Report na Saray Manangiyabawag na Panarian

Maabig Iran Gawan Mangiglogloria ed si Jehova

DIAD Sermon to ed Palandey, inkuan nen Jesus ed saray babangatan to: “Abuloyan yon onsinag so liwawa yo ed arap na totoo, ta pian nanengneng day maabig iran gawa yo tan mangiter na gloria ed Ama yo a wala ed katawenan.” (Mateo 5:16) Ontan met, saray tuan Kristiano so mibibiang natan ed “maabig iran gawa” a mangigloria ed si Jehova.

Anto irayan maabig a gawa? Lalaktipen da so panangipulong ed maong a balita, balet say napanuliranan a kondukta tayo so importanti met a kabiangan. Mabetbet a say maong a kondukta tayo so unonan managyat ed totoo ed Kristianon kongregasyon. Say onggendan iran eksperiensia so mangiyilustra no panon ya ‘angisindag na liwawa ed totoo’ so Tastasi nen Jehova ed Martinique.

◻ Legan a manpupulong ed kabkaabungan, sakey ed Tastasi nen Jehova so binmisita ed sakey a Katolikon bii. Sayan bii so miaamong ed loob la na 25 taon ed lakin agto kakasal. Kabisado toray bangat na Tastasi nen Jehova, lapud ta, sikato ed ngalngali pitoran taon ed asasakbay et akaawat na libron Makapambilay Kayo na Ando lan Ando ed Paraiso diad Dalin.a Inkuan na bii ed Tasi: “Agaylay kinarakel na relihyon. Agko amta no siopay panisiaan ko ed leet na amin na sayan pakawetwetan.” Insalaysay na Tasi a say katuaan so naromog lambengat ed Biblia tan pian naromog iya, kaukolan ton siaalwar ya aralen so Kasulatan tan manpikasi ed Dios nipaakar ed espiritu tan panangigiya to.

Diad sakey a panaon et anggaman interesadon manaral na Biblia, impulisay na bii so pigaran imbitasyon ya onatendi ed saray Kristianon miting ed Kingdom Hall na Tastasi nen Jehova. Akin? Pirmin sikatoy mabaing. Anggaman ontan, kayari impangawat ed sakey ya imbitasyon ed Memoryal na impatey nen Kristo, atalonaan to so inkamabaing to tan sikatoy inmatendi.

Say pirmin angingganyo ed sikato ed miting et say maaron kaliberliber ed Kingdom Hall. Agto ni naeksperiensia so onman a tuan pikakaaro ed simbaan to! Kayari na saman a miting et ginapoan ton atendian ya amin so miting ya idadaulo na Tastasi diman, tan ag-abayag et inkasal to so lakin kaamong to. Sikato la natan so sakey a bautismadon membro na kongregasyon.

◻ Saray maabig a gawa na sakey nin Tasi so amawala na maong iran resulta. Sikato so walaan na responsablin posisyon ed sakey ya opisina. Kayarin kinontrata so sakey a laki ed isla na Réunion, pigara ed saray trabahador so ginmapon manludlurey ed sikato lapud inkaunano to. Sikatoy nagmaliw a panelekan. Diad kasuniyan, say Tasi so naynay a mapangasi tan marespeto ed satan a laki. Ag-abayag et nantepet ed sikato no akin a say Tasi et duman tuloy.

Insalaysay na Tasi a say magalang a kondukta to so resulta na saray prinsipyo ed Biblian naaralan to ed Tastasi nen Jehova. Impanengneng to met ed laki no anto so ibabaga na Biblia nipaakar ed saray gagala na Dios tan ed ilalo ed sakey a balon mundo. Inawat na laki so panagaral ed Biblia, tan ginmapon inmatendi ed saray Kristianon miting, tan nampakasal ed biin piaamongan to.

Diad kaunoran et pinmawil ed Réunion. Diad apalabas et sikatoy agkapaknay kakanayon to, lalo la ed pamilya na akulaw to. Balet natan sikara so mandinayew a tuloy ed maabig a Kristianon kondukta to. Say laki so abautismoan tan diad kaplesan et sakey a ministeryal ya aripen. Pigara ed membro na pamilya, pati say akulaw to tan duaran ilalak ton bibii, so manlilingkor met ed Kristianon kongregasyon bilang manangipalapag na maong a balita na Panariay Dios.

[Paimano ed leksab]