Akin a Nepeg a Takotan so Tuan Dios Natan?
“Takotan so tuan Dios tan sumpalen iray ganggan to. Ta saya so interon obligasyon na too.”—ECLESIASTES 12:13.
1, 2. Akin a matukoy so manepeg a takot ed Dios?
SAY manepeg tan walaay-galang a takot ed Dios so maong parad too. On, anggaman dakel ed katatakotan na too so agmamaligen ed emosyon, tan makaderal ni ingen ed bunigas tayo, maabig parad say sikatayo ya ontakot ed si Jehova a Dios.—Salmo 112:1; Eclesiastes 8:12.
2 Kabat iya na Manamalsa. Lapud panangaro ed saray palsa to, igaganggan to ed amin a sikatoy takotan tan dayewen. Nabasa tayo: “Anengneng ko so sakey nin anghel ya ontetekkiab ed pegley na tawen, tan sikato so walaan na andi-anggaan a maong a balita ya iyabawag bilang maliket a pabalita ed saramay manaayam ed dalin, tan ed kada nasyon tan tribu tan pansasalita tan totoo, a kuanto ed maksil a boses: ‘Takotan yo so Dios tan mangiter ed sikato na gloria, lapud say oras na panangukom to so sinmabi la, kanian dayewen imay Sakey a nanggawa na tawen tan say dalin.’”—Apocalipsis 14:6, 7.
3. Anto so ginawa na Manamalsa parad inmunan atateng tayo?
3 Maseguron agtayo kaukolan ya ibaliwala so Manamalsa na amin a bengatla, say Subol na bilay, ta sikatoy akankayarian ed sikatayo tan sayan planeta. (Salmo 24:1) Bilang pakapatnagan ed baleg ya aro to, inikdan nen Jehova na bilay iray mangaraldalin ya anak to tan intaryaan tora na sakey a marakerakep a pasen a panayaman—sakey a masanting a paraiso. Ingen, sayan makapakelaw a langkap so walaay kondisyon. Diad tua, satan so nimatalek ed sikara. Asikasoen na inmunan atateng tayo so ayaman da tan palaknaben itan anggad namakmakan tan napatulok da so interon dalin. Sikaray awalaan na saray pribilihyo tan responsabilidad ed ayayep, ed saray manok, tan ed sirasira—ed amin niran mabilay a pinalsa a minabang ed sikara tan ed ilalak da ed dalin. Lapud sayan baleg ya impabtang ed sikara, say too so kaukolan a mikuentaan.
4. Anto so ginawa na too ed saray palsa na Dios?
4 Anggaman ontan ya alay dakep a gapoan, imanoen pay ginawa na toon impanutak ed masanting ya ayaman ton dalin! Diad sitatangas a panangibaliwala ed pankayarian na Dios ed sayan marakep a dalin a dinutakan na totoo so dalin. Say panagdutak so inmabot ed punton panpeligroen to so kiwawala na ondarakel lan ondarakel a klase na ayayep, manok, tan sira. Ag-iya mantultuloy ya abuloyan na maptek tan maaron Dios tayo. Say kadederal na dalin so mankakaukolan na pikuekuentaan, bengatlan katatakotan na dakel. Diad biek a dapag, parad saramay sirerespeton manmamatalek ed Dios, makapaligliwan naamtaan no anto so nagawa. Si Jehova so mikuentaan, tan say dalin so nipawil. Talagan saya so maliket a pabalita parad amin a matuan-impanpuson totoo ed dalin.
5, 6. Panon so ikiwas nen Jehova ed gagawaen na too ed pinalsa To?
5 Diad anton paraan a sumpalen na Dios so panangukom to? Diad panamegley nen Jesu-Kristo, a nitrono la natan bilang Ari ed mangatatawen a Panarian na Dios. Diad panamegley na satan a mangatatawen ya Anak, panganggaen nen Jehova so peles ya agmalinis tan rebelyoson sistema. (2 Tesalonica 1:6-9; Apocalipsis 19:11) Diad sayan paraan et itarok to so pakainawaan ed saramay walaay takot ed sikato tan, kabansag na saya et kiliktar tan kipreserba na mangaraldalin ya ayaman tayo.
6 Panon a nagawa iya? Sasaglawien na Biblia so nipaakar ed sakey a baleg a kairapan a mamantok ed bakal na Armagedon. (Apocalipsis 7:14; 16:16) Saya so panangukom na Dios sumpad sayan marutak a sistema na bengabengatla tan ed saray manudutak ed saya. Wala ta’ray totoon natilak a mabilay? On! Sikara imay walaan na, aliwan say makapataktakot, agmanepeg a takot ed Dios, noagta sirerespeto, walaay-galang a takot ed sikato. Sikaray niliktar.—Uliran 2:21, 22.
Makaingganyon Panangipatnag na Pakayari
7. Akin a sinmalet so Dios nisesengeg ed Israel ed agew nen Moises?
7 Sayan dramatikon kiwas nen Jehova a Dios so inyanino na makapanyarin kiwas a ginawa to nisesengeg ed saray managdayew to ngalngali 1,500 taon sakbay na Komon a Panaon tayo. Say baleg a pakayari militar na Ehipto so angaripen ed saray sankailin Israelitan komikimey to, a sinali ra ingen so palanit a panamatey sanen say manuley to, si Faraon, so angiganggan ed pamatey na amin a kapkapanyanak a lalakin Israelita. Say itatalona na Dios sumpad Ehipto et say pangibulos ed Israel manlapud maruksan mapulitikan sistema, on, kibulos manlapud nasyon a dinutakan na panagdayew ed dakel a dirios.
8, 9. Panon so inkiwas nen Moises tan saray Israelita ed ginawan insalet na Dios?
8 Inkurit na Exodo 15 so inkiwas na Israel ed inkibulos manlapud Ehipto. Say pansuri ed sayan salaysay so ontulong ed sikatayon natalosan no panon so kiliktar na saray Kristiano manlapud kaplesan a sisteman marutak diad espiritual tan pisikal a paraan. Konsideraen tayo pa so Exodo 15, ya imanoen iray apilin bersikulo pian naaralan no akin a nepeg tayon desidien so itakot ed si Jehova, say tuan Dios. Gapoan tayo ed Ex 15 bersikulo 1 tan 2:
9 “Diad satan a panaon si Moises tan saray anak nen Israel so ginmapon mankanta na sayan kanta ed si Jehova tan ibaga so onggendan: ‘Abuloyan ak a mankanta ed si Jehova, lapud sikatoy nipaatagey a tuloy. Say kabayo tan say akalugan ed satan so imbasileng to ed dayat. Say biskeg ko tan say pakayari et si Jah, lapud sikatoy kinmana parad kilalaban ko.’”
10. Anto so angitonton ed impaneral na Dios ed armada na Ehipto?
10 Kabisado na totoo’d interon mundo so salaysay no panon ya imbulos nen Jehova so Israel manlapud Ehipto. Angitarok na saray bakbak ed saman a makapanyarin pakayari na mundo ya anggad kaunoran et inabuloyan nen Faraon ya ontaynan iray Israelita. Balet kayari na saya et inusilan na saray armada nen Faraon iyan anggapoy nayarian a nasyon tan singano ra asaruko ed gilig na Ambalangan Dayat. Anggaman singano nabalang a tampol na ananak nen Israel so kapkapandampot dan kawayangan, duma so walad kanonotan nen Jehova. Mamilagron binelsay toy dayat pian magmaliw a dalan a baliwan tan intarok toray totoo to’d kililiktar. Sanen tinmumbok iray Ehipsio, pinapawil to so Ambalangan Dayat ed sikara tan nalner si Faraon tan saray puersan militar to.—Exodo 14:1-31.
11. Anto so nansumpalan na inkiwas na Dios sumpad Ehipto?
11 Say impaneral nen Jehova ed saray puersan militar na Ehipto so angitandoro ed sikato ed imaton na saray managdayew to tan angipabantog ed ngaran to. (Josue 2:9, 10; 4:23, 24) On, say ngaran to so nipaatagey ed tapew na anggapoy-pakayari, palson dirios na Ehipto, ya apaneknekan ya agmakapangiliktar ed saray managdayew da. Say panmamatalek ed saray diosa ra tan diad mortal a too tan ed puersan militar so nansumpal ed ampait ya inkasaew. (Salmo 146:3) Agpankelawan ya apakiwas iray Israelita a mankanta na saray panangidayew ya angipatnag na manepeg a takot ed mabilay a Dios, a makapanyarin mangililiktar ed totoo to!
12, 13. Anto so nepeg a naaralan tayo manlapud impanbiktoria na Dios ed Ambalangan Dayat?
12 Mipadpara, nepeg tayon aksobien ya anggapoy palson dirios tan superpower ed panaon tayo, anggan saramay walaan ni nuklear ya armas, so nayarin makapipara ed si Jehova. Sarag ton iliktar so totoo to tan gawaen to itan. “Sikato so manusumpal unong ed dilin linawa to ed limog na armada ed katawenan tan ed saray manaayam ed dalin. Tan anggapoy siopaman a walan makapangamper ed lima to odino makapangibaga ed sikaton, ‘Anto ta so gagawaen mo?’” (Daniel 4:35) Sano sigpot tayon natatalosan irayan salita, sikatayo met so napapakiwas a sililiket a mankanta na panangidayew ed sikato.
13 Manpapatuloy so kanta na panbiktorya ed Ambalangan Dayat: “Si Jehova so sakey a silalakin persona na bakal. Jehova so ngaran to.” Sirin, sayan agnatalon Mibabakal so aliwan sakey ya agkabat ya is-isipen labat na too. Sikato so walaan na ngaran! Sikato imay ‘Sakey a pagmaliwen to,’ say Engranden Managgawa, say Sakey a “say ngaran to et Jehova, . . . say Sankatagyan ed amin a dalin.” (Exodo 3:14; 15:3-5; Salmo 83:18) Agka ta mipakna a makabat komon parad saraman a kadaanan ya Ehipsio a nawalaan na makatunongan tan marespeton pakalikna na takot ed say Makapanyarin-amin imbes a sikatoy sumlangen?
14. Panon a nidemostra so kablian na maridios a takot diad Ambalangan Dayat?
14 Bilang Desinyador na dalin, kontroladon tuloy na Managgawa na dayat so laknab na danudanum. (Exodo 15:8) Diad impangusar na pakayari to met ed dagem, agawaan to so singano imposibli. Pinaldua to so kaaralman na danum ed sakey a pasen tan nambasilan ton sinambenan pian niwalay apaderan a danum a pasilyon nadalanan na totoo to. Isipen pa so eksena: minilyon a toneladan danum na dayat so nantupag a nipaatagey a singano pader, a kinmanan manalimbeng a pakatakasan parad Israel. On, saramay angipatnag na manepeg a takot ed Dios so akagamor na proteksion. Insan binulosan nen Jehova so danum a pinaulyanan itan ya ompawil bilang mabiskeg a delubio, ya angilon ed saray puersa nen Faraon tan ed amin nin uusaren da. Agaylan makapakelkelaw a panangipatnag na madibinon pakayari sumpad anggapoy kanan dirios tan puersan militar na too! Maseguro, si Jehova so sakey a nepeg a takotan, agta ontan?—Exodo 14:21, 22, 28; 15:8.
Panangidemostra na Takot Tayo ed Dios
15. Anto so nepeg a kiwas tayo ed makapanyarin manangisalba iran gawa na Dios?
15 No akaalagey tayon liktar a kaiba nen Moises, maseguron sikatayo so napakiwas a mankanta: “Siopa ed dirios so singano sika, O Jehova? Siopa so kaparam, a papaneknekan so inkasika a makapanyari ed inkasanto? Say Sakey a nepeg a takotan tekep na saray kanta na panangidayew, say Sakey a manggagawa na saray pakelaw.” (Exodo 15:11) Say ontan a liknaan so niyaaniweng ed loob na saray siglo nanlapulad saman. Diad kaunoran a libro na Biblia, dedeskribien nen apostol Juan so sakey a grupo na matoor ya alanaan ya ariripen na Dios: “Kakantaen da so kanta nen Moises ya aripen na Dios tan say kanta na Kordero.” Anto iyan baleg a kanta? “Baleg tan makapakelaw iray gawam, Jehova a Dios, say Makapanyarin-amin. Matunong tan tua iray dalan mo, Ari na inkamagnayon. Siopa so talagan ag-ontakot ed sika, Jehova, tan mangigloria ed ngaran mo, lapud sika lambengat so matoor?”—Apocalipsis 15:2-4.
16, 17. Anton makapakelkelaw ya aligwas so nanenengneng tayon nagagawa natan?
16 Kanian natan met et walaray nibulos a managdayew ya aglambengat mangaapresya ed mapamaraan iran kimey na lima na Dios noagta ontan met ed saray ganggan to. Nibubulos ed espiritual a paraan iray totoon manlalapud amin a nasyon, a nisian manlapud sayan abulok a mundo lapud bibidbiren da tan iyaaplika daray matunong a ganggan na Dios. Tinaon et nilasus nilibo so makakaliktar ed sayan abulok a mundo pian miayam ed malinis tan maptek ya organisasyon na saray managdayew ed si Jehova. Agmanbayag, kayarin nipakat so mangapuy-apuy a panangukom na Dios sumpad palson relihyon tan ed nakekeraan a kabiangan na marelmeng a sistema, sikaray manbilay ya ando lan ando diad sakey a matunong a balon mundo.
17 Mitunosan ed Apocalipsis 14:6, 7, narerengelan natan na katooan so manamasakbay a mensahe panangukom ya iyaabawag na Tastasi nen Jehova diad silong na anghelikon panangiwanwan. Diad masulok a 230 a daldalin ed imbeneg a taon, ngalngali limaran milyon a Tastasi so angiproklama na maong a balita na Panarian na Dios tan ed oras na panangukom to. Pian bangatan iray kapara ran totoo parad kililiktar, regular a bibisitaen na Tastasi so ayaman na totoo, ya ikokondukta so libren panangiyaral na Biblia. Diad ontan et nilasus nilibo ed kada taon so magenap a makakaaral pian takotan so tuan Dios diad matudion paraan, idedika so bilay da ed sikato, tan manpabautismo. Alay liket a saratan a totoo et naaralan dan takotan so tuan Dios!—Lucas 1:49-51; Gawa 9:31; ipareng so Hebreos 11:7.
18. Anto so mangiyiilustra a saray anghel so nalalanor ed panagpulong tayo?
18 Kasin talagan nalalanor iray anghel diad sayan kimey a panagpulong? Bueno, maseguron mabitabitar a natalosan a say anghelikon panangiwanwan so mabetbet a mangitatarok ed Tastasi nen Jehova ed sakey ya ayaman a ditan et walay nagogonigon a kamarerwan manpirawat, manpipikasi ni ingen, nipaakar ed espiritual a tulong! Alimbawa, duaran Tastasi nen Jehova a walay kaulop ya ugaw a laki so angiparungtal na maong a balita diad sakey ya isla na Caribbean. Legan ya onkakaaguan, deniside na duaran wala la’d edad ya onsempet la. Balet laba-labay na ugaw a bisitaen so ontumbok ya abung. Sanen naimano ton aglabay a gawaen iman na saray wala la’d edad, bukor to so linma tan tinmuktok. Sakey a marikit so angilukas ed puerta. Sanen anengneng iya na saray wala la’d edad, sikaray inmasingger tan akitongtong ed sikato. Pinaloob to’ra, ya imbagan diad bektan impakadngel to ed toktok ed puerta et sikato so manpipikasi ed Dios a mangibaki ed sikato na Tastasi pian sikatoy bangatan na Biblia. Niyuksoy so panangiyaral na Biblia.
19. Anto so nituro tayo bilang gungguna manlapud itatakot ed Dios?
19 Legan a sitotoor tayon ipapasabi mensahe na panangukom na Dios, nibabangat tayo met iray matunong a ganggan to. Sano saraya so niyaaplika ed bilay na totoo, namparan pisikal tan espiritual iran bendisyon so resulta. Alimbawa, piho so Biblia ed panangondena to ed seksual ya imoralidad. (Roma 1:26, 27, 32) Natan et malaknab a nibabaliwala ed mundo iray madibinon estandarte. Anto so resulta? Saray panamaley so nabubuyak. Ondaraak so inkadelinkuente. Makaderal iran sakit diad pirelasyonan ed sekso, a magmamaliw a pandemya ed sayan koma-20 siglo, so onkakayat. On, say makapakebbiew a sakit ya AIDS diad baleg a laknab et ikakayat na seksual ya imoralidad. Balet agta say marespeton takot ed Dios so napapaneknekan a baleg a proteksion parad saray tuan managdayew?—2 Corinto 7:1; Filipos 2:12; nengnengen met so Gawa 15:28, 29.
Saray Resulta na Itatakot ed Dios Natan
20. Anto so mangiyiilustra ya amta na arum so reputasyon na Tastasi nen Jehova?
20 Daakan so bendisyon na saramay tatakotan da so Dios tan manutumbok ed saray ganggan to. Konsideraen pay sakey ya inkagawan mangiyiilustra ed ombubulaslas a panamidbir ed katuaan a saray Tastasi nen Jehova so manitibukel na mareen ya impanaagi na saray maptek ed moralidad a Kristianos. Pigaran Tastasi, a delegado ed internasyonal a kombension diad Abalaten ya Amerika, so nampundo ed sakey ya hotel ya inusar met parad sakey a pandaragup ed sakey a labi na saray aliwan-Tasi a say espiker et say presidenti na bansa. Legan a say presidenti so apuraan ya impalugan na security team ed sakey ya elebeytor, linmugan met so sakey a Tasi ya agkabat no siopa so walad elebeytor, ya inkabigla na security men! Sanen amoria toy ginawa to, kinmerew na despensa ed saman ya impakadisturbo to. Impanengneng to so convention badge to a mangipapakabat a sikatoy sakey a Tasi tan inkuanton sikatoy aliwan sakey a sesga ed presidenti. Makakaimis ya inkuan na sakey a guardia: “No amin a too komon et singa Tastasi nen Jehova, agmi la kaukolanen iyan klase na seguridad.”—Isaias 2:2-4.
21. Antoran kurso na ikikiwas so lukas ed totoo natan?
21 Saya so klase na totoon titiponen natan nen Jehova tan ipaparaan ya ‘ompaway ed baleg a kairapan’ a panganggaen to iyan sistema. (Apocalipsis 7:9, 10, 14) Satan a kililiktar so aliwan kibanbana labat. Pian magmaliw a sakey a niliktar, nepeg a takotan na say sakey si Jehova, bidbiren to bilang say makanepegan a Soberano, tan magmaliw a dedikado ed sikato. Anggaman say katuaan et maslak so agmamabayubo ed klase na takot a mangitarok na proteksion. (Salmo 2:1-6) Unong ed amin a walan ebidensya, say apilin Manuley nen Jehova, si Jesu-Kristo, so manuuley la bilang Ari nanlapulad importantin panaon na 1914. Kabaliksan na saya a say natitilak a panaon et nauupot la parad saray indibidual pian bayuboan tan ipatnag so manepeg a takot ed si Jehova. Anggaman ontan, aabuloyan na Manamalsa tayo iray indibidual, anggan saramay walad atagey a kipapasen ya onkiwas: “Natan, O arari, mangagamil na aralem a pakatalos; pakorehi kayo, O uko-ukom ed dalin. Lingkoran si Jehova tekep na takot tan manggayaga tekep na giwgiw. Angoban so anak, pian Sikatoy agsigpot ya onsanok tan sikayoy agnatawtaw ed dalan, ta say sanok to so mainomay a tuloy ya ondalang. Maliket ya amin iramay papasalimbengan ed sikato.”—Salmo 2:7-12.
22. Anto so nailaloan ed arapen parad saramay ontatakot natan ed Dios?
22 Komon ta napibilang tayo ed saramay mangidayew ed Manamalsa tayo bilang say Sakey ya angiliktar ed sikatayo. Balet kakaukolanen na saya ed sikatayo a takotan la natan so tuan Dios! (Ipareng so Salmo 2:11; Hebreos 12:28; 1 Pedro 1:17.) Nepeg tayon mantultuloy ya aralen iray matunong a ganggan to tan tuloken iratan. Say kanta nen Moises tan say Kordero, a nikurit ed Apocalipsis 15:3, 4, so makasabi ed kapantokan to sano punasen nen Jehova so amin a karelmengan ed dalin tan gapoan ton paabigen so too tan say mangaraldalin ya ayaman to ed saray makadutak ya epekto na kasalanan. Diad ontan et sigpot puso tayon kantaen: “Baleg tan makapakelaw iray gawam, Jehova a Dios, say Makapanyarin-amin. Matunong tan tua iray dalan mo, Ari na inkamagnayon. Siopa so talagan ag-ontakot ed sika, Jehova, tan mangigloria ed ngaran mo?”
Kasin Natandaan Yo?
◻ Akin a makanepegan si Jehova na manepeg a takot tayo?
◻ Anto so nipatnag ed saray agawaan na Dios ed Ambalangan Dayat?
◻ Antoray gunggunan itarok na marespeton takot tayo ed si Jehova?
◻ Anton arapen so manatalaran ed saramay ontatakot ed tuan Dios natan?