Ag-Onsusuko!

“Agtayo komon onsukon manggawa na maabig, ta dia ed nigeter a panaon et manani tayo no agtayo nakesawan.”​—GALACIA 6:9.

1, 2. (a) Antoray paraan a say sakey a leon et manaanap na nabuag to? (b) Siopa so nagkalalon interesadon biktimaen na Diablo?

SAY leon so manaanap na nabuag to ed nanduruman dalan. No maminsan et lusoben to so biktima to diad saray abot a nandanum odino ed saray basbas a naynay a nadadalanan. Balet no maminsan, kuan na libron Portraits in the Wild, “aanamoten labat la [na leon] so situasyon​—singa alimbawa, sano sisiliban toy nauugip a kilaw a zebra.”

² Say “kalaban [tayo], say Diablo,” salaysay nen apostol Pedro, so “liber-liber a singa managlem a leon, a manaanap na siopaman a buagen to.” (1 Pedro 5:8) Lapud amta ton antikey lay nakekeraan a panaon to, lalo so panedesdes nen Satanas ed totoo pian amperen ira ed panaglingkor ed si Jehova. Anggaman ontan, sayan “managlem a leon” so nagkalalon interesado ed pamiktima ed ariripen nen Jehova. (Apocalipsis 12:12, 17) Say panag-anop to so mipadpara’d kapara ton ayayep. Panon ya ontan?

3, 4. (a) Antoray metodon uusaren nen Satanas ed pamiktima ed ariripen nen Jehova? (b) Lapud saraya so “maatap iran panaon a mairap a pidenengan,” antoran tepet so onlelesa?

³ No maminsan et uusaren nen Satanas so panaglusob​—panamasegsegang odino isusumpa diad getman buyaken so integridad tayo ta pian ontunda tayon manlingkor ed si Jehova. (2 Timoteo 3:12) Balet, singa say leon, no maminsan et aanamoten lambengat na Diablo so situasyon. Manaalagar anggad sikatayo so nadismaya odino naalipanesan, tan insan to salien ya anamotey inkagonigon ed mental tayo ta pian pasukoen to itayo. Nepeg ya agtayo magmaliw a mainomay a biktimaen!

⁴ Balet, sikatayoy manbibilay ed sanka-irapan a panaon ed interon awaran na too. Diad sarayan “maatap iran panaon a mairap a pidenengan,” dakel ed sikatayo so nayarin nadidismaya odino nagogonigon no maminsan. (2 Timoteo 3:1) Panon, tayo sirin a naarawian tayo so pakaalipanesan a tuloy a sengegan a mainomay tayon biktimaen na Diablo? On, panon tayon natumbok so apuyanan a konseho nen apostol Pablo: “Agtayo komon onsukon manggawa na maabig, ta dia ed nigeter a panaon et manani tayo no agtayo nakesawan”?​—Galacia 6:9.

Sano Sinaew Itayo na Arum

5. Anto so sengegan a naalipanesan si David, balet anto so agto ginawa?

⁵ Diad panaon na Biblia, anggan say sankamatooran ya ariripen nen Jehova so nayarin akaliknan abelatan. “Siak so naalipanesan ed pandageyem ko,” insulat nen salmistan David. “Sanlabin pinalangoy ko so dukolan ko; diad saray luak a pinanlippuak so dilin diban ko. Manlapud ermen et kinmapuy so matak.” Akin ya ontan so alikna nen David? “Lapud amin na saramay mangipapanengneng na panamusol ed siak,” so salaysay to. Saray makapasakit a kiwas na arum so nansengegay ontanlan ot-ot ed liknaan nen David ya inmagus iray lua to. Siansia, agbinenegan nen David si Jehova lapu labat ed ginawa ed sikato na kapara ton too.​—Salmo 6:6-9.

6. (a) Panon itayon nayarin apektoan na saray salita odino kiwas na arum? (b) Panon a ginawa na arum so inkasikaran mainomay a biktimaen na Diablo?

⁶ Mipadpara, say panagsalita odino kakikiwas na arum so nayarin pansengegan na kaalipanesan tayo ya atekepay pirmin ot-ot ed liknaan. “Wala so sakey a bengat-bengat a mansasalitan singa ed saray duyok na sakey a kampilan,” kuan na Uliran 12:18. Sano samay bengat-bengat et sakey a Kristianon agi, say ‘sugat na duyok’ so nayarin onaralem. Natural ed too so pakaopendi, anganko et ombarung ni ingen. Nagkalalo lan tua iya no liknaen tayon sikatayo so atrato ed agmarakep odino agmakatunogan a paraan. Nayarin nairapan tayon mitongtong ed akaopendi’d sikatayo; ompan gagalaen tayo ni ingen a sikatoy arawian. Lapud nabebelatan nisesengeg ed imbel na linawa, say arum so sinmuko la tan agla onaatendi ed saray Kristianon miting. Makapaermen, sikara sirin so “mangiyaabuloy na pasen parad Diablo” ed panangamot toy pamiktima ed sikara.​—Efeso 4:27.

7. (a) Panon tayon naarawiay kapelag ed saray lima na Diablo sano sikatayo so sinaew odino sinakitan na arum? (b) Akin a kaukolan tayon ekalen so panimbel?

⁷ Panon tayon naarawiay kapelag ed saray lima na Diablo sano sikatayo so sinaew odino sinakitan na arum? Panggunaetan tayoy agmanimbel na linawa. Imbes, mabulos linawan mikareenan odino aregloen iray pamaakaran a tampol no posibli. (Efeso 4:26) Papasesegen itayo na Colosas 3:13: “Mantultuloy . . . a sibubulos a perdonaen so sakey tan sakey no wala so siopaman a pansengegan na panreklamo sumpad sananey.” Say panamerdona so nagkalalo lan matukoy sano say sakey ya akaopendi so mangako ed lingo tan sisimoon a mipulangan. (Ikompara so Salmo 32:3-5 tan Uliran 28:13.) Anggaman makatulong ed sikatayo no lawas tayon nonoten a say panamerdona et agto kabaliksan a palalabasen odino palelemewen tayoray kasalanan a ginawa na arum. Sasaglawien na pamerdona so pakaekal na panimbel. Ambelat a sasakbaten so panimbel. Nayarin daraken toy panagnonot tayo, a manamsam ed liket tayo. Mangapekta ni ingen itan ed bunigas tayo. Midumaan, say panamerdona, no iner a matukoy et parad dilin kagunggunaan tayo. Singa si David, komon ta agtayon balot onsuko tan onarawi manlapud si Jehova lapud nibaga odino ginawa na arum ed sikatayo!

Sano Sikatayo so Kinmulang

8. (a) Akin a say arum so nagkalalon makakalikna na impankasalanan no maminsan? (b) Anto so walan kapeligroan ed pakatalonaan ed liknaan na impankasalanan ya onsuko tayo la?

⁸ “Amin tayo so nagagapol ed dakel a danay,” kuan na Santiago 3:2. Sano nagawa itan ed sikatayo, natural lambengat a liknaen tayon akapankasalanan. (Salmo 38:3-8) Say liknaan na impankasalanan so nagkalalo lan mabiskeg no sikatayo so mipupuligesgesan ed sakey a kaleteyan na laman tan manasagmak na tunggal paminsan ya inkasaew.a Oniay salaysay na sakey a Kristianon nipaarap ed ontan a pipupuligesgesan: “Agko la labay so manbilay, ya ag-amta no kasin akagawa ak odino andi na sakey ya agnaperdonan kasalanan. Isipen kon mas maong la ingen ya agko la panggunaetay panaglingkor ed si Jehova lapud anganko ta atrasado la.” Sano sikatayo so alimbos a tuloy na liknaay impakasalanan a sinmuko tayo la, iikdan tayo na pankanawnawa so Diablo​—tan ompan tampol ton anamoten itan! (2 Corinto 2:5-7, 11) Ompan say nakakaukolan et say mas asimbang a panmoria ed kasalanan.

9. Akin a nepeg itayon mankompiyansa ed panangasi na Dios?

⁹ Sano sikatayo so nankasalanan, manepeg labat so panlikna ya akapankasalanan. Anggaman no maminsan et mansiansiay liknaan na impankasalanan lapud liknaen na sakey a Kristianon sikatoy agbalot makanepegan ed panangasi na Dios. Ingen, sililigsan ipapaseguro ed sikatayo na Biblia: “No ipatua tayoray kasalanan tayo, sikato so matoor tan matunong ta pian perdonaen toray kasalanan tayo tan linisan itayo manlapud amin ya ag-inkatunong.” (1 Juan 1:9) Wala ta so mabiskeg a rason ed panisian aggawaen itan na Dios ed kipapasen tayo? Tandaan, diad Salita to, kuan nen Jehova a sikato so “akaparaan a mamerdona.” (Salmo 86:5; 130:3, 4) Lapud sikato so agmakapantila, tooren to so unong ed isisipan na Salita to, daput no sikatayo so onasingger ed sikato tekep na magbabawin puso.​—Tito 1:2.

10. Anton makapaligsan panamaseguro so impalapag na Watchtower nipaakar ed pipupuligesgesan ed sakey a kaleteyan na laman?

¹⁰ Anto so nepeg mon gawaen no sika so mipupuligesgesan ed sakey a kaleteyan tan atalonaan la lamet na satan? Ag-onsusuko! Say pangulit ed kaleteyan so agmamaandi kabaliksan ed iyaligwas na agawaan mo la. Say Pebrero 15, 1954, a paway na sayan dyurnal (ed Ingles) so angitarok na sarayan makapaligsan panamaseguro: “[Nayarin] naromog tayoy inkasikatayon nagagapol tan napepelag ed maminpigan danay ed mauges ya ugali a nigalet a tuloy ed datin paraan na kabibilay tayo nen say amoria tayo. . . . Agnaaandiay ilalo. Agmo ibabagan sika so akapanggawa na agnaperdonan kasalanan. Ontan so labay nen Satanas ya ikatunongan mo. Say bengatlan sika so naermenan tan apagaan so prueban mismo ya aliwan ontanlan inkaseryoso so impankasalanan mo. Agbalot naaalipanesan ed pagmaliw a sipapaabeba tan sisisimoon ya iyaarap ed Dios, a kerewey kaperdona tan pakalinisan tan tulong to. Onasingger ed sikato no panon a say sakey ya ugaw so onaasingger ed ama to sano sikatoy walaan na problema, kaunongan man kabetbet lapud parparehon kaleteyan, tan si Jehova so sililigsan ontulong ed sika lapud agkanepegan a panangasi to tan, no sika so masimoon, tulongan to kan magmaliw a malinis so konsiensiam.”

Sano Nalikna Tayon Kulang Ni so Gagawaen Tayo

11. (a) Anto so nepeg a panlikna tayo nipaakar ed pibibiang ed kimey na panangipulong na Panarian? (b) Anton liknaan nipaakar ed pibibiang ed ministeryo so pipupuligesgesan na arum a Kristiano?

¹¹ Say kimey a panagpulong na Panarian so walaan na importantin betang diad bilay na sakey a Kristiano, tan say pibibiang ed satan so mangitatarok na gayaga. (Salmo 40:8) Balet, arum a Kristiano et liknaen dan akapankasalanan lapud agpakakagawa na malaglaem diad ministeryo. Say ontan a liknaan na impankasalanan so nayari ni ingen a mangekal ed gayaga tayo tan pansengegan na isuko tayo, ya iisipen a liknaen nen Jehova ya agmagenap so gagawaen tayo. Konsideraen pa so liknaan a pipupuligesgesan na pigara.

“Kasin amta yo no kaunongay kabaleg na panaon a nauupot lapud inkaduka?” insulat na sakey a Kristianon agin bii a kaibay asawa ton mamapabaleg ed taloran anak. “Nepeg koy mangimper anggad nayarian ko. Kabaliksan na saya so pangusar na panaon ed pananap na saray lakuan na segunda mano, ed saray salansan na baratilyo, odino anggan ed pandait na kawes. Uusaren ko met so sakey odino duaran oras ed kada simba ed saray kupon [na saray diskuento ed tagano]​—kakatlien, isasalansan tan isasalat iratan. No maminsan et liknaen kon mankakasalanan ak ed panggagawa ed sarayan bengatla, ya iisipen kon inusar ko la komon itan a panaon ed lawak a serbisyo.”

“Isipen kon talagan agmagenap so panangarok ed si Jehova,” salaysay na sakey ya agin bii a walaay apatiran anak tan agmananisian asawa. “Kanian akipuligesgesan ak ed panaglingkor ko ed si Jehova. Talagan nanggunaetan ko, balet agkon balot aliknan magenap la iman. Amta yo, agko akaliknay dilin-kakanaan, kanian agko naisip no panon a naawat ni nen Jehova so panaglingkor ko ed sikato.”

Oniay kuan na sakey a Kristiano a kaukolan toy ontunda ed sigpot-panaon a serbisyo: “Agko naawat so ideyan siak so sinmaew a manumpal ed sipan kon panlingkoran si Jehova a sigpot-panaon. Agyo naisip so naliliknak ya inkasaew! Makakaakis ak natan sano nanonotan ko iya.

12. Akin a say arum a Kristiano so ontanlan makakalikna na impankasalanan ed agda pakakagaway malaglaem ed ministeryo?

¹² Natural labat so pankaliktan a manlingkor ed si Jehova a sigpot no nayari. (Salmo 86:12) Balet akin ya ontanlay liknaan na arum a nankasalanan lapud inkulang da? Parad arum, ompatnag a misiglaotan itan ed kaslakan a liknaan na inkaandi-kakanaan, anganko lapud resulta na agmarakep iran eksperiensia ed bilay. Diad arum a kaso, say agmanepeg a liknaan na impankasalanan so nayarin resulta na agrealistikon panmoria ed no antoy iilaloan ed sikatayo nen Jehova. “Liknaen kon anggad sika so agnaksawan ed pankikimey mo, maseguron kulang ni so gagawaen mo,” inako na sakey a Kristiano. Bilang resulta na saya, angiletneg na atagtagey ya estandarte parad inkasikaton dili​—tan kayari to et lalon alikna ton akapankasalanan sanen agto adampot iratan.

13. Anto so iilaloan ed sikatayo nen Jehova?

¹³ Anto ta so iilaloan ed sikatayo nen Jehova? Diad simplin balikas, iilaloan nen Jehova a panlingkoran tayo ya interon-kamarerwa, a gagawaen no antoy iyaabuloy na sirkumstansya tayo. (Colosas 3:23) Anggaman ontan, ompan walay baleg a pandumaan ed no antoy labay tayon gawaen tan ed no antoy realistikon nagawaan tayo. Nayarin nagegetaran itayo na saray bengatlan singa say edad, bunigas, biskeg na laman, odino responsabilidad ed pamilya. Anggaman kuan, sano gagawaen tayoy anggaay nayarian tayo, nalikna tayoy panamaseguron say serbisyo tayo ed si Jehova so interon-kamarerwa​—ag-alablabas odino kulang ni nen say interon-kamarerwan panaglingkor na sakey a say bunigas tan kipapasen to so mangiyaabuloy ed sikaton mansiansia ed sigpot-panaon a ministeryo.​—Mateo 13:18-23.

14. Anto so nagawaan mo no kaukolan mo so tulong ed pandetermina no anto so realistikon nailaloan ed inkasikan dili?

¹⁴ Sirin, panon mon nadetermina no antoy realistikon nailaloan mo ed inkasikan dili? Ompan kaliktan mon itongtong iyan pamaakaran ed sakey a napanmatalkan, matatken a Kristianon kaaro, anganko et sakey a matatken odino ed sakey ya eksperiensiadon agin bii, a makaamta ed saray abilidad mo, limitasyon, tan ed saray responsabilidad mo ed pamilya. (Uliran 15:22) Tandaan a diad imaton na Dios say kablian mo bilang indibidual so agsusukaten no kaunongay nagagawaan mo ed lawak a ministeryo. Amin ya ariripen nen Jehova so mabli ed sikato. (Aggeo 2:7; Malaquias 3:16, 17) Say nagagawaan mo ed panagpulong so nayarin sobra odino kulang nen say nagagawaan na arum, balet basta satan so sankaabigan a nagawaan mo, naliliketan si Jehova, tan agmo kaukolan a liknaen a sika so nankasalanan.​—Galacia 6:4.

Sano Dakel so Kakaukolanen ed Sikatayo

15. Diad antoran paraan a dakel so kakaukolanen ed mamatatken na kongregasyon?

¹⁵ “Balang sakey ya inikdan na dakel,” inkuan nen Jesus, “dakel so kakaukolanen ed sikato.” (Lucas 12:48) Maseguro a ‘dakel so kakaukolanen’ ed saramay manlilingkor bilang mamatatken ed kongregasyon. Singa si Pablo itatalaga ray inkasikara ed pankaabigan na kongregasyon. (2 Corinto 12:15) Sikaray mangipaparaan na saray paliwawa, manpapastol, mamebenben na saray hudisyal a kaso​—ya amin et gagawaen ya agpapaulyanay dilin pamilya ra. (1 Timoteo 3:4, 5) Okupado so arum a mamatatken diad itulong ed pamaalagey na saray Kingdom Hall, panlingkor ed saray Hospital Liaison Committee, tan panagboluntaryo ed saray asamblea tan kombension. Panon a naarawian na sarayan makuli, debotadon lalaki so pakaalipanesan lapud ontan iran ambelat a responsabilidad?

16. (a) Anton praktikal a solusyon so insuheri nen Jetro ed si Moises? (b) Anton kualidad so manggawa ed sakey a matatken ya inabang ed arum so matukoy iran responsabilidad?

¹⁶ Sanen si Moises, sakey a maamo tan mapaabeban laki, so naaalipanesan lapud pangaasikaso’d saray problema na arum, say katulangan ton laki a si Jetro, so angisuheri na praktikal a solusyon: inabang toy responsabilidad ed arum a kualipikadon lalaki. (Exodo 18:17-26; Numeros 12:3) “Say kakabatan so walad saray maamo,” kuan na Uliran 11:2. Say pagmaliw a maamo et kabaliksan toy pamidbir tan pangaksobi ed saray limitasyon mo. Say sakey a mauyamon too so agmasuyat a mangipabtang ed arum, nisay natatakot ya ompan naandian na kontrol ed panamegley na pananginabang na matukoy iran responsabilidad ed arum a kualipikadon lalaki.b (Numeros 11:16, 17, 26-29) Imbes, sikato so magunaet ya ontulong ed sikaran onaligwas.​—1 Timoteo 4:15.

17. (a) Panon a napalemew na saray membro na kongregasyon so awit na mamatatken? (b) Anton panagsakripisyo so gagawaen na kaasawaan na mamatatken, tan panon tayon nipanengneng ed sikara ya agtayo ibabaliwala iraya?

¹⁷ Baleg so nagawaan na saray membro na kongregasyon pian napalemew so awit na mamatatken. Lapud pakakatalos a saray matatken et walaan na dili ran pamilyan kaukolan ya asikasoen, say arum so agmanggawa na agmakatunongan a pankaukolan ed panaon tan atensyon na mamatatken. Nisay agda apresyaen so mabulos a panagsakripisyo na kaasawaan na mamatatken legan ya agsinisiblet ya inanabang day panaon na kaasawaan da parad kongregasyon. Oniay salaysay na sakey ya ina na taloran anak a say asawa to et manlilingkor bilang sakey a matatken: “Say sakey a bengatlan agkon balot nanreklamoan et say kaaruman ya awit a sibubulos kon sasakbaten ed sankaabungan ta pian say asawak so makapanlingkor bilang sakey a matatken. Amtak a mayaman so panamendisyon nen Jehova ed pamilya mi lapud panlilingkor to, tan agko isisiblet so iiter to. Balet say tua et mas ondarakel so trabahok ed solar tan ed panagdisiplina ed ananak mi lapud okupado so asawak.” Makapaermen, nalmoan na sayan agi a say arum, imbes ya apresyaen day kaaruman ya awit to, so bengat-bengat a mansasalita a singa ed, “Akin ya agka manpapayunir?” (Uliran 12:18) Agaylan magmaong ni so pangomenda ed arum ed nagagawaan da nen say pamalaw ed sikara ed agda nagagawaan!​—Uliran 16:24; 25:11.

Lapud Agni Sinmabi Anggaan

18, 19. (a) Akin ya aliwan natan so panaon pian ontundan ombatik ed lumba parad bilay ya andi-anggaan? (b) Anton nipanpanaon a simbawa so inter nen apostol Pablo ed saray Kristiano ed Jerusalem?

¹⁸ Sano amta na sakey a bumabatik a sikatoy asingger la ed anggaan na sakey ya andukey a lumba, agto onsusuko. Nayarin inmabot la ed kapantokan so panagsungdo to​—aluspok, napepetangan, tan nauupotay biskeg—​balet lapud asingsingger lay sampot, aliwan satan so panaon na itundan ibabatik. Ontan met, bilang Kristiano sikatayo so walad lumba parad premyon bilay, tan asingger tayo la ed sampot. Aliwan natan so panaon na itunda tayo ed ibabatik!​—Ikompara so 1 Corinto 9:24; Filipos 2:16; 3:13, 14.

¹⁹ Nipaarap ed mipadparan situasyon iray Kristiano ed inmunan siglo. Nen ngalngali 61 K.P., nansulat si apostol Pablo ed saray Kristiano ed Jerusalem. Nauupot lay panaon​—say marelmeng a “kailalakan,” say apostatan Judion sistema na bengabengatla, so paganigani lan “onlabas.” Saray Kristiano ed Jerusalem so nagkalalo lan kaukolan a magmaliw ya alerto tan matoor; kaukolan dan taynan so syudad sano anengneng dan napaliberan iya na nankampamento iran armada. (Lucas 21:20-24, 32) Nipanpanaon, sirin, so impuyan a simbawa nen apostol Pablo: ‘Agkayo onkekesaw tan onkakapuy ed saray kamarerwa yo.’ (Hebreos 12:3) Inusar dia nen apostol Pablo so duaran malinew a Griegon verbo: “onkekesaw” (kaʹmno) tan “onkakapuy” (e·klyʹo·mai). Unong ed sakey ya iskolar na Biblia, sarayan Griegon salita so “inusar nen Aristotle ed saray bumabatik a manrerelaks tan napupunaw kayarin alampasan da so sampot na babatiken. Saray managbasa [na sulat nen Pablo] so siansian ombabatik. Nepeg dan ag-abuloyan so inkasikaran omputi busalog tan napunaw lapud inkaalipanesan. Maminsan lamet a wadtan so tawag a mananos ed arap na kairapan.”

20. Akin a nipanpanaon parad sikatayo natan so simbawa nen Pablo?

²⁰ Talagan nipanpanaon so simbawa nen Pablo parad sikatayo natan! Diad arap na ondaraak a desdes, nayarin walaray panaon a singa tayo no alusluspok a bumabatik a saray bitking tayo et ngalngali la napakel. Balet lapud kinaasingger na sampot na babatiken, sikatayo so agnepeg ya onsuko! (2 Awaran 29:11) Ontan ya ontan so labay na Kalaban tayo, say “managlem a leon,” a gawaen tayo. Maong ta, nanggawa si Jehova na saray probisyon pian mangiter na “biskeg ed sakey a nakekesawan.” (Isaias 40:29) No anto irayan probisyon tan no panon tayon anamoten iraya et singbaten ed ontumbok ya artikulo.

[Saray paimano ed leksab]

Anto so Ebat Yo?

◻ Panon tayon napaliisan so isuko sano sikatayo so sinaew odino sinakitan na arum?

◻ Anton asimbang a panmoria ed liknaay impankasalanan so ontulong ed sikatayo pian ag-onsuko?

◻ Anto so iilaloan ed sikatayo nen Jehova?

◻ Panon a say inkamaamo so makatulong ed mamatatken ed kongregasyon ya arawian so pakaalipanesan?

◻ Akin a nipanpanaon parad sikatayo natan so simbawa nen Pablo ed Hebreos 12:3?