Itatandoroy Kakapuyan na Too so Pakayari nen Jehova

“Say amta na amin et siak so ontanlan maliket tan masayaksak a sigpot-panaon a ministro. Lawas a siak imay ontutulong ed arum a walaay problema. Balet, kabansag to, singa ak ompapatey ed loob ko. Aapektaen ak a maong na makapagonigon iran kanonotan tan mental a kapagaan. Niliknak lay onarawi’d totoo. Mas labay ko lay mandukol diad abung. Diad loob na pigaran bulan, akikasiak ed si Jehova ya ompatey ak la.”​—Vanessa.

ASINGA say kipapasen a sinalambit ed tagey, normal labat a no maminsan et naapektaan iray aripen nen Jehova a manbibilay ed sarayan “maatap a panaon a mairap a pidenengan.” (2 Timoteo 3:1, NW) Arum so nayarin onletey. (Filipos 2:25-27) Sano manbayag, pakapuyen itayo na inkaandi-ilalo, lapud ibabagay Biblia: “No onkapuy ka ed agew na kasegsegangan, say kasil mo sikato so melag.” (Uliran 24:10) On, sano nadidismaya itayo, kaukolan tayoy kasil​—anganko ta anggan say tutukoyen nen apostol Pablo a “sankatageyan ya inkabaleg na pakayari.”​—2 Corinto 4:7.

Si Jehova a Dios so lapuay andi-geter a pakayari. Mapatnag iya no usisaen tayo so palsa to. (Roma 1:20) Alimbawa, konsideraen pay banwa. Sasagapey dalin so tuloytuloy ya agos na onliligada’d 240 trilyon a horsepower a manlalapud banwa. Ingen, irerepresinta lambengat na satan so sakey a kabiangan na duaran bilyon ya enerhiyan ibubugay banwa. Tan melag so banwa no ikompara’d bibitewen ya akabatan bilang supergiants. Sakey lad’tan so Rigel, sakey a bitewen ed konstelasyon ya Orion a 50 danay so kabaleg to nensay banwa tayo tan mangibubugay 150,000 danay nin karakel na enerhiya!

Say Manamalsa ed ontan a mangatatawen a lapuay enerhiya so seguradon walaay “kabaleg a tuloy na biskeg to ed pakapanyari.” (Isaias 40:26; Salmo 8:3, 4) On, ta inkuan nen propeta Isaias a si Jehova et “ag-onkapuy, tan agmet nakesawan.” Tan mabulos so Dios a manginabang ed pakayari to’d siopaman a, lapud atooan a kaleteyan, manliknan nakekesawan. (Isaias 40:28, 29) No panon ton ginawa iya et niyilustra ed kipapasen nen Kristianon apostol Pablo.

Itatalona ed Subsubok

Imbaga nen Pablo ed saray taga-Corinto so babeng a kaukolan ton sungdoan. Tinawag to itan a “sabit ed laman.” (2 Corinto 12:7) Sayan “sabit” et nayarin problema’d bunigas, anganko et makapuy lan pakanengneng. (Galacia 4:15; 6:11) Odino nayarin say tutukoyen nen Pablo et saray palson apostol tan arum niran managdogirog a mangaangat ed inka-apostol tan kimey to. (2 Corinto 11:5, 6, 12-15; Galacia 1:6-9; 5:12) Antokaman itan, sayan “sabit ed laman” so angonigon a tuloy ed si Pablo, tan paulit-ulit ton impikasi a naandi la komon itan.​—2 Corinto 12:8.

Balet, ag-inebatan nen Jehova so kerew nen Pablo. Imbes, oniay imbaga to’d si Pablo: “Say grasyak so masarag ed sika.” (2 Corinto 12:9) Antoy labay ya ibaga nen Jehova ed saya? Bueno, sano konsideraen tayoy abenegan a kurso nen Pablo diad impamasegsegang to’d saray Kristiano, diad andi-kanepegan a kaabigan lambengat so impakawalaan toy siglaotan ed Dios​—puera ni panlilingkor to bilang apostol!a (Ikompara so Zacarias 2:8; Apocalipsis 16:5, 6.) Maseguron ipapabitar nen Jehova ed si Pablo a say pribilihyo to bilang babangatan so “masarag” la. Agla nalaktipan itan na mamilagron pakaandi na personal iran problema’d bilay. Diad inkapeteg, nayarin manresulta ni ingen ed arum a kairapan so kaaruman niran pribilihyo. (2 Corinto 11:24-27; 2 Timoteo 3:12) Antokaman so nagawa, kaukolan lambengat a sungdoan nen Pablo so “sabit ed laman” to.

Maseguron agsiruruksan pinaulyanan nen Jehova si Pablo. Imbes, oniay inkuanto’d sikato: “Say pakayarik agawan ayadyari ed kakapuyan.” (2 Corinto 12:9) On, simamaaron papabiskegen nen Jehova si Pablo pian natalonaan toy kidudungetan to. Kanian, say “sabit ed laman” nen Pablo so nagmaliw ya alimbawan pakaaralan. Angibangat itan ed sikato ya onsaral ed biskeg nen Jehova imbes diad dilin biskeg to. Mapatnag ya akaaral a maong si Pablo ed sayan leksion, lapud pigaran taon ed saginonor et insulat to’d saray taga-Filipos: “Inaral ko so mamasarag na antokaman a kipapasen ko. Nayarian ko a gawaen so ganagana ed saman so mamabiskeg ed siak.”​—Filipos 4:11, 13.

Sika balet ey? Wala tay susungdoan mon nengneng toy “sabit ed laman,” anganko ta sakey a beblay odino sirkumstansia ed bilay a panpapagaen to kan maong? No ontan, paligliwa ka. Anggaman agmamilagron ekalen nen Jehova so babeng, niiter to’d sika so karunongan tan paot pian natalonaan itan legan mon iyuunay intereses na Panarian ed bilay mo.​—Mateo 6:33.

No beblay odino itatatken so mangaamper ed panlabay mon dakel ni nagawaan ed Kristianon kimey, agnaaandiay ilalo. Imbes a moriaen so pakasusubok mo a mamupuger ed serbisyom ed si Jehova, ipasen mo itan a pankanawnawan napadaak moy panagmatalek mo’d sikato. Tandaan met, say kablian na Kristiano so nasusukat, aliwan diad kinarakel na nagagawaan to, noagta diad pananisia tan kinaaralem na aro to. (Ikompara so Marcos 12:41-44.) Say pangaro’d si Jehova ed intiron kamarerwam et kabaliksan toy panserbi’d sikato diad sankaabigan a nagawaan mo​—aliwan say pikompara’d arum.​—Mateo 22:37; Galacia 6:4, 5.

No say “sabit ed laman” mo et sasaglawien toy makapasesgan sirkumstansia ed bilay, singa say impatey na inadaro, tumboken so simbawa na Biblia: “Paawit mo ed Jehova so awit mo, et sikato benbenan to ka; agton balot paulyan so matunong a natentenyeg.” (Salmo 55:22) Ginawa iya na sakey a Kristianon bii a manngaray Sylvia. Diad panat lambengat na pigaran taon, inatey si masiken to kayari na 50 taon a panamaley tan ontan met ed siamera nin kapamilyaan​—pati say duaran kalangweran ya apo to. “No aliwan lapud si Jehova,” so kuan nen Sylvia, “agko nakontrol so panagogol ko. Balet aligliwaak a tuloy diad pikakasi. Nantultuloy ak ed mapeleng a pitotongtong ko’d si Jehova. Amtak a papabiskegen to ak a mansungdo.”

Agaylan makapaseguro so pakaamtan say “Dios na ami ligliwa” et mangiiter na pakayari ed saramay maneermen pian makapansungdo! (2 Corinto 1:3; 1 Tesalonica 4:13) Diad pamabli ed saya et natalosan tayoy impangisampot nen Pablo ed sayan pamaakaran. Oniay insulat to: “Kanian panliketan ko so saray kakapuyan, dia ed saray inkapabpabanday, dia ed saray pakaosil-osil, dia ed saray irirap a makalanor ed Kristo; ta sano siak so makapuy, dia ed satan mabiskeg ak.”​—2 Corinto 12:10.

Itatalona’d Saray Ag-inkayadyari

Akatawir tayon amin na ag-inkayadyari ed inmunan atateng tayo. (Roma 5:12) Bilang resulta, mibabarangkaan itayo sumpad pilpilalek na makabos a laman. Agaylan makapaermen a naamtaan a saray walna na “say toon daan” so mabiskeg a mangegemgem ed sikatayo nen say inisip tayo! (Efeso 4:22-24) Diad saratan a panaon et nalikna tayoy singa alikna nen apostol Pablo, a nansulat: “Ta unong na too ed dalem ko manliket ak ed ganggan na Dios. Bangbalet wala so nanengneng ko a sananey a ganggan ed saray kabiangan ko, a mibakal ya onsumpa ed ganggan na isip ko, tan arakep to ak ed ganggan na kasalanan a wala ed saray kabiangan ko.”​—Roma 7:22, 23.

Ontan met, makagamor tayo na pakayari manlapud si Jehova. Sano mipupuligesgesan ed personal a kakapuyan, agbalot ontutundan ontupleg ed sikato diad pikakasi, a sisisimoon ya onkekerew na panamerdona to anggano maminpigam ya iyasingger ed sikato so parihon problema. Lapud andi-kanepegan a kaabigan to, si Jehova, “simbangen to so saray puso” tan nakunineng toy kinaaralem na inkasimoon mo, so mangiter ed sikay agogolan a konsiensia. (Uliran 21:2) Diad panamegley na masanton espiritu to, pabiskegen ka nen Jehova pian nitultuloy moy pitulot ed silalaman iran kakapuyan.​—Lucas 11:13.

Kaukolan tayo met so biskeg manlapud si Jehova sano pidedenengay ag-inkayadyari na arum. Alimbawa, nayarin makapansalita so kaparan Kristiano ed sikatayo na “botaktak a singa saray kisaksak na kampilan.” (Uliran 12:18) Ansakit iya ed sikatayon maong, nagkalalo la no ibesngaw itan na sakey a makapuy manayay kondukta to. Ompano nagonigon tayon tuloy. Pangibabaraanan ni ingen na arum iratan ya impakaopendi pian ikaindan si Jehova​—say sankabalgan a lingo ed amin!

Balet, ontulong ed sikatayo so balansin awawey pian moriaen so kakapuyan na arum diad suston punto-de-bista. Agtayo nailaloan so inkayadyari ed ag-ayadyarin totoo. Papanonotan itayo na makabat a toon Solomon, “anggapo so too ya agmankasalanan.” (1 Arari 8:46) Si Arthur, sakey ya alanaan a Kristianon sitotoor a nanlingkor ed si Jehova diad ngalngalin pitoran dekada, so angikuan: “Saray kakapuyan na kaparan ariripen so pankanawnawa pian napaneknekan tayoy integridad tayo, a manusubok ed Kristianon disposisyon tayo. No paapektaan tayo’d ibaga odino gawaen na totoo diad panaglingkor tayo’d si Jehova, say panlilingkoran tayo et totoo. Niarum ni, aaroen met na agagi tayo si Jehova. No kaabigan da so imanoen tayo, agmabayag et ibaga tayon sikaray agmauges manaya.”

Say Pakayarin Makapanpulong

Sakbay a sinmegep ed tawen, oniay imbaga nen Jesus ed saray babangatan to: “Balet makaawat kayo na pakayari, no onsabi ed sikayo so masanton espiritu, et sikayo so tasik ed Jerusalem, tan ed arum a Judea tan Samaria, tan anggad kasampotan na dalin.”​—Gawa 1:8.

Tua iray salita nen Jesus, sayan kimey so susumpalen la natan na Tastasi nen Jehova ed 233 a daldalin diad intiron globo. Ami-amin, manguusar iray masulok a sakey bilyon ya oras kada taon diad panutulong da’d arum ya ontundas ed pikakabat ed si Jehova. Aglawas mainomay so pakasumpal ed sayan kimey. Diad arum a daldalin et nisesebel odino napepegetan so panagpulong na Panarian. Isipen pa met, no siopa so manggagawa’d sayan kimey​—maletey, ag-ayadyarin totoo, a balang sakey ed sikara et walaay dilin problema tan kapagaan. Ingen tuloytuloy so kimey, tan bilang resulta, diad apalabas a taloy taon, masulok a sakey milyon a totoo so angididika’d bilay da ed si Jehova tan insimbolo ray didikasyon diad bautismo ed danum. (Mateo 28:18-20) Peteg, sayan kimey so nasusumpal lambengat diad biskeg na Dios. Oniay imbaga nen Jehova panamegley nen Zacarias: “Agnisengeg ed kabayanian, odino dia ed pakayari, noag ingen dia ed espirituk.”​—Zacarias 4:6.

No sakey kan manangipalapag na maong a balita, makapipibiang ka​—anggan panon la kamelag​—diad satan ya engranden pakasumpalan. Anggaman ed ‘sabisabit’ a nepeg mon sungdoan, napaseguroan kan aglingwanan nen Jehova so ‘gawam tan say aro ya impanengneng mo ed ngaran to.’ (Hebreos 6:10) Kanian mantultuloy a manmatalek ed Lapuan na amin a dinamikon enerhiya parad tulong. Tandaan, diad pakayari lambengat nen Jehova so pakapansungdo tayo; say pakayari to so mamayadyari’d kakapuyan tayo.

[Paimano ed leksab]

[Litrato ed pahina 26]

Nasumpal lambengat so panagpulong diad panamegley na pakayari nen Jehova