Nisipan So Magmaong a Bilay
LABAY mo ta so nibulos ed saray probleman mamapairap ed bilay? Kaliktan mo ta so manayam diad sakey a mundon say bilay et ontanlan makapaliket a singa ed eksenan ililitrato ed arap tan beneg ya apis na sayan magasin? Nengneng mo pan maong itan a litrato. Daakan so naakan na totoo. Talagan panggayagaan da itan a mananam a tagano. Balang sakey so maliket. Saray totoon walaan na nanduruman rasa so mareen ed sakey tan sakey. Anggan saray ayayep so mareen! Anggapoy mankokolkol. Anggapoy duka. Anggapoy mansasakit. Marakep iray kaliberliber, masanting a kakiewan, tan walay dalisay, malinis a danum. Agaylan pandinayewan ya eksena!
Magmaliw ta nin ontan iyan dalin? On, saya so magmaliw a paraiso. (Lucas 23:43) Ginagala na Dios, ya amalsa ed dalin, a panggayagaan na totoo so magmaong a bilay ed paraison dalin. Tan sika so nayarin napibilang ditan!
Dinan a Bilay so Mas Labay Mo?
Panon a miduma so arapen a mangaraldalin a Paraiso ed mundon panaayaman tayo natan? Diad kaplesan et masulok a sakey bilyon a totoo so naeerasan ed inagew-agew. Balet diad Paraison ginagala na Dios parad dalin, amin so nawalaan na daakan a nakan. Isisipan na Biblia: “Si Jehova na saray ehersito so peteg a manggawa parad amin a totoo . . . na sakey a bangkete na tinabaan-a-maong iran putahe, sakey a bangkete na saray alak a pinansiansia ed saray gaer.” (Isaias 25:6) Naandi la so kakisiran na tagano, ta kuan na Biblia: “Niwala so daakan ya ilik ed dalin; diad tuktok na saray palandey wala so panliplippua.”—Salmo 72:16.
Natan, dakel so manaayam diad saray alolong tan diad saray squatter, odino mantalikarkar pian makabayar na abang da. Arum so andian na ayaman tan onuugip ed saray kalye. Unong ed World Health Organization, ngalngali 100 milyon na ugugaw ed mundo so andiay-ayaman. Balet diad onsabin Paraiso, balang sakey et walay natawag ton dilin ayaman to. Kuan na Salitay Dios: “Peteg a sikara so mangipaalagey na abung tan panayaman da; tan peteg a sikaray mantanem na kaubasan tan kanen daray bunga to.”—Isaias 65:21.
Aanosan na dakel iray trabahon agda labay. Mabetbet a sikaray impasyan mantratrabaho ed loob na andukey ya oras balet ta melag so sueldo ra. Ngalngali 1 ed kada 5 totoo diad mundo so manbibilay ed sueldo a kulang nin $500 ed kada taon. Balet, diad onsabin Paraiso, panggayagaan na totoo so trabaho ra tan nanengneng daray maong a resulta to. Isisipan na Dios: “Saray pinilik so mangunggunan tuloy ed kimey na dilin kalimaan da. Agda pansagpotan so andi-kakanaan.”—Isaias 65:22, 23.
Natan kasmak iray sakit tan inagem. Dakel so bulag. Arum so telek. Say arum met so agmakaakar. Balet diad Paraiso, saray totoo so nibulos manlapud saray sakit tan inagem. Kuan nen Jehova: “Anggapoy manaayam a mangikuan a: ‘Mansasakit ak.’” (Isaias 33:24) No nipaakar ed saramay agla makayari, say makapaliket a sipan et: “Diad satan a panaon et saray mata na bulag so nalukasan, tan saray mismon layag na saray telek so nibuang. Diad satan a panaon et say sakey a piley so onkalab a singa sakey a [kalakian ya] usa, tan say dila na sakey ya agmakasalita so mankelyaw tekep na liket.”—Isaias 35:5, 6.
Diad kaplesan et wala so kairapan tan ot-ot, ermen tan ipapatey. Balet diad Paraiso ed dalin, anggapo la’rayan bengatla. On, anggan say patey so naandi la! Kuan na Biblia: “Say Dios a mismo so wala ed sikara. Tan punasen to so amin a lua ed kamataan da, tan anggapo la so patey, nisay pannangis nisay pandageyem nisay ot-ot. Saray gendat a bengatla so linmabas la.”—Apocalipsis 21:3, 4.
Malinlinew sirin, a say insipan nen Jehova a mangaraldalin a Paraiso so mankabaliksan na magmaong a bilay parad katooan. Balet panoy pakaseguro tayon onsabi itan? Kapigan so isabi to, tan panon? Anto so nepeg mon gawaen pian napibilang ed satan?