Tepetepet Manlapud Managbasa
No maminsan et narengel tayoray agagin mansasalita odino mangipipikasi nipaakar ed isabi na Panarian na Dios ed dalin. Susto ta iyan balikas?
Diad direktan panagsalita, satan so aliwan Makasulatan a paraan a pangibalikas na saray bengatla. Say Panarian na Dios so mangatatawen. Kanian, nisulat nen apostol Pablo: “Say Katawan iliktar toak manlapud amin a marelmeng a gawa tan isalba to ak parad say mangatatawen a panarian to. Diad sikato niwala komon so gloria ed ando lan ando. Amen.”—2 Timoteo 4:18; Mateo 13:44; 1 Corinto 15:50.
Say Panarian so niletneg diad tawen nen 1914, tan satan so agbalot niyalis ed nipawil a mangaraldalin a Paraiso odino ed inerman. Si Jesu-Kristo so Ari na Panarian. Bilang Ari, si Jesus so walaay autoridad ed angheles. Sirin, say manepeg a pasen na pananguley to et diad nikawanan a lima na Dios diad katawenan. Saray alanaan a Kristianos so kaiba to bilang arari tan saserdote ed tawen.—Efeso 1:19-21; Apocalipsis 5:9, 10; 20:6.
No ontan, kabaliksan ta na saya ya agtayo la kaukolan ya ibalikas ed Dios iray kerew tayo a naromog ed kabiangan na Pikakasi na Katawan a mangibabagan: “Onsabi komon so panarian mo. Nagawa komon so linawam, a singa diad tawen, ontan met diad dalin”? (Mateo 6:10) Kasunian to, satan a pikakasi so manepeg tan napno ni na kabaliksan.
Say Panarian na Dios so maseguron onkiwas ed arapen nipaakar dia ed dalin, tan saya so walad isip tayo sano ipipikasi tan uusaren tayoray salitan singa walad Pikakasi na Katawan. Alimbawa, ipapasakbay na Daniel 2:44 a deralen na “onsabi” a Panarian so amin a nasyon tan satan so manguley ed sayan dalin. Sinaglawi na Apocalipsis 21:2 so nipaakar ed Balon Jerusalem ya onleleksab manlapud tawen. Say Balon Jerusalem so tugyopen na 144,000 ya alanaan a Kristiano a magmaliw a nobya nen Kristo. Sikara met so kaiban mananawir nen Jesus ed Panarian. Kanian dedeskribien na Apocalipsis 21:2 so pangipaarap na imano ra’d dalin, a manbunga na daakan a panamendisyon parad matoor a katooan.—Apocalipsis 21:3, 4.
Anggad agni asumpal iraya tan arum niran makapakelaw a propesiya, satan so mantultuloy nin magmaliw a susto so pangipikasi ed si Jehova a Dios a mitunosan ed saray salita nen Jesus, “Onsabi komon so panarian mo.” Balet nepeg tayon tandaan a say Panarian so ag-onla dia ed planetan Dalin diad literal a pantalos. Say gobiernon Panarian so mansiansia ed tawen, aliwan ed dalin.
[Picture Credit Line ed pahina 31]
Dalin: Base ed impanlitrato na NASA