Kaukolan Tayo so Tuan Kakaaro
MABILABILAY so tongtongan di Jenny tan Sue. Mansyayap ya imis, mankirlap a matamata—balang kiwas da so mangipaparungtal na aralem ya interes ed ibaga na sakey tan sakey. Anggaman nandumaan so abenegan da, mapatpatnag a dakel so panpara ra tan baleg so respeto ra ed sakey tan sakey.
Diad sananey met a pasen, si Eric tan Dennis so mankatrabahoan ed sakey a proyekto, sakey ed dakel lan agawaan ed loob na pigaran taon. Sikaray relaks, tan mabetbet a manelekan. Sanen say tongtongan so inmabot ed seryoso iran tema, prangkaan iran duan mansalatay opinyon. Manrerespetoan iran dua. Singa di Jenny tan Sue, si Eric tan si Dennis so tuan kakaaro.
Sarayan eksena so mamaligsa na pusom, a panisipen to ka nipaakar ed dilin kakaarom. Diad biek a dapag, saratan so manggawa ed sikan manpirawat ed ontan a pikakaaro. Nawalaan ka met na ontan!
No Akin a Kaukolan Tayo so Tuan Kakaaro
Saray maong a kaaro so makana ed mental tan pisikal a bunigas tayo. Balet, sano naeermenan itayo, agkabaliksan na saya a wala so deperinsya ed sikatayo. Kuan na arum a manag-research a say inkabegtebegtew so sakey ya eras, sakey a natural a pakabidbiran a kaukolan tayo so kaulop. Anggaman kuan, no panon a nakekesayan odino naeekal so eras lapud tagano, nabawasan odino napaandi ni ingen so inkabegtebegtew lapud dugan nengneng na saray kaaro. Sakey ni, agpa imposibli so pakawalaan na maong a kakaaro a mamabli ed sikatayo.
Apalsa so totoo a walaay pankaukolan na kaulop. (Genesis 2:18) Kuan na Biblia a say tuan kaaro, odino kaulop, “so nianak parad sano wala so kasulitan.” (Uliran 17:17) Kanian, saray tuan kaaro so makakerew na tulong ed sakey tan sakey sano satan so nakakaukolan. Balet mas ni so kabaliksan na pikakaaroan nen say basta pakawalaan na batikan odino napiulopan ed trabaho odino galaw. Papawayen na maong a kakaaro ed sinansakey so marakep iran ugali. Oniay kuan na Uliran 27:17: “Diad panamegley na balatyang, napatarem so mismon balatyang. Kanian say sakey a too et patataremen toy lupa na sananey.” No panon a say sakey a piraso na balatyang so nausar a mamatarem ed tarem a gawa ed parehon metal, say sakey a kaaro so nayarin ontalona diad pamatarem ed intelektual tan espiritual a kipapasen na sananey. No mangonigon ed sikatayo iray inkadismaya, talagan makapaligsa so mililiknan panangimano tan Makasulatan a panamaseseg na sakey a kaaro.
Diad Biblia, say pikakaaro so misiglaotan ed aro, inkapamilyar, napanpiyaan, tan pipiulop. Nayarin lalanoren na pikakaaro iray kaabay, katrabahoan, tan arum nira. Ipasen met na arum so pigaran kanayon bilang sankaapitan a kaaro. Anggaman ontan, parad dakel natan, saray tuan kaaro so mairap ya almoen tan napansiansia. Akin ya onia? Napanggayagaan mo ta so tua tan magnayon a pikakaaro?