Saray Tastasi nen Jehova so Manggawa na Internasyonal Iran Kombension
Say Mananguley ya Ulop na Tastasi nen Jehova so mangiplaplano na internasyonal iran kombension legan na 1998. Naawat iyan anunsio tekep na entusiastikon ebat diad tinaon a miting na Watch Tower Bible and Tract Society ed Pennsylvania, a ginawa diad Jersey City Assembly Hall ed Sabado, Oktubre 5, 1996.
Tekep na gendat a distrito iran kombension, pigaran internasyonal a kombension so nagawa diad North America legay kapegleyan na 1998. Iilaloan a sarayan pandaragup so mangitarok ed pankakasakey ed nilasus nilibon Tastasi manlapud dakel a parti na dalin. Pian naabuloyan so dakel a nirepresentan daldalin anggad nayari, balang sakey ed masulok a 100 a sangan opisina na Watch Tower Society so naikdan na agetaran a bilang na saray delegado ra parad nidesignan internasyonal a kombension a syudad ed North America.
Mapatnag, aliwan amin a malabay a manbiahen paonla ed North America so makagawa ed satan. Balet, posibli parad nilibo ya onatendi ed sakey ya internasyonal a kombension ya asisingger ed bansa ra. Gagawaen laray uksoyan parad internasyonal iran kombension a nagawa ed duara odino taloran bansa ed Europa tan say arum et diad Aprika, Asia, Latin America, tan South Pacific, tan Caribbean.
Diad matukoy a panaon, pakabatan na saray sanga na Sosyedad iray kongregasyon diad saray nasasakopan da nipaakar ed saray lugar na kombension a ditan ira imbitado. Niiter so impormasyon nipaakar ed saray petsa na kombension tan saray uksoyan parad pamili na saray delegado. Saraman so malabay a mangaplay parad delegadon panpilian so mankaliktan ya onggapo lan mangigana na arum ed pundo ra diad panaalagar ed sarayan espisyal ya ebento.
Amin a Tastasi nen Jehova ed sankamundoan so onnengneng ed arapen ed no anto so manatalaran ed sikatayo diad sarayan internasyonal a pandaragup parad 1998. Saray distriton kombension ed amin a bansa so nawalaan na parihon programa.