Panumpal ed Samba Na Panangasawa Yo!

SAY agew na kasal so magayagan agew. Satan met so seryoson maong ya okasyon. Say nobya tan nobyo so manggawa na masimoon a sipanan a satan so mangapekta ed interon panbilay da. Saramay wadman ed kasalan a bilang sankaili so tastasi ed sayan masimoon a sipanan, ingen si Jehova a Dios so manunan Tasi.

Agkakaukolanen na Biblia iray espisipikon paraan odino sakey a nikaduman klase na seremonyay kasal. Ingen, bilang panamidbir ed madibinon gapoan, say kasal so maslak a napagalangan diad panamegley na usar na saray samba ed kasal legan na relihyoson seremonya. Diad pigara lan taon, uusaren na Tastasi nen Jehova so onggendan a samba ed kasal: “Siak ​—​— alaen taka ​—​— pian magmaliw ya inkasal ya asawan (bii/laki), pian aroen tan pian pablien (Nobya: tan aralem a respetoen) mitukoyan ed madibinon ganggan a nidatak ed Masanton Kasulatan parad Kristianon asawan (bibii/lalaki), legan a sikatan dua so saniban manbilay ed dalin unong ed uksoyan na Dios ed panangasawa.”a

Sakey a Bengatlan Panisipan

No nononoten mo lay mangasawa, makanakanan isipen so nipaakar ed kinaaralem tan kabaliksan na satan a samba sakbay na agew na kasal. Inkuan nen Solomon: “Agka maganat ed inkasika no nipaakar ed sangim; tan parad say pusom, agka komon manapura a mangibesngaw ed imaton na tuan Dios.” (Eclesiastes 5:2) Panon no wala lay asawam? Diad ontan nagunggunaan ka manlapud pandalepdep ed say kaimportantian na masimoon a sipanan a ginawa yo ed imaton nen Jehova. Susumpalen yo ta itan? Sisisimoon a susumpalen na Kristianos iray sipan da. Intuloy nen Solomon: “No antoy sinambaan mo, sumpal mo. Magmaong ni agka nansamba nen say nansamba ka tan agmo sumpalen. Agmo aabuloyan so sangim a pankasalananen so laman mo, nisay pangibaga ed imaton na anghel a satan et sakey a lingo.”​—Eclesiastes 5:4-6.

Say balikas por balikas a panangonsidera ed samba na kasal so maseguron palaknaben toy pakatalos mo ed sayan masimoon a sipanan.

“Siak —— alaen ta ka”: Saraya so manangilukas a balikas na samba. Ipapabitar na saraya ya aawaten mo so personal a responsabilidad ed desisyon mon mangasawa.

Diad silong na Kristianon uksoyan, anggapo so Makasulatan ya obligasyon pian mangasawa. Si Jesu-Kristo mismo so nansiansian ag-angasawa tan irerekomenda toy kasuloan parad saraman so “makapangilugar ed satan.” (Mateo 19:10-12) Diad biek a dapag, maslak ed saray apostol nen Jesus so walaan na asawa. (Lucas 4:38; 1 Corinto 9:5) Malinew a say desisyon a mangasawa so personal a bengatla. Anggapoy toon walaan na Makasulatan ya autoridad pian paskaren so arum a mangasawa.

Kanian, sika so responsabli ed desisyon mon mangasawa. Maseguro, sika so amili na sakey ya ikasal mo. Sano sika so manggawa ed samba na panangasawa, ya ikuan mo, ‘Alaen ta ka ——,’ aalaen odino aawaten mo itan a too pati saray kaabigan to​—ontan met ed saray kakapuyan to.

Nasabi panaon et nayarin nadiskobrim so ag-iilaloan a personalidad na asawam. Niwala iray sanpaminsan a pakadismayaan. Ibabaga na Biblia ya “amin so nankasalanan tan kinmulang ed say gloria na Dios.” (Roma 3:23) Kanian ompan kaukolan mo so manggaway pananguman pian napidenengan moy asawam. Nayarin saya so mairap, tan no maminsan et nayarin liknaen mon onsuko ka la. Balet nonoten, say samba na panangasawa so agawa ed arap nen Jehova. Natulongan to kayon ontalona.

“Pian magmaliw ya inkasal ya asawan (bii/laki)”: Diad inmunaunan kasal, sanen niiter si Eva ya asawaen nen Adan, inkuan nen Jehova a “sikaray nepeg a magmaliw a saksakey a laman.” (Genesis 2:24; Mateo 19:4-6) Say impanasawa sirin so sankaapitan a relasyon a niwala ed baetan na duaran too. Itatarok ka na panangasawa ed balon pankanayon. Aawaten mo so sakey a magmaliw ya “inkasal ya asawan bii” odino “inkasal ya asawan laki.” Satan so duma ed dinanman nin arum a relasyon. Saray kiwas a mamalesa na melag a kasakitan ed arum a relasyon so nayarin mamalesa na pirmin sakit ed dalem na uksoyan na panangasawa.

Alaen pan alimbawa so Makasulatan a konseho a naromog ed Efeso 4:26. Ditan et ibabaga na Biblia: “Onsanok kayo, tan ingen agmankasalanan; ag-abuloyan ya onselek so agew a manpapasnok kayo ni.” Anganko aliwan naynay a naresolbim iray problema a kaibay kakanayon tan kakaaro a tamtampol a singa ed panggawam. Balet say kapareham so maapit nen say arum a kanayon odino kaaro. Say isaew a panresolbin tamtampol ed saray pamaakaran a kaibay asawam so nayarin mamiligro ed nikaduman pankanayon yo.

Abuloyan mo tay agpakapanpakna ed baetan yon sanasawa pian pansengegan na mantultuloy a pakasyodotan odino pakaungangetan? Kasin say agpantatalosan tan makapasinagem iran situasyon so mansiansia ed loob na pigaran agew? Pian nasumpal moy sambam, sano onlesa iray problema agmo aabuloyay agew ya onlabas ya agka mikareenan ed kapareham. Kabaliksan na saya so panamerdona tan panangilingwan ontan met ed panamidbir ed dilin kakulangan tan saray lingom.​—Salmo 51:5; Lucas 17:3, 4.

“Pian aroen”: Sasambaan na magmaliw ya asawan laki ya “aroen tan pablien” so nobya to. Lalaktipen na sayan aro so romantikon aro a maseguron mansiknol ed sikaran dua. Balet agmagenap so romantikon aro. Say aron sasambaan na Kristiano parad say kapareha to so mas aralem tan mas malaknab.

Ibabagay Efeso 5:25: “Asawan lalaki, mantultuloy yon aroen iray kaasawaan yo, a singa si Kristo inaro to so kongregasyon.” Say aro nen Jesus ed kongregasyon so seguradon aliwan walad parehon kipapasen a singa say romantikon aro ed baetan na agmankasekso. Saray terminon “aroen” tan “inad-aro” a nausar ed sayan kasulatan so nanlapud salitan a·gaʹpe, a manutukoy ed aron igigiya na prinsipyo. Igaganggan dia na Biblia iray asawan laki pian mangipatnag na mantultuloy, mansiansia, mansungdon aro parad asawa ra.

Aliwa labat lan basta “inaro ta ka lapud inaro mo ak” a klase na emosyon. Aanapen na asawan laki so pankaabigan na asawa to a manunaan ni ingen nen sikato, tan aaroen na asawan bii so asawa to ed parehon nengneng. (Filipos 2:4) Say pamayubo ed aralem a panangaro parad say kapareham so ontulong ed sikan manumpal ed sambam ed panangasawa.

“Pian pablien”: Unong ed sakey a diksyunaryo, say kabaliksan na “pian pablien” so ‘pamablin maong, pian ipalikna odino ipanengneng so liknaan ed satan.’ Nepeg mon ipatnag so panangarom namparan diad saray salita tan gawa! Nagkalalo lan kaukolan na asawan bii so mantultuloy iran panangipatnag na aroy asawa to. Say asawa ton laki so mangasikason maong ed say pankaukolan to ed pisikal, balet ag-iya magenap. Walaray asawan bibii a walaan na magenap a tagano tan sakey a komportablin ayaman balet sikaray pirmin maermen lapud napapaulyanan odino nibabaliwala ira na asawa ra.

Diad biek a dapag, say asawan bii a nalilikna ton sikatoy inad-aro tan pinabpabli so maseguron walaay rason a manliket. Siempre, satan met so tua ed asawan laki. Napabiskeg a maong so tuan aro diad panamegley na puron panangibalikas na panangaro. Diad Kanta nen Solomon, inkelyaw na manangaron pastol: “Alay dakep na balikas na panangarom, O agik, say nobyak! Lalon magmaong iray balikas na panangarom nen say alak tan say samyong na saray larak mo nen say amin a klase na pabalingit!”​—Kanta nen Solomon 4:10.

“Tan aralem a respetoen”: Diad dakel laran siglo, walaray lalaki ya angaabuso tan angipabpaabeba ed saray bibii. Anggan natan, unong ed magasin a World Health, “nagagawa so karamsakan sumpad bibii ed kada bansa tan ed kada sosyal tan ekonomikon klase. Diad dakel a kultura, say panagpekpek ed asawan bii so ikokonsideran kanepegan na laki.” Maslak a lalaki so nayarin agmankakasalanan ed ontan a kondukta. Siansia, ompapatnag a dakel a lalaki so onsasaew a mangipanengneng na puron interes ed saray isyu a manasaglawi ed bibii. Bilang resulta, dakel a bibii so akalikna na negatibon awawey nipaakar ed lalaki. Arum ya asawan bibii so nadngel a nankuan, “Inarok so asawak, balet agko narespeto!”

Anggaman ontan, si Jehova a Dios so mangiiter na kablian na bii a manggugunaet pian respetoen so asawa to​—anggaman sikatoy onkulang ed saray iilaloan to sanpaminsan. Bidbiren ton sikatoy walaan na inter-Dios ya asainmin, odino posisyon. (1 Corinto 11:3; Efeso 5:23) Say aralem a respeto parad asawa to so kabiangan na panagdayew tan katutulok to ed si Jehova. Ag-ibabaliwala na Dios so katutulok na maridios a bibii.​—Efeso 5:33; 1 Pedro 3:1-6; ikompara so Hebreos 6:10.

Nepeg a mantekep so respeto ed panangasawa, tan satan so nakaukolan a nagamoran imbes a satan so iilaloan lambengat odino pamaskar. Alimbawa, say makdem odino makapasakit a salita so andian komon na pasen ed uksoyan na panangasawa. Aliwan maaro odino marespeto no manggawa na panagleglemew iran komento nipaakar ed asawam. Anggapoy kaabigan manlapud pangipatnag na kakapuyan na asawam ed arum odino itongtong ira ed publiko. Anggan lurey lambengat et mangipanengneng na sobran agpanagrespeto ed sayan pamaakaran. Onaaplika iray salita na Efeso 4:29, 32 ed saray sanasawa. Ditan et ibabaga na Biblia: “Agkomon ompaway ed sangi yo so abulok a salsalita, balet antokaman a maong a salsalita parad makapabiskeg a pankaukolan . . . Magmaliw a mapangasi ed sakey tan sakey, maabagey a sitatamoy.”

“Mitukoyan ed madibinon ganggan a nidatak ed Masanton Kasulatan”: Labay na Dios a panggayagaan tayoy kawayangan na panpili tan kiwas. Agto itayo pinasakbatan na makapakesaw a listaan a totontonen a mameget ed bilay na panamaley. Ingen, parad pankaabigan tayo sikatoy angidatak na pigaran totontonen.

Natan, wala so daakan a klase na niimprintan materyal ed panangasawa, tan dakel a totoo so walaan na dili ran pilosopiya. Ingen manalwar! Dia ed tema na panangasawa, dakel ed impormasyon a nipapalapag so misumlangan ed Biblia.

Bidbiren met a mandurumaan iray sirkumstansya na sanaasawa. Diad sakey a dalan, saray sanasawa so singa pelag na nieve; singa ira parpareho manlapud arawi, balet diad tua balang sakey so nikabkabiig, duma manlapud arum. Say pantekep na personalidad mo tan ed say asawam so agnaparaan na dinanman a sanasawa ed mundo. Kanian agka maganat a mangawat ed personal iran punto de bista na arum. Anggapo so ginawa na too a pormula ya onaaplika ed kada sanasawa!

Kasuniyan to, amin a ganggan na Biblia so tua tan matukoy. Insulat nen apostol Pablo: “Amin a Kasulatan so pinuyanan na Dios tan makagungguna parad panbangat, parad pamaat, parad pangipetek ed saray bengatla.” (2 Timoteo 3:16; Salmo 119:151) No basaen mo so Biblia tan awaten iray bangat to bilang giya ed inagew-agew a bilay mo, sika so makasarag a manumpal ed say sambam ed panangasawa.​—Salmo 119:105.

“Legan a sikatan dua so saniban manbilay ed dalin”: Saya so mangipapabitar ed andukey a panaon a pankasakey. Igaganggan na Dios a “say laki taynan to so ama to tan ina to tan sikatoy nepeg a mikasakey ed asawa to.” (Genesis 2:24) Labay nen Jehova a sikayo so mankasakey. Mankasakey a panlingkoran si Jehova. Mankasakey ya aralen so Salita to. Mangigana na panaon a manakar a mankasakey, onyurong a mankasakey, mangan a mankasakey. Mankasakey a panggayagaay bilay!

Arum a sanasawa so mansasagpot a mangigana na panaon ed kada agew pian makapantongtong ed balang sakey. Anggan kayari dakel iran taon na impanasawa, sayan pankasakey so makana ed liket na panangasawa.

“Unong ed uksoyan na Dios ed panangasawa”: Say panamaley so regalon nanlapud si Jehova a Dios, a sikato so angiletneg na uksoyan na panangasawa. (Uliran 19:14) Say isaew ya itumbok ed sayan uksoyan so maneral aliwa lambengat ed liket na panangasawa noagta ontan met ed siglaotan yo ed Manamalsa. Diad biek a dapag, sano say asawan laki tan bii so mamayubo na maong a siglaotan ed si Jehova, a nipapatnag diad katutulok ed saray uksoyan to, nawalaan iray mareen a siglaotan ed arum, pati ed balang sakey.​—Uliran 16:7.

Agbalot lilingwanan a si Jehova so manunan Tasi ed samba na panangasawam. Mantultuloy mon sumpalen iyan masimoon a sipanan, tan say panamaley mo so magmaliw a sakey a lapuan na dayew tan gloria ed si Jehova a Dios!

[Paimano ed leksab]

[Blurb ed pahina 22]

Diad sakey a dalan, saray sanasawa so singa pelag na nieve. Amin da so singara parpareho manlapud arawi, balet diad tua et balang sanasawa so nikabkabiig a duma

[Credit Line]

Snow Crystals/Dover