Natatakot Ka Ta’n Manmatalek ed Arum?

‘ANGGAPO so nakatongtong ko. Agak natatalosan na totoo. Okupado iran maong ed dili ran problema. Andian iray panaon parad saray problemak.’ Dakel so makakaliknay ontan, kanian sasarilien da labat laray bengatla. Sano komustaen ira na arum, mabetbet a labay dan ibaga ed sikara, balet agda gagawaen. Talagan agda nibalikas so labay da.

Tua, wala iraman so agda labay so patulongan. Ingen, dakel so desperadon malabay a natulongan balet ta natatakot dan iparungtal so nononoten, nalilikna, tan saray eksperiensia ra a personal a tuloy. Sakey ka ta ed sikara? Anggapo ta so peteg a napanmatalkan mo?

Pakatalos ed Kapapagaan

Diad mundo natan et kasmak so andiay talek. Agmitotongtong iray kalangweran ed kaatengan da. Agmakapantotongtong iray atateng ed sakey tan sakey. Daiset so mabulos a mitongtong ed saraman so walad autoridad. Lapud agmakapanpatua ed arum, say arum so ombabaling la ed alkohol, druga, odino magulon estiloy-bilay pian makataynan manlapud saray problema ra.​—Uliran 23:29-35; Isaias 56:12.

Say kompiyansa ed totoon walaan na autoridad, singa saray klerigo, doktor, therapist, tan managbangat, so binmetel lapud agmanganggan kipaparungtal na ag-inkamatua tan imoralidad. Alimbawa, ibabaga na sakey a padisir a masulok a 10 porsiento na saray klerigo et alanor ed mauges a kondukta ed sekso. Sarayan “managderal-talek,” inkuan na sakey a managsulat, “so mankokotkot na saray kelas, letak tan saray betag ed relasyon na totoo.” Panon iyan mangaapekta ed saray kongregasyon da? Dederalen toy panagmatalek.

Nitotonton met ed sakey a krisis na pamilya so malaknab ya inkagba na moral, ya anggad punton saray walay diperensyan pamilya so kaslakan la, agla eksepsion. Datin sakey a napaninawaan a kaliberliber so ayaman. Natan et mabetbet lan singa sakey a pananganan labat. Sano ombaleg so sakey ya ugaw ed sakey a pamilyan ‘anggapo so aro ra ed nianakan,’ say maslak a resulta et no wala-la’d-edad ira et andian ira na abilidad a manmatalek ed arum.​—2 Timoteo 3:3.

Niarum ni, legan ya onuuges so kipapasen na mundo, nagkalalo itayon niwawalwal ed posiblin makapasesga iran eksperiensia. Diad mipadparan situasyon, oniay insulat nen propeta Miqueas: “Agyo yan so panmatalek yo ed sakey a kaaro.” (Miqueas 7:5) Ompan kayari melag ya insaew ontan met so naliknam, inkitapat na talek, odino sakey ya inkagawa na anigensigen ed bilay mo. Naiirapan kan panmatalkan lamet so arum tan magmaliw kan andian na liknaan, a manbibilay ya agew-agew a singano walay pader a mamababeng ed emosyon mo. (Ikompara so Salmo 102:1-7.) Tua, nayarin say ontan ya awawey so makatulong ed sika a makakiwas, balet sasamsamen na ‘ermen na pusom’ so antokaman a peteg a gayaga ed bilay. (Uliran 15:13) Say katuaan et, pian sika so magmaliw a mabunigas ed espiritual, emosyonal, mental, tan ed pisikal a paraan, nepeg a gebaen itan a pader tan nepeg mon aralen so manmatalek ed totoo. Kasin posibli itan? On.

Akin a Nepeg a Gebaen so Pader?

Say pangipatua ed arum so mamalemew ed liknaan. Ontan so eksperiensia nen Hana. Sikatoy walaan na maong a panamaley, maligen so ayaman da, balet sikatoy agonigon a tuloy. Anggaman sikatoy walad “kapaitan na kamarerwa,” sikatoy sikakabat ya “akikasi ed si Jehova” tekep na inkasimoon a nanmitimiti iray bibil to. On, sikatoy nanpatua ed si Jehova. Insan to imbesngaw so liknaan to ed manangilaman na Dios a si Eli. Diad anton resulta? “[Si Hana] linma ed dalan to tan angan, et say lupa to aliwa lan maermen.”​—1 Samuel 1:1-18.

Bibidbiren ed dakel a kultura iray gungguna ed maapit a tongtongan. Alimbawa, say panginabang na saray ideya tan eksperiensia ed saramay walaan la na miulibayan a kipapasen so apaneknekan a makagungguna. Oniay konklusyon na saray managsukimat: “Say panamokpok ed emosyon so sengegay pansakit​—kaukolan tayon mangisalita pian mansiansian limpio ed nonot.” Pepekderan na ondarakel a resulta na sientipikon panagsukimat ed katuaan na apuyanan a proverbio ya angikuan: “Say onsian anapen to so dili a pilalek to, tan misangsangan sumpa ed amin ya aralem a kakabatan.”​—Uliran 18:1.

No agmo ibaga ed arum, panon da ka’n natulongan? Bangta si Jehova a Dios so makakabasa na kapusoan, say sankautelan iran kanonotan tan liknaan mo et agkabat na kapamilyaan tan kakaaro—likud no ipatuam ed sikara. (1 Awaran 28:9) Sano lalanoren na problema so impakalukso ed ganggan na Dios, lalon onloor iya no ipaleen mo so pangipatua.—Uliran 28:13.

Maseguro, saray gungguna ed pangipatua ed arum na pakakasesgaay sakey et mamalumbas nen say posibilidad a nasakitan. Siempre, agkabaliksan na satan ya agtayo la alwaran so pangiparungtal na personal iran detalye. (Ikompara so Uko-ukom 16:18; Jeremias 9:4; Lucas 21:16.) “Say too a mikakaaro sikato so gawaen to ed dili a kabagbag,” so impasakbay na Uliran 18:24 balet insan to intuloy: “Wala so kaaro a maapit nen say agi.” Iner so pakaromogan mo na ontan a kaaro?

Manmatalek Ka ed Pamilyam

No walaan ka na problema, sinalim ta lan intongtong ed asawam odino ed atateng mo? “Nipaakar ed dakel a problema, nakaukolan na satan so pangitongtong a maong,” so inaksobi na sakey ya eksperiensiadon a managkonseho. (Uliran 27:9) Say Kristianon asawan lalaki a ‘mangaaro ed asawa ra a singa sikaran dili,’ saray asawan bibii a ‘pauleyan ed saray asawa ra,’ tan saray ateng a mamapabli ed impabtang-Dios a responsabilidad da a ‘pabalegen so ananak da ed manametek-kanonotan nen Jehova’ so mambanikel ed pagmaliw a mililiknan managtalineng tan makatulong a managkonseho. (Efeso 5:22, 33; 6:4) Anggaman ag-angasawa nisay nanilalak, agaylan abig ya uliran so inletneg nen Jesus nipaakar ed saya!​—Marcos 10:13-16; Efeso 5:25-27.

Anto no say problema et mairap a naresolbi na pamilya? Diad Kristianon kongregasyon, ag-itayo kaukolan a manbokbokor. “Siopa so makapoy, tan agak makapoy?” inkuan nen apostol Pablo. (2 Corinto 11:29) Insimbawa to: “Mantatarokan kayo na awit na sinansakey.” (Galacia 6:2; Roma 15:1) Diad limog na espiritual ya agagi tayo, agpanduaruwaan a makaromog tayo na masulok nen sakey ya ‘agi a nianak sano onlesay kasumlangan.’—Uliran 17:17.

Manmatalek ed Kongregasyon

Diad masulok a 80,000 a kongregasyon na Tastasi nen Jehova ed sankamundoan, walaray mapaabeban lalaki a manlilingkor bilang ‘mananulong ed liket yo.’ (2 Corinto 1:24) Saraya so mamatatken. “Sakey a too,” inkuan nen Isaias, “so magmaliw naani a singa sakey ya amotan na dagem, tan sakey a siroman ed bagyo, singa saray agos na saray danum ed pasen ya amaga, singa anino na sakey a baleg a batondampay ed sakey a dalin ya apagaan.” Panbabanikelan na mamatatken a magmaliw ya ontan.​—Isaias 32:2; 50:4; 1 Tesalonica 5:14.

Kapeten na mamatatken iray Makasulatan a kakaukolanen sakbay a magmaliw a ‘naturo na masanton espiritu.’ Say pakaamta ed saya so mamabiskeg ed kompiyansam ed sikara. (Gawa 20:28; 1 Timoteo 3:2-7; Tito 1:5-9) Mansiansian kompidensyal so itongtong mo ed sakey a matatken. Say pagmaliw a napanmatalkan et sakey ed saray kualipikasyon to.​—Ikompara so Exodo 18:21; Nehemias 7:2.

Saray mamatatken ed kongregasyon so “manbabantay ira lapu ed saray kamarerwa yo a singa sikara so mangiter naani na pipalinewan.” (Hebreos 13:17) Agta saya so mamakiwas ed sikan manmatalek ed sarayan lalaki? Natural, aliwan amin a mamatatken so matalona ed pareho iran kualidad. Arum so ompasen a mainomay ya asinggeran, mapangasi, odino makatalos nen say arum. (2 Corinto 12:15; 1 Tesalonica 2:7, 8, 11) Akin ya agmo salien so mangipatua ed sakey a matatken a liknaen mon mainawa ka?

Sarayan lalaki so agbabayaran a propesyonal. Imbes, sikaray “langkap [a] totoo,” ya intarya nen Jehova ya ontulong ed sika. (Efeso 4:8, 11-13; Galacia 6:1) Panon? Sidudunong dan uusaren so Biblia, iyaplika ra so makapaabig a pakayari to ed personal a situasyon mo. (Salmo 107:20; Uliran 12:18; Hebreos 4:12, 13) Kaiba ra ka’n manpikasi tan ipikasi ra ka. (Filipos 1:9; Santiago 5:13-18) Baleg a tulong so nagawaan manlapud saratan a maaron managkonseho ta pian onabig so nagogonigon ya espiritu tan nipawil so mareen a kanonotan.

No Panon a Makapangipaalagey na Napanmatalkan a Siglaotan

Say ikerew na tulong, simbawa, odino italineng so aliwan sakey a tanda na kakapoyan odino isaew. Realistiko lambengat iyan panamidbir a sikatayo so agnaspot tan anggapoy anggan sakey a makaamta ed amin ya ebat. Petepeteg, say sankabalgan a managkonseho tan napanpiyaan tayo et say mangatatawen ya Ama tayo, si Jehova a Dios. Miabobon itayo ed salmista a nansulat: “Si Jehova sikato so biskeg ko tan kinlong ko. Say pusok nanmatalek ed sikato, et atulongan ak.” (Salmo 28:7) Diad pikakasi et silulukas tayon ‘nibalikas so walad puso tayo’ ed sikato ed amin a panaon, mapiyan dengelen to itayo tan iyaansakit to itayo.—Salmo 62:7, 8; 1 Pedro 5:7.

Balet panon mon naaralan so manmatalek ed mamatatken tan arum ni ed kongregasyon? Unona, usisaen moy inkasika. Napatunongan ta a maong iray kapapagaan mo? Maininap ka ta ed saray motibo na arum? (1 Corinto 13:4, 7) Wala ta so paraan a naparaisetan so pakasakitan mo? On. Panon? Panggunaetan a personal a nakabkabat so arum ed espiritual a kaliberliber. Mitongtong ka ed sikara diad saray miting ed kongregasyon. Miiba ka ed sikato ed panagkabkaabungan. Singa ed panagrespeto, say sakey so kaukolan a magmaliw a makanepegan pian mangamor na talek. Kanian mananos. Alimbawa, legan a nakakabat bilang espiritual a managpastol, ombaleg so kompiyansam ed sikato. Kalkalnam ya iparungtal iray bengatlan kapapagaan mo. No sikatoy ondengel diad matukoy, mililikna, tan makabat a paraan, no ontan et nayarian mon ibaga ni ed sikatoy kaaruman.

Saray kaparan managdayew ed si Jehova, nagkalalo la ed Kristianon mamatatken, so mansasagpot a mangaalig ed pabpablien iran kualidad na Dios diad pisiglaot da ed balang sakey. (Mateo 5:48) Manresulta itan ed panagmatalek ed kongregasyon. Oniay inkuan na sakey ya abayag lan matatken: “Nakaukolan a naamtaan na agagi so sakey a bengatla: Antokaman a gagawaen na sakey a too, agnabalang so Kristianon aro parad sikato na matatken. Nayarin agto labay so ginawa to, balet siansian sikatoy aaroen na agi to tan labay ton tulongan.”

Kanian agnakaukolan a liknaen a manbobokbokor ka ed problemam. Mitongtong ka’d sakey a walaan na ‘espiritual iran kualipikasyon’ a makatulong ed sikan manakbat ed awit mo. (Galacia 6:1) Nonoten a say “kabelatan ed puso na too mamatuek ed sikato,” balet “saray makapaliket a salsalita sikara so singa kulaba na dilo, masamit ed kamarerwa tan kasil ed saray pukel.”​—Uliran 12:25; 16:24.

[Kahon ed pahina 26]

Siopaman a Kristiano so natawag a mangasisti ed sakey a kanayon, kaaro, odino sakey ya espiritual ya agi a walaay personal a problema. Kabat mo ta no panon so itulong?

Say Sakey ya Epektibon Managkonseho

so mainomay ya asinggeran: Mateo 11:28, 29; 1 Pedro 1:22; 5:2, 3

so mamili ed dugan pankanawnawa: Marcos 9:33-37

so manggunaet a talosan so problema: Lucas 8:18; Santiago 1:19

so agpatatalona ed liknaan: Colosas 3:12-14

so mangantabay ed nasesesgan emosyon: 1 Tesalonica 5:14; 1 Pedro 3:8

so mamidbir ed limitasyon to: Galacia 6:3; 1 Pedro 5:5

so mangiter na espisipikon konseho: Salmo 19:7-9; Uliran 24:26

so marunong ed sekreto: Uliran 10:19; 25:9