Tepetepet Manlapud Managbasa

Inkuan nen Jesus: “No perdonaen yoray kasalanan na siopaman a totoo, naperdona la ira ed sikara; no pansiansiaen yoray kasalanan na siopaman a totoo, mansiansia ira.” Kasin sarayan salita et kabaliksan to a saray Kristiano so makaperdona na saray kasalanan?

Anggapo so Makasulatan a basiyan ed pangibaga a saray Kristiano ed inkalapagan, odino anggan saray aturon mamatatken ed saray kongregasyon, so walaan na madibinon autoridad pian mamerdona na saray kasalanan. Ingen, say inkuan nen Jesus ed babangatan to diad Juan 20:23, ya inaon ed tagey, so mangipapatnag a say Dios et pinagamoran toray apostol na nikaduman pakayari nipaakar ed saya. Tan say balikas nen Jesus ditan so nayarin walay pisiglaot ed inkuanto ed Mateo 18:18 nipaakar ed mangatatawen iran desisyon.

Naperdona na saray Kristiano so pigaran pakaopendian, mitunosan ed konseho nen apostol Pablo a nirekord ed Efeso 4:32: “Magmaliw a mapangasi ed sinansakey, sitatamoy a maabagey, sibubulos a mamerdona ed sinansakey no panon a say Dios ed panamegley nen Kristo so sibubulos ya amerdona ed sikayo.” Sasalitaen nen Pablo dia so nipaakar ed personal iran problema ed baetan na saray Kristiano, a singa say agmaalwar a panagsalita. Nepeg dan panbanikelan ya uksoyen irayan pamaakaran, a manpeperdonaan ed sinansakey. Tandaan iray salita nen Jesus: “Diad ontan, no aawiten mo so bagat mo ed altar tan anonotan mo a say agim so walaan na sakey a bengatlan sumpa ed sika, itilak moy bagat mo ed arap na altar, et taynan ka; mikareenan ka nin unona ed say agim, et kayari to, sano ompawil ka, iyapay mo so bagat mo.”​—Mateo 5:23, 24; 1 Pedro 4:8.

Balet, isusuheri na konteksto ed Juan 20:23 a say tinukoy nen Jesus et saray mas seryoson kasalanan, a singa impatnag ed impanengneng na inkuanto ni ed sarayan espisipikon dumerengel. Nengnengen tayo no akin.

Diad agew sanen sikatoy apaoli, si Jesus so inmapireng ed saray babangatan to ed akakapot a kuarto ed Jerusalem. Inkuan na salaysay: “Sirin, inkuan lamet nen Jesus ed sikara: ‘Nawalaan kayo komon na kareenan. No panon a say Ama so angibaki ed siak, ibaki takayo met.’ Tan kapangikuan to ed saya et sinibokan tora tan inkuanto ed sikara: ‘Awaten yo so masanton espiritu. No perdonaen yoray kasalanan na siopaman a totoo, naperdona la ira ed sikara; no pansiansiaen yoray kasalanan na siopaman a totoo, mansiansia ira.’”​—Juan 20:21-23.

Maseguro, saray babangatan ya asaglawi et manunaan la iray matoor ya apostol. (Ikompara so bersikulo 24.) Diad panisibok ed sikara tan impangikuan, “Awaten yo so masanton espiritu,” makasimbolikon impaimano ed sikara nen Jesus a say masanton espiritu so asingger lan nikalbo ed sikara. Intuloy nen Jesus ya inkuan a sikaray walaan na autoridad nipaakar ed panamerdona ed saray kasalanan. Makatunongan, sarayan duaran balikas to so mansuldongan, a say sakey so mangitonton ed sananey.

Limamplon agew manlapud inkioli to, ed agew na Pentecostes, inkalbo nen Jesus so masanton espiritu. Anto so sinumpal na satan? Unona, saraman so akaawat na espiritu so nianak lamet bilang espiritual ya ananak na Dios tekep na ilalon magmaliw a kaiban mananguley nen Kristo ed tawen. (Juan 3:3-5; Roma 8:15-17; 2 Corinto 1:22) Balet mas ni so agawa na inkikalbo na espiritu. Pigara ed akaawat so akagamor na mamilagron pakayari. Diad panamegley na satan, say pigara so makapansalita na lenguahe ed biek-taew a datin agda amta. Arum so makapanpropesiya. Ingen say arum so makapantambal na sakit odino makapaoli na inatey.​—1 Corinto 12:4-11.

Lapud ituturo na saray salita nen Jesus ed Juan 20:22 iyan inkikalbo na masanton espiritu ed saray babangatan to, saray nisuldong a salita nipaakar ed panamerdona na saray kasalanan so ompasen a mankabaliksan a saray apostol so madibinon pinagamoran diad panamegley na ikiwas na espiritu ed sakey a nikaduman autoridad a mamerdona odino mamasiansia na saray kasalanan.​—Nengnengen so The Watchtower, Marso 1, 1949, pahina 78.

Ag-itayo iikdan na Biblia na kompleton salaysay ed amin a pankanawnawa a ditan et inusar na saray apostol so ontan ya autoridad, balet agto met insalaysay so amin a kaso a ditan et inusar da so mamilagron regalo a mansalita na saray pansasalita, manpropesiya, odino mantambal.​—2 Corinto 12:12; Galacia 3:5; Hebreos 2:4.

Say sakey a kason anaglawi ed autoridad na saray apostol pian mamerdona odino mamasiansia na saray kasalanan et samay nipaakar ed di Ananias tan Safira, a nantila ed espiritu. Si Pedro, ya akadngel ed balikas nen Jesus a nabasa tayo ed Juan 20:22, 23, so angiwalwal ed si Ananias tan Safira. Inmunan sinalitaan nen Pedro si Ananias, ya inatey a tampol. Sanen sinmabi si Safira kayari tan intuloy so panitila, imparungtal nen Pedro so panangukom ed sikato. Agpinerdona nen Pedro so kasalanan to noagta inkuanto’d sikato: “Nia! Saray sali na angiponpon ed asawam so walad puerta, tan ipaway da ka.” Sikato met so inatey a tampol.​—Gawa 5:1-11.

Diad sayan inkagawa et inusar nen apostol Pablo so nikaduman autoridad pian ibalikas so pihon panamasiansia na kasalanan, mamilagron pikakabat a say Dios so agmamerdona ed kasalanan di Ananias tan Safira. Ompatnag a saray apostol so walaan na labas-nen-toon aralem a pakatalos diad saray kaso a ditan et segurado ran saray kasalanan so aperdona ed basiyan na bagat nen Kristo. Kanian saraman a pinakayarian na espiritun apostol so makapangiyabawag na pakaperdona odino panamasiansia na saray kasalanan.a

Aglabay ya ibaga na saya ya amin ya alanaay-espiritun mamatatken nen saman so walaan na ontan a mamilagron autoridad. Naimano tayo itan ed inkuan nen apostol Pablo nipaakar ed say toon denispelosip manlapud kongregasyon ed Corinto. Ag-inkuan nen Pablo, ‘Perdonaen ko iray kasalanan na satan a too’ odino anggan, ‘Amtak a satan a too so aperdona la ed tawen, kanian awaten yo la.’ Imbes, pinaseseg nen Pablo so interon kongregasyon a perdonaen iyan nipawil a Kristiano tan ipanengneng so aro ed sikato. Inyarum nen Pablo: “Antokaman a bengatlan sipapangasin peperdonaen yo ed siopaman, gagawaen ko met.”​—2 Corinto 2:5-11.

Bektaman a nipawil so too ed kongregasyon, amin a Kristianon agagi so mamerdona diad pantalos ya agmanemem ed no anto so agawaan to. Anggaman, unona nepeg toy manbabawi tan nipawil. Panon itan a nagawa?

Walaray seryoson kasalanan a kaukolan a benbenan na mamatatken ed kongregasyon, singa say panagtakew, panagtila, odino sobran imoralidad. Panggunaetan dan korehien tan baaten iratan a managgaway-mauges, pian napakiwas a manbabawi. Balet no say sakey so agmagbabawin mangaagamil na seryoson kasalanan, iyaplika na sarayan mamatatken so madibinon panangiwanwan pian dispelosipen so managgaway-mauges. (1 Corinto 5:1-5, 11-13) Say inkuan nen Jesus ed Juan 20:23 et ag-onaaplika ed saratan a pamaakaran. Sarayan mamatatken so andian na mamilagro iran regalo na masanton espiritu, a singa say abilidad a mantambal na mansasakit ed pisikal odino mamaoli na inaatey; saratan a regalo so nanserbi ed saray gagala ra ed inmunan siglo tan diad ontan et angangga la. (1 Corinto 13:8-10) Niarum ni, andian na madibinon autoridad so mamatatken natan a mamerdona na kasalanan na saray seryoson kasalanan diad pantalos ed pangibalikas a say sakey a seryoson nankasalanan so malinis ed saray mata nen Jehova. Sayan klase na panamerdona so kaukolan a nibased dondon bagat, tan si Jehova lambengat so makaperdona ed satan a basiyan.​—Salmo 32:5; Mateo 6:9, 12; 1 Juan 1:9.

Singa ed kaso na lakin taga kadaanan a Corinto, sanen agnagbabawi so seryoson nankasalanan, kaukolan a sikatoy nadispelosip. No diad kaunoran et sikatoy manbabawi tan mamawala na saray gawan ontukoy ed panagbabawi, posibli so madibinon panamerdona. (Gawa 26:20) Diad satan a situasyon, inikdan na Kasulatan na rason so mamatatken pian sisiaen a si Jehova so peteg ya amerdona ed managgaway-mauges. Sirin, bektan akapawil lay too, sikatoy natulongan na mamatatken ed espiritual a paraan pian magmaliw a malet ed pananisia. Say arum ed kongregasyon so makaperdona diad parehon paraan ya impamerdona na saray Kristiano ed Corinto ed adispelosip a too a nipawil nen saman.

Diad pangasikaso ed saray pamaakaran ed onian dalan, agmanggagawa so mamatatken na dili ran estandarte na panangukom. Iyaaplika ra iray prinsipyo na Biblia tan maapapit dan tumboken so Makasulatan iran paraan ya indatak nen Jehova. Kanian, antokaman a pamerdona odino agpamerdona ed biang na mamatatken so mitunosan ed saray salita nen Jesus ed Mateo 18:18: “Tua kuan ko ed sikayo, Antokaman iran bengatlan takeren yo ed dalin so bengabengatlan ataker la ed tawen, tan antokaman iran bengatlan ukbaren yo ed dalin so bengabengatlan naukbar la ed tawen.” Saray kiwas da so mangireplekta lambengat ed panmoria nen Jehova ed saray pamaakaran unong ed ipaparungtal na Biblia.

Lapud saya, say inkuan nen Jesus, a singa nirekord ed Juan 20:23, so agmisumlangan ed arum nin Kasulatan, noagta ipapanengneng na satan a saray apostol so walaan na nikaduman autoridad a mamerdona, mitunosan ed nikaduman betang da ed kagapo na Kristianon kongregasyon.

[Paimano ed leksab]