Kasin Amin a Relihyon so Makapaliket ed Dios?
Isipen mo ta’n amin a relihyon et mamaliket ed Dios? Anganko et dinanman a porma na panagdayew ya amtam et mangipapaseseg na maong a kondukta, anggan panon et diad sakey a laknab. Balet kasin magenap itan a mamaliket ed Dios?
IKUAN na arum, ‘Basta masimoon ka ed panagdayew mo, napaliket lay Dios. Wala so maong ed amin a relihyon.’ Alimbawa, inadapta na Bahai Faith iyan panmoria anggad punton intekep ed saray sisiaen to ed siameran manunan relihyon ed mundo. Panisiaan na sayan relihyoson grupo a walaan irayan amin na madibinon lapuan tan aspeto na sakey a katuaan. Panon a nagmaliw ya ontan?
Niarum ni, kanepegan mon ontepet no panon a makapaliket ed Dios so sakey a relihyon sano gagangganen toray membro to a mangipasen na nerve gas ed publikon paspasen, a posiblin kipateyan na dakel a totoo. Ontan so akusasyon ed sakey a relihyoson grupo ed Hapon. Odino napapaliket ta so Dios ed sakey a relihyon a papasesegen toray membro to a manbitkel? Pigaran taon lay apalabas, agawa itan ed saray papatumbok na relihyoson lider a si Jim Jones.
No pawilen tayoray asasakbay a panaon, nitepet tayo, Makapaliket ta ed Dios iray relihyon sano saratan so mangidadalangirang ed panbabakal, a singa ed kaso na Talomplon Taon a Bakal, a nanlalabanan nen 1618 ya anggad 1648? Unong ed The Universal History of the World, saray relihyoson gutgutan ed baetan na saray Katoliko tan Protestanti et “sakey ed saray sankateriblian a bakal ed awaran na Europa.”
Nansumpal met ed makapataktakot a panagpaagus na dala iray relihyoson Krusada manlapud nen koma-11 ya anggad koma-13 a siglo. Alimbawa, diad inmunan Krusada, say tatawagen a Kristiano iran managkrusada so siruruksan amatey ed saray Muslim tan Judios a manaayam ed Jerusalem.
Konsideraen met so agawa legan na Inkisisyon, a ginmapo nen koma-13 siglo tan nambayag ed ngalngali 600 taon. Nilibo so pinairap tan pinoolan diad ganggan na saray relihyoson lider. Diad libro ton Vicars of Christ—The Dark Side of the Papacy, oniay inkuan nen Peter De Rosa: “Diad ngaran na papa, [saray inkisidor] so responsabli ed sankaruksaan tan tuloytuloy a panagpatey ed maong a walna na too ed awaran na [atooan a] rasa.” Nipaakar ed Dominican ya inkisidor a si Torquemada na Espanya, oniay inkuan nen De Rosa: “Sikatoy aturo nen 1483, siruruksan nanuley ed loob na labin-liman taon. Saray biktima to so masulok a 114,000 tan 10,220 ed sikara so pinoolan.”
Siempre, aliwan saray relihyon na Kakristianoan labat so nankasalanan ed dala. Diad libro ton Pensées, inkuan nen pilosopon Pranses a si Blaise Pascal: “Agbalot nanggawa na mauges iray totoo ya ontanlan inkasigpot tan inkaligsa no gagawaen da itan lapud relihyoson kombiksyon.”
Nabibidbiran Diad Saray Bunga Ra
Manlapud punto de bista na Dios, say pakaabobonan na sakey a relihyon so agnibase ed sakey labat a sengegan. Pian abobonan to so sakey a relihyon, nepeg a saray bangat tan aktibidad to so mitunosan ed nisulat a Salita ton katuaan, say Biblia. (Salmo 119:160; Juan 17:17) Nepeg a mitunosan so bunga na aabobonay-Dios a panagdayew ed saray estandarte nen Jehova a Dios.
Diad Sermon to ed Palandey, impabitar nen Jesu-Kristo ya onlesa iray propeta a sititilan mangibabagan mangirepresenta ed Dios. Inkuan nen Jesus: “Manalwar kayo ed saray aliwan tuan propetas ya onla’rad sikayo a sikakawes na kawes na karnero, balet dia ed loob da sikaray lobon mangasiba. Napatnagan yo ra lapud saray bunga ra. Makaborbor ta’ray totoo na ubas ed saray espino, odino higos ed saray sabitan? Ontan met ya amin a maong a kiew mangiter na maong a bunga, sabalet so aderal a kiew mangiter na aliwan maong a bunga; say maong a kiew agnayarin manbunga na mauges a bunga, et agmet nayarian na aderal a kiew so manbunga na maong a bunga. Balang kiew ya agmanbunga na maong a bunga sikato so nabatang tan ibuntok ed apuy. Kanian diad saray bunga ra so nibiig yo ra.” (Mateo 7:15-20) Ipapanengneng na sarayan salita a kaukolan itayon akabantay ed espiritual a paraan. Nayarin isipen tayon say sakey a relihyoson lider odino grupo so aabobonan na Dios tan nen Kristo, balet ta nayarin nalilingo itayo.
Kaukolay Panalwar
Anggaman ibabaga na sakey a relihyon ya aabobonan na Dios itan tan manbabasa iray ministro to ed saray bersikulo na Biblia, agto labay ya ibagan satan so porma na panagdayew a makapaliket ed Dios. Manggawa ni ingen iray lider to na makapadinayew iran bengatla ya ompatnag a singano say Dios so manguusar ed sikara. Anggaman kuan, siansian say relihyon so palso, ya agmamapawala na bunga ya aabobonan na Dios. Akapanggawa na makapadinayew iran bengatla iray taga-Ehipton saserdote a managsalamangka diad agew nen Moises, balet ta maseguron anggapoy panangabobon na Dios ed sikara.—Exodo 7:8-22.
Natan a singa nen saman, dakel a relihyon so mangidadalangirang na atooan iran ideya tan pilosopiya imbes a suportaan so idedeklara na Dios a katuaan. Kanian, nagkalalo lan matukoy so pasakbay na Biblia: “Manasikaso kayo ta ompan wala so manggawa na deral ed sikayo lapu ed pilosopya to tan andi kakanaan a panamalingo, unong ed saray dinaralin bangat na mundo tan aliwan unong ed Kristo.”—Colosas 2:8.
Kayari impanukoy to ed saray maong tan mauges a bunga, inkuan nen Jesus: “Aliwan balang sakey a mankuan ed siak na, ‘Katawan, Katawan,’ et onloob naani ed panariay tawen, noag ingen say mangunor na linawa nen Amak a wala ed tawen. Dakel naani ray mankuan ed siak ed satan ya agew, ‘Katawan, Katawan, agkami ta angipropeta lapud ed ngaran mo, tan diad ngaran mo pinapaway mi ray demonio, tan lapud ngaran mo nanggawa kami na makapakelaw iran gawa?’ Et saman ko la ipaliwawa naani ed sikara: Ag takayo apikabkabatan a balot! Arawi kayo’d siak, sikayo a managgawa na kaugsan.”—Mateo 7:21-23.
Panangusisa ed Bunga
Malinew, sirin, ya importanti so inengneng ed bunga na sakey a relihyon sakbay ya ibagan satan so aabobonan na Dios. Singa bilang, mibabali ta so relihyon ed saray politika? Insan imanoen irayan salita, a nirekord diad Santiago 4:4: “Siopaman a magmaliw naani a kaaro na mundo sikato so kabusol na Dios.” Sakey ni, inkuan nen Jesus ed saray tuan papatumbok to: “Ag-ira taga mundo, salanti unong ya ag’ak taga mundo.” (Juan 17:16) Say relihyon a maong ed imaton na Dios et agmibabali ed saray politika na sayan mundo, a “mandokdokol ed kaugsan,” say agnanengneng ya espiritun pinalsa a si Satanas a Diablo. (1 Juan 5:19) Imbes, say relihyon ya aabobonan na Dios so sitotoor a mangidadalangirang ed Panarian to ed silong nen Jesu-Kristo tan mangidedeklara ed maong a balita nipaakar ed satan a mangatatawen a gobierno.—Marcos 13:10.
Aabobonan ta na Dios so relihyon no satan so mangidadalangirang na agkatutulok ed sibil? Mapatpatnag so ebat no talinengen tayo so simbawa nen apostol Pablo: “Ipanonot mi ed sikara a pauleyan ira komon ed saray manuley tan pakauley ya ontulok ira, tan maralato ra ed amin a gawa a maabig.” (Tito 3:1) Siempre, impanengneng nen Jesus a saray papatumbok to so kaukolan a ‘manbayar ed Cesar na bengabengatlan kien nen Cesar, tan ed Dios ed saray kien na Dios.’—Marcos 12:17.
Bilbilang ta ipapaseseg na sakey a relihyon so pibiang ed saray bakal na nasyones. Papasesegen itayo na 1 Pedro 3:11 a ‘gawaen so kaabigan’ tan ‘anapen so kareenan tan tumboken.’ Panon a napaliket na sakey a relihyon so Dios no saray membro to so mabulos a mamatey ed saray kapara ran managdayew ed sananey a bansa diad panbabakal? Ipapatnag na saray membro na relihyon ya aabobonan na Dios so manunan kualidad to—say aro. Tan inkuan nen Jesus: “Lapu ed saya amin a too nabirbiran da a sikayoray babangatan ko, no wala so aro yo ed sakey tan sakey.” (Juan 13:35) Satan ya aro so andian na pisiglaot ed marawal a panbubusolan a nidadalangirang ed saray bakal na nasyones.
Uumanen na tuan relihyon so gerero a totoo a magmaliw a manangaro na kareenan. Nipasakbay iya ed oniaran salita: “Pitpiten da naani so saray kampilan da a pagmaliwen da a dingding na lukoy, tan saray gayang da a komkompay. Say nasyon agnaani mangitagey na kampilan a sumpa ed nasyon, ag-ira met la manaral na bakal ed anggan kapigan.” (Isaias 2:4) Imbes a mangikelyaw na panggula, saramay mangaagamil na tuan panagdayew so ontulok ed ganggan ya: “Aroen mo so kaparam a too unong ed sikan dili.”—Mateo 22:39.
Panbabanikelan na saramay mangaagamil na tuan relihyon so panbilay ed atagey iran estandarte nen Jehova a Dios, ya ipupulisay so pangadapta na imoral iran estiloy-panagbilay. Oniay ibabaga na Salita na Dios: “Odino! Agyo amta kasi ta saray agmatunong agda natawir so panariay Dios? Agkayo patitilaan. Anggan saray managlawan, anggan saray manangigalang ed talintao, anggan saray managsingger ed agda asawa, anggan saray binabai, anggan saray milawanan ed kapara ra a laki, anggan saray matakew, anggan saray maagum anggan saray managbuanges, anggan saray managpabanday, anggan saray managpatubo agda natawir so panariay Dios. Tan ontan so saray arum ed sikayo nen saman. Balet naurasan kayo la, balet apasantos kayo la, balet nibilang kayo la a matunong ed ngaran na Katawan a Jesu-Kristo tan dia ed espiritu na Dios tayo.”—1 Corinto 6:9-11.
Panaon la Parad Desididon Kiwas
Makana so pakatebek ed pandumaan na palson panagdayew tan ed tuan relihyon. Diad libro na Biblia ya Apocalipsis, abidbir so sankamundoan ya imperyo na palson relihyon bilang “Babilonia a Baleg,” sakey a simbolikon balangkantis “a sikato so nanggawaan na lawan na saray arari ed dalin.” Sikatoy nankasalanan ed dala tan akaegna na binmalitok a kupa a “napno na makapadimla, salanti karutakan na bengatla a pilalawan to.” (Apocalipsis 17:1-6) Anggapon balot so aabobonan na Dios ed sikato.
Saya la so panaon parad desididon kiwas. Onia so ikekelyaw na maaron Manamalsa tayo ed saray masimoon a totoo a wala ni ed Babilonia a Baleg: “Ompaway kayo ed sikayo, baley ko, pian agkayo nalanor ed saray kasalanan to, tan agkayo manlikna ed saray bakbak to.”—Apocalipsis 18:4.
No pirawat moy mangagamil na relihyon a makapaliket ed Dios, akin ya agkabaten a nagkalalo iray Tastasi nen Jehova? Say katekep a tsart so mangililista ed pigaran sisisiaen, tekep na Makasulatan iran rason parad saratan a sisisiaen. Sukayan mo ed Bibliam pian imanoen no kasin saray sisisiaen na Tastasi so mitunosan ed Salita na Dios. Sukimaten pian naromog no kasin say relihyon da so mamapawala na maabig a bunga ya iilaloan mo ed tuan panagdayew. No naromog mon mitunosan, nadiskobrim so relihyon a makapaliket ed Dios.
[Kahon ed pahina 5]
NO ANTO SO SISISIAEN NA TASTASI NEN JEHOVA
SISISIAEN BIBLIKON BASIYAN
Say ngaran na Dios et Jehova Exodo 6:3; Salmo 83:18
Say Biblia so Salita na Dios Juan 17:17; 2 Timoteo 3:16,17
Si Jesu-Kristo et Anak na Dios Mateo 3:16, 17; Juan 14:28
Say katooan so agnankalkalnan Genesis 1:27; 2:7
linmesa noagta pinalsa
Say ipapatey na katooan et lapud Roma 5:12
kasalanan na inmunan too
Ontundan manbilay so kamarerwa diad ipapatey Eclesiastes 9:5, 10; Ezequiel 18:4
Say impierno so kaslakan a lubok na katooan Job 14:13; Apocalipsis 20:13,
King James Version
Say kikioli so ilalo parad inaatey Juan 5:28, 29; 11:25; Gawa 24:15
Inter nen Kristo so mangaraldalin Mateo 20:28; 1 Pedro 2:24;
a bilay to bilang dondon 1 Juan 2:1, 2
parad matulok a katooan
Nepeg ya ipaarap labat iray pikakasi Mateo 6:9; Juan 14:6, 13, 14
ed si Jehova diad panamegley nen Kristo
Nepeg ya unoren iray ganggan na
Biblia nipaakar ed moral 1 Corinto 6:9, 10
Agnepeg ya usaren iray imahen Exodo 20:4-6;1 Corinto 10:14
ed panagdayew
Nepeg a paliisan so espiritismo Deuteronomio 18:10-12;
Agnepeg ya ipaloob so dala Genesis 9:3, 4; Gawa 15:28, 29
ed laman na sakey
Nepeg a mansiansian biig ed Juan 15:19; 17:16; Santiago 1:27; 4:4
mundo iray tuan patumbok nen Jesus
Mantasi iray Kristiano, Isaias 43:10-12;
ya iyabawag so maong a balita Mateo 24:14; 28:19, 20
Say bautismo diad kompleton kipalgep ed danum Marcos 1:9, 10; Juan 3:22;
so mangisisimbolo Gawa 19:4, 5
na dedikasyon ed Dios
Saray relihyoson titulo Job 32:21, 22; Mateo 23:8-12
so agmakasulatan
Manbibilay itayo ed Daniel 12:4; Mateo 24:3-14;
‘panaon na anggaan’ 2 Timoteo 3:1-5
Agnanengneng so kiwawala nen Kristo Mateo 24:3; Juan 14:19;
Si Satanas so agnanengneng a Juan 12:31; 1 Juan 5:19
manuley na sayan mundo
Deraley Dios so peles a marelmeng Daniel 2:44;
a sistema na bengabengatla Apocalipsis 16:14, 16; 18:1-8
Say Panarian na Dios ed silong Isaias 9:6, 7; Daniel 7:13,14;
nen Kristo so manuley Mateo 6:10
ed dalin diad inkatunong
Sakey a “melag a pulok” so miuley Lucas 12:32;
ed si Kristo diad tawen Apocalipsis 14:1-4; 20:4
Say arum ya aabobonan na Dios Lucas 23:43; Juan 3:16;
so mangawat na magnayon Apocalipsis 21:1-4
a bilay diad paraison dalin
[Litrato ed pahina 4]
Nilibo-libo so pinatey legan na Inkisisyon
[Litrato ed pahina 6]
Saray Krusada so nansumpal ed makapataktakot a panagpaagus na dala
[Litrato ed pahina 7]
Naamtaan so tuan relihyon ed maong a bunga to
[Picture Credit Line ed pahina 2]
Cover: Garo Nalbandian