Magmaong a Bilay​—Asingger La!

ISIPEN pay sakey a managtantiya na kipapasey panaon a saray tantiya to et ngalngalin suston amin. No tinantiya to ed para labin balita ya unoran ed ontumbok ya agew, agka masuyat a mangawit na payong sano onalis ka’d abung diad kaimbuasan. Nala toy kompiyansam lapud apalabas a rekord to. Onkikiwas ka unong ed ibabaga to.

Natan, kaunongan inkanapanmatalekan so sipan nen Jehova ed sakey a magmaong a bilay ed paraison dalin? Bueno, anto so ipapanengneng na apalabas a rekord to. Say impakasumpal na saray propesiya ed Biblia so malinew a mamapabiskeg ed rekord nen Jehova. Sikato so sakey a Dios na ag-onsaew ya inkasusto tan inkamatua. (Josue 23:14; Isaias 55:11) Ontanlan napanmatalekan iray sipan nen Jehova a Dios a no maminsan et aktual a sasalitaen ton saray nisipan ya arapen ya ebento et singano agawa lara. Alimbawa, kayari impangisipan to ed balon mundo a ditan et anggapo lay patey tan nangis, nabasa tayo: “Saratan [nisipan a bendisyones] so agawa la!” Diad arum a salita, “Saraya so tuan agawa!”​—Apocalipsis 21:5, 6, paimanod-leksab [diad Ingles].

On, say impakasumpal na apalabas iran sipan nen Jehova so mangiiter ed sikatayo na kompiyansa a sumpalen toy sipan ton magmaong a bilay parad katooan. Balet kapigan so isabi na sayan magmaong a bilay?

Magmaong a Bilay​—Kapigan?

Asingger la so lalon magmaong a bilay! Makapanseguro tayo lapud kuan na Biblia a dakel a mauges a bengatla so nagawa ni ed dalin sakbay a kitarya na Paraiso ed magmaong a bilay. Saratan a mauges a bengatla so nagagawa la natan.

Alimbawa, impasakbay nen Jesu-Kristo a niwala so ankabaleg a bakabakal. Inkuanto: “Say nasyon so onalagey sumpad nasyon tan say panarian sumpad panarian.” (Mateo 24:7) Tinmua iyan propesiya. Legan na saray taon 1914 ya anggad 1945, niwala so duaran guerra mundial tan saraya so tinumbokan na dakel niran bakal a nanlalaban iray nasyon. “Unong ed promedyo ed tinaon a basiyan, say bilang na ompapatey ed bakal diad sayan peryodo [nanlapulad Guerra Mundial II] so masulok a doble na saray inatey nen koma-19 siglo tan maminpiton danay a mas dakel ni nen say koma-18 siglo.”​—World Military and Social Expenditures 1993.

Say ikakamayat na sakit so sakey nin ebidensya na kinaasingger na magmaong a bilay diad Paraiso. Impasakbay nen Jesus a niwala ‘iray salot ed naduruman pasen.’ (Lucas 21:11) Kasin tinmua iyan propesiya? On. Kayari na inmunan guerra mundial, say trangkaso Español so anigway na masulok a 20 milyon a totoo. Nanlapulad saman, say kanser, sakit ed puso, malaria, AIDS, tan arum niran sakit so anigway na minilyon a totoo. Diad onaaligwas iran bansa, saray sakit lapud marutak a danum (pati say diarrhea tan saray impeksyon nisesengeg ed bulate) so manitigway na minilyon a bilay ed kada taon.

Inkuan nen Jesus: “Niwala iray kakisiran na tagano.” (Mateo 24:7) Singa naimano ed akaunan artikulo, saray duka ed mundo so andian na magenap a naakan. Saya so sakey nin kabiangan na ebidensya ya asingger lan onsabi so lalon magmaong a bilay diad Paraiso.

“Niwala so mabiskeg a yegyegyeg,” inkuan nen Jesus. (Lucas 21:11) Saya met so tinmua ed panaon tayo. Nanlapulad 1914 say panagderal na makadesyang iran yegyeg so anigway na nilasus nilibon bilay.

Intuloy ni na Biblia a say “kaunoran iran agew” et natandaan lapud panguman na totoo. Sikaray magmaliw a “manangaro ed inkasikara” tan “manangaro na kuarta,” tan saray anak so magmaliw a “matunganga ed saray ateng.” Saray totoo ed inkalapagan so magmaliw “a manangaro ed panliliket nen say manangaro ed Dios.” (2 Timoteo 3:1-5) Agka ta miabobon a dakel so ombagay ed sayan deskripsyon?

Legan ya ondarakel so totoon mangaagamil na mauges a bengabengatla, ondaraak met so kaugsan. Saya so nipasakbay met. Unong ed Mateo 24:12, sinaglawi nen Jesus so “idaraak na kaugsan.” Maseguron miabobon ka a say krimen so mapalalo natan nen say nen apalabas iran taon. Saray totoo ed inerman so natatakot a sikaray natakewan, nasaol, odino nasakitan ed antokaman a paraan.

Saray bakal, onkakamayat a sakit, saray kakisiran na tagano, yegyegyeg, ondaraak a krimen, tan iyuuges na pidedeneng na totoo ed balang sakey​—amin na saraya so sankapatnagan natan, a singa ed impasakbay na Biblia. ‘Balet agta saraya so agawa la ed interon awaran na too?’ nayarin itepet mo. ‘Anto so pidumaan ed agew tayo?’

Walaray pigaran importantin tuloy ya aspeto nipaakar ed nagagawa natan. Ag-ibabaga na Biblia a dinanman ed sakey a kabiangan, singa saray kakisiran na tagano et prueba ed inkasikato a sikatayo so wala la’d panaon na anggaan tan say magmaong a bilay so asingger la. Saray propesiya na Biblia nipaakar ed panaon na anggaan so nasumpal ed sakey ya andiay-dios a kailalakan.​—Mateo 24:34-39; Lucas 17:26, 27.

Sakey ni, singano makapakelaw a pigara ed kabiangay propesiya nen Jesus​—nagkalalo la ed saramay nipaakar ed saray kakisiran na tagano tan onkakamayat a sakit—​so ontuatua natan. Akin? Lapud anggan kapiganman et mas malaknab natan so nagagawaan na siensia. Say pikakabat ed medisina tan pigaran paraan na panagtambal so agbalot nagmaliw ed kapiganman ya onia kaaligwas odino kalaknab. Say Dios lambengat so makapangipasakbay diad Salita to, say Biblia, ya onsabi panaon, ompalalo ni sakit tan eras, ag-onmaong.

Lapud amin a propesiya na Biblia nipaakar ed panaon na anggaan, odino “kaunoran iran agew,” so ontuatua, anto so nibaga tayo? A say magmaong a bilay so asingger la! Balet panon iyan nagawa?

Magmaong a Bilay​—Panon?

Diad padesir mo, nitarok kasi na totoo so Paraiso? Diad interon awaran ya anggad sayan agew, wala laray dakel a klase na gobiernoy too. Nanggunaetan a tuloy na arum a peneken iray pankaukolan na totoo. Ingen, onuuges so dakel a problema. Namparan diad mayayaman a bansa tan diad durukan daldalin, a mipupuligesgesan iray gobierno ed panangabuso ed druga, problema ed panabungan, kairapan, krimen, agpakaimpleyo, tan panbabakal.

Anggano naresolbi ni na saray gobierno so pigara ed sarayan problema, agdan balot niiter so kompleton kawayangan manlapud sakit; nisay napangangga ra so itatatken tan ipapatey. Malinlinew, agbalot nitarok na totoo so Paraiso ed sayan dalin.

Sikakabat a kuan na Biblia: “Agyo iteteen so talek yo ed saray dederlengen, nisay ed anak na mangaraldalin a too, ya anggapo ed sikato so kilalaban.” No ontan, siopa sirin so nepeg a panmatalekan tayo? Oneebat so Biblia: “Maliket imay sakey a walaan na Dios nen Jacob pian sikatoy tulongan, a say ilalo to et walad si Jehova a Dios to.” (Salmo 146:3, 5) No iteen tayo so ilalo tayo diad si Jehova a Dios, agtayon balot nadismaya.

Maseguron say Sakey a walaan na kakabatan tan pakayari a mamalsa na dalin, say agew, tan bibitewen so makapanggawa met ed dalin a paraiso. Nayarian ton pagayagaen so totoo na magmaong a bilay. Antokaman ya inyarunsa nen Jehova a Dios a gawaen, nayarian tan sarag ton sumpalen. Kuan na Salita to: “Diad Dios et anggapo so deklarasyon a magmaliw ya imposibli.” (Lucas 1:37) Balet panon ya itarok na Dios so magmaong a bilay?

Itarokan nen Jehova so katooan na lalon magmaong a bilay diad panamegley na Panarian to. Tan anto ta so Panarian na Dios? Satan so sakey a literal a gobierno a walaay tinuroy-Dios a Manuley, si Jesu-Kristo. Say Panarian na Dios so walad tawen, balet asingger lan mangitarok na makapakelkelaw iran bendisyon tan lalon magmaong a bilay ed saray manaayam ed Paraison dalin.​—Isaias 9:6, 7.

Nayarin kabisadom so modelon pikakasi nen Jesus, a naromog diad Biblia ed Mateo 6:9-13. Oniay kuan na kabiangan na satan a pikakasi ed Dios: “Onsabi komon so panarian mo. Nagawa komon so linawam, unong ed tawen, ontan met ed dalin.” Mitunosan ed satan a pikakasi, say Panarian na Dios so “onsabi” pian manumpal ed gagala nen Jehova a Dios parad dalin. Tan gagala to a magmaliw a paraiso so dalin.

Onlelesa so pinal a tepet: Anto so nepeg mon gawaen pian panggayagaan so magmaong a bilay diad onsabin Paraiso?

Say Kaukolan Mon Gawaen

Simamaaron iyoopresi nen Jehova a Dios so ilalon magmaong a bilay diad Paraiso ed amin a manggagawa ed linawa to. Ibabaga na Biblia ed sikatayo: “Saray matunong a mismo so mangayarian na dalin, tan sikara so manayam dia ed ando lan ando.” (Salmo 37:29) Balet anto so manggawa ed sakey a too a matunong ed imaton na Dios?

Pian napaliket si Jehova kaukolan tayon aralen ni so labay ton pagawa ed sikatayo. No mangasol tayo na pikakabat na Dios tan iyaplika itan ed saray bilay tayo, makapanbilay itayo ya ando lan ando. Diad pikakasi ed Dios, inkuan nen Jesus: “Kabaliksan na saya so andi-anggaan a bilay, say pangasol da na pikakabat ed sika, say alenleneg a tuan Dios, tan say imbakim, si Jesu-Kristo.”​—Juan 17:3.

Say libron mangibabaga ed sikatayo nipaakar ed si Jehova a Dios tan si Jesu-Kristo et say Salitay Dios, say Biblia. Satan so sakey ed saray sankamablian a regalo nen Jehova. Say Biblia so singa sakey a sulat na maaron ama ed ilalak to. Ibabaga to ed sikatayo so nipaakar ed sipan na Dios ed pangitarok na magmaong a bilay parad katooan tan ipapanengneng to no panon a nagamoran tayo itan. Ipapaamta na Biblia ed sikatayo so agawaan la na Dios ed apalabas tan say gawaen to ni ed arapen. Iiter to met ed sikatayo so praktikal a simbawa no panon a natalonaan iray problema tayo natan. On, ibabangat itayo na Salita na Dios no panon so pakaromog na sukat na liket anggan wala tayo ni’d sayan magulon mundo.​—2 Timoteo 3:16, 17.

Maliket iray Tastasi nen Jehova a mangiyuksoy na sakey a libren panagaral na Biblia parad sika. Aralen no panon kan nawalaan na mas maliket a bilay natan, tekep na ilalo a sakey a lalon magmaong a bilay ed asingger ya arapen.

[Litrato ed pahina 5]

Isasalaysay na saray propesiya na Biblia ya asingger lan onsabi magmaong a bilay

[Litrato ed pahina 7]

Itarok na Panarian na Dios so magmaong a bilay parad katooan