Panoy Nepeg a Panpikasi Tayo ed Dios?

SANEN impaibangat so sakey a babangatan nipaakar ed panagpikasi, ag-inkaindan nen Jesus itan. Unong ed Lucas 11:2-4, inyebat to: “Sano manpikasi ka, ikuanmo: Ama, napasanto komon so ngaran mo. Onsabi komon so panarian mo. Ikdan mo kami ed sayan agew so inagew-agew a kanen mi. Tan perdonaen moray kasalanan mi, ta peperdonaen mi so amin ya akaotang ed sikami. Tan agmo kami itonton ed pakatuksoan.” (Catholic Douay Version) Saya so kabkabat bilang say Pikakasi na Katawan. Lugan toy dakel ya impormasyon.

Unona, say mismon unonan salita et mangipapaamta ed sikatayo no siopay nepeg a pangipaarapan na pikakasi tayo​—ed Ama tayo. Imanoen ya ag-amalugar si Jesus ya ipaarap so pikakasi ed arum a persona, imahen, “santo,” odino anggan ed sikato ni ingen. Ta, inyabawag la na Dios: “Agko iter so gloriak ed sananey, nisay dayew ko ed imbolik a bengabengatla.” (Isaias 42:8, Dy) Saray pikakasin nipaarap ed antokaman odino ed siopaman a nilikud ed mangatatawen ya Ama tayo et agto dengelen sirin, anggan panon lay kasimoon na managdayew. Diad Biblia, si Jehova a Dios lambengat so atawag a “Dumerengel na Pikakasi.”​—Salmo 65:2, NW.

Nayarin ikuan na arum a ‘saray santo’ so onkakana labat bilang manamegley ed Dios. Balet imbilin a mismo nen Jesus: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko. Et anggan anton kerewen yo ed ngaran ko, satan gawaen ko, pian say Ama nigloria ed Anak.” (Juan 14:6, 13) Sirin impulisay nen Jesus so ideya a siopaman a natatawag a santo so onkana bilang manamegley. Imanoen pa met so imbaga nen apostol Pablo nipaakar ed Kristo: “Agto lambengat inatey parad sikatayo​—pinaoli manlapud inaatey, tan diman ed nikawanan a lima na Dios sikato so akatalindeg tan mikakasi parad sikatayo.” “Sikato so mabilay a magnayon pian mamegley ed amin ya onasingger ed Dios diad panamegley to.”​—Roma 8:34; Hebreos 7:25, Catholic Jerusalem Bible.

Say Ngaran a Nepeg a Napasanto

Say tinmumbok iran salita nen Jesus ed pikakasi et: “Napasanto komon so ngaran mo.” Panon a napasanto na sakey, salanti, pasantosen, odino napatalonggaring, so ngaran na Dios no agni amta tan agni uusaren na sakey itan? Masulok ya 6,000 danay diad “Daan a Sipan,” a nipakabat so Dios ed personal a ngaran ton Jehova.

Oniay kuan na paimano’d-leksab ed Exodo 6:3 na Catholic Douay Version nipaakar ed ngaran na Dios: “Arum a moderno so anibukel ed ngaran a Jehova . . . , say tuan panangibalikas ed ngaran [na Dios], a wala ed Hebreon teksto, diad abayag ya ag-impangusar, so natan abalang la.” Kanian say uusaren na Catholic New Jerusalem Bible et say ngaran a Yahweh. Anggaman lablabayen itan na pigaran iskolar a panangibalikas, say “Jehova” so lehitimo tan abayag lan niletneg a paraan na pangibalikas na madibinon ngaran ed Ingles. Say arum a lenguahe so walaan na dili ran paraan na panangibalikas ed madibinon ngaran. Say importantin bengatla et say pangusar tayo ed satan a ngaran ta pian napasanto itan. Kasin ibabangat ka na relihyon mon usaren so ngaran a Jehova ed pikakasi?

Manepeg Iran Tema ed Pikakasi

Insan imbangat nen Jesus iray babangatan ton manpikasi: “Onsabi komon so panarian mo.” Iyaarum na Ebanghelyo nen Mateo iray salitan: “Nagawa so linawam ed dalin a singa met ed tawen.” (Mateo 6:10, Dy) Say Panarian na Dios so sakey a gobierno ed silong nen Jesu-Kristo. (Isaias 9:6, 7) Unong ed propesiya na Biblia, agla manbayag et satan so onsalat ed amin a gobierno na too tan itarok toy panaon na englobon kareenan. (Salmo 72:1-7; Daniel 2:44; Apocalipsis 21:3-5) Kanian naynay a tema ed saray pikakasi na tuan Kristianos so isasabi na Panarian. Kasin ibabangat ka na relihyon mon ontan so gawaen mo?

Makapasagyat, impanengneng met nen Jesus a nayarin ilaktip ed pikakasi tayoray personal a pamaakaran ya importanti ed sikatayo. Inkuanto: “Iter mo ed sikami ed sayan agew so inagew-agew a kanen mi. Tan perdonaen moray kasalanan mi, ta peperdonaen mi so amin ya akaotang ed sikami. Tan agmo kami itonton ed pakatuksoan.” (Lucas 11:3, 4, Dy) Ipapanengneng na salita nen Jesus a naanap tayoy linawa na Dios ed saray inagew-agew a pamaakaran, a naasinggeran tayo si Jehova nipaakar ed antokaman a panaburidoan odino pakaguloan na deen na nonot tayo. Sayan paraan na maparanay ya ikekerew ed Dios so ontutulong ed sikatayon natalosan a sikatayo so mandependi ed sikato. Diad ontan et lalon naaamtaan tayo so impluensya to ed bilay tayo. Say inagew-agew ya ikekerew na panamerdona na Dios ed impakalukso tayo so makagungguna met. Mas naaamtaan tayoray kakapuyan tayo​—tan lalon nitepel tayo iray kakulangan na arum ed sikatayo. Say simbawa nen Jesus ya ipikasi tayo so kiliktar manlapud tukso so matukoy met, nagkalalo la nisesengeg ed iyaabeba na moralidad na sayan mundo. Mitunosan ed satan, siaalwar tayon papaliisan iray sirkumstansya tan kipapasen a makapangitonton ed sikatayo ed gawan-mauges.

Sirin, anggapoy suppiat a dakel so ipapaamta ed sikatayo na Pikakasi na Katawan nipaakar ed saray pikakasin mamaliket ed Dios. Balet kasin ginetma nen Jesus a moriaen tayo iyan pikakasi a maparanay ya usaren?

Kaaruman a Konseho ed Pikakasi

Angiter si Jesus na kaaruman a bilin ed panagpikasi. Diad Mateo 6:5, 6, nabasa tayo: “Bangno mikasi kayo agki komon singa saray mansimpisimpitan; ta labalabay day manalagey a manpikasi dia ed saray sinagogas tan dia ed saray soysuyok na polpolong, pian nanengneng ira na totoo. . . . Ingen sika, bangno mikasi ka, onloob ka ed silir mo, et no nikapot mo la so pintom, insan ka mikasi ed Amam a wala ed amot, et say Amam ya wala ed amot tumangan to ka.” Ibabangat itayo na sarayan salita a say pikakasi so nepeg ya ag-itarok diad mapasirayew, maparayag a paraan ta pian pandinayewen so sananey. Kasin personal ya ibabagam ya amin so gonigon mo ed si Jehova, a singa ipapaseseg na Biblia?​—Salmo 62:8.

Impasakbay iya nen Jesus: “Diad saray pikakasim agka andi-kakanaan a mangulit-ulit a singa ed gagawaen na saray pagano, ya isipen dan diad pangusar na dakel a salita et sikaray narengel.” (Mateo 6:7, JB) Malinlinew, ya ag-inabobonan nen Jesus iray impatlep a pikakasi​—nisay binasa ed dasalan. Agmet ilalaktip na saray salita to so panagrosaryo.

Oniay inaksobi na sakey a Katolikon dasalan: “Say sankaabigan a pikakasi tayo et say natural a walad dilin kanonotan tayo sano onarap itayo ed sikato lapud otang a linawa odino ed pankaukolan tayo, ed panaon na ermen, odino ed inagew-agew a regular a panamagalang tayo ed sikato.” Saray mismon pikakasi nen Jesus so natural, aliwan impatlep. Alimbawa, basaen so pikakasi nen Jesus a nirekord ed Juan kapitulo 17. Mitukoyan itan ed modelon pikakasi, a nidadanet so pilalek nen Jesus a namoria so kapasantos na ngaran nen Jehova. Say pikakasi nen Jesus so natural manlalapud puso.

Pikakasi A Dengelen na Dios

No sika so nibangat lan mangiyapay na impatlep iran pikakasi, a manpikasi ed “saray santo” odino ed imahen, odino mangusar na bengatlan relihyoso, singa say rosaryo, say ideyan panpikasi ed paraan ya indatak nen Jesus so diad unona et manesga ed sika. Ingen, say tombok et say pangamta ed Dios​—say ngaran to, saray gagala to, say personalidad to. Nagawam iya diad impasyan panagaral ed Biblia. (Juan 17:3) Akaparaan tan mabulos so Tastasi nen Jehova ya ontulong ed sika ed sayan pamaakaran. Agayla, minilyon lay atulongan da ed interon mundo pian ‘tawayan tan nengnengen a si Jehova so maong’! (Salmo 34:8) No lalon nakakabatan mo so Dios, lalon napakiwas kan mandayew ed sikato diad pikakasi. Tan diad lalon iyaasingger mo ed si Jehova diad marespeton pikakasi, lalon onapit so relasyon mo ed sikato.

Napapaseseg sirin so amin a tuan managdayew na Dios a ‘manpikasi ya andi-tunda.’ (1 Tesalonica 5:17) Seguradoen mon saray pikakasim so talagan mitunosan ed Biblia, a lalaktipen toray bilin nen Jesu-Kristo. Diad onian paraan et makapanseguro kan saray pikakasim so walaay panangabobon na Dios.

[Litrato ed pahina 7]

No panon a lalon naaaralan tayo so nipaakar ed si Jehova, lalon napapakiwas itayon manpikasi ed sikato manlapud puso