Panlilingkor ed si Jehova Bilang Sakey a Nankakasakey a Pamilya

UNONG ED SALAYSAY NEN ANTONIO SANTOLERI

Say amak so mantaon na 17 sanen tinaynan to so Italya nen 1919. Inmalis ed Brazil diad panaanap na magmaong a panagbilay. Ag-abayag, awalaan na barberya ed sakey a melag a baley diad loob na estado na São Paulo.

SAKEY ya agew nen 1938, sanen manedad ak na pitora, akala si Tatay na Brasileira a bersyon na Biblia ed sakey a lakin dinmalan ed barberya to. Duay taon ed saginonor et si Nanay so naninagem a pirmi tan nansiansian baldado anggad impatey to. Si Tatay so nansakit met, kanian amin mi​—siak, si Nanay, Tatay, tan say agik a si Ana​—so akiayam ed kakanayon mi ed syudad na São Paulo.

Legan na impaneskuelak ed São Paulo, nagmaliw ak a mahilig a managbasa, nagkalalo la ed saray maawaran a sulsulat. Pandinayewan koy bengatlan say Biblia so nasasaglawi ed saratan tunggal paminsan. Sakey a nobelan libron binayes ko ed publikon librarya na São Paulo, so anaglawi ed Sermon ed Palandey ya aminpiga. Saman ko la deneside so pakagamor na Biblia pian nabasak a mismo itan a sermon. Inanap koy Biblian nala nen Tatay ed apalabas iran taon tan diad kaunoran et nalmok iman ed daledalem na kaban, a wadman ed loob na pitoran taon.

Say pamilya mi et Katoliko, kanian agak balot apaseseg a manbasa na Biblia. Natan, diad inkasiak et naamtaan kon anapen iray kapitulo tan bersikulo. Nanliketan kon tuloy so impamasa ed Sermon ed Palandey pati ed interon libro na Mateo ontan met ed arum niran libro na Biblia. Say akasagyat ed siak a maong et say tanol na katuaan ed inkiparungtal na saray bangat tan milagro nen Jesus.

Diad impakamorian duman tuloy so Katolikon relihyon ed nababasak ed Biblia, inmatendi ak ed Presbyterian Church, tan akiulop ed siak si Ana. Ingen, liknaen kon wala ni kulang ed siak. Abayag kon sigugunaet ya inanap so Dios. (Gawa 17:27) Sakey a mabitewen a labi, sanen siak so nandalepdep, nanumameng ak, ‘Akin a wadia ak? Anto ta so gagala na bilay?’ Nananap ak na niamot a lugar ed solar, tinmalimukor, tan nampikasi, ‘Katawan a Dios! Siopa ka? Panon ta kan nakabat?’ Ag-abayag et sinmabi so ebat.

Impakaaral ed Katuaan na Biblia

Sakey ya agew nen 1949, inasinggeran na sakey a marikit si Tatay kayari inyepas to ed luluganan. Inopresian to na saray magasin a Panag-Bantayan tan Awake! Nansuskribe na Panag-Bantayan tan kinerew ton ombisita ed abung, ya imbaga ton walaan na duaran ilalak ya onaatendi ed Presbyterian Church. Legan na imbisita na bii, intilak to ed si Ana so libron Children tan inyaralan to. Diad saginonor et akila ak ed panagaral.

Nen Nobyembre 1950 et akaatendi kami ed sankaunaan a kombension na Tastasi nen Jehova. Diman a nipaway so libron “Let God Be True,” tan intuloy mi so panagaral na Biblia diad impangusar ed saman a libro bilang giya mi. Ag-abayag et atebek min nalmo mi la so katuaan, tan nen Abril 1951 sikami abautismoan bilang simbolo na dedikasyon mi ed si Jehova. Kayari na pigaran taon ed saginonor tan sikatoy inatey a matoor ed Dios nen 1982 et nandedika si Tatay.

Maliket ed Sigpot-Panaon a Serbisyo

Nen Enero 1954, sanen 22 ak labat ni, nala ak a manserbi ed sangan opisina na Tastasi nen Jehova, a tatawagen a Bethel. Nikelawan ak sanen naamtaan ko diad insabik diman a sakey a lakin panguloan na duaran taon labat nen say siak, si Richard Mucha, so say manangasikaso na sanga. Nen 1955, sanen mankaukolan na saray circuit servant, bilang tawag ed saman ed saray managbiahen manangasikaso, sakey ak ed limaran lalakin naimbitaan a mibiang ed sayan serbisyo.

Say asainmin ko et say estado na Rio Grande do Sul. Walwaloray kongregasyon na Tastasi nen Jehova diman sanen ginapoan koy serbisyo, balet diad loob na 18 bulan et niletneg so duaran balon kongregasyon tan 20 nisulinek a grupo. Diad sayan lugar labat et walaray 15 sirkito na Tastasi nen Jehova, a kada sakey et walaay ngalngali 20 a kongregasyon! Diad kasampotay 1956, nibaga ed siak a say sirkitok so naapag ed apatiran mas ankelag a sirkito a panserbian na apatiran circuit servant. Diad saman et pinapawil ak ed Bethel parad balon asainmin.

Asurprisa tan aliketan ak a naasain ed mamaamianen na Brazil bilang district servant, sakey a managbiahen ministron lilingkoran toy pigaran sirkito. Diad saman et say Brazil so walaan na 12,000 a ministros na Tastasi nen Jehova, tan say bansa so walaan na duaran distrito. Si Richard Wuttke so nanlingkor ed saman diad abalaten, tan siak et diad distriton amianen. Nipasal kami ed Bethel a mangipaandar na prodyektor pian naipalabas iray pelikulan pinawala na Tastasi nen Jehova, The New World Society in Action tan The Happiness of the New World Society.

Diad saraman a panaon et mairap a tuloy. Anggapo so Tasin walaan na auto, kanian siak so nambaroy diad panamegley na canoe, baloto, kariton a guguyoren na baka, kabayo, bagon, trak, tan aminsan et akalugan ed eroplano. Agaylan makapalikliket so pakatekkiab ed tapew na katakelan na Amazon pian ondapo ed Santarém, sakey a syudad a walad baetan na Belém ed sangi na say Amazon tan Manaus, say kabisera na Estado na Amazonas. Diad saman a panaon et daiset ni lilingkoran na saray district servant ya asamblea sirkito, kanian baleg a panaon so inusar ko ed impangipanengneng na saray pelikula na Sosyedad. Diad ankabaleg a syudades, nilasus so inmatendi.

Say nandinayewan kon tuloy ed amianen a Brazil et say lugar na Amazon. Legan na panlilingkor diman nen Abril 1957, linmippua so Ilog na Amazon pati ed saray linok to. Apribilihyoan ak a mangipanengneng ed sakey ed saray pelikula diad katakelan, diad impangibuskag na ginawan telon ed baetan na duaran kiew. Say koryenti parad prodyektor so inala manlapud baloton de-motor ya akadaung ed asingger ya ilog. Saman so sankaunaan a pelikulan anengneng na maslak ed say wadman.

Agnambayag kayari na saman et pinmawil ak ed serbisyo’d Bethel, tan diad tinmumbok a taon, nen 1958, apribilihyoan ak ya onatendi ed maawaran a “Madibinon Linawa” ya Internasyonal ya Asamblea na Tastasi nen Jehova, diad New York City. Walaray delegadon nanlapud 123 a daldalin ed limog na saramay 253,922 ya inmatendi ed Yankee Stadium tan asingger a Polo Grounds ed kasampotan ya agew na waloy-agew a kombension.

Nanggayagaan Iray Pananguman ed Bilay Ko

Kayarin tuloy na impawil ed Bethel, akabat ko si Clara Berndt, tan nen Marso 1959 et nankasal kami. Sikami niasain ed pansirkiton kimey ed estado na Bahia, a nanlingkor kami ditan ed ngalngali sakey taon. Nanonotan mi ni nen Clara tekep na gayaga so inkamapaabeba, inkamaparawes, seseg, tan aro na agagi diman; pobre ira no nipaakar ed materyal balet ta mayaman ed saray bunga na Panarian. Insan sikami so niyalis ed São Paulo State. Diman, nen 1960, a nanlukon so asawak, tan kaukolan min itunday sigpot-panaon a ministeryo mi.

Deneside mi onalis ed lugar diad estado na Santa Catarina, lugar na inkianakan na asawak. Say anak mi, si Gerson, so inmuna ed limaran anak mi. Sikatoy tinumbokan nen Gilson nen 1962, Talita nen 1965, Tárcio nen 1969, tan Janice nen 1974. Salamat ed si Jehova tan ed maabig a simbawan iiter to, ayarian min naarap so angat ed panamabaleg ed sikara a “bangatan ed kadudusa tan panamilin na Katawan.”​—Efeso 6:4.

Impasen mi so balang anak mi a mablin tuloy. Marakep so impangibalikas na salmista ed liknaan mi: “Nia! Saray ugugaw sikara so sakey a tawir [manlapud si, NW] Jehova.” (Salmo 127:3) Anggaman walaray problema, naasikaso miray anak mi a singa gawaen mi ed antokaman a ‘tawir manlapud si Jehova,’ sinononot ed saray bilin a naromog ed Salita to. Dakel iray tumang. Agnibaga so gayaga mi sanen say limara, balang sakey, tan ed dilin bunek da et angibalikas ed pilalek dan manpabautismo bilang simbolo na dedikasyon da ed si Jehova.​—Eclesiastes 12:1.

Say Desisyon na Ananak Mi

Nanggayagaan min tuloy sanen si Gerson, diad impakasumpal toy kurso ton data processing et inkuanton labay toy man-Bethelite, diad ontan et pinili to so sigpot-panon a ministeryo imbes a propesyonal a karera. Balet diad gapo et agnagmaliw a mainomay parad si Gerson. Kayari imbisita mi ed sikato sanen apatiran bulan to labat ni ed Bethel, atikna ak ed kaermenan a nabasa’d itsuray lupa to diad inyalis mi. Diad rearview mirror na kotse mi, anengneng kon sankanengneng to kami anggad alampasan mi so inmunan kurba ed kalsada. Saray matak so napno na lua a kaukolan kon itunda ed gilig na kalsada sakbay na ituloy mi 700 kilometron biahen pasempet.

Talagan nanggayagaan nen Gerson so Bethel. Kayari impanserbi to diman ed ngalngali anemiran taon, inasawa to si Heidi Besser, tan nanlingkor iran dua ed Bethel ed duara nin taon. Insan nanlukon ed satan si Heidi tan kaukolan da lay onalis. Say anak dan bii, si Cintia, natan et anem taon to la, so mimila ed sikara ed saray kimey da ed Panarian.

Ag-abayag kayari inmunan imbisita mi ed si Gerson ed Bethel, si Gilson, a kapkapansumpal toy inmunan taon ya impaneskuela ed komersyo, so angibagan labay toy manlingkor met diman. Plano ton ituloy so kurso ton komersyo kayari panlingkor na sakey taon ed Bethel. Balet nauman iray plano to, tan nansiansia ed serbisyo ed Bethel. Nen 1988 inasawa to si Vivian Gonçalves, sakey a payunir, a singa tawag ed saray sigpot-panaon a ministros. Nanlapulad saman, sikaray saniban nanlingkor ed Bethel.

Tuloy so gayaga mi sanen say komatlon anak mi, si Talita, et pinili toy panpayunir nen 1986 kayari impanaral na kurson drafting. Taloy taon ed saginonor et sikato met so naimbitaan ed Bethel. Nen 1991 et akiasawa ed si José Cozzi, a manlilingkor la ed Bethel ed loob na samploy taon. Sikaray nantultuloy ditan bilang sanasawa.

Nanliketan min sanasawa lamet sanen si Tárcio, say yugtan to, so angulit ed parehon imbalikas na saray talora la, “Tay, labay ko met so onlad Bethel.” Say aplikasyon to so inawat, tan nen 1991 et inggapo to met so serbisyo ed Bethel, a sikatoy wadtan anggad 1995. Maliket kami ta inusar to so biskeg na inkatobonbalo to pian iyalibansa so intereses na Panarian nen Jehova ed onian dalan ed loob na taloran taon.

Say sankayogtanan mi, si Janice, so nandesisyon a manlingkor ed si Jehova tan abautismoan ed edad a 13. Legan na paneeskuela to, nanlingkor bilang auxiliary payunir ed loob na sakey a taon. Insan, nen Setyembre 1, 1993, sikato so ginmapo bilang regular payunir ed kongregasyon mi dia ed syudad na Gaspar.

Say Dalan na Itatalona

Anto so sekreto pian napantultuloy so sakey a nankakasakey a pamilya diad panagdayew ed si Jehova? Agak manisian wala so nikaduman tugyop na totontonen a manresolbi ed amin a problema. Intarok la nen Jehova so simbawa ed Salita to parad Kristianon atateng a tumboken, kanian amin a dayew so nipaarap ed sikato parad maabig iran resultan nanggayagaan mi. Tinumbok mi labat iray direksion to. (Uliran 22:6) Amin ed ananak mi so akatawir na inkasentimental na Latin manlapud siak tan sakey a praktikal ya awawey na Aleman manlapud ina ra. Balet say sankaimportantian a bengatla a naawat da ed sikami et say espiritual a tawir.

Say bilay na buleg mi et onliliber ed interes na Panarian. Say pamasiansia ed sarayan interes a manuna so aliwan mainomay. Singa bilang, nairapan kami ed lawas panmantini na regular a panpamilyan panagaral na Biblia, ingen agkamin balot sinmuko. Nanlapulad inmunan agew na bilay da, kada anak so intagar ed Kristiano iran miting ontan met ed saray asamblea tan kombension. Say inagem labat odino arum nin emerhensya so agmamaatendi ed sikami. Niarum ni, diad kaugawan da ni, inulop kami na ananak mi ed Kristianon ministeryo.

Sanen ngalngali mansamplora lara, ginapoan na ugugaw so manpaliwawa diad Eskuelaan na Teokratikon Panagministro. Tinulongan mi iran mangiparaan ed saray inmunan paliwawa ra, a pinaseseg iran mangusar na outline imbes a manuskrito. Diad saginonor et balang sakey ed sikara so angiparaan ed dili ton paliwawa. Ontan met, sanen sikara lay walad baetan na edad a 10 tan 12, balang sakey ed sikara so ginmapon akibiang a regular ed ministeryo. Onia labat a klase na bilay so amta ra.

Say asawak, si Clara, so walaan na baleg a papel ya agawaan ed impamabaleg na ananak mi. Kada labi, sanen sikaray ugugaw nin tuloy​—say panaon a say ugaw et mansepsep a singa sakey ya espongha ed amin a nibangat et sikato​—ibasaan ira nen Clara na istorya ed Biblia tan manpikasi a kaiba so balang sakey ed sikara. Inanamot ton inusar iray libron Nanlapud Abalang ya Paraiso anga ed Apapawil ya Paraiso, Listening to the Great Teacher, tan My Book of Bible Stories.a Sanen wala la, inusar mi met iray katulongan ya audio tan visual ya intarya na Tastasi nen Jehova.

Say eksperiensia mi bilang Kristianon atateng so mamekder a nakakaukolan na ananak so inagew-agew ya atensyon. Ampetang a panangaro, personal ya interes, tan daakan a panaon so kabiangan na saray manunan pankaukolan na saray kalangweran. Agmi labat momoriaen itan bilang responsabilidad mi bilang ateng so pamenek ed sarayan pankaukolan ed sankaabigan ya abilidad mi noagta naaani mi met so baleg a liket manlapud panusumpal ed satan.

On, makapenek parad atateng so pakaeksperiensia ed kasumpalan na saray salita ed Salmo 127:3-5: “Nia! Saray ugugaw sikara so sakey a tawir [manlapud si, NW] Jehova; tan say bunga na eges sikato so tumang to. Singa saray panapana ed lima na sakey a mabiskeg a too, ontan so saray anak na kalangweran. Magayaga so too a wala ed sikato so pananginan na panapana a napno na panapana.” Say panlilingkor ed si Jehova bilang nankakasakey a pamilya so talagan lapuay gayaga mi!

[Paimano ed leksab]

[Litrato ed pahina 26]

Si Antonio Santoleri a kaibay kapamilyaan to