Onnengneng ed Labas Ni na Bengabengatlan Nanenengneng Mo!

SAKEY a bendisyon so maong a pisikal a pakanengneng. Diad tua, maslak a totoo so mangikuan a pigpigara so bengatlan walad sikara so mas mabli nen say satan. Anggaman ontan, parad saray Kristiano, wala so klase na pakanengneng a sinaglawi nen apostol Pablo a lalon importanti nen say maong a pisikal a pakanengneng. “Ipapaarap mi iray mata mi, aliwan diad bengabengatlan nanengneng, noagta diad saray bengatlan agnanengneng,” so insulat nen Pablo. (2 Corinto 4:18) Satan so talagan nikabkabiig a klase na pakanengneng a mamakayari ed sakey pian nengnengen iray bengatlan agnanengneng! Natawag tayo itan a sakey ya espiritual a 20/20 bista.

Akin a Nakaukolan?

Saray Kristiano ed inmunan siglo so peteg a mankaukolan na pakawalaan na sayan klase na espiritual a pakanengneng. Sasakbaten da so Kristianon ministeryo ra diad silong na pirmin kairapan. Oniay impangisalaysay nen Pablo nipaakar ed saya: “Nadedesdes kami ed kada paraan, balet agnaleletlet ya agmakagalaw; nawewetwet kami, balet agsigpot ya anggapoy napawayan; napapasegsegang kami, balet agtinaynanan a nairapan; nitutumba kami, balet ag-abagbag.”​—2 Corinto 4:8, 9.

Anggaman ed ontan iran sirkumstansya, tinmalindeg a malet iray matoor a babangatan. Tekep na mabiskeg a pananisia ed Dios, nikuan da a singa ed inkuan nen Pablo: “Agkami onsusuko, anggaman say inkatoo mi ed paway so onkakapuy, say akindalem ya inkatoo mi so napapasimbalo ya inagew-agew.” Balet anto ta so angitarok ed sayan inagew-agew a panamasimbalo? Intuloy ya inkuan nen Pablo: “Ta say kairapan so maganggano tan anlemew, manggagawa iya ed sikami na sakey a gloria a walaan na lalon ambelat tan andi-anggaan; legan ya ipapaarap mi iray mata mi, aliwan diad saray bengatlan nanengneng, noagta diad saray bengatlan agnanengneng. Ta saray bengatlan nanengneng so temporaryo, ingen saray bengatlan agnanengneng so andi-anggaan.”​—2 Corinto 4:16-18.

Papasesegen nen Pablo iray espiritual ya agagi ton ag-abuloyan iray problema, irirap, panamasegsegang​—antokaman a nengneng na kairapan​—a mamuragas ed panmoria ra’d maglorian tumang a niparaan ed sikara. Nepeg day onnengneng ed labas ni na saray peles a sirkumstansya ra, ya iyaapasakey so kamataan da ed maliket a pansumpalan na Kristianon kurang. Satan so tinmulong ed sikaran napasimbalo-lamet ed inagew-agew so determinasyon dan ontundas ed pibabakal. Saray Kristiano natan so namparan mankaukolan na ontan a maong ya espiritual a pakanengneng.

Moriaen ya Agmanbayag Iray Peles a Kairapan!

Labay mo man odino andi, inagew-agew tayon nanenengneng iray bengatlan agtayo labay a nanengneng. Onnengneng a magano ed espeho tan agtayo napaliisan a naimano iray agkaliktan a depekto tan matik na pisikal a laman, a pakapatnagan na ag-inkayadyari ed pisikal. Sano onkunineng ed espeho na say Salitay Dios, nanengneng tayoray espiritual a depekto tan matik, namparan diad inkasikatayo tan ed arum. (Santiago 1:22-25) Tan sano onnengneng itayo ed agew-agew a peryodiko odino ed telebisyon, panermenan tayo iray ag-inkahustisya, inkaramsak, tan trahedya a naiimano tayon tampol.

Labay nen Satanas a nadismaya tayo lapu ed saray bengatlan nanengneng tayo odino pian nisuawi tan onggapon onkesay ed pananisia. Panon tayon naamper iyan nagawa? Nepeg tayon tumboken so uliran ya inletneg nen Jesu-Kristo, a singa ed inrekomenda nen apostol Pedro sanen inkuanto: “Diad tua, atawag kayo ed sayan kurang, lapud anggan si Kristo so nanirap parad sikayo, ya angitilak na modelo ed sikayo pian tumboken yoray bakat ton maapapit.” (1 Pedro 2:21) Diad kada nengneng na Kristianon kabibilay, si Jesus so ayadyarin uliran.

Diad impanukoy ed si Jesus bilang modelo tayo, nagkalautlan sinaglawi nen Pedro a si Jesus so nanirap. On, pirmin nanirap si Jesus sanen wadia ed dalin. Bilang “uloen a komikimey” nen Jehova a wadman sanen pinalsay katooan, kabat ton tuloy no anto so ginetma na Dios parad totoo. (Uliran 8:30, 31) Balet natan et aktual ton anengneng no antoy epekto na kasalanan tan ag-inkayadyari ed sikara. Inagew-agew ton anengneng tan kaukolan ton pidenengan iray ag-inkayadyari tan kakapuyan na totoo. Talagan satan so makapasubok ed sikato.​—Mateo 9:36; Marcos 6:34.

Likud ed saray kairapan na arum, anengneng met nen Jesus so dilin kairapan to. (Hebreos 5:7, 8) Ingen tekep na espiritual a pakanengneng, ninmengneng ed labas ni na saratan pian nanengneng so tumang ed kipaatagey ed imortal a bilay lapud kurang na katooran to. Diad satan a panaon bilang Mesianikon Ari, sikatoy nawalaan na pribilihyon mangagwat ed napapairap a katooan manlapud nipaabeban kipapasen pian nipawil ed inkayadyari ya orihinal a gagala nen Jehova. Say kipasakey na pakanengneng to ed sayan agnanengneng ya iilaloan ed arapen so tinmulong ed sikaton apanmantini so gayaga ed maridios a serbisyo anggaman ed saray kairapan ya anengneng to ya inagew-agew. Insulat nen Pablo ed saginonor: “Ta say gayagan niteen ed arapan to sinungdoan toy panamairapan a kiew, a pinabanday toy baing, tan sikatoy yinmurong ed nikawanan na trono na Dios.”​—Hebreos 12:2.

Ag-inabuloyan nen Jesus iray kairapan tan makapasubok iran sirkumstansyan manismaya ed sikato, mangisuawi ed sikato, odino mamakesay ed pananisia to. Bilang babangatan to, nepeg tayon tumboken a maapapit so sankaabigan ya uliran to.​—Mateo 16:24.

Iyapasakey so Imano ed Agnanengneng tan Andi-anggaan a Bengabengatla!

Diad panalambit nipaakar ed amasarag ed si Jesus pian makapansungdo, tinukoy met nen Pablo so kurang parad sikatayo sanen insulat to: “Batiken tayo tekep na sungdo so lumban nipaarap ed sikatayo, legan a sikatayoy onnengneng a maong ed say Manunan Ahente tan Manamayadyari na pananisia tayo, si Jesus.” (Hebreos 12:1, 2) On, pian nabatik tayo so Kristianon kurso a siaaligwas tan sigagayaga, nepeg itayon onnengneng ed labas ni na saray bengatlan asingger ed arapan tayo. Balet panon tayon “onnengneng a maong” ed si Jesus, tan antoy nagawaan na saya parad sikatayo?

Bilang alimbawa, nen 1914, aturo si Jesus bilang Ari na Panarian na Dios, tan sikatoy manuuley la manlapud tawen. Siempre, amin na saya et agnanengneng na saray pisikal a mata tayo. Ingen, no “onnengneng [itayo] a maong” ed si Jesus, tulongan itayo na espiritual a pakanengneng tayo a nanengneng a sikatoy akaparaan natan ya onkiwas pian itarok ed panganggaan so peles a sistema na bengabengatla tan say kapalis nen Satanas tan say demoniko iran ulopan to ed kabalor ed inkainaktibo. Niarum ni, iparungtal na espiritual a pakanengneng tayo so marakerakep a balon mundo a ditan et say “patey so naandi la, anggan say pandageyem nisay pannangis nisay ot-ot so wala ni. Say inmuna iran bengatla so linmabas la.”​—Apocalipsis 19:11-16; 20:1-3; 21:4.

Sirin, imbes a nabelatan na saray temporaryon kairapan a nayarin nipaarap ed sikatayo kada agew, akin ya agtayo iyapasakey so imano tayo ed saray bengatlan magnayon? Tekep na saray mata na pananisia, akin ya agtayo onnengneng ed labas ni na sakit tan agum na sayan arutakan a dalin pian nengnengey paraison napno na mabunigas, maliket, tan maasikason totoo? Akin ya ag-onnengneng ed labas ni na saray depekto tayo, namparan diad pisikal tan espiritual, tan nengnengen tayoy inkasikatayo a nibulos ya andi-anggaan manlapud saratan diad merito na dondon bagat nen Kristo? Akin ya ag-onnengneng ed labas ni na saray bangkay a tinaynan na guerra, krimen, tan karawalan tan nengnengen so kapkapanpaoli a nibabangat ed kareenan tan inkatunong nen Jehova?

Niarum ni, say ‘inengneng a maong’ ed si Jesus et laktipen to met so pangiyapasakey ed espiritual a pakanengneng tayo ed no anto so agawaan la na Panarian, anggaman agnanengneng, ed limog na totooy Dios ed dalin: pankakasakey, kareenan, aro, inaagin aroan, tan espiritual ya ibubulaslas. Oniay insulat na sakey a Kristianon bii ed Alemanya kayari impanbantay to ed video ya United by Divine Teaching: “Say video so tinmulong ed siak a mapalalo pian lawas nonoten a dakel so Kristianon agagi ed interon mundo a diad sayan momento et sitotoor a manlilingkor ed si Jehova​—nagagawa iya anggaman ed isusumpay publiko. Agaylan mabli so inaagin pankakasakey diad mundo na karawalan tan busolan!”

“Nanenengneng” mo ta si Jehova, si Jesus, saray matoor ya anghel, tan minilyon a kaparan Kristiano a manalalagey ed dapag mo? No ontan, agka magmaliw a sobran mapaga ed “say kapagaan ed sayan sistema na bengabengatla” a satan so mangikutep ed sika diad pakadismayaan tan gawaen to kan magmaliw ya “agmabunga” ed Kristianon serbisyo. (Mateo 13:22) Kanian “onnengneng a maong” ed si Jesus diad pangiyapasakey ed espiritual iran matam ed niletneg lan Panarian na Dios tan saray bendisyon to, namparan natan tan diad arapen.

Panbanikelan a Niliktar pian Nanengneng so Agnanengneng!

Diad pakakaimano ed baleg a pandumaan ed baetan na magnayon a balon mundo na Dios tan peles a nakukusbon daan a mundo, kaukolan a sikatayoy napakiwas ya itonton so inkasikatayo ed satan a dalan a sikatayoy nibilang a makana pian manbilay a nanengneng a literal iray bengatla a nayarin nanengneng lambengat na saray espiritual a mata tayo natan. Mairap a panisiaan na amayamay ya apaoli so nanengneng da sano nibangon pian nanengneng so matunong a paraison dalin a duman tuloy manlapud say mundon anengneng da sakbay na impatey da. Isipen pay gayaga diad pagmaliw tayon mabilay pian abrasaen tan isalaysay ed sikara no anto so ginawa na Dios!​—Ikompara so Joel 2:21-27.

On, agaylan mabli so maong ya espiritual a pakanengneng, tan agaylan makana so pamasiansia ed saya a makdem! Saya so nagawaan tayo ed panamegley na personal a panagaral na Biblia, iyatendi ed saray Kristianon miting, itontong ed arum so nipaakar ed nibased-Biblia ya ilalo tayo tan nagkalalo ed amin, panpikasi parad panangigiya na Dios. Saya so mamasiansian makdem tan malinew ed espiritual a pakanengneng tayo, pasaragen to itayon onnengneng ed labas ni na bengabengatlan nanenengneng tayo!