Mansiansia ed “Syudad na Salimbengan” tan Manbilay!

“Kaukolan a sikatoy manayam ed syudad na salimbengan to ya anggad ipatey na atagey a saserdote.”​—NUMEROS 35:28.

1. Siopa so Manangibales na dala, tan anton kiwas so agla manbayag a gawaen to?

SAY Manangibales na dala a tinuro nen Jehova, si Jesu-Kristo, so ngalngali la mangidapo. Kaiba iray anghelikon puersa to, agla manbayag et sayan Manangibales so onkiwas sumpad amin ya agmagbabawin nankasalanan ed dala. On, si Jesus so manlingkor bilang Manangipakat na Dios legan na maples ya onsasabin “baleg a kairapan.” (Mateo 24:21, 22; Isaias 26:21) Diad satan a panaon et onarap so katooan ed impankasalanan da ed dala.

2. Anto so mogmon tuan pasen na salimbeng, tan antoran tepet so mankakaukolan na saray ebat?

² Say paraan parad kiliktar et say iyakar ed dalan na antitipikon syudad na salimbengan tan iliktar so bilay na sakey! No naawat ed syudad, say sakey a takas so kaukolan a manpirmi diman, ta satan so mogmon tuan pasen na salimbeng. Balet nayarin manumameng kayo, ‘Lapud dakel ed sikatayo so agnin balot akapatey, talaga ta’n sikatayo so nankasalanan ed dala? Akin a si Jesus so Manangibales na dala? Anto so modernon-agew a syudad na salimbengan? Wala ta so siopaman a sililiktar a makapaliis ed satan?’

Kasin Sikatayo so Talagan Nankasalanan ed Dala?

3. Anton kabiangan na Mosaikon Ganggan so ontulong ed sikatayo a nanengneng a binilyon ed dalin so minanabang ed kasalanan ed dala?

³ Say sakey a kabiangan na Mosaikon Ganggan so ontulong ed sikatayo pian nanengneng a binilyon ed dalin so minanabang ed kasalanan ed dala. Impakseb na Dios ed saray Israelita so pannononong a responsabilidad lapud panangipaagos na dala. No wala so siopaman ya aromog a pinatey tan say managpatey to so agkabat, kaukolan a sukaten na saray ukom so distansya na akapaliber iran syudad pian determinaen so sankaasinggeran a syudad. Pian nalinisan ed kasalanan, saray mamatatken ed saman a nankasalananan ed dala a syudad so kaukolan a mamakger na sakey ya ugaw tan agni nitrabahon baka ed sakey a malinis ya agosan ya alosarsar. Saya so gawaen ed arap na saray saserdoten Levita ‘lapud sikaray pinili nen Jehova pian resolbien iray gutgutan nipaakar ed marawal iran gawa.’ Urasan na mamatatken na syudad iray lima ra ed tapew na baka tan ikuan: “Saray lima mi so ag-angipaagos ed sayan dala, nisay anengneng na kamataan mi sanen nipaagos itan. Agmo ipapakseb iya ed baley mon Israel, a dinondon mo, O Jehova, tan agmo itatapew so kasalanan ed dala na inosenti ed leet na baley mon Israel.” (Deuteronomio 21:1-9) Aglabay nen Jehova a say dalin na Israel et narutakan na dala odino saray totoo diman so manakbat ed inkalapagan a kasalanan ed dala.

4. Anto so walan rekord na Babilonia a Baleg nipaakar ed kasalanan ed dala?

⁴ On, walay bengatlan singa say inkalapagan, odino pankomunidad, a kasalanan ed dala. Konsideren pa so kabaleg na kasalanan ed dala a nipasakbat ed Babilonia a Baleg, say sankamundoan ya imperyo na palson relihyon. Agayla, sikatoy abuek ed dala na ariripen nen Jehova! (Apocalipsis 17:5, 6; 18:24) Ibabaga na saray relihyon na Kakristianoan a tutumboken da so Prinsipe na Kareenan, balet saray bakal, relihyoson inkisisyon, tan manamatey iran krusada so nanggawa ed sikaton walaay kasalanan ed dala ed imaton na Dios. (Isaias 9:6; Jeremias 2:34) Diad tua, sikatoy manunan nepeg ya onebat ed impatey na minilyon ed duaran guerra mundial na sayan siglo. Kanian, saray mananumbok na palson relihyon pati saray sumusuporta tan mibibiang ed saray panbabakal na too so walaan na kasalanan ed dala ed imaton na Dios.

5. Panon a say arum a totoo so nagmaliw a singa saramay agsigagalan akapatey ed Israel?

⁵ Say arum a totoo so sengegay impatey na arum a sigagala odino lapud ag-inkamaalwar. Arum so akibiang ed palanit a panagpatey, anganko diad impangisugsog na saray relihyoson lider a saya so linawa na Dios. Say arum met so amasegsegang tan amatey ed ariripen na Dios. Anggan agtayo ginawa irayan bengatla, anggaman kuan et minanabang itayo ed pankomunidad a responsabilidad diad inkabalang na bilay na too lapud agtayo amta so ganggan tan linawa na Dios. Singa itayo ed toon agsigagalan akapatey ya ‘amatey ed kapara ton too ya agto naamamtaan tan sikatoy agto ginula ed inmuna.’ (Deuteronomio 19:4) Saratan a sinansakey so nepeg a mikasi ed Dios tan ombatik ed antitipikon syudad na salimbengan. Tano andi naabet da so ipapatey da ed Manangibales na dala.

Saray Makanan Betang nen Jesus

6. Akin a nibaga a si Jesus so sankaapitan a kanayon na katooan?

⁶ Diad Israel say manangibales na dala so sankaasinggeran a kadalaan na biktima. Pian ibalesan so amin ya inatey ed dalin tan nagkalalo la ed inatey ya ariripen nen Jehova, say kaplesan a Manangibales na dala so kaukolan a magmaliw a kadalaan na amin a katooan. Satan a betang so sinumpal nen Jesu-Kristo. Sikatoy niyanak bilang ayadyarin too. Insuko nen Jesus so anggapoy kasalanan a bilay to diad ipapatey bilang dondon bagat, tan kayari na inkioli to ed tawen, imparungtal toy kablian na satan ed Dios nisesengeg ed makasalanan ya ompapatey iran ilalak nen Adan. Diad ontan et si Kristo so nagmaliw a Mananondon na katooan, say sankaapitan a kanayon tayo​—say makanepegan a Manangibales na dala. (Roma 5:12; 6:23; Hebreos 10:12) Akabatan si Jesus bilang agi na alanaan iran mananumbok na bakat to. (Mateo 25:40, 45; Hebreos 2:11-17) Bilang mangatatawen ya Ari, sikato so magmamaliw a “Magnayon ya Ama” na saramay nagunggunaan manlapud bagat to bilang mangaraldalin iran uuleyan. Saraya so manbilay ed ando lan ando. (Isaias 9:6, 7) Kanian matukoy so impanuro nen Jehova ed sayan Kadalaan na katooan bilang say Manangibales na dala.

7. Bilang say baleg ya Atagey a Saserdote, anto so gagawaen nen Jesus parad totoo?

⁷ Si Jesus so sakey met ya anggapoy kasalanan, asubok, mililiknan Atagey a Saserdote. (Hebreos 4:15) Tekep na satan a kapasidad, iyaaplika to so merito na mananakbong-kasalanan a bagat to ed katooan. Saray syudad na salimbengan so niletneg “parad saray anak nen Israel tan parad manaayam a sankaili tan parad saray miaayam ed leet” da. (Numeros 35:15) Kanian inmunan inyaplika na baleg ya Atagey a Saserdote so merito na bagat to ed alanaan iran patumbok to, “saray anak nen Israel.” Natan et satan so onaaplika ed ‘saray manaayam a sankaili’ tan ‘saray miaayam’ diad antitipikon syudad na salimbengan. Sarayan “arum a karnero” na Katawan a Jesu-Kristo so maniilalon manbilay ed ando lan ando diad dalin.​—Juan 10:16; Salmo 37:29, 34.

Say Kaplesan a Syudad na Salimbengan

8. Anto so antitipikon syudad na salimbengan?

⁸ Anto so antitipikon syudad na salimbengan? Aliwan sakey a lugar itan a singa say Hebron, a sakey ed anemiran Levitan syudades na salimbengan tan ayaman na atagey a saserdote na Israel. Say kaplesan a syudad na salimbengan so probisyon na Dios diad kaprotektaan tayo manlapud ipapatey lapud isusumlang ed ganggan to nipaakar ed inkasagrado na dala. (Genesis 9:6) Ginagala man odino andi, kada onsusumlang ed satan a ganggan so kaukolan ya onkerew na panamerdona na Dios tan say kaekal na kasalanan to diad panamegley na pananisia ed dala na Atagey a Saserdote, si Jesu-Kristo. Inanamot na saray alanaan a Kristiano a walaan na mangatatawen ya ilalo tan say “baleg ya ulop” a walaay mangaraldalin ya iilaloan iray gungguna na mananakbong-kasalanan a bagat nen Jesus tan sikara so walad antitipikon syudad na salimbengan.​—Apocalipsis 7:9, 14; 1 Juan 1:7; 2:1, 2.

9. Panon a sinumlang nen Saul na Tarso so ganggan na Dios nipaakar ed dala, balet panon ton nipatnag so panamasibaloy awawey to?

⁹ Sakbay a nagmaliw a Kristiano, sinumlang nen apostol Pablo so ganggan nipaakar ed dala. Bilang si Saul na Tarso, pinasegsegang toray patumbok nen Jesus tan inabobonan to ni ingen so ipatey da. “Anggaman kuan,” inkuan nen Pablo, “akasian ak, lapud anggapoy-amtak tan kinmiwas ed inkaandi na pananisia.” (1 Timoteo 1:13; Gawa 9:1-19) Si Saul so nagbabawi, a diad saginonor et pinaneknekan to diad dakel a gawa na pananisia. Balet nagkalalo ni nen say pananisia diad dondon so kakaukolanen ta pian makaloob ed antitipikon syudad na salimbengan.

10. Panon a posiblin nagamoray maong a konsiensia, tan anto so kaukolan pian naalwaran itan?

¹⁰ Say sakey ya agsigagalan akapatey so makapansiansia ed sakey ed saray syudad na salimbengan ed Israel no napaneknekan to a sikatoy walaan na sakey a maong a konsiensia ed arap na Dios nipaakar ed panagpaagos na dala. Pian nawalaan na maong a konsiensia, nepeg tayoy mangagamil na pananisia ed bagat nen Jesus, magbabawi ed saray kasalanan, tan manguman ed kurang tayo. Kaukolan tayo so onkerew na maong a konsiensia diad sipipikasin dedikasyon ed Dios diad panamegley nen Kristo, ya isimbolo iya diad bautismo ed danum. (1 Pedro 3:20, 21) Sayan maong a konsiensia so manggagawa ed sikatayon nagamoray malinis a siglaotan ed si Jehova. Say mogmon paraan pian napansiansia so maong a konsiensia et say katutulok ed saray kakaukolanen na Dios tan panggawa ed nipabtang a kimey ed sikatayo diad antitipikon syudad na salimbengan, a singa met ed saray takas diad kadaanan iran syudad na salimbengan et kaukolan ya ontulok ed Ganggan tan manumpal ed saray nipabtang a kimey da. Say manunan kimey na totoo nen Jehova natan et say pangiyabawag na mensahe na Panarian. (Mateo 24:14; 28:19, 20) Say panggawa ed ontan a kimey so ontulong ed sikatayon magmaliw a makana iran residenti na kaplesan a syudad na salimbengan.

11. Anto so kaukolan a paliisan pian sikatayo so mansiansian niliktar ed kaplesan a syudad na salimbengan?

¹¹ Say itataynan ed kaplesan a syudad na salimbengan so panangiparayag na inkasikatayo ed kadederal, ta say Manangibales na dala so asingger lan onakto sumpad amin a nankasalanan ed dala. Aliwan saya so panaon a pakatekmelan ed paway na sayan protektibon syudad odino diad sakey a mapeligron lugar ya asingger ed ketegan na saray pastolan. Mansumpal itayo ed paway na antitipikon syudad na salimbengan no naandian itayo na pananisia ed mananakbong-kasalanan a bagat na Atagey a Saserdote. (Hebreos 2:1; 6:4-6) Agtayo met magmaliw a liktar no adaptaen tayoy minumundo iran dalan, agsigpot a nalalanor ed organisasyon nen Jehova, odino onsuwawi manlapud saray estandarte na mangatatawen ya Ama tayo.​—1 Corinto 4:4.

Nibulos Manlapud Syudad na Salimbengan

12. Kaunongan kabayag so nepeg a pansiansia na sakey a datin nankasalanan ed dala ed antitipikon syudad na salimbengan?

¹² Say agsigagalan akapatey diad Israel so kaukolan a mansiansia ed syudad na salimbengan “ya anggad ipatey na atagey a saserdote.” (Numeros 35:28) Kanian kaunongan kabayag so pansiansia na saray datin nankasalanan ed dala diad antitipikon syudad na salimbengan? Anggad agda la kaukolan iray serbisyo na Atagey a Saserdote, si Jesu-Kristo. “Sarag to met a sigpot ya isalba iramay onaasingger ed Dios diad panamegley to,” inkuan nen Pablo. (Hebreos 7:25) Anggad mantultuloy ni so pankakasalanan ed dala, kaukolan iray serbisyo na Atagey a Saserdote pian saray ag-ayadyarin totoo so nawalaan na matunong a talindeg ed Dios.

13. Siopa so kaplesan ‘iran anak nen Israel,’ tan kaunongan kabayag iran kaukolan a mansiansia ed “syudad na salimbengan”?

¹³ Tandaan a saray kadaanan a syudad na salimbengan so niletneg parad “saray anak nen Israel,” saray manaayam a sankaili, tan saray miaayam. “Saray anak nen Israel” so espiritual ya Israelitas. (Galacia 6:16) Nepeg day mansiansia ed antitipikon syudad na salimbengan legan a sikaray manbibilay ed dalin. Akin? Lapud sikaray ag-ayadyari ni ed laman tan sirin mankakaukolan na mananakbong merito na mangatatawen ya Atagey a Saserdote ra. Balet sano sarayan alanaan a Kristiano so inatey la tan pinaoli ed espiritual a bilay ed tawen, agda la kaukolan iray mananakbong a serbisyo na Atagey a Saserdote; tinaynan da la’d satan ed ando lan ando so laman tan kasalanan ed dala a nisiglaot ed satan. Parad saratan a pinaolin alanaan ya onkakanan pananakbong tan kililiktar so impatey na Atagey a Saserdote.

14. Akin a saramay walaay mangatatawen ya iilaloan natan so kaukolan a mansiansia ed kaplesan a syudad na salimbengan?

¹⁴ Wala ni sananey a Makasulatan a rason no akin a saramay magmaliw a mangatatawen a “minanawir ed Kristo” so mansiansia ed antitipikon syudad na salimbengan ya anggad sitotoor dan nasumpal so mangaraldalin a kurang da diad ipapatey. Sano sikara lay ompatey, ibagat da ed ando lan ando so inkatoo ra. (Roma 8:17; Apocalipsis 2:10) Say bagat nen Jesus so onaaplika lambengat ed saramay totoo. Kanian, inatey so Atagey a Saserdote parad saramay membro na espiritual ya Israel sanen sikara lay pinaoli tan pinasimbalo manlapud too a magmaliw ya espiritu iran pinalsa a manayam ed ando lan ando ed tawen bilang “minanabang diad madibinon inkamapakelaw.”​—2 Pedro 1:4.

15. Siopa so modernon-panaon ‘iran manaayam a sankaili’ tan ‘miaayam,’ tan anto so nagawaan na Atagey a Saserdote parad sikara?

¹⁵ Kapigan ya “ompatey” so Atagey a Saserdote no nipaakar ed modernon-agew ‘iran manaayam a sankaili’ tan ‘miaayam,’ a mangiyaabuloy ed sikaran taynan so antitipikon syudad na salimbengan? Sarayan membro na baleg ya ulop so agmakapaway a tampol ed sayan syudad na salimbengan kayari na baleg a kairapan. Akin ya andi? Lapud mansiasiansia nira ed agda inkayadyari, makasalanan a laman tan mankaukolan na pansiansia ni ed silong na proteksyon na Atagey a Saserdote. Diad pakagamor da parad inkasikara na mananakbong iran serbisyo to legan na sanlibon-taon ya inkaari tan inkasaserdote, nagamoran da so atooan ya inkayadyari. Ipresenta ira ed satan nen Jesus ed Dios ed pinal, nagnap ya importantin subok na integridad da diad panamegley na pangibulos ed si Satanas tan saray demonyo to ed agmanbayag a panaon. Lapud atalonaan da iyan subok tekep na panangabobon na Dios, sikaray iyabawag a matunong nen Jehova. Diad ontan et sikara so makadampot ed sigpot ya atooan ya inkayadyari.​—1 Corinto 15:28; Apocalipsis 20:7-10.a

16. Kapigan ya agla nakaukolan na saray akaliktar ed baleg a kairapan so mananakbong iran serbisyo na Atagey a Saserdote?

¹⁶ Kanian, saray makaliktar sirin ed baleg a kairapan so kaukolan a mantinien day maong a konsiensia ra diad pansiansia ra ed antitipikon syudad na salimbengan ya anggad sampot na Sanlibon Taon ya Uley nen Kristo. Bilang apayadyarin totoo, agda la kaukolan so mananakbong a serbisyo na Atagey a Saserdote tan sikaray ompaway la manlapud silong na proteksyon to. Diad ontan et si Jesus so ompatey ed sikara bilang Atagey a Saserdote, ta sikato so agla kaukolan ya onkiwas nisesengeg ed sikara tekep na makalinis a dala na bagat to. Diad satan a panaon et taynan da la so antitipikon syudad na salimbengan.

17. Akin a saramay pinaoli ed panaon na Sanlibon Taon ya Uley nen Kristo so agla kaukolan ya onloob ed antitipikon syudad na salimbengan tan mansiansia ditan?

¹⁷ Kasin saramay pinaoli legan na Sanlibon Taon ya Uley nen Jesus so kaukolan ya onloob ed antitipikon syudad na salimbengan tan mansiansia ditan ya anggad ipatey na atagey a saserdote? Andi, lapud diad patey et abayaran da lay dusa na inkamakasalanan da. (Roma 6:7; Hebreos 9:27) Anggaman kuan, tulongan ira met na Atagey a Saserdote a mangapet ed inkayadyari. No sitatalonan nilabas da so pinal a subok kayari na Milenyo, iyabawag ira na Dios a matunong tekep na garantiyan magnayon a bilay ed dalin. Siempre, say isaew ed panumbok ed saray kakaukolanen na Dios so mangitarok na manangondenan panangukom tan kadederal ed siopaman a toon agto nilabas so pinal a subok bilang manamenben na integridad.

18. Nipaakar ed inkaari tan inkasaserdote nen Jesus, anto so mansiansia ed katooan diad ando lan ando?

¹⁸ Diad kaunoran et saray Israelitan atagey a saserdote so inatey. Balet si Jesus “so nagmaliw ya agtagey a saserdote unong ed paraan nen Melquisedec ed ando lan ando.” (Hebreos 6:19, 20; 7:3) Kanian say pansaran betang nen Jesus bilang manamegley ya Atagey a Saserdote ed katooan so agmanampot ed bilay to. Saray maabig ya epekto na serbisyo to bilang Ari tan Atagey a Saserdote so mansiansia ed katooan ed ando lan ando, tan saray totoo so magnayon ya akaotang ed sikato lapud serbisyo to ed sarayan kapasidad. Niarum ni, si Jesus so magnayon a mangidaulo ed puron panagdayew ed si Jehova.​—Filipos 2:5-11.

Makana Iran Leksion Parad Sikatayo

19. Anton leksion nipaakar ed pangula tan aro so naaralan manlapud probisyon iran syudad na salimbengan?

¹⁹ Dakel so naaralan tayo manlapud probisyon na saray syudad na salimbengan. Singa bilang, anggapoy manamatey a walaay makapatey a gula ed biktima to so inabuloyan a manayam diad syudad na salimbengan. (Numeros 35:20, 21) Kanian akin ya abuloyan so siopaman diad antitipikon syudad na salimbengan ya ontubo ed puso to so panggula ed sakey ya agi? “Balang sakey a mangugula ed agi to so manamatey,” so insulat nen apostol Juan, “tan amta yon anggapoy manamatey a nawalaay andi-anggaan a bilay a mansiansia ed sikato.” Sikatayo sirin so “mantultuloy a manaaroan, lapud say aro et manlalapud Dios.”​—1 Juan 3:15; 4:7.

20. Bilang proteksyon manlapud Manangibales na dala, anto so kaukolan a gawaen na saramay walad antitipikon syudad na salimbengan?

²⁰ Bilang proteksyon sumpad manangibales na dala, say agginagalan akapatey so kaukolan a mansiansia ed syudad na salimbengan tan nepeg ya ag-onaarawi ed paway na pastolan. Komusta iramay walad antitipikon syudad na salimbengan? Pian makaliktar manlapud baleg a Manangibales na dala, agda nepeg a taynan so syudad. Diad tua et kaukolan day manbantay sumpad saray pakatuksoan ya onla ed tambib na pastolan, a singa panangibaga. Nepeg a manalwar ira ya ag-ontubo ed puso ra so pangaro ed mundo nen Satanas. Mankakaukolan iya na pikakasi tan sagpot, balet mandedependi so bilay da ed satan.​—1 Juan 2:15-17; 5:19.

21. Anton makatumang a kimey so gagawaen na saramay walad kaplesan a syudad na salimbengan?

²¹ Saray agsigagalan akapatey diad kadaanan iran syudad na salimbengan so kaukolan a magmaliw a mabungan komikimey. Mipadpara, say alanaan ‘iran anak nen Israel’ so angipanengneng na maabig ya alimbawa bilang manag-ani tan manangiyabawag na Panarian. (Mateo 9:37, 38; Marcos 13:10) Bilang ‘saray manaayam a sankaili’ tan ‘miaayam’ diad kaplesan a syudad na salimbengan, saray Kristianon walaan na mangaraldalin ya iilaloan so apribilihyoan a gawaen iyan manangisalbay-bilay a kimey a kaiba iray alanaan a wadia ni ed dalin. Tan agaylan makatumang iyan kimey! Saramay mankikimey a sitotoor diad antitipikon syudad na salimbengan so makaliktar ed maandon ipapatey ed lima na Manangibales na dala. Imbes, nagamoran da so magnayon iran gungguna manlapud panlingkor to bilang baleg ya Atagey a Saserdote na Dios. Kasin mansiansia ka ed syudad na salimbengan tan manbilay ed ando lan ando?

[Paimano ed leksab]

Panon Yon Ebatan?

◻ Akin a nibaga a binilyon ed dalin so walaan na kasalanan ed dala?

◻ Antoran betang so gagawaen nen Jesus no nipaakar ed katooan?

◻ Anto so antitipikon syudad na salimbengan, tan panon a makaloob diman so sakey a too?

◻ Kapigan so kibulos na totoo manlapud antitipikon syudad na salimbengan?

◻ Antoran makanan leksion so naaralan tayo manlapud probisyon iran syudad na salimbengan?

[Litrato ed pahina 16]

Kasin amta yo so makana iran betang a gagawaen nen Jesu-Kristo?