Say Inmunan Inkakristiano tan say Estado

PIGARAN oras sakbay na ipatey to, imbaga nen Jesus ed saray babangatan to: “Aliwa kayon kabiangan na mundo, noagta pinili takayo manlapud mundo, lapud saya busolen kayo na say mundo.” (Juan 15:19) Anggaman kuan, kabaliksan ta na saya a saray Kristiano so kaukolan a kalaban daray autoridad na sayan mundo?

Aliwan Minumundo Balet Aliwan Kalaban

Imbaga nen apostol Pablo ed saray Kristianon manaayam diad Roma: “Kada kamarerwa so pauleyan komon ed saray superyor ya autoridad.” (Roma 13:1) Mipadpara, insulat nen apostol Pedro: “Nisesengeg ed say Katawan a pauleyan kayo ed kada atooan a palsa: balanglan ari bilang superyor odino ed saray gobernador a bilang imbaki to pian ipasakbat so pananusa ed saray managgaway kaugsan balet pian idayew iray mananumpal na maong.” (1 Pedro 2:13, 14) Say panagpauley ed Estado tan ed saray mismon tinuron representanti to so malinlinew ya aawaten a prinsipyo ed limog na saray inmunan Kristiano. Nambanikelan da so magmaliw a matulok ed ley a mibabaley tan manbilay a walay pikakareenan ed amin a totoo.​—Roma 12:18.

Diad silong na teman “Simbaan tan Estado,” iyaabawag na The Encyclopedia of Religion: “Diad inmunan taloran siglo AD et ngalngali akabiig so simbaan manlapud opisyal a Romanon pakurang . . . Anggaman kuan, saray Kristianon lider . . . so angibangat na katutulok ed Romanon ley tan katooran ed say emperador, ya agpapalampasan iray limitasyon ya inggeter na Kristianon pananisia.”

Kagalangan, Aliwan Panagdayew

Agkalaban na saray Kristiano so Romanon emperador. Nirespeto ra so autoridad to tan inter da ed sikato so kagalangan a matukoy ed betang to. Legan na uley nen Emperador Nero, nansulat si apostol Pedro ed saray Kristianon manaayam ed nanduruman parti na Romanon Imperyo: “Pagalangan so amin a nengneng na totoo, . . . pagalangan so ari.” (1 Pedro 2:17) Say salitan “ari” so inusar ed daldalin a mansasalitay-Griego aliwa lambengat parad arari ed saman a lugar noagta ontan met parad Romanon emperador. Sinimbawa nen apostol Pablo iray Kristianon manaayam diad kabisera na Romanon Imperyo: “Iter ed amin so kanepegan da, . . . ed saman so mankakaukolan na kagalangan, so ontan a kagalangan.” (Roma 13:7) Say Romanon emperador so maseguron tuloy a mankakaukolan na panamagalang. Asabi panaon, kinaukolan to ni ingen a sikatoy nadayew. Anggaman ontan, dia la angigeter na limitasyon iray Kristiano.

Diad bista to ed arap na sakey a Romanon prokunsul ed komaduan siglo K.P., nireport ya inyabawag nen Policarpio: “Siak so sakey a Kristiano. . . . Sikami nibangat ya iter so amin a makanepegan a panamagalang . . . ed saray pakayari tan autoridad ya inordinaan na Dios.” Balet ta pinili nen Policarpio so ompatey imbes a dayewen so emperador. Diad komaduan siglo, nansulat so apolohista a si Theophilus na Antiokia: “Mas labay kon pagalangan so emperador, aliwan lapud dadayewen ko, noagta ipipikasi. Balet say Dios, say mabilay tan tuan Dios so dadayewen ko.”

Saray matukoy a pikakasi nipaakar ed emperador so pihon agmikonektaan ed panagdayew ed emperador odino ed nasyonalismo. Insalaysay nen apostol Pablo so gagala ra: “Kanian siak so pirmin manisimbawa ed sikayo, unona ed amin, a saray eyey, pikakasi, saray panamegley, saray panangiyapay na pisasalamat, so gawaen nipaakar ed amin a nengneng na totoo, nipaakar ed arari tan ed amin na saramay walad atagey a kipapasen; ta pian makapantultuloy tayon manbilay ed sakey a kalmado tan mareen a bilay tekep na sigpot a maridios a debosyon tan inkaseryoso.”​—1 Timoteo 2:1, 2.

“Aliwan Sigpot a Kabiangan na Sosyedad”

Sayan marespeton kondukta ed biang na saray inmunan Kristiano so ag-angitarok ed sikara na pikakaaro ed mundo a panbibilayan da. Insalaysay na manag-awaran a Pranses a si A. Hamman a saray inmunan Kristiano so “nambilay ya aliwan sigpot a kabiangan na sosyedad.” Sikaray aktual a nambilay ya aliwan sigpot a kabiangan na duaran sosyedad, say Judio tan Romano, ya akasagmak na alabas a panangidumaduma tan ag-atalosan na mankalaban a dapag.

Alimbawa, sanen sikato so sititilan inakusa na Judio iran lider, inkuan nen apostol Pablo diad depensa to ed arap na Romanon gobernador: “Agak akapanggawa na antokaman a kasalanan anggan sumpad say Ganggan na saray Judio nisay sumpad templo nisay sumpad Cesar. . . . Onapela ak ed Cesar!” (Gawa 25:8, 11) Diad impakalikas ton manplaplano iray Judion sikatoy pateyen, inmapela si Pablo ed si Nero, sirin et bibidbiren so autoridad na Romanon emperador. Tinmumbok et diad inmunan bista to ed Roma, ompatnag a si Pablo so inabsuelto. Balet diad saginonor et sikato so nipriso lamet, tan unong ed tradisyon et sikato so pinatey diad ganggan nen Nero.

Nipaakar ed mairap a kipapasen na saray inmunan Kristiano diad Romanon sosyedad, say sosyologo tan teologon si Ernst Troeltsch so nansulat: “Inkaindan so amin ya inkabetang tan gegemtan nipaakar panagdayew ed talintao, odino ed panagdayew ed Emperador, odino nipaakar ed saramay panagpaagus na dala odino ed dusan patey, odino ed saramay manggawa ed saray Kristiano a natilolan na paganon imoralidad.” Kasin sayan talindeg so agmangiyaabuloy na mareen tan walaay respeto a relasyon ed baetan na saray Kristiano tan say Estado?

Bayaran ed Cesar so “Kanepegan” To

Inter nen Jesus so prinsipyo a mangontrol ed Kristianon kondukta nipaakar ed Romanon Estado odino, diad mipadparan paraan, ed dinanman nin gobierno, sanen inyabawag to: “Ibayar yo . . . ed Cesar iray bengatla nen Cesar, balet ed Dios iray bengatla na Dios.” (Mateo 22:21) Sayan konseho ed saray patumbok nen Jesus so duman tuloy ed awawey na dakel a nasyonalistikon Judio a sinmanok ed pananguley na saray Romano tan sinangsang so kanepegan na panagbayar na saray buis ed sakey a dayon pakayari.

Diad saginonor, imbaga nen Pablo ed saray Kristianon manaayam ed Roma: “Kanian wala so kapilitan a rason pian sikayo so pauleyan, aliwa lambengat nisesengeg ed pasnok noagta ed konsiensia yo. Ta satan so rason no akin a manbabayar kayo met na saray buis; ta sikara [“superyor iran autoridad” na gobierno] so publikon ariripen na Dios a naynay a manlilingkor ed sayan mismon gagala. Iter ed amin so kanepegan da, ed saman so mankakaukolan na buis, say buis; ed saman so mankakaukolan na impuesto, say impuesto.” (Roma 13:5-7) Bangta saray Kristiano so aliwan kabiangan na mundo, sikaray obligadon magmaliw a matua, mibabaley a manbabayar na buis, a manbabayar ed Estado parad saray ginawan serbisyo.​—Juan 17:16.

Balet kasin saray salita nen Jesus so limitado ed panagbayar labat na buis? Lapud agpihon impaamta nen Jesus no anto so kien nen Cesar tan no anto so kien na Dios, walaray alanganin a kaso a nepeg a desisyonan unong ed kipapasen odino unong ed pakatalos tayo ed interon Biblia. Diad arum a salita, say pandeside ed no antoray bengatla ya iter ed si Cesar et no maminsan et manasaglawi ed Kristianon konsiensia, a singa nipaliwawa ed saray prinsipyo na Biblia.

Sakey a Maalwar a Pananimbang ed Duaran Mansumlangan a Kakaukolanen

Dakel a totoo so mainomay a makalingwan a kayari ed impangibaga a nepeg ya ibayar ed Cesar iray bengatla nen Cesar et inyarum nen Jesus: “Balet [ibayar yo] ed Dios iray bengatla na Dios.” Impanengneng nen apostol Pedro no dinan so manunaan parad saray Kristiano. Tamtampol, kayari impangonseho ed panpasakop ed “ari,” odino emperador, tan ed “saray gobernador” to, insulat nen Pedro: “Magmaliw a singa bulos a totoo, tan ingen mamebenben ed kawayangan yo, aliwan bilang panakab parad inkauges, noagta bilang ariripen na Dios. Pagalangan so amin a nengneng na totoo, nawalaan na aro ed interon panlilimog na agagi, takotan so Dios, pagalangan so ari.” (1 Pedro 2:16, 17) Impanengneng na say apostol a saray Kristiano so ariripen na Dios, aliwan ed manuley a too. Bangta sikaray kaukolan a mangipanengneng na manepeg a panamagalang tan respeto parad saray representanti na Estado, gawaen da itan lapud takot ed Dios, a saray ganggan to so supremo.

Pigara lan taon so linmabas et sineguro la nen Pedro so inkasuperyor na saray ganggan na Dios ed saray ganggan na too. Say Judion Sanhedrin so sakey ya administratibon ulop a pinagamoran na saray Romano na autoridad nampara ed sibil tan ed relihyon. Sanen ingganggan toray patumbok nen Jesus ya ontundan manbangat diad ngaran nen Kristo, si Pedro tan arum niran apostol so sirerespeton inmebat balet tekep na inkapekder: “Nepeg min tuloken so Dios bilang manuley imbes nen saray totoo.” (Gawa 5:29) Malinlinew, saray inmunan Kristiano so kaukolan a manmantini na maalwar ya inkabalansi ed baetan na katutulok ed Dios tan ed manepeg a panpasakop ed saray autoridad na too. Onia so imbaga ed saya nen Tertullian diad asakbay na komatlon siglo K.P.: “No amin et kien nen Cesar, anto ni so natitilak a para ed Dios?”

Pikokompromiso ed Estado

Diad ilalabas na panaon, kalkalnan binmetel so talindeg ya inadapta na inmunan-siglo iran Kristiano misiglaotan ed Estado. Say apostasyan impasakbay nen Jesus tan saray apostol so binmulaslas diad komadua tan komatlo iran siglo K.P. (Mateo 13:37, 38; Gawa 20:29, 30; 2 Tesalonica 2:3-12; 2 Pedro 2:1-3) Say apostatan Inkakristiano so akikompromiso ed Romanon mundo, tinumbok iray paganon piespiesta to tan pilosopiya to, tan aglambengat inawat so sibil a serbisyo noagta pati met ed serbisyo militar.

Insulat nen propesor Troeltsch: “Nanlapulad komatlon siglo a manpatuloy et lalon inmirap so kipapasen, lapud dinmakel iray Kristiano a walad atagey iran posiyon na Sosyedad tan ed saray mas prominentin propesyon, diad armada tan diad sirkulo na opisyales. Diad dakel ya estansa na [aliwan-Biblikon] Kristianon sulsulat et walaray pirmin panagprotesta sumpad pibibiang ed sarayan bengatla; diad biek a dapag, makakaromog tayo met na panalsalin mikompromiso​—saray argumento ya adesinyon mamareen ed saray agmakareen a konsiensia . . . Manlapud panaon nen Constantino et sarayan problema so naandipat; tinmunda so irangan ed baetan na saray Kristiano tan pagano, tan nilukas so amin a betang ed Estado.”

Diad pansamposampot na komapat a siglo K.P., sayan alaokan, mikokompromison porma na Inkakristiano so nagmaliw a relihyon na Estado na Romanon Imperyo.

Diad interon awaran to, say Kakristianoan​—irerepresenta na saray Iglesia a Katoliko, Ortodukso, tan Protestanti​—so mantultuloy a mikokompromiso ed Estado, a pirmin akibabali ed pulitika tan manusuporta ed saray bakal to. Dakel a masimoon a mimimisan akigtot ed saya so maseguron maliket a makaamtan walaray Kristiano natan a manusuporta ed tinalindegan na inmunan-siglo iran Kristiano nipaakar ed siglaotan da ed Estado. Say onsublay a duaran artikulo so maningbat ed pamaakaran a mas detalyado.

[Litrato ed pahina 5]

Si Cesar Nero, a tutukoyen nen Pedro sanen insulat ton: “Pagalangan so ari”

[Credit Line]

Musei Capitolini, Roma

[Litrato ed pahina 6]

Pinili nen Policarpio so ompatey imbes a dayewen so emperador

[Litrato ed pahina 7]

Saray inmunan Kristiano so mareen, matua, managbayar na buis a mibabaley