Ligliwa tan Panamaseseg—Ankablin Baton Nandurumay Dakep
MASLAK ed sikatayo so akasagmak na saray panaon sanen sikatayoy nakakaposan—aliwan lapud kuarta noagta begtebegtew. Sikatayoy naandiay ilalo, pirmin nagogonigon ni ingen. Ingen, diad saratan a panaon et nayarin sankaabot tayo so sakey a bengatlan mabli a pasaragen to itayon makagawa na maong. Satan a “mablin bato” et say panamaseseg.
Diad Biblia et saksakey a Griegon salita so inusar parad “paseseg” tan “ligliwa.” Ipapaamta na namparan salita so pakaliknan mangipapatalos ed tepel, biskeg, odino ilalo. Malinlinew sirin, sano makapuy so liknaan odino nimedmer, say ligliwa tan panamaseseg so eksakto iran kaukolan tayo. Iner kasi so pakaromogan?
Ipapaseguro na Biblia ed sikatayo a si Jehova so “say Dios na ami ligliwa.” (2 Corinto 1:3) Ibabaga met na saya ed sikatayo a “sikato so aliwan arawi ed kada sakey ed sikatayo.” (Gawa 17:27) Kanian naromog so ligliwa tan panamaseseg. Konsideraen tayo pay apatiran manunan lawak a pangitataryaan nen Jehova na panamaseseg.
Diad Panamegley na Personal a Relasyon ed Dios
Say sankabalgan a lapuan na ligliwa et say personal a relasyon ed si Jehova a Dios. Makapaseseg so bengatlan posibli so ontan a relasyon. Anggaman kuan, siopan manuley ed mundo so mangawat ed saray tawag ed telepono odino mangibalikas na personal ya interes ed saray problema tayo? Si Jehova so mas nagkalalon makapanyari nen saratan a totoo. Ingen, sikatoy mapaabeba—talagan mabulos a mideneng ed totoon abeba tan ag-ayadyari. (Salmo 18:35) Si Jehova ni ingen so inmunan kinmiwas ed pangipanengneng na aro ed sikatayo. Oniay kuan na 1 Juan 4:10: “Say aro so walad sayan pamaakaran, aliwan lapud sikatayo so angaro ed Dios, noagta sikato so angaro ed sikatayo tan angibaki ed Anak to bilang makapikareenan a bagat parad saray kasalanan tayo.” Niarum ni, simamaaro si Jehova ya iyaasingger itayo ed Anak to.—Juan 6:44.
Sika ta so kinmiwas tan inanap moy ligliwa diad pikakaaro ed Dios? (Ikompara so Santiago 2:23.) Singa bilang, no walaan ka na pinabli tan maapit a kaaro, agta sakey a liket so pangusar moy panaon a mibukbukoran ed saman a kaaro, a walaay kawayangan a pantongtongan iray kapagaan tan kaaburidoan yo, saray ilalo tan saray gayaga yo? Ontan met so pangiimbitaan nen Jehova a gawaen mo ed sikato. Agto gegetaran so kabayag na pitongtong mo ed sikato diad pikakasi—tan sikatoy peteg ya ontatalineng. (Salmo 65:2; 1 Tesalonica 5:17) Si Jesus so regular tan sisisimoon a nampikasi. Diad tua, sakbay a piliey 12 apostoles to, sikatoy sanlabin nampikasi.—Lucas 6:12-16; Hebreos 5:7.
Panapanaon et kada sakey ed sikatayo so nayarin mibukbokoran ed si Jehova. Say iyurong lambengat ed asingger na bintana odino mareen a panakar so makapangitarok na maong a pankanawnawa ed pangilukas na puso tayo ed si Jehova diad panpikasi. Say panggawa ed saya so panlapuan na abalbaleg a pakainawaan tan ligliwa. No imanoen so pigaran aspeto na palsa nen Jehova legan na pandadalepdep tayo—anggan sakey labat a parti na tawen, pigaran kiew odino manok—diad satan a paraan et makaromog tayo na pigaran makaligliwan panonot na panangaro tan panangiyansakit ed sikatayo nen Jehova.—Roma 1:20.
Diad Panamegley na Personal a Panagaral ed Salita na Dios
Balet diad panamegley na personal a panagaral na say Biblia a saray kualidad nen Jehova so peteg a niparungtal ed sikatayo. Naulit-ulit ya ipaparungtal na Biblia a si Jehova so “Dios a mapangasi tan maong a linawa, matantan a manpasnok tan daakan ed maaron-kaabigan.” (Exodo 34:6; Nehemias 9:17; Salmo 86:15) Sipor lan kualidad na personalidad nen Jehova so pilalek a ligliwaen iray ariripen to.
Singa bilang, konsideraen pa iray salita nen Jehova diad Isaias 66:13: “Singa sakey a toon naynay a liligliwaen na dilin ina to, ontan ta kayo met a naynay a ligliwaen sikayon totoo.” Denisinyo nen Jehova a say panangaroy ina ed saray anak to so magmaliw a dilin-panagsakripisyo tan matoor. No akanengneng ka la na maaron ina a manliligliwa ed asugatan ya anak to, kabat mo no antoy labay ya ibaga nen Jehova sano ikuan to a ligliwaen to so totoo to.
Dakel a salaysay ed Biblia a mangipapanengneng na ontan a ligliwa diad gawa. Sanen amagyaw si marelmeng a Reyna Jezebel ya ipapatey si propetan Elias, abalang toy inkakpel to tan tinmakas. Ontanlay inkataktakot to ya abasbas toy kalawakan parad sanagew a panagbaroy, mapatnag ya ag-akapangawit na danum odino panustos to. Lapud ermen to inkuan nen Elias ed si Jehova a labay to lay ompatey. (1 Arari 19:1-4) Antoy ginawa nen Jehova pian ligliwaen tan pasesegen so propeta to?
Agbinaat nen Jehova si Elias lapud liknaan ton manbukbukor, andi-kana, tan inkataktakot. Kasunian to, nadngel na propeta so “sakey a kalmado, abeba a boses.” (1 Arari 19:12) No basaen mo so 1 Arari kapitulo 19, naimanom no panon a niligliwa nen Jehova si Elias, sikatoy pinakepa, tan pinabiskeg so pananisia to. Saya so aliwan palaway a panagligliwa. Tinmanek itan anggad nagugulon puso nen Elias, ya amaseseg ed propetan mantultuloy. (Ikompara so Isaias 40:1, 2.) Agnambayag, pinawil toy asainmin to.
Liligliwaen tan papasesegen met nen Jesu-Kristo iray matoor a patumbok to. Diad tua, nampropesiya si Isaias nipaakar ed Mesias: “Say Soberanon Katawan a Jehova . . . so angibaki ed siak pian mamedber ed saray nagban puso, . . . pian ligliwaen so amin a mannanangis.” (Isaias 61:1-3) Diad interon bilay to, impalinew nen Jesus a saratan a salita so onaaplika ed sikato. (Lucas 4:17-21) No naliknam a kaukolan moy ligliwa, dalepdepen so mabanayat tan maaron pidedeneng nen Jesus ed totoon asakitan tan mankakaukolan. On, say maalwar a panaral na Biblia so baleg a lapuan na ligliwa tan panamaseseg.
Diad Panamegley na Kongregasyon
Diad Kristianon kongregasyon, saray mablin bato na ligliwa tan panamaseseg so mankirlap diad nanduruman dakep. Si apostol Pablo so apuyanan a mangisulat: “Mantultuloy a ligliwaen so sakey tan sakey tan pabiskegen so sakey tan sakey.” (1 Tesalonica 5:11) Panon a naromog ed saray miting ed kongregasyon so ligliwa tan panamaseseg?
Siempre, manuna ed amin et atendian tayoray Kristianon miting ta pian ‘nabangatan nen Jehova,’ pian naawat iray bangat nipaakar ed sikato tan saray dalan to. (Juan 6:45) Saratan a panagbangat so ginetma pian magmaliw a makapaseseg tan makaligliwa. Oniay nabasa tayo ed Gawa 15:32: “Si Judas tan Silas . . . pinaseseg daray agagi ed panamegley na dakel a diskurso tan pinabiskeg ira.”
Naeksperiensiam ta la so inyakar ed Kristianon miting ed panaon a sika so naandiay ilalo tan makasempet a magmaong lay liknaan mo? Anganko walay bengatlan nibaga ed paliwawa, diad sakey a komento, odino diad sakey a pikakasi ya anenyeg ed pusom tan angitarya na nakakaukolan a ligliwa tan panamaseseg. Kanian agsasaewen iray Kristianon miting.—Hebreos 10:24, 25.
Say pililimog ed agagi tayo diad ministeryo tan ed arum niran okasyon so walaan na mipadparan epekto. Diad Hebreo, pigaran verbo a mankabaliksan na “bedberen a saniiba” so asabin tinukoy to met so “biskeg” odino “pabiskegen”—say malinew ya ideya et say pagmaliw a mas mabiskeg sano takeren a saniiba. Sayan prinsipyo so tua ed kongregasyon. Sikatayo met so naliligliwa, napapaseseg, on, napapabiskeg, diad panlilimog a saniiba. Tan sikatayo so bebedberen na aro a nankakasakey, say sankabiskegan ed amin a bedber.—Colosas 3:14.
No maminsan et say katooran na espiritual ya agagi tayo so mamapaseseg ed sikatayo. (1 Tesalonica 3:7, 8) No maminsan et say aron ipapanengneng da. (Filemon 7) Tan no maminsan et say pankimey lambengat a saniiba, benebenek, legan ya itotongtong ed arum so Panarian na Dios. No onkakapuy ka tan mankakaukolan na panamaseseg nipaakar ed ministeryo, akin ya ag-iyuksoy so pikimey ed sakey a matatatken odino mas eksperiensiadon manangipalapag na Panarian? Maseguron naromog mo so baleg a ligliwa diad panggawam ed satan.—Eclesiastes 4:9-12; Filipos 1:27.
Diad panamegley na “say Matoor tan Makabat ya Aripen”
Siopa so mangoorganisa ed makapaligliwa iran kabiangan na panagdayew tayo? Pinabtangan nen Jesus so sakey a klase a tinukoy to bilang “say matoor tan makabat ya aripen” pian mangipasabi na espiritual “a tagano ed say manepeg a panaon.” (Mateo 24:45) Nen inmunan siglo K.P., sayan ulop na alanaay espiritu a Kristianos so onkukurang la. Say mananguley ya ulop na mamatatken diad Jerusalem so angipatulor na saray sulat na instruksion tan panangigiya ed saray kongregasyon. Tekep na anton resulta? Inrekord na Biblia no panon so inkiwas na saray kongregasyon ed sakey ed ontan a sulat: “Kabasa ra, nanliketan da so panamaseseg.”—Gawa 15:23-31.
Ontan met, diad sarayan maatap a kaunoran iran agew, say matoor tan makabat ya aripen so mangipapasabi na espiritual a tagano a mangitatarya na baleg a ligliwa tan panamaseseg ed totoo nen Jehova. Mibibiang ka ta ed satan a tagano? Naala itan diad niimprinta a literatura ya itatarok na aripen a klase ed interon mundo. Saray magasin a Panag-Bantayan tan Awake! ontan met ed saray libro, brosyur, tan tract ya ipapalapag na Watch Tower Society so angitarok na ligliwa ed dakerakel a managbasa.
Oniay insulat na sakey a managbiahen manangasikaso: “Kaslakan ed agagi tayo so malabay a manggawa na susto, balet mabetbet a sikaray mipupuligesgesan ed inkadismaya, takot, tan say liknaan a sikaray andiay-pakayari pian tulongay sarili ra. Saray artikulo ed sarayan dyurnal tayo so ontutulong ed dakel pian napapawil so abilidad a napetek so bilay tan emosyon da. Mas ni nen say palaway a panamaseseg so iiter met na saray artikulo pian nausar na mamatatken.”
Usaren a sigpot so literatura a manlalapud say matoor tan makabat ya aripen a klase. Say nipanpanaon iran magasin, libro, tan arum niran publikasyon so makatulong ed sikatayon naromog so ligliwa sano onsabi mairap a panaon. Diad biek a dapag, no sika so wala’d posisyon a napaseseg so sakey a walaay depresyon, usaren so Makasulatan ya impormasyon ed sarayan dyurnal. Saray artikulo so nisulat a maal-alwar, mabetbet kayari dakel a simba odino bulan na makulin impan-research, impanaral, tan pikakasi. Say konseho so nibased-Biblia, asubok tan tua. Aromogan na arum a makatulong a tuloy so panbasa na sakey odino duaran matukoy ya artikulo ed sakey ya onleletey. Saya so nayarin manresulta ed baleg a ligliwa tan panamaseseg.
No akaromog ka na ankablin bato, iyamot mo ta, odino sibubunlok mon inabang so pigara ed kaykayamanan ed arum? Gawaen a kalat so pagmaliw a sakey a lapuan na ligliwa tan panamaseseg ed agagim diad kongregasyon. No mamabiskeg ka imbes a mangigeba, mangomenda nen say mamalaw, mansalita tekep na “say dila na saray abangatan” imbes nen say ‘agsinononot iran duyok na sakey a kampilan,’ baleg so nagawaan mo ed bilay na arum. (Isaias 50:4; Uliran 12:18) On, maseguron sikan mismo so moriaen bilang sakey a mablin bato—sakey a lapuan na puron ligliwa tan panamaseseg!
[Kahon ed pahina 20]
Ligliwa Parad Saramay Mankaukolan
DAKEL so nankomento no panon ya arum ed artikulo na say Panag-Bantayan odino Awake! so amaaralem na personal a relasyon da’d si Jehova. Oniay inkuan na sakey: “Kayari impakabasa ed sayan artikulo, aliknak a kaibak si Jehova tekep na amin a pakapanyari tan kabalgan to. Aliknak a sikato so peteg a persona.” Insalaysay na sakey nin sulat: “Ontanlay kabaleg na impanguman na saray panmoria mi ed si Jehova diad kapusoan tan kaisipan mi a sikami aliwan singa lay gendat. A singa amunas ed antepara mi, tan natan et malinlinew so pakanengneng mi ed amin a bengatla.”
Arum so nansulat pian ibalikas no panon a saray magasin so tinmulong ed sikaran mideneng ed espisipikon problema odino saray angat, a diad panamegley na saraya et naseseguro ra so personal ya interes ed sikara nen Jehova. Onia so inkuan na sakey a managbasa: “Pisalamatan ta kayon tuloy ed impangipanengneng yo ed sikami no kaunongay kabaleg na panatalima tan aro nen Jehova ed totoo to.” Oniay inkuan na sakey a bii ed Hapon ya inateyan na anak nipaakar ed saray artikulo na Awake! ed satan a tema: “Nikalbo ed saray pahina so kinaaralem na panangasi na Dios, tan siak so nanakis lan nanakis. Inyan ko irayan artikulo ed lugar a mainomay kon nabasa kapiganman a siak so naeermenan tan begtebegtew.” Insulat ni na sakey a biin mandadageyem: “Saray artikulo na Panag-Bantayan tan Awake! tan say brosyur a “Sano Naandi’d-bilay so Pinabli Yo” so angiter na say kaukolan kon biskeg pian nasungdoan so panaon na kaermenan ko.”
Say Masanton Kasulatan so manunan lapuan na ligliwa. (Roma 15:4) Say Panag-Bantayan so ontutumbok ed say Biblia bilang autoridad to, tan ontan met ed say kaiba ton magasin, say Awake! Lapud saya, sarayan dyurnal so apaneknekan a ligliwa tan panamaseseg ed saray managbasa to.
[Litrato ed pahina 23]
Say Dios na ami ligliwa so say Dumerengel met na pikakasi