Tepetepet Manlapud Managbasa

Nibaga kasin say agano nin unong-ed-petsan pakatalos ed salitan “kailalakan” ed Mateo 24:34 so mangipapalugar ed ideyan nikuntang ni so pangangga na sayan sistema dia ed mabayag nin arapen?

Seguradon aliwan tua itan. Diad kasunian to, say peles ya apaaligwas a pakatalos ed sayan pamaakaran so kaukolan ya ontulong ed sikatayon lawas manilalo ed anggaan. Akin a nibaga itan?

Bueno, singa insalaysay la na Say Panag-Bantayan na Nobyembre 1, 1995, inyaplika nen Jesus so balikas a “sayan kailalakan” ed kapanaonan ton marelmeng a totoo. (Mateo 11:7, 16-19; 12:39, 45; 17:14-17; Gawa 2:5, 6, 14, 40) Aliwan singa ed deskripsion a sakey a nigeter a dukey na panaon ya onggapo’d espisipikon petsa.

Diad tua et say “Tepetepet Manlapud Managbasa” ed satan a parihon paway na Say Panag-Bantayan so nisentro’d duaran importantin bengatla: “Sakey a kailalakan na totoon agnayarin ipasen bilang sakey a panaon a walaan na nigeter a bilang na taon,” tan, “Saray totoo na sakey a kailalakan a manbibilay ed loob na sakey a relatibon tikey na panaon.”

Nauusar tayon mabetbet so “kailalakan” ed ontan a dalan. Alimbawa, nayarin ikuan tayo: ‘Ag-amtan balot na saray sundalo na kailalakan nen Napoléon so nipaakar ed saray eroplano tan bomba atomika.’ Kasin tukoyen tayoray sundalon nianak ed parihon taon ya inkianak nen Napoléon? Tukoyen tayo kasi iramay sundalon Pranses ya inaatey sakbay na impatey nen Napoléon? Siempre andi; nisay sikatayo a mangusar ed “kailalakan” et sasalien tayon igeter so bilang na saray taon. Balet, nayarian tayon tukoyen so sakey a relatibon antikey a panaon, aliwan nilasus a taon manlapulad panaon nen Napoléon a manpatuloy ni’d arapen.

Mipadpara itan ed pakatalos tayo ed inkuan nen Jesus ed propesiya to diad Palandey na Olibo. Say kasumpalan na nanduruman kabiangan na satan a propesiya so mamapaneknek a say anggaan na sayan sistema so magano la. (Mateo 24:32, 33) Tandaan ya unong ed Apocalipsis 12:9, 10, diad inkiletneg na mangatatawen a Panarian na Dios nen 1914 et nibantak la si Satanas ed kaliberliber na dalin. Iyaarum ni na Apocalipsis a si Satanas et walaan la natan na baleg a sanok. Akin? Lapud amta ton, “daiset la so panaon to.”​—Apocalipsis 12:12.

Matukotukoy sirin a Say Panag-Bantayan na Nobyembre 1 so walaan na subtitulon “Mansiansia Kayon Akabantay!” Mitukoyan so inkuan na onggendan a parapo: “Agtayo kaukolan ya amtaen so eksakton panaon na saray ebento. Imbes, say imano tayo so nepeg a diad pagmaliw ya akabantay, a bayuboan so mabiskeg a pananisia, tan mansiansian okupado ed serbisyo ed si Jehova​—ya aliwan diad panagkalkula na petsa.” Insan to inaon iray salita nen Jesus: “Mansiansian manimano, mansiansian aliing, ta agyo amta no kapigan so aturon panaon. Say ikuanko ed sikayo so ikuanko ed amin, Mansiansia kayon akabantay.”​—Marcos 13:33, 37.