Sirkeros ed Kabatoan na Palandey

NAROMOG ed mamasagur na gilig na Inatey a Dayat et say kadaanan a syudad tan kabangibang a kalawakan a tinawag ya En-gedi. Say mabaton dadalanan tan aralem a kakelasan so mangitatarya na marakep a panayaman na kanding ya atap ed Insipan a Dalin, a mipadpara ed saramay nanengneng dia.

Sayan agnalinggin pinalsa so sakey ed saray pankelawan ed palsan ayayep. Ilukas tayo pay Biblia tan imanoen tayo pan maong iyan makapaingganyon ayep.

‘Saray Atagey a Palpalandey so Onkana ed Saray Kanding ya Atap’

Ontan so inkanta na salmista. (Salmo 104:18) Akinlongan a maong iray kanding ya atap a manayam ed ataragey a lugar! Sikaray mataltalabit, a mankulagtit ed mabaton lugar a mataletalek tan mapmaples. Say sakey a makasengeg et say inkagawa na saray kuko ra. Say sengat so onnatnat lapud belat na kanding, ya onkebeng so ayep a maong sano manalalagey odino mankulkulagtit ed masupit iran ketyang.

Walaan met iray kanding ya atap na esktra-ordinaryon inkabalansi. Nalukso day andurukey a distansia tan ondapo ed tambib a dugdugan dapoay apatiran sali. Aminsan et naobserbaan nen biologon si Douglas Chadwick so sananey a nengneng a panguusaran na kanding ya atap ed inkabalansi to ta pian makaalis ed tambib a masupit a tuloy a peyesan. Inkuanto: “Diad impakapasimar ed onsublay a tambib a ngalngalin 120 piye ed paleksab, inkebeng na kanding iray walad arap a sali to insan kalkalna ton inkulamyat so walad beneg a sali to ed duyas na bato tan tinmelek a singa dalig na kariton. Legan ya ab-abuten koy linawak, intultuloy na kanding ya anggad dinmapo lay sali to’d beneg ta pian makaarap ed direksion a nanlapuan to.” (National Geographic) Agpankelawan a saray kanding ya atap so atawag a “sirkeros ed kabatoan na palandey”!

‘Amtam Ta No Kapigay Pananak na Kanding ya Atap?’

Mabaing a tuloy iran pinalsa iray kanding ya atap. Lablabayen day manayam ya arawi ed too. On, naiirapay totoo a makaasingger pian naobserbaan ira ed maatap a kipapasen da. Kanian, say Makankien na “amin ya ayep na katakelan” so makanepegan labat a mangitepet ed si Job: “Amtam ta so panaon a pananak na saray taga-bato ya atap a kanding?”​—Salmo 50:10; Job 39:1.

Say inter-Dios a kasiporan so mangibabaga ed kabatyan a kanding ya atap no kapigay pananak to la. Sikatoy mananap na maligen a lugar a pangiyanakan toy sakey odino duara, kaslakan et diad pansamposampot na Mayo tan Hunyo. Ombiskeg iray sali na saray kapanyanak ed loob na pigara labat ya agew.

“Singa Sakey a Maaro ya Ulsa a Kabatyan tan Mapaliket a [Kanding ya Atap]”

Papasesegen nen makabat ya Arin Solomon iray asawan lalaki: “Manliket ka ed asawa na inkaugaw mo. Singa sakey a maaro ya ulsa a kabatyan tan mapaliket a [kanding ya atap, NW].” (Uliran 5:18, 19) Aliwa iyan panagmelmelag ed bibii. Mapatnag, tutukoyen nen Solomon so inkadakep, inkaroyroyo, tan arum a matalonggaring a kualidad na sarayan ayayep.

Say kanding ya atap so sakey ed agnabilang a ‘[mabilay] iran pinalsa’ a mangiiter na daakan a paneknek ed kakabatan na Manamalsa. (Genesis 1:24, 25) Agtayo kasi maliket ta pinaliberan itayo na Dios na dakerakel a makapaingganyon pinalsa?

[Picture Credit Line ed pahina 24]

Diad Panangiyabuloy na Athens University