“Onman ya Onman so Ginawa” Ra
“Onia so kabaliksan na panangaro na Dios, a sumpalen tayo iray ganggan to.”—1 JUAN 5:3.
1. Anto so nibaga nipaakar ed laknab na aro na Dios?
“SAY DIOS SO ARO.” Amin a makapikabat ed Dios tan ontutulok ed saray ganggan to so mangagamor na aralem ya apresasyon ed kinaaralem na satan a panangaro. “Say aro so walad sayan pamaakaran, aliwan lapud inaro tayo so Dios, noagta lapud inaro to itayo tan imbaki to so Anak to bilang manamaandin bagat parad saray kasalanan tayo.” Legan ya aagamilen tayo so pananisia diad mablin dondon bagat nen Jesus, sikatayo so ‘mansiansia ed aro na Dios.’ (1 Juan 4:8-10, 16) Diad ontan et napanggayagaan tayo so mayaman ya espiritual iran bendisyon natan tan ed onsabin sistema na bengabengatla, andi-anggaan a bilay.—Juan 17:3; 1 Juan 2:15, 17.
2. Panon a say panangunor ed saray ganggan na Dios so angungguna ed ariripen to?
2 Daakan ed rekord na Biblia iray alimbawa na saramay angunor ed saray ganggan na Dios tan bilang resulta et siyayaman ya abendisyonan. Lalaktipen na saraya so tastasi sakbay a panaon na Kristiano, a nipaakar ed pigara ed sikara et insulat nen apostol Pablo: “Diad pananisia et amin na saraya so inatey, anggaman agda amoria so kasumpalan na sipasipan, balet anengneng da iratan manlapud arawi tan mabulos ya inawat iratan tan sipupublikon inyabawag a sikaray dayo tan temporaryon manaayam diad dalin.” (Hebreos 11:13) Saginonor, agunggunaay debotadon Kristianon ariripen na Dios ed “say agkanepegan a kaabigan tan say katuaan [a] sinmabi diad panamegley nen Jesu-Kristo.” (Juan 1:17) Diad loob na ngalngali 6,000 taon na awaray too, tinutumangan nen Jehova so matoor a tastasi a tinmulok ed saray ganggan to, a talagan “aliwan makapabelat.”—1 Juan 5:2, 3.
Diad Saray Agew nen Noe
3. Diad antoran paraan ya “onman ya onman” so ginawa nen Noe?
3 Oniay ibabaga na rekord na Biblia: “Diad pananisia si Noe, kayarin naikdan na madibinon pasakbay nipaakar ed bengabengatlan agni anengneng, angipanengneng na maridios a takot tan angipaalagey na biong parad kisalbaan na sankaabungan to; tan diad panamegley na sayan pananisia a kinondena to so mundo, tan sikato so nagmaliw a mananawir na say inkatunong salanti unong ed pananisia.” Bilang “sakey a managpulong na inkatunong,” agmasuyat a tinmulok si Noe ed Dios, a pinasakbayan so marawal a mundo sakbay na Delap nipaakar ed paganigani lan panangukom na Dios. (Hebreos 11:7; 2 Pedro 2:5) Diad pangipaalagey na biong, siaalwar ton tinumbok so desinyon inter na Dios. Insan to inloob iray nidesignan ayayep tan suplay a tagano. “Ginapoan nen Noe a ginawa so amin ya inganggan ed sikato na Dios. Onman ya onman so ginawa to.”—Genesis 6:22.
4, 5. (a) Panon a say mauges ya impluensya so angapekta ed katooan ya anggad natan? (b) Akin a nepeg ya “onman ya onman” so gawaen tayo ed itutulok ed instruksion na Dios?
4 Kaukolan a milaban si Noe tan say pamilya to ed say mauges ya impluensya na matungangan angheles. Sarayan anak na Dios so nankinon-too tan akirelasyonan ed bibii, ya amawala na labas-nen-toon mestison ilalak a nanduksa ed katooan. “Say dalin so aderal diad imaton na tuan Dios tan say dalin so napno na karawalan.” Angibaki si Jehova na Delubio pian punasen iman a marelmeng a kailalakan. (Genesis 6:4, 11-17; 7:1) Nanlapulad agew nen Noe saray demonikon anghel so ag-inabuloyan a mankinon-too. Anggaman kuan, ‘say interon mundo so mantultuloy a walad pakayari na sakey a marelmeng,’ si Satanas a Diablo. (1 Juan 5:19; Apocalipsis 12:9) Diad mapropetikon paraan, inkompara nen Jesus itan a rebelyoson kailalakan ed agew nen Noe ed kailalakan na katooan ya angipulisay ed sikato nanlapulad inggapo na “kiwawala” to a mapatnag nen 1914.—Mateo 24:3, 34, 37-39; Lucas 17:26, 27.
5 Natan, a singa ed agew nen Noe, sasalien nen Satanas ya itarok so katooan tan say planeta tayo ed kadederal. (Apocalipsis 11:15-18) Kanian inkaganatan a kaukolan tayon talinengen so apuyanan a ganggan: “Isulong yo so kompleton kinlong manlapud Dios pian sikayo so makayarin ontalindeg a malet sumpad saray masilib a kiwas na Diablo.” (Efeso 6:11, paimanod-leksab [diad Ingles]) Lapud saya, sikatayo so napapabiskeg diad panagaral na Salita na Dios tan diad pangiyaplika ed satan ed bilay tayo. Sakey ni, walaan itayo na manataliman organisasyon nen Jehova, a kaibay alanaan a “matoor tan makabat ya aripen” tan say maaron mamatatken to, pian siaanos a mamastol ed sikatayo diad dalan a nepeg tayon laen. Walaan itayo na sankagloboan a panagpulong a kaukolan a sumpalen. (Mateo 24:14, 45-47) Singa si Noe, a siaalwar a tinmulok ed saray madibinon instruksion, komon ta “onman ya onman” so naynay tayon gawaen.
Moises—Say Sankamauyamoan ed Totoo
6, 7. (a) Anton makatumang a panagpili so ginawa nen Moises? (b) Anton makpel a padron so intilak nen Moises parad sikatayo?
6 Konsideraen pay sananey a toon walaay pananisia—si Moises. Nanggayagaan to komon so dilin-makapenek a panagbilay ed utel na saray luho ed Ehipto. Balet pinili to “so kapairap a kaiba na totoo na Dios imbes a nawalaan na temporaryon panggayaga ed kasalanan.” Bilang niganggan ya aripen nen Jehova, “sikato so ninmengneng a mapetepet ed bayar a tumang [tan] nantultuloy ya agnagiing a singano nanenengneng to so Sakey ya agnanengneng.”—Hebreos 11:23-28.
7 Diad Numeros 12:3, nabasa tayo: “Say toon Moises so arawin sankamauyamoan ed amin a totoo a walad tapew na dalin.” Midumaan, kinmiwas so Faraon na Ehipto a singa sankamapaatagey ed amin a totoo. Sanen inganggan nen Jehova si Moises tan Aaron ya iyabawag so panangukom to ed si Faraon, panon so inkiwas da? Nibaga ed sikatayo: “Ginawa nen Moises tan Aaron so unong ed inganggan ed sikara nen Jehova. Onman ya onman so ginawa ra.” (Exodo 7:4-7) Agaylan makpel a padron parad sikatayo a mangiyaabawag ed saray panangukom na Dios natan!
8. Panon a kinerew ed saray Israelita ya “onman ya onman” so gawaen, tan panon a say resultan panggayaga so nipara ed asingger ya arapen?
8 Kasin matoor a sinuportaan na saray Israelita si Moises? Kayarin pinairap nen Jehova so Ehipto na anemira ed samploran bakbak, inikdan to so Israel na detalyado iran instruksion ed panagselebray Paskua. “Sirin tinmuek tan tinmalimukor a mismo so totoo. Kabekta saray anak nen Israel so tinmuloy tan ginawa ra so unong ed inganggan nen Jehova ed si Moises tan Aaron. Onman ya onman so ginawa ra.” (Exodo 12:27, 28) Diad kapegleyay labi ed saman a napnoy-ebenton agew, Nisan 14, 1513 K.K.P., ginapoan na anghel na Dios a pateyen so amin a panguloan na Ehipto balet ta nilabsanan to iray ayaman na Israelita. Akin a niliktar iray panguloan nen Israel? Lapud aromog da so proteksion ed silong na dala na korderoy Paskua, ya inwalsik ed saray puerta ra. Ginawa ra so unong ed inganggan nen Jehova ed si Moises tan Aaron. On, “onman ya onman so ginawa ra.” (Exodo 12:50, 51) Diad Ambalangan Dayat, ginawa ni nen Jehova so sakey a milagro diad impangisalba ed matulok a totoo to bangta dineral si Faraon tan saray makapanyarin puersan militar to. Agaylay impanliket na Israelitas! Ontan met natan, dakel a tinmutulok ed saray ganggan nen Jehova so manggayaga ed pakaimaton ed kiyalangon to diad Armagedon.—Exodo 15:1, 2; Apocalipsis 15:3, 4.
9. Antoran modernon-panaon a pribilihyo so iyaanino na “onman ya onman” a ginawa na saray Israelita no nipaakar ed tabernakulo?
9 Sanen inganggan nen Jehova so Israel pian mankontribusyon tan mangipaalagey na tabernakulo diad kalawakan, sibubunlok a sigpot ya anuporta so totoo. Insan, anggan diad sankamelagan a detalye, si Moises tan saray kaiba ton mabulos a komikimey so anumbok ed saray arkitektural a planon intarya nen Jehova. “Kanian say kimey parad tabernakulo na say tolda na duypo so akompleton amin, diad bengatlan saray anak nen Israel so nantultuloy a nankimey unong ed amin ya inganggan nen Jehova ed si Moises. Onman ya onman so ginawa ra.” Mipadpara, diad inagurasyon na inkasaserdote, “ginapoan nen Moises a gawaen unong ed amin ya inganggan ed sikato nen Jehova. Onman ya onman so ginawa to.” (Exodo 39:32; 40:16) Diad modernon panaon, walaan tayo na pankanawnawa ya interon-puson manuporta ed panagpulong tan saray programa parad kilaknab na Panarian. Kanian pribilihyo tayo sirin ya “onman ya onman” so gawaen tekep na pankakasakey.
Josue—Makpel tan Mabisbiskeg
10, 11. (a) Anto so anginlong ed si Josue parad itatalona? (b) Panon itayon napabiskeg ya ontalona ed saray subok ed modernon panaon?
10 Sanen inganggan nen Moises si Josue a mangidaulo ed Israel a mamaarap ed dalin ya insipan, maseguron say impuyan a nisulat a Salita nen Jehova so niwala lambengat ed limaran libro nen Moises, ed sakey odino duaran salmo, tan say libro nen Job. Binilin nen Moises si Josue a dagupen so totoo sano nasabi ra lay Insipan a Dalin tan pian “basaen iyan ganggan ed arap na amin ya Israel diad pakadngel da.” (Deuteronomio 31:10-12) Niarum ni, si Jehova a mismo so angiganggan ed si Josue: “Sayan libro na ganggan so nepeg ya ag-onarawi manlapud sangim, tan sika so nepeg a manbasan makalna manlapud saya ed agew tan labi, ta pian naasikasom a gawaen so amin unong ed nisulat ed satan; ta diad ontan et nagawam a matalona so dalan mo tan diad ontan et onkiwas ka a sikakabat.”—Josue 1:8.
11 Say inagew-agew a panagbasa ed “libro” nen Jehova so anginlong ed si Josue pian nabenbenan iray subok a walad arapen, no panon a say inagew-agew a panagbasa na Salita nen Jehova, say Biblia, so mamapabiskeg ed modernon-agew a Tastasi To pian talonaan iray subok ed sarayan maatap a “kaunoran iran agew.” (2 Timoteo 3:1) Lapud napapaliberan itayo na sakey a marawal a mundo, ipapuso tayo met so simbawa na Dios ed si Josue: “Manpakpel tan manpabiskeg. Agka nakigtot odino natalagnaw, ta si Jehova a Dios mo so kaibam inerman a laen mo.” (Josue 1:9) Kayari impanakop ed Canaan, siyayaman a tinumangan iray tribu na Israel sanen nanayam ira ed tawir da. “Unong ya inganggan nen Jehova ed si Moises, ontan met so ginawa na ananak nen Israel.” (Josue 14:5) Mipadparan tumang so manatalaran ed amin ed sikatayo natan a manbabasay Salita na Dios tan mangiyaaplika ed satan ed bilay tayo, ya “onman ya onman” so sititulok a gagawaen.
Arari—Matoor tan Matunganga
12. (a) Anton ganggan so niiter ed arari na Israel? (b) Anto so resulta na insaew ya itulok na arari?
12 Komusta so nipaakar ed arari diad Israel? Inggeter nen Jehova ed ari iyan kakaukolanen: “Sano onyuyurong ed trono na panarian to, nepeg toy mangisulat ed sakey a libro parad inkasikato na sakey a kopya na sayan ganggan manlapud samay walad panangasikaso na saray saserdote, saray Levita. Tan satan so nepeg a mantultuloy ed sikato, tan nepeg ton basaen itan ed amin ya agew na bilay to, ta pian naaralan ton takotan si Jehova a Dios to ta pian sumpalen ya amin so salita na sayan ganggan tan sarayan regulasyon diad panggawa ed saratan.” (Deuteronomio 17:18, 19) Tinulok ta na arari na Israel itan a ganggan? Diad baleg a kabiangan, talagan sikaray sinmaew, kanian sikaray anagmak na saray samba a nipasakbay ed Deuteronomio 28:15-68. Kaunoran, say Israel so nitaytayak “manlapud sakey a sampot na dalin angga ed sananey a sampot na dalin.”
13. Panon itayon nagunggunaan, a singa si David, ed panangipanengneng na aro parad Salita nen Jehova?
13 Anggaman ontan, si David—say inmunan matoor ya atooan ya ari diad Israel—so angipanengneng na nikadkaduman debosyon ed si Jehova. Sikatoy apaneknekan a ‘sakey a kilaw a leon ed Juda,’ a mangiyaanino ed Kristo Jesus, say mansasakop a ‘leon ed tribu nen Juda, say lamut nen David.’ (Genesis 49:8, 9; Apocalipsis 5:5) Iner so nanlapuan na biskeg nen David? Sikatoy awalaan na aralem a pakatalos ed nisulat a Salita nen Jehova tan nambilay unong ed satan. Diad Salmo 19, “sakey a melodya nen David,” nabasa tayo: “Say ganggan nen Jehova so ayadyari.” Kayari impanukoy ed panonot, saray kerew, ganggan, tan hudisyal iran desisyon nen Jehova, intuloy ya inkuan nen David: “Saraya so panpilalekan nen say balitok, on, nen say dakel a dinalisay a balitok; tan mas masamit nen say dilo tan say onaagus a dilo ed saray ubong-na-dilo. Ontan met, say aripen mon dili so pinasakbayan na saratan; diad panumbok ed saratan wala so baleg a tumang.” (Salmo 19:7-11) No say inagew-agew a panagbasa na Salita nen Jehova tan say panagdalepdep ed satan so makagungguna ed apalabas a 3,000 a taon, agaylan lalo ed sayan panaon!—Salmo 1:1-3; 13:6; 119:72, 97, 111.
14. Diad anton dalan ya ipapanengneng na kurang nen Solomon so pankaukolan na nagkalalo nensay pikakabat?
14 Balet agmagenap so pangamor lambengat na pikakabat. Importanti met parad ariripen na Dios so ikiwas unong ed satan a pikakabat, iyaplika itan unong ed madibinon linawa—on, “onman ya onman” so gawaen. Saya so niyilustra ed kaso na anak nen David si Solomon, a pinili nen Jehova “pian onyurong ed trono ed inkaari nen Jehova ed Israel.” Inawat nen Solomon so asainmin ya ipaalagey so templo, ya usaren so arkitektural iran plano ya inawat nen David “diad panamegley na inkipuyan.” (1 Awaran 28:5, 11-13) Panon a nasumpal nen Solomon iyan abalbaleg a kimey? Bilang ebat na pikakasi to, sikatoy pinagamoran nen Jehova na kakabatan tan pikakabat. Tekep na saraya, tan diad pananumbok ed madibinon impuyan iran plano, nipaalagey nen Solomon itan a makapakelkelaw ya abung, a napnapno na gloria nen Jehova. (2 Awaran 7:2, 3) Balet diad saginonor et sinmaew si Solomon. Diad anton pamaakaran? Inkuan na ganggan nen Jehova nipaakar ed arari diad Israel: “Nepeg ya agto manparakel na asawa parad inkasikaton dili, pian agnisuwawi so puso to.” (Deuteronomio 17:17) Balet si Solomon so “awalaan na piton lasus ya asawa, saray prinsesa, tan taloran lasus a kalugoran; tan saray asawa to so kalkalnan . . . inkiling so puso to ya ontumbok ed arum a dirios.” Diad kaunoran iran taon to, aliwan “onman ya onman” so ginawa nen Solomon.—1 Arari 11:3, 4; Nehemias 13:26.
15. Panon ya “onman ya onman” so ginawa nen Josias?
15 Walaray pigaran matulok ya arari diad Juda, a say kaunoran ed sikara et si Josias. Diad taon 648 K.K.P., nilinisan to so dalin manlapud idolatriya tan inapiger so templo nen Jehova. Ditan aromog na atagey a saserdote so “libro na ganggan nen Jehova ed panamegley ed lima nen Moises.” Anto so ginawa nen Josias nipaakar ed saya? “Natan et linma so ari na abung nen Jehova a kaiba so amin a lalaki na Juda tan saray manaayam ed Jerusalem tan saray saserdote tan saray Levita tan say amin a totoo, say ankabaleg ontan met ed ankelag; tan ginapoan ton basaen ed sikara ed kalayagan da so amin a salita na libro na sipan, ya aromog ed abung nen Jehova. Say ari so nansiansian akaalagey ed pasen to tan ginmapon misipanan ed arap nen Jehova pian mantultuloy ya ontumbok ed si Jehova tan sumpalen iray ganggan to tan saray testimonya to tan saray regulasyon to ed amin a puso to tan ed amin a kamarerwa to, pian gawaen iray salita na sipan ya akasulat ed sayan libro.” (2 Awaran 34:14, 30, 31) On, “onman ya onman so ginawa” nen Josias. Bilang resulta na matoor a kurang to, say inkipakat na panangukom nen Jehova ed andiay-pananisian Juda so tinmunda anggad saray agew na delinkuenten ilalak to.
Panbilay Unong ed Salitay Dios
16, 17. (a) Diad antoran pamaakaran a nepeg tayon tumboken iray bakat nen Jesus? (b) Siopa ni arum ya ariripen na Dios so mangitatarya na ehemplo parad sikatayo?
16 Ed amin a totoon nambilay ed kapiganman, say sankaabigan ya uliran ed panagdalepdep na Salitay Dios tan panagbilay unong ed satan et say Katawan a Jesu-Kristo. Say Salitay Dios so singano tagano ed sikato. (Juan 4:34) Imbaga to ed dumerengel to: “Say Anak so agmakapanggawa na anggan sakey a bengatla diad dilin bunek to, noagta no anto lambengat so nanenengneng ton gagawaen na Ama. Ta antokaman iran bengatlan gagawaen na saman a Sakey, sarayan bengatla so gagawaen met na Anak ed mipadparan paraan.” (Juan 5:19, 30; 7:28; 8:28, 42) “Onman ya onman so ginawa” nen Jesus, ya angiyabawag: “Siak so linmeksab manlapud tawen pian gawaen, aliwan say linawak, noagta say linawa na samay angibaki ed siak.” (Juan 6:38) Ipapaimano ed sikatayon dedikadon Tastasi nen Jehova ya “onman ya onman” so gawaen diad panumbok ed saray bakat nen Jesus.—Lucas 9:23; 14:27; 1 Pedro 2:21.
17 Say panggawa na linawa na Dios so sankamanunaan ed kanonotan nen Jesus. Sikato so mikabisadon maong ed Salitay Dios tan sirin akinlongan a mangiter na makasulatan ya ebaebat. (Mateo 4:1-11; 12:24-31) Diad naynay a panangimano ed Salitay Dios sikatayo met so magmaliw a “sigpot a walaay kapasidad, sikokompleto ya akinlongan nipaakar ed kada maong a gawa.” (2 Timoteo 3:16, 17) Komon ta tumboken tayo so ehemplo na matoor ya ariripen nen Jehova diad inmunan panaon tan diad sinmaginonor iran panaon tan manuna ed amin samay diad Katawan tayo, si Jesu-Kristo, a nankuan: “Ta pian nakabatan na mundo ya inarok so Ama, singa ed ganggan ya inter na Ama ed siak pian gawaen, onman so gagawaen ko.” (Juan 14:31) Komon ta “onman ya onman” so mantultuloy tayon gawaen bilang panangipatnag met na panangaro tayo ed Dios.—Marcos 12:29-31.
18. Anto so nepeg a mamaligsa ed sikatayo a “magmaliw a mananumpal na salita,” tan anto so ontumbok a singbaten?
18 Legan a dadalepdepen tayo so matulok a kurang na ariripen na Dios ed panaoy Biblia, agta sikatayo so napapaseseg a gawaen so matoor a serbisyo legan na pansamposampot iran agew na marelmeng a sistema nen Satanas? (Roma 15:4-6) Talagan nepeg tayon napaligsan “magmaliw a mananumpal na salita” diad nagnap a pantalos, singa ed singbaten na ontumbok ya artikulo.—Santiago 1:22.
Kasin Natandaan Yo?
◻ Anto so nepeg a kabaliksan parad sikatayo na “panangaro na Dios”?
◻ Anto so naaralan tayo manlapud ehemplo di Noe, Moises, tan Josue?
◻ Diad anton laknab a tinulok na arari na Israel so “salita” na Dios?
◻ Panon a si Jesus so Uliran tayo ed panggawa na “onman ya onman”?
[Saray litrato ed pahina 15]
“Onman ya onman so ginawa” di Noe, Moises, tan Josue