Say Bini na Serpiente—Panon a Nibuyandak?
“Mangyan ak na gulaan ed baetan mo tan ed bii tan ed baetan na binim tan ed bini to.”—GENESIS 3:15.
1. (a) Akin a si Jehova so maliket a Dios? (b) Anto so ginawa to pian makapinabang tayo ed gayaga to?
SI Jehova so maliket a Dios tan walaan na maong a rason. Sikatoy sankabalgan tan manunan Manangiter na bengabengatlan maong, tan anggapoy makaamper ed pakasumpal na saray gagala to. (Isaias 55:10, 11; 1 Timoteo 1:11; Santiago 1:17) Labay ton napinabangan na ariripen toy gayaga to, tan itatarok toray makatunongan a rason pian naeksperiensia ra itan. Kanian, diad sakey ed sankauddieman a panaon ed awaran na too—kayari rebelyon diad Eden—intaryaan to itayo na basiyan pian onnengneng ed arapen tekep na ilalo.—Roma 8:19-21.
2. Sanen imbalikas so panangukom ed saray rebelde diad Eden, panon so impangitarya nen Jehova na basiyan na ilalo parad saray ilalak nen Adan tan Eva?
2 Say sakey ed espiritun ananak nen Jehova, diad insumpa tan impamauges to ed Dios, et ginawa toy inkasikaton Satanas a Diablo. Saray inmunan totoo, si Eva tan insan si Adan, so naplag ed panangimpluensya to tan sinumlang day malinew a nibalikas a ganggan nen Jehova. Sikaray makatunongan ya asentensyaan na ipapatey. (Genesis 3:1-24) Ingen, sanen imbalikas so panangukom ed sarayan rebelde, intarok nen Jehova so basiyan na ilalo parad saray ilalak nen Adan tan si Eva. Diad anton dalan? Singa nirekord ed Genesis 3:15, inkuan nen Jehova: “Mangyan ak na gulaan ed baetan mo tan say bii tan ed baetan na binim tan bini to. Sugaten to ka ed ulo tan sika so manugat ed mukor to.” Satan a propesiya so say tombok ed pakatalos ed interon Biblia ontan met ed apalabas tan kaplesan iran ebenton manasaglawi ed mundo tan ed ariripen nen Jehova.
No Antoy Kabaliksan na Propesiya
3. Singa atukoy ed Genesis 3:15, ipabidbir so (a) say Serpienti, (b) “say bii,” (c) say “bini” na Serpienti, (d) say “bini” na bii.
3 Pian natalosan so kabaliksan to, konsideraen so pigaran kabiangan na mismon propesiya. Say katongtong diad Genesis 3:15 et say Serpiente—aliwan say abeban uleg, noagta samay angusar ed satan. (Apocalipsis 12:9) “Say bii” et aliwan si Eva noagta say mangatatawen ya organisasyon nen Jehova, say ina na alanaay-espiritu ton ariripen ed dalin. (Galacia 4:26) Say “bini” na Serpiente, et say “bini” nen Satanas, say ilalak to—saray demonyo tan totoo ontan met ed saray organisasyon na too a mangipapatnag ed saray ugali nen Satanas tan mamubusol ed “bini” na bii. (Juan 15:19; 17:15) Say “bini” na bii so manuna et si Jesu-Kristo, a nilanaan na masanton espiritu nen 29 K.P. Say 144,000 a ‘nianak lamet . . . dia ed danum tan espiritu’ tan mananawir na mangatatawen a Panarian a kaibay Kristo, so segundaryon kabiangan na nisipan a bini. Saraya so nigapon niarum ed bini na bii nen Pentecostes 33 K.P. a manpatuloy.—Juan 3:3, 5; Galacia 3:16, 29.
4. Panon a nisisiglaot so Genesis 3:15 ed pagmaliw a paraiso na dalin, a napno na totoon bulos manlapud kasalanan tan ipapatey?
4 Say literal a serpiente diad Eden so inusar a pinagka-sangiyan na samay say panamalikdo to et angitonton ed impakabalang na katooan ed Paraiso. Ipapaimano na Genesis 3:15 so panaon a mekmeken imay angipakurang ed saman a serpienti. Insan lukas la lamet so dalan parad totoon ariripen na Dios a panayamay Paraiso, a bulos manlapud kasalanan tan ipapatey. Agaylan magayagan panaon itan!—Apocalipsis 20:1-3; 21:1-5.
5. Antoran ugali so mangipabidbir ed espiritual ya ilalak na Diablo?
5 Kayari impanrebelde diad Eden, ginmapon pinmaway iray sinansakey tan organisasyon a mangipapatnag ed ugugalin singa saramay ed si Satanas a Diablo—rebelyon, panagtila, panagpauges, tan panagpatey, atekepan na isusumpa ed linawa nen Jehova tan ed saramay mandadayew ed si Jehova. Saratan ya ugali so mangipapabidbir ed saray ilalak, espiritual ya ananak, na Diablo. Kabiangan ed saraya et si Cain, ya amatey ed si Abel sanen pinaboran nen Jehova so panagdayew nen Abel imbes a si Cain. (1 Juan 3:10-12) Si Nimrod, a say mismon ngaran to so angipaamtan sikatoy sakey a rebelde tan nagmaliw a mabisbiskeg ya umaanop tan manuley a sumpad si Jehova. (Genesis 10:9) Sakey ni, wala so impantutumbokan na kadaanan iran panarian, pati say Babilonia, tekep na saray relihyon ya inaprobaan tan sinuportaan na estado a nipaalagey ed katilaan, tan saraya so siruruksan mamapairap ed saray managdayew nen Jehova.—Jeremias 50:29.
“Gulaaan ed Baetan Mo tan ed Bii”
6. Diad antoran dalan ya impanengneng nen Satanas so gula to ed biin-pinagkaasawa nen Jehova?
6 Legan na saratan a panaon, wala so gulaan ed baetan na Serpiente tan ed biin-pinagkaasawa nen Jehova, ed baetan nen Satanas a Diablo tan ed mangatatawen ya organisasyon nen Jehova na saray matoor ya espiritun pinalsa. Say gula nen Satanas so nipanengneng diad impanbalaw to ed si Jehova tan impanalin guloen so mangatatawen ya organisasyon nen Jehova, a nilagyat iray anghel ya ikaindan so manepeg dan panayaman. (Uliran 27:11; Judas 6) Nipatnag itan sanen inusar nen Satanas iray demonyo to pian panggunaetan ya amperen iray anghelikon mensaheron imbaki nen Jehova. (Daniel 10:13, 14, 20, 21) Lalon mabitar itan diad sayan koma-20 siglo sanen sinali nen Satanas a deralen so Mesianikon Panarian nen iyanak itan.—Apocalipsis 12:1-4.
7. Akin a wala so gulaan na matoor ya angheles nen Jehova sumpad simbolikon Serpienti, ingen anton panamuger so nipapanengneng da?
7 Wala met so pigulaan na biin-pinagkaasawa nen Jehova, say ulop na matoor ya angheles, sumpad simbolikon Serpiente. Pinauges nen Satanas so maong a ngaran na Dios; tan sinuppiat to met so integridad na balang sakey ed intelehentin pinalsa na Dios, pati amin ya angheles, tan siaaktibon manggugunaet a mamakapuy ed katooran da ed Dios. (Apocalipsis 12:4a) Agnapaliisan na saray matoor ya anghel, kerubin, tan serapin a manliknay busol ed say sakey a ginawa toy inkasikaton Diablo tan Satanas. Ingen, aalagden day Jehova a manresolbi ed saray pamaakaran ed dilin panaon tan dalan to.—Ikompara so Judas 9.
Panamusol ed Bini na Biin-Pinagkaasawa na Dios
8. Siopa so babantayan nen Satanas?
8 Kaleganan to, si Satanas so maimano a manatalaran ed nipasakbay a Bini na bii, say sakey ya angibagaan nen Jehova a manugat ed ulo na Serpiente. Sanen inyabawag na anghel a manlapud tawen a si Jesus, a niyanak ed Betlehem, so say “Manangisalba, a sikato so Kristo a Katawan,” saya so mabiskeg a panamekder a sikato imay magmaliw a nipasakbay a Bini na bii.—Lucas 2:10, 11.
9. Kayari inkianak nen Jesus, panon ya angipatnag na maruksan panggula si Satanas?
9 Ag-abayag et say maruksan panggula nen Satanas so nipatnag sanen inayat toray paganon astrologo ed sakey a misyon ya onla nin unona ed si Arin Herodes diad Jerusalem tan insan diad abung ed Betlehem a ditan et aromog da si Jesus tan say ina to, si Maria. Kayarin tuloy na satan et ingganggan nen Arin Herodes ya ipapatey so amin ya ugugaw a lalaki a manedad na duara a paabeba, diad loob tan paway na Betlehem. Diad saya, impanengneng nen Herodes so satanikon panamusol to ed Bini. Kabat a tuloy nen Herodes a sasalien ton pateyen iman so sakey a magmaliw a Mesias. (Mateo 2:1-6, 16) Papaneknekan na awaran a si Arin Herodes so andiay-prinsipyo, masilib, tan manamatey—peteg a sakey a bini na Serpiente.
10. (a) Kasumpal na bautismo nen Jesus, panon a personal a sasalien nen Satanas ya amperen so gagala nen Jehova nipaakar ed insipan a Bini? (b) Panon ya inusar nen Satanas iray Judion relihyoson pangulo diad pangegemtan ed saray getma to?
10 Kayari inkalanaan nen Jesus na masanton espiritu nen 29 K.P. tan nansalita lay Jehova manlapud tawen pian ipaamtan si Jesus so Anak to, naulit-ulit a sinalin mismo nen Satanas a patuloken si Jesus ed katukso, diad ontan et sasalien ya amperen so gagala nen Jehova nipaakar ed Anak to. (Mateo 4:1-10) Diad insaew ed satan, imbaling to ed impangusar ni na atooan ya ahentes pian dampoten iray getma to. Arum ed saramay inusar ton mamauges ed si Jesus et saray mansimpisimpitan a relihyoson papangulo. Inusar daray panagtila tan panagpauges, say nengneng na saray pakanan inusar a mismo nen Satanas. Sanen imbaga nen Jesus ed sakey a paralitikon, “Manpakpel, . . . saray kasalanan mo so pinerdona la,” inukom na saray eskriba si Jesus a manag-ayew ya ag-anggan inalagar a nanengneng no kasin say laki so talagan inmabig. (Mateo 9:2-7) Sanen pinaabig nen Jesus so totoo ed Sabaton, sikatoy inakusa na Fariseos a mananumlang na ganggan na Sabaton tan nannonongan dan pateyen. (Mateo 12:9-14; Juan 5:1-18) Sanen amapaway na dedemonyo si Jesus, sikatoy pinakasalananan na Fariseos a sikatoy akikasakey ed “Beelzebub, say manuley na saray demonyo.” (Mateo 12:22-24) Kayari impamaoli ed si Lazaro manlapud saray inatey, dakel ed totoo so anisia ed si Jesus, balet saray manunan saserdote tan Fariseos so nankokomplot lamet a sikatoy pateyen da.—Juan 11:47, 53.
11. Taloy agew sakbay na ipatey nen Jesus, siopa so impabidbir to bilang kabiangan na bini na Serpienti, tan akin?
11 Nen Nisan 11, 33 K.P., anggaman ed sigpot a pikakabat nen Jesus ed plaplanoen da, linmoob ya andi-takot ed templo diad Jerusalem tan diman sipupubliko ton imbalikas so panangukom ed sikara. Bilang sakey a grupo, anggapoy-pananguman ya indemostra na eskribas tan Fariseos no anton klase na totoo ira; kanian inkuan nen Jesus: “Kasi kayo la, eskribas tan Fariseos, a mansimpisimpitan! lapud kakapotan yo so panarian na katawenan ed arap na totoo; lapud sikayon mismo so ag-onloloob, ni abuloyan yon palooben met iramay onloloob la.” Direktan inyabawag nen Jesus a sikaray kabiangan na bini na Serpienti, ya imbagan: “Sikayoran serpienti, ananak na saray tadioko, panon kayon makabatik manlapud panangukom na Gehenna?” (Mateo 23:13, 33) Say balikas to so mangisisindag ed samay nipropesiya ed Genesis 3:15.
12, 13. (a) Panon ya angiter na kaaruman ya ebidensya iray manunan saserdote tan eskriba no siopa so espiritual ya ama ra? (b) Siopa so akiulop ed sikara? (c) Bilang kasumpalan na Genesis 3:15, panon ya asugatan ed mukor so Bini na bii?
12 Diad impakadngel ed saray salita nen Jesus, kasin atiknay kapusoan da, ta pian sikaray onkerew na panangasi na Dios? Kasin sikaray nagbabawi ed karelmengan da? Andi! Isasalaysay na Marcos 14:1 a diad kaimbuasan, diad sakey a miting diad sabanan na atagey a saserdote et “saray manunan saserdote tan saray eskriba so manaanap na paraan no panon ya erelen [si Jesus] diad panamegley na masilib a pakana tan sikatoy ipapatey.” Intultuloy day mangipapatnag na makapatey a disposisyon nen Satanas, a diad asasakbay et deneskribe nen Jesus bilang manamatey. (Juan 8:44) Ag-abayag et sikaray akiulopan nen Judas Iscariote, a sinagyat nen Satanas a magmaliw ya apostata. Tinaynan nen Judas so andi-kabalawan a Bini na biin-pinagkaasawa na Dios tan akiulop ed bini na Serpiente.
13 Kaimbuasan na Nisan 14, inawit bilang priso si Jesus ed Romanon gobernador na saray membro na Judion relihyoson korte. Dia et saray manunan saserdote so angidaulo ed impaneyag ed kipasak to. Sanen intepet nen Pilato, “Ipasak ko ta so ari yo?” saramay manunan saserdote so inmebat, “Angapo so Ari mi noag si Cesar.” (Juan 19:6, 15) Talagan pinaneknekan da’d amin a pamaakaran a sikaray kabiangan na bini na Serpiente. Balet maseguron agda bukbukor. Oniay salaysay na apuyanan a rekord ed Mateo 27:24, 25: “Si Pilato so angala na danum tan inurasan toray lima to ed arap na karaklan.” Insan inkuan na amin a totoo: “Say dala to ondetdet ed sikami tan ed ananak mi.” Diad ontan et impabidbir na karaklan a Judio ed satan a kailalakan so inkasikara bilang kabiangan na bini na Serpiente. Sakbay a manampot itan ya agew, inatey lay Jesus. Diad impangusar na nanengneng a bini to, sinugatan nen Satanas so mukor na say Bini na biin-pinagkaasawa na Dios.
14. Akin a say inkasugat ed mukor na bini na Bii so agmankabaliksan na impanbiktorya parad si Satanas?
14 Kasin analo si Satanas? Andin balot! Tinalo nen Jesu-Kristo so mundo tan anaeg sumpad manuley na mundo. (Juan 14:30, 31; 16:33) Pinansiansia toy katooran to ed si Jehova ya anggad impatey to. Say impatey to bilang ayadyarin too so angitarok na bili na dondon a kaukolan pian nasaliw lamet so kanepegan ed bilay ya abalang nen Adan. Kanian ginawa ton posibli so magnayon a bilay parad saramay mangagamil na pananisia diad satan a probisyon tan ontulok ed saray ganggan na Dios. (Mateo 20:28: Juan 3:16) Pinaoli nen Jehova manlapud inaatey si Jesus ed imortal a bilay diad tawen. Diad nigeter a panaon nen Jehova, si Jesus so manmekmek ed si Satanas ed kaandi. Diad Genesis 22:16-18, nipropesiya a si Jehova et paboran to so amin a pamilya ed dalin ya angala na nakakaukolan a kiwas pian bendisyonan day inkasikara diad panamegley na satan a matoor a Bini.
15. (a) Kayari impatey nen Jesus, panon ya intuloy ya inbuyandak na saray apostol to so bini na Serpienti? (b) Anto nin panamusol so impatnag na bini na Serpienti anggad agew tayo?
15 Kayari impatey nen Jesus, saray alanaan-na-espiritun Kristiano so nantultuloy ya angibuyandak ed bini na Serpiente, a singa ginawa na Katawan da. Pinakiwas na masanton espiritu, angipasakbay si apostol Pablo sumpad “say too na kaugsan” a say kiwawala to so “mitukoyan ed panangipakurang nen Satanas.” (2 Tesalonica 2:3-10) Sayan tugyop na “too” so apaneknekan a say klero na Kakristianoan. Siruruksan pinasegsegang na bini na Serpienti iray papatumbok nen Jesu-Kristo. Diad propesiyan nirekord ed Apocalipsis 12:17, impasakbay nen apostol Juan a si Satanas so mantultuloy a mibakal sumpad amin a nakdaan na bini na biin-pinagkaasawa na Dios ya anggad agew tayo. Satan so eksakton nagagawa. Diad dakel a daldalin et nasesebelan, lulusubey karaklan, nipipisok, odino pinilit ya inyan ed panangipangawan iran kampo iray Tastasi nen Jehova lapud malet a talindeg da parad Panarian na Dios tan diad saray matunong a dalan to.
Modernon-Agew a Pangibuyandak ed Bini na Serpiente
16. Diad modernon panaon tayo, siopa so inbuyandak bilang kabiangan na bini na Serpienti, tan panon?
16 Diad panangalig ed si Jesu-Kristo, saray tuan Kristiano so andi-tunda ed andi-takot a panangibuyandak da’d Serpiente tan ed bini to. Nen 1917 saray Estudyante na Biblia, a singa tawag ed Tastasi nen Jehova nen saman, so angipalapag ed libron The Finished Mystery, a ditan da inbuyandak so pansimpisimpitan na klero na Kakristianoan. Tinumbokan iya nen 1924, na sakey ya inimprintan resolusyon ya apauloan na Ecclesiastics Indicted. Limamplon milyon a kopya so nibunog ed sankamundoan. Nen 1937, nampaliwawa si J. F. Rutherford, say presidenti ed saman na Watch Tower Society, na mabiskeg a panangibuyandak ed bini na Serpiente ed diskurson apuloan na “Nibuyandak” tan “Relihyon tan Inkakristiano.” Diad tinmumbok a taon, legan ya ontatalineng iray dumerengel ed 50 kombension ed nanduruman daldalin, impaliwawa to so diskurson “Arapen Iray Katuaan” ed panamegley na radyotelepono manlapud London, Ingglatera. Kalabas na sakey bulan, sakey a malaknab a nikonektan radyo ed Estados Unidos so angipasabi ed nipasabin paliwawan “Pasismo Odino Kawayangan.” Saraya so tinumbokan na mapuersa iran panangibuyandak ed saray libron singa say Enemies tan Religion ontan met ed bokletan Uncovered. Mitunosan ed nipalapag la nanlapulad saray taon 1920, say libron Revelation—Its Grand Climax At Hand!,a a niimprinta la ed 65 lenguahe, so mangipapaamta ed saray abulok a mapulitikan manuley tan maagum, anggapoy prinsipyon ilegal a komersyante a bilang kabiangan met na manuna iran membro na nanengneng a bini na Serpiente. Sano saray mapulitikan manuley so tuloy-tuloy a mangagamil ed inkatila pian ibalang iray uuleyan da, agmanrespeto ed inkasagrado na dala, tan mamairap ed ariripen nen Jehova (diad ontan et ipapanengneng so panamusol ed bini na biin-pinagkaasawa na Dios), maseguron ipapabidbir day inkasikara bilang kabiangan na bini na Serpiente. Pareho met itan ed saray ilegal a komersyante, ya agnakokonsiensia a mantila pian manubo, a mamapawala odino manlalakoy bantog iran produkton pansesengegay sakit.
17. Anton pankanawnawa so siansian lukas ed saray prominentin indibidual a nayarin ompaway ed sistema na mundo?
17 Aliwan amin ya indibidual a namamatikan na minumundon relihyon, pulitika, odino komersyo so nikuenta diad kaunoran bilang kabiangan na bini na Serpiente. Arum ed saraya so mandinayew ed Tastasi nen Jehova. Uusaren day impluensya ra pian tulongan ira tan diad nigeter a panaon et mangabrasa ed tuan panagdayew. (Ikompara so Gawa 13:7, 12; 17:32-34.) Diad saratan ya amin, sayan apelo so ninanatnat: “Natan, O arari, agamiley aralem a pakatalos; pakorihe kayo komon, O uko-ukom ed dalin. Manlingkor ed si Jehova tekep na takot tan manggayaga kayo ya atekepan na giwgiw. Angoban yo so Anak, pian Sikatoy ag-onsanok tan agkayo nabalang ed dalan, ta mainomay ya onsanok. Maliket ya amin iramay pasalimbengan ed sikato.” (Salmo 2:10-12) On, makana parad amin a manpilalek ed pabor nen Jehova ya onkiwas la natan, sakbay a biglan ikaput na mangatatawen ya Ukom so puerta na pankanawnawa!
18. Anggaman aliwan kabiangan na bini na bii, sioparay anggan panon et managdayew nen Jehova?
18 Saraman lambengat so manibukel na mangatatawen a Panarian so kabiangan na bini na bii. Saraya so dagdaiset ed bilang. (Apocalipsis 7:4, 9) Ingen, wala so baleg ya ulop na arum ni, on, minilyon ed sikara, a bilang managdayew nen Jehova so maniilaloy magnayon a bilay ed paraison dalin. Namparan diad salita tan diad gawa, kuan da ed saray alanaan nen Jehova: “Mila kami ed sikayo, ta nadngelan mi a say Dios so kaiba yo.”—Zacarias 8:23.
19. (a) Anton panpili so nepeg a gawaen na amin a totoo? (b) Siopa ed partikular so masimoon ya aapeloan ya onkiwas a sikakabat legan a wala ni pankanawnawa?
19 Natan la so panaon sano amin a katooan so nepeg a manpili. Labay da ta a dayewen si Jehova tan itandoroy inkasoberano to, odino kasin abuloyan day Satanas a magmaliw a manuley da diad panggawa’d bengabengatlan mamaliket ed sikato? Ngalngali limaran milyon a totoo a manlalapud amin a nasyon so ontatalindeg ed dapag nen Jehova a kaulop na saray nakekeraan ed bini na bii, saray mananawir na Panarian. Waloran milyon ni so mangipapanengneng na interes diad panaaral na Biblia a kaiba ira odino diad iyaatendi ed saray miting. Parad saratan, oniay ibabaga na Tastasi nen Jehova: Say puerta na pankanawnawa so siansia nin akalukas. Ontalindeg tekep na agpanduaruwa ed dapag nen Jehova. Bidbiren si Kristo Jesus bilang say insipan a Bini. Sigagayagan mibiang ed nanengneng ya organisasyon nen Jehova. Komon ta naromog yo so gayaga diad si Jehova tan ed amin a bendisyon ya itarok To diad panamegley na uley na Ari, si Kristo Jesus.
[Paimano ed leksab]
a Impalapag na Watchtower Bible and Tract Society of New York, Inc.
Kasin Natandaan Mo?
◻ Siopa so Serpienti ya atukoy ed Genesis 3:15? Tan siopa so bii?
◻ Antoran ugali so mangipabidbir ed bini na Serpienti?
◻ Panon ya inbuyandak nen Jesus so bini na Serpienti?
◻ Siopa so inbuyandak bilang kabiangan na bini na Serpienti ed modernon panaon?
◻ Anton maganat ya ikiwas so kakaukolanen pian napaliisan so pagmaliw a kabiangan na bini na Serpienti?
[Litrato ed pahina 10]
Inbuyandak nen Jesus iray mansimpisimpitan a relihyoson pangulo bilang kabiangan na bini na Serpienti