Ehud—Lakin Walaay Pananisia tan Tepel

DAKEL lan taon so linmabas nanlapulad inmunan impakagatin na Israelitas ed Insipan a Dalin. Si Moises tan say sinmalat ed sikato, si Josue so abayag lan inatey. Diad inkaandi na saratan a lalaki na pananisia, nagba lay panamabli ed puron panagdayew. Nanlingkor la’d satan iray Israelita ed saray Baal tan saray sagradon lusek.a Bilang resulta, impalima nen Jehova so totoo to ed saray Siryano ed loob na waloy taon. Saman la kinmelyaw iray Israelita a patulongan ed si Jehova. Sipapangasi, tinalineng tora. Pinatalindeg nen Jehova so sakey ya ukom, si Otniel, pian iliktar so totoo To.​—Uko-ukom 3:7-11.

Angibangat komon iraya ya ebento ed Israelitas na importantin katuaan​—say katutulok ed si Jehova so mangitatarok na saray bendisyon, bangta say isusumlang so manresulta ed saray ayew. (Deuteronomio 11:26-28) Anggaman ontan, ag-akaaral so totoo na Israel ed sayan leksion. Kayari na 40-taon a peryodo na kareenan, tinaynan da lamet so puron panagdayew.​—Uko-ukom 3:12.

Tinalo na Moab

Diad saman a panaon impatalo nen Jehova iray totoo to’d si Arin Eglon na Moab. Sikatoy dedeskribien na Biblia bilang “matabataba a laki.” Diad tulong nen Ammon tan Amalek, nilusob nen Eglon so Israel tan angipaalagey na palasyo to ed Jerico, “say syudad na saray kiew na palma.” Agaylan duma itan ed inmunan Canaanitan syudad a binagbag na Israel a natan et kawalaan la na saray hedkuarter na sakey a mandadayew ed palson dios a si Chemosh!b​—Uko-ukom 3:12, 13, 17.

Nilames nen Eglon iray Israelita ed loob na 18 taon, a mapatnag diad panisingil ed sikara na makapabelat a buis. Diad pangakaukolan ed paulit-ulit ya impuesto, apaaligwas na Moab so dili ton ekonomiya bangta papakatay kaykayarian na Israel. Natalosan, kinmelyaw so baley na Dios parad kainawaan, tan aminsan lamet a tinalineng ira nen Jehova. Pinatalindeg to’d sikara so sakey nin manangilaban​—diad saya et sakey a Benjamitan manngaran na Ehud. Pian patundaey mauges ya uley nen Eglon ed Israel, nanplano si Ehud ya onkiwas ed agew na ontumbok a panagbayar ed impuesto.​—Uko-ukom 3:14, 15.

Pian niparaan so makpel a maneobra to, nanpanday si Ehud na duaran-tarem a kampilan a sakey kasiko so karukey to. No satan et antikey a kasiko, say ayura so ngalngali 15 pulgaday dukey to. Ipasen na arum a satan et sakey a punyal. Mapatnag ya agnasanggaan so tarem tan putan to. Sirin, nisanib nen Ehud so melag a kampilan ed saray tupi na kawes to. Niarum ni, lapud si Ehud et katigir, naisukbit toy kampilan to ed nikawanan to​—aliwan normal a pasen na ayura.​—Uko-ukom 3:15, 16.

Mapeligro so estratehiya nen Ehud. Alimbawa, panon to no kapkapay ariripen na ari si Ehud? Iyan lan agda gawaen itan, maseguron agda taynan a manbokbokor so ari ran kaibay sakey ya Israelita! Balet no bilang ta taynan da et nayarin ompatey si Eglon, panon a makapuslit si Ehud? Kaunongan kaarawi so nabatik to sakbay a naamtaan na ariripen nen Eglon so agawa?

Andi-duaruwan minotektek nen Ehud iratan a detalye, nayarin iisipen toy karakel na makadesyang a pansumpalan. Anggaman kuan, intuloy toy plano to, angipatnag na tepel tan angagamil na pananisia ed si Jehova.

Inabet nen Ehud si Eglon

Asabi la so agew na pangipresenta ed onsublay ya impuesto. Si Ehud tan say totoo to so linmoob ed palasyo na ari. Ag-abayag et sikara lay manalalagey ed arapan a mismo nen Arin Eglon. Balet agni asabi oras ya iyataki nen Ehud. Kayari impangipresenta ed impuesto, imbaki la nen Ehud iray manangawit na impuesto.​—Uko-ukom 3:17, 18.

Akin ya inkuntang nen Ehud so pangabil to’d si Eglon? Sikato ta’y antakot? Andin balot! Pian nasumpal so plano to, nakaukolan nen Ehud so personal a pitongtong ed ari​—bengatlan agto agawaan ed sayan unaan ya impiabet. Niarum ni, nakaukolan nen Ehud so maples ya ilimot. Magmainomay so ipuslit na sakey a too nen say intiron ulop na manangawit ed impuesto. Sirin, inalagar labat nen Ehud so pankanawnawan oras to. Diad antikey ya imbisita to’d si Eglon et akabisado to so pasen ed palasyo tan aseguro to so laknab na bantay na ari.

Kayari impakasabi “ed saray pandayan na bato a wala ed abay na Gilgal,” intilak nen Ehud iray totoo to tan pinmawil ed palasyo nen Eglon. Say panakar ya onliligadad 2 kilometro so akapangipanaon ed si Ehud a nonotey nipaakar ed misyon to tan ipikasi panamendisyon nen Jehova.​—Uko-ukom 3:19.

Pinmawil si Ehud

Mapatnag ya inabrasa si Ehud ed palasyo. Anganko ta say mabunlok ya impueston impresenta to ed akadkauna so amaliket ed si Eglon. Anggaman satan ya inmunan imbisita so antikey, akapangiter itan ed si Ehud na magenap a pankanawnawan nawalaan na maabig a pitutuyaw ed ari. Antokamay kipapasen, akapawil si Ehud ed arapan nen Eglon.

“Walaan ak na maamot a pabano ed sika, O ari,” inkuan nen Ehud. Say bengatlan sikatoy akasabi anggad sayan punto et mangipapatnag a sikatoy igigiya nen Jehova. Ingen, wala so problema. Say “maamot a pabano” ya awit nen Ehud so agnayarin ibalikas diad presensia na ariripen na ari. No onsalet si Jehova, nakaukolan a tampol nen Ehud itan a tulong. “Agka oneseesel!” inganggan na ari. Lapud aglabay nen Eglon a napidengel iyan “maamot a pabano,” pinataynan toray aripen to. Isipen pay impakainawaan nen Ehud!​—Uko-ukom 3:19.

Manyudyurong si Eglon ed katageyan a silir sanen sinmabi si Ehud tan kuanto: “Walaan ak na bilin a nanlapu ed Dios nipaakar ed sika.” Diad impamitlan “Dios,” kasin say tutukoyen nen Ehud et si Chemosh? Nayarin ontan so iisipen nen Eglon. Naintriga, sikatoy inmalagey ed trono to tan siiilalon tinmalindeg. Inmasingger si Ehud, nayarin nankalkalna ta pian agmaninap so ari ed iyataki to. Insan, diad masiglat ya inkiwas, “Si Ehud inpaway to so kawigi a lima to, tan inala to so kampilan ed kawanan ya olpo to, tan insaksak to ed laman nen Eglon. Et say kampilan nineknek a pati say putan et say inkataba kinmupit ed tapew na putan ta agto inekal so kampilan ed laman to et tinmalos ed beneg.”​—Uko-ukom 3:20-22.

Manatalaran ed banda’d asingger, agni ginmalaw iray aripen na ari. Balet siansian wala ni’d kapeligroan si Ehud. Diad antokaman a bekta et nayarin biglan onloob iray ariripen nen Eglon tan nanengneng day bangkay na niparokol ya ari ra. Nakaukolan ya ontaynan a tampol si Ehud! Inkaput iray puerta, sikatoy pinmuslit ed pasengaway dagem na katageyan a silir.​—Uko-ukom 3:23, 24a.

Impakadiskobre tan Impakatalo

Agnambayag et maupapet laray aripen nen Eglon. Ingen, agda ipalaran ompan onsyodot so ari diad pakadisturbo’d pribadon pitotongtong to. Insan da naimano a saray puerta ed atep na silir so nitalak. “Petepeteg a sasakbongan to so saray sali to ed katageyan a silir,” inkatunongan da. Balet, diad ilalabas na oras say inkamaupapet et sinandiay pirmin kapagaan. Agla makaalagar so ariripen nen Eglon. “Kanian inala ra so tombok, tan nilukasan da, et, nia, say katawan da niparokol ya inatey ed dalin!”​—Uko-ukom 3:24b, 25.

Kaleganan to, akapuslit lay Ehud. Sikatoy linmabas ed saray pandayan na bato ed Gilgal tan ag-abayag et akasabi ed Seirata, sakey a pasen ed mapalandey a rehyon na Efraim. Tinipon nen Ehud iray lalaki ed Israel tan indaulo tora’d nankakasakey ya iyaataki ed saray Moabita. Sinalambit na salaysay a “kinabil da so Moab ed saman a panaon a singa samplon libo a lalaki, balang mabiskeg a laki, tan balang laki a mabayani; et anggapo so akabatik a too.” Diad impakakobkob na Moab, say dalin na Israel so dinmeen ed loob na 80 taon.​—Uko-ukom 3:26-30.

Pakaaral Manlapud Alimbawa nen Ehud

Say pananisia ed Dios so amakiwas ed si Ehud. Sikatoy ag-espisipikon asalambit ed Hebreos kapitulo 11 bilang sakey a “lapud pananisia analtalo ra na panarian, . . . nagmaliw iran makapanyari ed bakal, pinabatik da so ehersitos na saray totoo a sankaili.” (Hebreos 11:33, 34) Anggaman kuan, inayudaan nen Jehova si Ehud unong ta sikatoy kinmiwas ed pananisia tan inliktar so Israel manlapud manamairap a pakayari nen Eglon.

Say tepel so sakey ed saray kualidad nen Ehud. Kaukolan a sikatoy makpel a larinon mangisingwat ed literal a kampilan. Bilang kaplesan ya ariripen na Dios, ag-itayo mansusukbit na ontan a kampilan. (Isaias 2:4; Mateo 26:52) Ingen, sikatayoy manguusar ed “kampilan na espiritu,” say Salitay Dios. (Efeso 6:17) Si Ehud so onsiano ed panangusar na ayura to. Nakaukolan met a sikatayoy marunong ed panangusar na Salitay Dios legan ya ipupulong tayo so maong a balita na Panarian. (Mateo 24:14) Say personal a panagaral ed Biblia, regular a kiwawala’d saray Kristianon miting, maseseg a pibibiang ed ministeryo, tan sipipikasin panagmatalek ed mangatatawen ya Ama tayo so ontulong ed sikatayon naalig iray kualidad ya impatnag nen Ehud, talagan sakey a lakin walaay pananisia tan tepel.

[Saray paimano ed leksab]

[Litrato ed pahina 31]

Si Ehud tan saray totoo to so mangiprepresentay impuesto ed si Arin Eglon

[Credit Line]

Inala manlapud Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s