Report na Saray Manangiyabawag na Panarian
Mantultuloy a Nipupulong Iray Katuaan na Biblia Diad Ireland
DIAD AGANO niran taon say mabistan bansa na Ireland so pakaromogay dakerakel a kaguloan. Kabansag na satan, kinmiwas a paborable iray Irelandes ed mensahe na Biblian ilalo ya intarok ed sikara na Tastasi nen Jehova. Saray onggendan ya eksperiensia manlapud Ireland so mamepekder ed saya.
◼ Diad Dublin et kaiba na sakey ed Tastasi nen Jehova so anak ton ugaw a bii ed panagkabkaabungan a kimey. Nabet da so sakey a biin manngaran na Cathy ya okupadon tuloy ed saray dakel ya ananak to. Kinerew na Tasi no say anak ton ugaw a bii, a manaaral no panon a manpulong, so nayarin manginabang na antikey a mensahe ed sikato. Inmabobon si Cathy, tan say ugaw a bii so akapangiter na malinew, maalotor a presentasyon. Nandinayew si Cathy ed mapatnag ya inkasimoon tan inkamapagalang na kalangweran, tan inawat to so opresin Bible tract.
Saginonor minolimoli nen Cathy so maabig a preparasyon tan walna na ugaw a bisita. “Pandinayewan ko a say ugaw a bii so makapanginabang na ontan a makapasagyat a mensahe ya agto ipaarap so imano ed inkasikaton dili,” inkuanto. “Denesidek a diad ontumbok a pankanawnawa ya ondalaw iray Tastasi nen Jehova et talinengen ko ra.”
Kaleganan na saya si Cathy so inmalis ed sakey a melag a baley ed abalaten-sagur na Ireland asingger ed ketegan na saray distrito na Cork tan Kerry. Agnambayag et dinmalaw ed abung to iray Tastasi nen Jehova, tan pinaloob. Inawat to so regular a panagaral na Biblia tan natan et onaatendi la ed saray miting ed kongregasyon a kaiba so pigaran anak to. Misalsalamat si Cathy ed masimoon a pilalek na ugaw a bii pian inabang so maong a balita ed sikato.
◼ Diad lugar na Tullamore, isisingbat na Tastasi so Biblia ed sakey a biin manngaran na Jean ed loob na pitora lan taon. No maminsan et mangipanengneng na interes tan mangawat na literatura, balet no maminsan et onkesay so interes to. Sakey ya agew, sanen sakey a Tasi a manngaran na Frances tan say kaiba to so dinmalaw ed si Jean, asabian dan anggapod kondisyon. “Anggan antoy ibaga mi,” report na Tasi, “sikatoy lalon onsyodot. Kaunoran, et pinataynan to kami tan inpalalkab toy puerta.”
Panumamengan nen Frances ompan onman so reaksion to ni ed ontumbok iran bisita. ‘Anganko et anggapo lay gungguna na idalaw ed sikato no talagan sikatoy agtalagan interesado ed mensahe,’ so inisip nen Frances. Anggaman ontan, intongtong to iya ed masiken to, si Thomas, tan sikatoy lalon mailalo. Diad tinmumbok a pankanawnawa a wadtan ira ed saman, dinalaw lamet si Jean. Sikatoy makaaro tan angawat na saray kopya na magasin a Say Panag-Bantayan tan Awake! Saray tinmumbok a dalaw so makapaliket, tan si Thomas tan Frances so angigapo ed sikato na regular a panagaral na Biblia.
Akin ya anguman? Impaliwawa nen Jean a diad saman a sikato so bugtabugtak ed saray Tastasi, sikato so agano nin nananak tan kapawapaway to ed ospital. Lapud manpapasoso ed kapananak tan pamapakan ed papanguloan ya anak to, sikatoy makakaugip labat na sakey oras tan kapaldua ed labi. “Say unor a bengatlan labay kon gawaen,” kuan nen Jean, “say pitongtong nipaakar ed relihyon.”
Diad loob labat na duaran bulan et aatendian la nen Jean so amin a miting ed kongregasyon, tan diad loob na apatiran bulan sikato lay mibibiang ed lawak a ministeryo. Samploran bulan manlapud inggapo ton manaral na Biblia, sikatoy abautismoan. Natan say dilin eksperiensia nen Jean so ontutulong ed ministeryo to. Insalaysay to: “No makaabet ak na bugtabugtak, panggunaetan koy pagmaliw a lalon makatalos. Lawas kon imanoen itan. Anganko manguman so situasyon diad panaon na ipawil ko; nayarin say too so minmaong la tan lalon akaparaan a mangawat.”