No Panoy Pangipasal Mo’d Konsiensiam

“SAY malinis a konsiensia et sankaabigan a danganan.” Sayan kadaanan a diparan so mangipapabitar ed importantin katuaan: Sano talinengen tayoy konsiensia tayo, napanggayagaan tayoy akindalem a kareenan tan inkaligen.

Balet, aliwan amin so makapanggagawa ed satan. Indeklara nen Adolf Hitler a sikato kuno so walaan na misyon pian ibulos so too manlapud onaabeban ugagep, odino ilusyon, a kabkabat bilang konsiensia. Say makapataktakot ya impanuley to so makapagonigon a pasikmat ed nayarin pagmaliway inkasebeg na totoo sano iburi day konsiensia ra. Balet, misimbangan met ed inkaruksa so dakel a marawal a kriminal natan​—saramay managpasoot tan managpatey ya anggapoy panagbabawi. Say ondaraak a bilang ed sarayan kriminal et ugugaw ni. Kanian say libron angaral ed sayan nagagawa et walaan na subtitulon Children Without a Conscience.

Balet anggaman maslak a totoo et agbalot maniisip ed panggawa na marawal a krimen, dakel so agnaaaburido ed pibibiang ed seksual ya imoralidad, panagtila, odino panagsaol. Onaabebay moralidad ed sankamundoan. Diad panutukoy ed baleg ya apostasya manlapud tuan panagdayew, insulat nen apostol Pablo a walaray Kristianon onsuko ed impluensya na mundo tan diad ontan et magmaliw “ya amarkaan so dilin konsiensia ra a singa say balatyang a mandarlang.” (1 Timoteo 4:2) Say pagyaw na inkauges so ompapalalo ni natan ed sarayan “kaunoran ya agew.” (2 Timoteo 3:1) Nepeg sirin a pambanikelan na Kristianos a salimbengan day konsiensia ra. Nagawaan tayo iya diad pangipasal tan pamayubo ed satan.

Say Kanonotan, Puso, tan say Konsiensiam

Oniay inkuan nen apostol Pablo: “Say tua so kuanko diad Kristo, agak mantila, say konsiensiak so mantasi ed siak dia ed espiritu santo.” (Roma 9:1) Kanian say konsiensia so magmaliw a managtasi. Usisaen toy kurang na kondukta tan naabobonan odino nakondena to itan. Wala’d sikatayo so baleg a pakapangibiig na susto ed mauges ya initer la ed sikatayo na Manamalsa tayo. Siansia, namoldi tan naipasal so konsiensia tayo. Panon? Diad pangala na suston pikakabat manlapud Salitay Dios. “Manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios,” so inkuan nen apostol Pablo. (Roma 12:2) Legan mon ipapaslep ed kanonotan mo so kanonotan tan linawa na Dios, say konsiensiam so onggagana ed mas maridios a dalan.

Atulongan la na Tastasi nen Jehova so minilyon ed sankamundoan a ‘mangamta ed tuan Dios [Jehova, NW] tan si Jesu-Kristo.’ (Juan 17:3) Diad panamegley na uksoyan dan libren panangiyaral na Biblia, nababangatan daray matuan-impanpuso ed saray estandarte nen Jehova a Dios nipaakar ed sekso, de-alkohol ya iinumen, panangasawa, pidedeneng nipaakar ed nigosyo, tan dakel niran tema.a (Uliran 11:1; Marcos 10:6-12; 1 Corinto 6:9, 10; Efeso 5:28-33) Say pangala ed sayan “suston pikakabat, NW” et importantin kundang diad pakabayuboy maridios a konsiensia. (Filipos 1:9) Siempre, anggan agamoran la na Kristiano so matatken a pakatalos ed Biblia, nepeg ton itultuloy a taganoen a maparanay so kanonotan to na Salitay Dios no labay ton mansiansian mabunigas so konsiensia to.—Salmo 1:1-3.

Isisiglaot met na Biblia so konsiensia ed piguratibon puso, a lalanoren toray liknaan tan emosyon tayo. (Roma 2:15) Nepeg a mantunosan a mankimey so kanonotan tan puso pian suston onggana so konsiensia. Aliwan magenap so basta pangipaslep na impormasyon ed kanonotan mo. Nepeg mo met a moldien so pusom​—say akindalem iran liknaan, pilpilalek, tan panpirawat mo. Kanian, uusaren na libron Uliran iray balikas a singa say “ipeket mo so pusom,” ‘imatonan mo so pusom,’ tan “itonton mo so pusom.” (Uliran 2:2; 23:19; 27:23) Say sakey a paraan a nagawaan itan et diad pandalepdep tan panmotektek ed Kasulatan. “Umamengen ko so amin a kimey mo, tan mandalepdep ak ed saray gawagawam,” kuan na Salmo 77:12. Say pandalepdep so ontulong ed sikatayon nasabi iray sankaaraleman a liknaan tan motibo tayo.

Singa bilbilang, iyaliling pan walaan ka na agmalinis a niyugali a singa say inkaadik ed tabako. Singa maslak a totoo, andi-duaruwan amtam a tuloy iray epekto to’d bunigas. Siansia, anggaman ed panamilit na kakaaro tan pamilya, nairapan mo nin itunda itan. Panon a say pandalepdep ed mensahe na Biblia et napabiskeg toy konsiensiam diad sayan pamaakaran?

Bilang alimbawa, salien pan dalepdepen iray salita nen apostol Pablo a naromog diad 2 Corinto 7:1: “Anta wala ed sikatayo sirin so saraya a sipan, inararok ira, linisan tayo komon so inkasikatayon dili ed amin a tilol na laman tan espiritu, a yadyarien itayo na kasantosan dia ed takot ed Dios.” Talosan pay kabaliksan na sarayan salita. Tepetan moy inkasika, ‘Anto ta so tutukoyen nen Pablo a “saraya a sipan”’? Diad pambasa ed konteksto, naimanom a diad akadkauna iran bersikulo kuanto: “Ekal kayo ed leet da, tan onsian kayo, kuan na Katawan, Tan ag yo diwiten so marutak; Tan akoen ta kayo, Tan siak naani Ama yo, Tan sikayo naani ana’ko a lalaki tan bibii, Kuan na Katawan a makapanyari ya amin.”​—2 Corinto 6:17, 18.

Say ganggan nen Pablo a ‘linisan tayoy inkasikatayo ed amin a tilol’ so walaan la natan na kaaruman a puersa! Bilang mabiskeg a pakasagyat ed panggawa’d satan, isisipan na Dios ya ‘akoen to itayo,’ salanti, ampopoen to itayo. ‘Panggayagaan ko ta so maapit a siglaotan ed sikato​—singa ed samay anak a laki odino bii ed sakey ya ama?’ so nayarin itepet mo’d inkasika. Agta makapalagyat so pannonot ed pagmaliw ya ‘aakoen’ odino aaroen na makabat, maaron Dios? No ompatnag a makilot ed sika itan a kaisipan, imatonan pay paraan a pangibabalikas na maaron kaamaan ed lugor tan liknaan da’d ananak da. Natan isipen pa so ontan a bedber a walad baetan yon dua nen Jehova! No lalom a dadalepdepen itan, lalon ombulaslas so pilalek mo ed ontan a siglaotan.

Balet nonoten pa: Say inkaapit ed Dios et posibli labat no ‘agmo diwiten so marutak.’ Tepetan moy inkasika: ‘Agta say inkaadik ed tabako et sakey ed “marutak” a kokondenaen na Dios? Agta say pangusar ed satan et magmaliw a “tilol na laman,” ya idudunget koy inkasiak ed amin a nengneng na kapeligroan ed bunigas? Lapud si Jehova et sakey a malinis, odino “masanto,” a Dios, abobonan to ta so sigagalan panitilol ko’d inkasiak ed onian dalan?’ (1 Pedro 1:15, 16) Imanoen ya impasakbay met nen Pablo so sumpad ‘pakatilolan na sakey ed espiritu,’ odino mental ya inklinasyon. Tepetan mo pay inkasika: ‘Kasin dodominaen na sayan inkaadik so panag-isip ko? Kasin penepeneken kon maong so panpirawat ko, anganko anggano sengegan lay kirisgay bunigas ko, pamilyak, odino anggan say talindeg ko ed Dios? Diad anton laknab a naaabuloyan koy inkaadik ko’d tabako a manigway ed bilay ko?’ Say pangarap ed sarayan makapapagan tepet so mangiter ed sika na tepel pian ontunda!

Siempre, nakaukolan moy tulong tan suporta manlapud arum pian natalonaan so inkaadik ed tabako. Siansia, baleg so nagawaan na pandalepdep ed Biblia diad kipasal tan pakapabiskeg na konsiensiam pian nibulos moy inkasika’d inkaadik.

Sano Makagawa Tayo na Lingo

Anggaman ed pansasagpot tayon gawaen so maptek, no maminsan natalonaan itayo na agtayo inkayadyari et mankasalanan itayo. Insan gonigonen itayo na konsiensia tayo, balet ta nayarin natukso tayon salien ya ibaliwala itan. Odino nayarin nadismaya itayon tuloy a labay tayo lan ontundan manlingkor ed Dios. Anggaman ontan, nonoten pay kaso nen Arin David. Kayarin akikalugoran ed si Bat-seba, sikatoy pinairap na konsiensia to. Deniskribe toy irap ya alikna to: “Agew tan labi a say limam ambelat nensaman ed siak. Say kalambotan ko nagmaliw a kelang na tiagew.” (Salmo 32:4) Makapaot-ot? On! Ingen sayan maridios a kaermenan to so amakiwas ed si David a magbabawi tan mipulangan ed Dios. (Ikompara so 2 Corinto 7:10.) Say makapaot-ot a kerew nen David parad kaperdona so mangiiter na daakan ya ebidensia na masimoon a panagbabawi to. Lapud sikatoy kinmiwas unong ed konsiensia to, atulongan si David a manguman tan diad kaunoran et agamoran to lamet so gayaga to.​—Salmo 51.

Nagawa met itan natan. Arum so nanaral na Biblia a kaibay Tastasi nen Jehova ed apalabas a panaon balet ta tinmunda sanen naaralan dan agmitunosan so bilay da ed saray atagey ya estandarte na Dios. Anganko ta sikaray agkasal a miaamong ed agkasekso odino aaripenen na marutak iran ugali. Papairapen ira na konsiensia ra!

No wala ka’d ontan a situasyon, konsideraen iray salita nen apostol Pedro ed agew na Pentecostes. Sanen inwalwal toray kasalanan na saray Judion kabaleyan to, “nanermen ira ed kapusoan da.” Imbes ya onsuko, tinalineng day konseho nen Pedro a magbabawi, tan agamoran day pabor na Dios. (Gawa 2:37-41) Nagawaan mo met so ontan! Imbes ya ikaindan so katuaan lapud papairapen ka na konsiensiam, abuloyan a pakiwasen ka na konsiensiam a ‘magbabawi tan manpataoli.’ (Gawa 3:19) Tekep na determinasyon tan sagpot, makapanguman ka pian nagamoran moy pabor na Dios.

“Wala so Maong a Konsiensia Yo”

Balanglan onggagapo ka ni labat a manaaral ed saray dalan nen Jehova odino walaan ka na dakel a taon ya eksperiensia bilang matatken a Kristiano, matukoy so simbawa nen Pedro: “Wala so maong a konsiensia yo.” (1 Pedro 3:16) Bentaha itan, aliwan pabelat. Ipasal itan diad panaganom ed kanonotan tan pusom na kakabatan a lugan na Salitay Dios, say Biblia. Talineng moy konsiensiam sano papasakbayan to ka. Panggayagaan so aralem a kareenan na nonot a nitarok diad panumbok na konsiensia na sakey.

Tua, aliwan mainomay so pangipasal tan panmoldi ed konsiensiam. Balet, nipikasim ed si Jehova a Dios pian tulongan to ka. Tekep na tulong to, nalingkoran moy Dios ed “malinis tan dia ed maabig a linawa [konsiensia, NW] tan dia ed pananisian aliwan kunwari.”​—1 Timoteo 1:5.

[Paimano ed leksab]

[Litrato ed pahina 6]

Say pambasa tan pandalepdep ed Salitay Dios so ontulong ed sikatayo ed kipasal na konsiensia tayo