“Iner so Panlalapuan na Kuarta?”

NANDINAYEW iray akapanbantay ed video na Watch Tower Society a “Jehovah’s Witnesses​—The Organization Behind the Name.” Anengneng day malilimgas a lalaki tan bibii manlapud nanduruman rasa tan abenegan, a manimimis tan saniiban mankikimey a mantutunosan. Aliwa lambengat a saray nilibon maliket a komikimey so akalay imano ra noagta pati say ankakabaleg a grupo na saray paalagey na hedkuarter na Sosyedad ed Brooklyn tan ed saray farm da ed Wallkill, New York. Ipapanengneng na video a diad loob na sarayan bilding et naromog iray modernon teknolohya​—alay peles iran agamilen ed panag-imprinta tan panaggaway libro, a mamapawala na minilyon a palapagan ed kada bulan, nanduruman computer, tan saray departamenton manusuporta ed panangipalapag na literatura.

Napapatnagan dia so baleg a gagastosen. Kanian say arum so mantetepet, “Iner so panlalapuan na kuarta?”

Mandinayew met iray ombibisita ed sankamundoan a hedkuarter na Sosyedad. Mantagey so beklew na saray bisita diad inengneng ed 30-gradon residensyan bilding, sakey ed dakel a bilding a pampupundoan na masulok a 3,000 boluntaryon ministron mantratrabaho ditan. Say ibisita ed balon Watchtower Educational Center a ngalngali 110 kilometro a mamaamianen na Brooklyn so talagan pandinayewan na dakel. Legan a susumpalen so konstruksyon, dia manpupundo so ngalngali 1,200 komikimey. Duaran klase na saray misionero so nipapasal ditan ed balang taon tan nibabaki ed saray asainmin da ed arum a bansa. Manlalapu met dia iray direksyon ed masulok a 10,000 kongregasyon na Tastasi nen Jehova diad Estados Unidos. Dakel a sanga ed sankamundoan so agano nin apabaleg iray pasilidad da odino gagawaen ni. Pian nagawa so amin na sarayan kimey, mankakaukolan iya na baleg a kuarta. Itetepet na dakel a totoo, “Iner so panlalapuan na kuarta?”

Bilang ebat et manlalapu iya ed ordinaryon totoo a singa met ed siopaman ed sikatayo. Sikaray totoo, ed sankamundoan, a manpipilalek a gawaey anggaay nayarian da pian palaknaben so makanan Kristianon kimey na panagpulong tan panagbangat. Say ontan ya inkamabulos so aliwan balo.

Say Alimbawan Inletneg na Kadaanan ya Israel

Masulok a 3,500 taon lay apalabas, linmesa so pankaukolan parad mabunlok a kontribusyon. Binilin nen Jehova si Moises a mangipaalagey na sakey a tabernakulo, odino “tolda na pantitipon,” ya usaren parad panagdayew ed Sikato. Say inter-Dios a desinyo so mankakaukolan na nanduruman ankablin bengatla. Inganggan nen Jehova: “Manlapud pegley yo a manggawa kayo na panagkontribusyonan parad si Jehova. Abuloyan yon iter na balang sakey a mabulos-impapuso bilang kontribusyon parad si Jehova.” (Exodo 35:4-9) Panon so inkiwas na totoo? Ibabaga na salaysay ed sikatayo a “sikaray sinmabi, balang sakey a pinakiwas na puso to, so intarok da, a balang sakey a sinagyat na espiritu to, say kontribusyon parad si Jehova ed kimey na tolda na pantitipon tan parad amin a serbisyon nipaakar ed saya tan parad masanton kawekawes.” Sayan “boluntaryon apay” so ontanlan kalkalnan dinmakel a satan so ‘sobra la ed nakakaukolan parad kimey ya inganggan nen Jehova.’ (Exodo 35:21-29; 36:3-5) Agaylan anggapoy-siblet tan mabunlok ya awawey so impatnag na totoo!

Kulangkulang a 500 taon ed saginonor, sakey a tawag so niyabawag lamet parad mabunlok a panagkontribusyon manlapud saray Israelita. Say pilalek nen Arin David a mangipaalagey na sakey a permanentin abung parad si Jehova diad Jerusalem so nagawa la diad panamegley na ilalak ton si Solomon. Si David a mismo so anugyop tan angiter ed manunan kabiangan na nakakaukolan. Say arum so akibiang sanen impaakseb nen David so tawag a pangiter na “sakey a regalo parad si Jehova.” Say resulta? “Saray totoo so angiter-dalan ed panggayaga lapud saray boluntaryon apay, ta ginawa ra so boluntaryon panangiyapay ed si Jehova a walaay interon puso; tan anggan si David ya ari mismo so nanliket tekep na baleg a gayaga.” (1 Awaran 22:14; 29:3-9) Say pilak tan balitok lambengat so mankantidad na $50 bilyon natan!​—2 Awaran 5:1.

Naimano tayo manlapud sarayan alimbawa ya anggapo so pinilit a mangiter. Satan so talagan ‘boluntaryo’ tan inter “a walaay interon puso.” Agnaliketan si Jehova sano aliwan ontan so panagkontribusyon. Mipadpara, sanen linmesa so pankanawnawa ed pangiter na kuarta pian natulongan iray mankakaukolan a Kristiano, insulat nen apostol Pablo a saman so agkaukolan a magmaliw a “sakey a bengatlan nakikil.” Inyarum to ni: “Gawaen na balang sakey so unong ed deniside to ed puso to, ya aliwan ansakit so linawa to odino ed silong na panamilit, ta inaro na Dios so sakey a masayaksak a manangiter.”​—2 Corinto 9:5, 7.

Say Pankaukolan Natan

Wala ta so pankaukolan na saray kontribusyon natan? On wala, tan niwala ni lalon pankaukolan legan na iyaaligwas na panaon. Akin?

Inikdan iray Kristiano na espisipiko iran bilin parad sayan panaon na anggaan. Inganggan nen Jesus iray babangatan to: “Onla kayon manggawa na saray babangatan ed totoo na amin a nasyon, bautismoan yora ed ngaran na Ama tan say Anak tan say masanton espiritu, ya ibabangat ed sikara so panumpal ed amin a bengatlan inganggan ko ed sikayo.”​—Mateo 28:19, 20.

Pian nasumpal iyan baleg a panagbangat tan panagpulong legan na panasingger tayo ed “konklusyon na sistema na bengabengatla” et mankakaukolan na baleg a panaon tan kaykayarian. Akin? Lapud amin na satan et lalanoren to so panumpal ed mensahe na Panarian na Dios ed “sankaarawian a parti na dalin.” (Gawa 1:8) Maslak a totoo so agmikabisado ed Kasulatan aliwan singa saray Judio ed inmunan-siglo. Diad tua, karaklan na totoo ed dalin so andiay amta nipaakar ed Biblia tan agda ipapasen iya bilang Salitay Dios. Nepeg a nipasal iray manangipulong tan ibaki ira ed ararawin daldalin. (Roma 10:13-15) Tan isipen pay karakel na lenguahen nasasaglawi! Saramay napupulongan so kaukolan a nawalaan na saray Biblia tan nibased-Biblia iran palapagan pian nabasa tan naaralan ed dilin lenguahe ra. Pian nasabi so amin ed sistematiko tan progresibon bangatan ira ed espiritual ya inkatatken ta pian natulongan da met so arum et kakaukolanen toy malaknab ya organisasyon.​—2 Timoteo 2:2.

Inkuan nen Jesus a say “maong a balita na Panarian,” so nepeg a “nipulong [ya ununa] diad amin a panaayaman a dalin parad pantasi ed amin a nasyon; tan insan onsabi so anggaan.” (Mateo 24:14) Kanian natan la so panaon a gawaen so anggaay nayarian ta pian nagawaan itan a makanan kimey. Saray kayarian tayo so nausar ed sankaabigan a paraan sakbay a naandiay antokaman a balor iray materyal a kayamanan.​—Ezequiel 7:19; Lucas 16:9.

Iner so Lalaen na Kuarta?

Mangipapalapag so Watch Tower Society na literaturay Biblia ed masulok a 230 a lenguahe, ontan met ed Braille parad saray bulag tan saray video ed sign language parad saray telek. Kakaukolanen na satan so grupo na saray managpatalos (translator) tan proofreader ed balang lenguahe. Say panisip ed panggawa na sayan amin a kimey, nagkalalo la’d magasin a Panag-Bantayan, a nipapalapag a kada bulan diad 121 a lenguahe tan manbabansag ed 101 ed saraya, so talagan pandinayewan. Ingen kapilitan ta pian saray totoo ed sankadalinan so nawalaan tan makabasa ed parehon impormasyon. Tinaon ya onbibili so papel tan arum nin materyales ya uusaren diad panangimprinta na mensahe Panarian tan diad panamawala na saray audio odino video recording nipaakar ed saya. Saratan a gastos so kaukolan a nasapotan diad panggastos ed saray donasyon a manlalapud agagi.

Say panagpulong tan panagbangat so nasusumpal diad saray teritorya a manasaglawi’d masulok a 75,000 kongregasyon na Tastasi nen Jehova ed sankamundoan. Pian napankasakey tan napaseseg ira, saray nipasal a managbiahen manangasikaso so ombibista ed kada kongregasyon a ngalngali mamidua ed sakey taon. Saray asamblea so walaan met na importantin betang diad panangipasabi na impormasyon. Kaukolan ya abangan iray ankabaleg a pasilidad parad saray kombension, ya ontanlan makapabiskeg ed pananisia. Saray kontribusyon yo so nauusar met ed sarayan gagala.

Bangta saray asamblea so gendagendat a nagagawa a mamitlon danay ed loob na sakey taon, saray lokal a kongregasyon so mantitipon parad limaran sinimban miting. (Ikompara so Exodo 34:23, 24.) Say idadagsa na saray balo nin onkikiwas ed maong a balita et kabaliksan toy kaaruman a nilibon kongregasyon ed kada taon. Diad tulong na minilyon a dolyar a panagpaotang ya ipapakurang na Sosyedad, nilasus a balo iran Kingdom Hall so nipapaalagey ed kada taon, tan dakel nira so naaapiger tan papaawangen. Anggaman saya so nipapatelek a pondo ya aminpiga lan nauusar, mantultuloy so pankaukolan.

Sakey a lugar a ditan et nagagawa so agnaparaan nin ibubulaslas et diad nasyones ed Mamabukig ya Europa a nisilong ed datin Sobyet Union. Agaylan makapagayaga so balita a say kimey so alukasan ed sarayan pasen! Natan saray misionero so nibabaki ed dakel ed sarayan bansa. Saray balon sangan nileletneg ed pigaran daldalin, ondaraak ed bilang na saray boluntaryon ministro na sankamundoan a membroy Bethel so masulok a 15,000. Siempre, saray paalagey ed sanga a napanpundoan da so kaukolan a nasaliw odino nipaalagey. Saray kontribusyon yo so ontulong pian napenek itan a pankaukolan.

Amin na sayan kimey so naiimano nen Satanas tan saray demonyo to. Gagawaen day anggaay nayarian dan pakapuyey sagpot na matoor ya ariripen nen Jehova odino mamapawalay problema parad sikara. (Apocalipsis 12:17) Kabaliksan na saya ya ondaraak so belat na saray legal a pibabakal pian protektaan iray kanepegan na totoo na Dios ed panagpulong tan panbilay a mitunosan ed saray matunong a ganggan to. Niarum ni, say idadagsa na saray bakal diad sistema na bengabengatla nen Satanas, ontan met ed natural iran desyang, et kabaliksan toy pananulong a mabetbet a nakakaukolan parad naapektoan ya agagi tan arum a kaiba ra. Saray kontribusyon yo so ontutulong ed sayan makanan tulong.

Tumangan Ka nen Jehova

Sibubunlok ya uusaren tayoy panaon tan kayarian tayo pian idalangirang so kimey na Katawan a mangitatarok na baleg iran bendisyon. Panon ya ontan? Lapud say Dios, ya akankien ed amin a bengatla, so manumang ed sikatayo. Kuan na Uliran 11:25: “Say mabunlok a kamarerwa so napataban mismo, tan say sakey a sibubulos a manasalog ed arum so mismon nasalog.” Si Jehova so talagan naliliketan sano gagawaen tayo so biang tayo ed kiyabante na panagdayew ed sikato. (Hebreos 13;15, 16) Insipan to ed kadaanan ya Israelita no siopa so mangitarok na saray kontribusyon a kakaukolanen ed silong na Ganggan a sipanan: “‘Subok moak, ipangasim, diad sayan pamaakaran,’ inkuan nen Jehova na ehersito, ‘no agko lukasan iray katawenan tan talagan ikalbok so bendisyon ya anggad anggapolay pankulangan.’” (Malaquias 3:10) Say espiritual ya iyaaligwas a panggagayagaan natan na ariripen nen Jehova so ebidensya a totooren nen Jehova so sipan to.

Sayan engranden kimey na pangiyaabawag ed amin nipaakar ed agew na kilalaban tan panutulong ed saray matuan-impanpuso a mamaarap ed dalan na bilay so agmantultuloy ed ando lan ando. (Mateo 7:14; 2 Corinto 6:2) Balet amin na saramay “arum a karnero” na Katawan so nepeg a natipon. (Juan 10:16) Agaylan importanti so pakakapet ed satan ya angat natan! Tan agaylay panliket na balang sakey ed sikatayo, diad ilingay manlapud satan a balon mundo na inkatunong, tan ibagan, ‘awalaan ak na sigpot ya impibiang ed satan a pinal a pananugyop a kimey’!​—2 Pedro 3:13.

[Kahon ed pahina 30, 31]

No Panon so Pangiiter na Arum na Donasyon Parad Panagpulong a Kimey

KONTRIBUSYON PARAD SANKAMUNDOAN A KIMEY: Dakel so mangigagana odino mangigegetar na sakey a kantidad ya iiyan da ed saray “contribution box” ya amarkaan na: “Contributions for the Society Worldwide Work​—Mateo 24:14.” Kada bulan et ipapawil na saray kongregasyon irayan kantidad balangla diad sankamundoan a hedkuarter ed Brooklyn, New York, odino diad lokal a sangan opisina.

SARAY LANGKAP: Saray boluntaryon donasyon a kuarta so nayarin direktan nipawit ed Watch Tower Bible and Tract Society of the Philippines, Inc., P.O. Box 2044, 1099 Manila, odino diad opisina na Sosyedad a manlilingkor ed bansa. Saray alahas odino arum niran ankablin bengatla so nayari met ya iter bilang donasyon. Sakey ya antikey a sulat a mangibabagan satan so sakey a direktan langkap so nepeg a nitekep ed sarayan kontribusyon.

UKSOYAN NA KONDISYONAL A DONASYON: Nayarin mangiter na kuarta ed Watch Tower Society pian saya so mamenben anggad ipatey na say angidona, tekep na probisyon a no bilang ta walay personal a pankaukolan, saya so ipawil ed angidona.

SEGURO: Say Watch Tower Society so nayarin ingaran bilang benepisyari na sakey a policy na seguro-ed-bilay (life-insurance) odino sakey a plano ed panretiro/pensyon. Nepeg ya ipakabat ed Sosyedad so antokaman ya ontan iran uksoyan.

DEPOSITO ED BANGKO: Saray deposito ed bangko, sertipiko na deposito, odino indibidual a deposito ed panretiro so nayarin imatalek parad odino ibayar ed oras na ipapatey ed Watch Tower Society, unong ed saray kakaukolanen na lokal a bangko. Say Sosyedad so nepeg a pakabatan ed antokaman ya ontan iran uksoyan.

SARAY STOCK TAN BOND: Saray stock tan bond so nayarin iter bilang donasyon ed Watch Tower Society bilang direktan langkap odino diad silong na sakey ya uksoyan a diad panamegley na say almo to et mantultuloy ya ibabayar ed angidona.

LOTE TAN ABUNG: Say panlakoan ed lote tan abung so nayarin iter bilang donasyon ed Watch Tower Society diad panamegley na direktan langkap odino pangireserba na sakey a kabiangan na satan bilang panayaman na angidona, a makapantultuloy a manayam legay bilay to. Nepeg a minengnengan nin unona ed Sosyedad sakbay ya iyalis ed ngaran na Sosyedad so antokaman a kaykayarian.

TESTAMENTO TAN IMAMATALEK: Saray kayamanan odino kuarta so nayarin ipatawir ed Watch Tower Society diad panamegley na sakey a testamento ya inuksoy unong ed legal a paraan, odino say Sosyedad so nayarin gawaen a benepisyari na sakey a paknaan na panangimatalek. Say sakey a nimatalek a pakagunggunaan na sakey a relihyoson organisasyon so nayarin mangitarok na pigaran bentaha ed panag-buis. Say sakey a kopya na testamento odino paknaan ed pangimatalek so nepeg ya ipawit ed Sosyedad.

NIPLANON PANANGITER: Say Sosyedad so angiparaan na Ingles-lenguahen brosyur ya apauloan na “Planned Giving.” Saramay walad Estados Unidos a manplaplanon manregalon nikadkaduma ed Sosyedad natan odino mangitilak na tawir diad ipatey so makaromog ed sayan impormasyon a makatulong. Satan so nagkalalo lan tua no kaliktan dan nadampot so sakey a kalat na pamilya odino niplanon-estadon getma bangta usaren iray benipisyo ed buis pian nakesayay gastos ed panregalo odino panpatawir a kakaukolaney ley.

Parad nagkalalon impormasyon ed antokaman a pamaakaran ed tagey, mansulat ed Treasurer’s Office, Watch Tower Bible and Tract Society of the Philippines, P.O. Box 2044, 1099 Manila, odino diad opisina na Sosyedad a manlilingkor ed bansam.