Sinononot Lawas ed Agew nen Jehova
“Dia ed kaunoran ya agew onsabi so saray managlurey.”—2 PEDRO 3:3.
1. Anton liknaan na inkaganatan so alikna na sakey a modernon-panaon a Kristiano?
ONIA so insulat na sakey a sigpot-panaon a ministro ed loob na masulok ya 66 lan taon: “Naynay kon nalilikna so pirmin inkaganatan. Lawas kon iisipen a say Armagedon et nabuas lan sakey.” (Apocalipsis 16:14, 16) Singa say amak, tan say ama to, inusar koy bilay ko unong ed samay insimbawa nen apostol [Pedro], a ‘pampilpilalekan so [sinononot lawas ed, NW] isabi agew na Dios.’ Naynay kon momoriaen so insipan a balon mundo bilang ‘panangipatnag ed saray bengatla ya agni anengneng.’”—2 Pedro 3:11, 12; Hebreos 11:1; Isaias 11:6-9; Apocalipsis 21:3, 4.
2. Anto so kabaliksan na pagmaliw a sinononot lawas ed agew nen Jehova?
2 Say balikas nen Pedro a “sinononot lawas” no nipaakar ed agew nen Jehova et kabaliksan ton agtayo itan ipupulisay ed kanonotan tayo. Agtayo nepeg a lingwanan ya asingsingger lay agew a deralen nen Jehova so sistema na sayan bengabengatla bilang gapoan ed kiletneg na insipan ton balon mundo. Nepeg a magmaliw itan a tudtua ed sikatayo a sankanengneng tayo itan a malinlinew, a kuanmono walad arapan tayo. Ontan kapeteg ed saray propeta na Dios nensaman, tan lanang dan sasaglawien itan ya asingger la.—Isaias 13:6; Joel 1:15; 2:1; Abdias 15; Sofonias 1:7, 14.
3. Anto so mabitar ya anagdag ed impangonseho nen Pedro nipaakar ed agew nen Jehova?
3 Akin a pinaseseg itayo nen Pedro a moriaen so agew nen Jehova a singano saya so onsabi la, a singa panangibagan, “nabuas lan sakey”? Lapud mapatnag a niludlurey na arum so ideya na insipan a kiwawala nen Kristo a diad satan a panaon et nadusa iray managgaway-mauges. (2 Pedro 3:3, 4) Kanian diad kapitulo 3 na komaduan sulat to, a konsideraen tayo natan, inebatan nen Pedro iray akusasyon na sarayan managludlurey.
Maligsan Kerew a Nepeg a Nonoten
4. Anto so labay nen Pedro a nonoten tayo?
4 Say lugor nen Pedro parad agagi to so nipanengneng diad paulit-ulit ya impanukoy to ed sikara ed sayan kapitulo bilang “inararok ira.” Sililigsan kinerew to’d sikara ya agda lilingwanan iray bengatlan nibangat la ed sikara, inggapo nen Pedro: “Inararok ira, . . . liingen ko so malinis a kanonotan yo lapud pangipasen ko’d sikayo ed pakanonotan, pian nanonotan yo so saray salita ya imbalikas nensaman na saray masantos a propetas, tan say ganggan na Katawan tan Manangilaban ed leksab na saray apostoles yo.”—2 Pedro 3:1, 2, 8, 14, 17; Judas 17.
5. Anto so imbaga na arum a propeta nipaakar ed agew nen Jehova?
5 Anto so “saray salita ya imbalikas nensaman na saray masantos a propetas” so insimbawa nen Pedro ed saray managbasa to a nonoten? Siempre, saramay nipaakar ed kiwawala nen Kristo tekep na pakayari na Panarian tan nipaakar ed pangukom ed saray agmaridios. Sakbay na saya et impaarap la nen Pedro so imano ed sarayan balikas. (2 Pedro 1:16-19; 2:3-10) Tinukoy nen Judas si Enoc, say inmunan nirekord a propetan amasakbay nipaakar ed pirmin panangukom na Dios ed saray managgaway kaugsan. (Judas 14, 15) Wala niray propetan tinmumbok ed si Enoc, tan aglabay nen Pedro a lingwanan tayo so insusulat da.—Isaias 66:15, 16; Sofonias 1:15-18; Zacarias 14:6-9.
6. Antoran balikas nen Kristo tan saray apostol so makapangipalinew ed sikatayo nipaakar ed agew nen Jehova?
6 Niarum ni, imbaga nen Pedro ed saray managbasa to a nodnonoten so “ganggan na Katawan tan Manangilaban.” Nilaktip ed ganggan nen Jesus so pirmin simbawan: “Balet manlikas kayo ed inkasikayo ompan saray puso yo napano . . . et onsabi ed sikayo ed kasanlilikna so saman ya agew a singa sakey a patit.” “Manlikas kayo, manbantay tan mikasi kayo; ta agyo amta no kapigan [so aturon] panaon.” (Lucas 21:34-36; Marcos 13:33) Papasesegen itayo met nen Pedro a talinengen iray balikas na apostoles. Alimbawa, oniay isulat nen apostol Pablo: “Say agew na Katawan onsabin singa matakew ed labi. Kanian sirin ag-itayo onugip, a singa gawa na saray arum, et manpuyat itayo tan mandangka itayo.”—1 Tesalonica 5:2, 6.
Saray Pilalek na Saray Managludlurey
7, 8. (a) Anton nengneng na totoo iramay manluludlurey ed manamasakbay iran mensahe na Dios? (b) Anto so ibabaga na saray managludlurey?
7 Singa asaglawi la, say rason ed panonot nen Pedro et lapud saray arum so ginmapon mamalaw ed ontan iran pasakbay, no panon a niludlurey na saray Israelita ed inmunan panaon iray propeta nen Jehova. (2 Awaran 36:16) Oniay insalaysay nen Pedro: “Amtaen so saya ya unona, a dia ed kaunoran ya agew onsabi so saray managlurey a pati panaglurey, a manakar ira’d dilin lawan da.” (2 Pedro 3:3) Imbaga nen Judas a saray pilalek na sarayan managludlurey et “mauges a kaalakan.” Tinawag toran “kaalakan [inaayep, NW] a totoo, ya anggapo ed sikara so espiritu.”—Judas 17-19.
8 Saray palson managbangat ya angikuanan nen Pedro ya “ontumbok ed laman ed gawa na lawan na karutakan” so maseguron kaiba na sarayan managludlurey ya andiay espiritualidad. (2 Pedro 2:1, 10, 14) Sibabalaw dan tinetepetan iray matoor a Kristiano: “Iner so kawalaan na sipan ed idateng to? Ta nanlapu la ed saman so agew ya inkaplag da’d ugip na atateng, ganagana a bengatla, ontutuloy a singa nen gapo na inkapalsa.”—2 Pedro 3:4.
9. (a) Akin a sasalien na saray managludlurey so pamakapuy ed kablian na inkaganatan a mabitabitar ed Salita na Dios? (b) Panon a salimbeng parad sikatayo so pagmaliw a sinononot lawas ed agew nen Jehova?
9 Akin ya onian panaglurey? Akin ya ipapalikas da lan nayarin agnagawa so kiwawala nen Kristo, ya agbalot mibabali so Dios ed saray kurang na too tan agbalot mibali? Bueno, diad panamegley na pamakapuy ed kablian na inkaganatan a mabitabitar ed Salita na Dios, sarayan inaayep a managludlurey so manggugunaet a lagyaten so arum a mangibaliwala ed espiritual tan diad ontan et gawaen iran magmainomay a nabiktimay sinisiblet iran pakaingganyoan. Agaylan mabiskeg a panamaseseg ed sikatayo natan so pansiansian aliing ed espiritual! Komon ta sinononot tayo lawas ed agew nen Jehova tan naynay a nonoten a saray mata to so akanengneng ed sikatayo! Diad ontan et napakiwas itayon manlingkor ed si Jehova tekep na seseg tan napansiansia tayo so inkadalisay tayo ed moral.—Salmo 11:4; Isaias 29:15; Ezequiel 8:12; 12:27; Sofonias 1:12.
Sigagagala tan Makapadimdimla
10. Panon a papaneknekan nen Pedro a saray managludlurey et aliwa?
10 Ibabaliwala na ontan iran managludlurey iyan importantin katuaan. Sigagala ran ibabaliwala itan tan sasalien dan dagdagen so arum pian lingwanan itan. Akin? Pian mas mainomay a naingganyo so too. “Ta nanlinawaan da,” insulat nen Pedro, “ya inlingwan [iyan katuaan, NW].” Anton katuaan? “A walaray katawenan nanlapulad inmunan panaon, tan say dalin a wala ed danum tan utel na danum lapud salita na Dios; lapu ed saya say mundo nensaman, dia ed inkayanep to na danum atawtaw.” (2 Pedro 3:5, 6) On, inekal nen Jehova so karelmengan ed dalin diad panamegley na Delap ed panaon nen Noe, sakey a katuaan ya indanet met nen Jesus. (Mateo 24:37-39; Lucas 17:26, 27; 2 Pedro 2:5) Kanian, mikontraan ed ibabaga na saray managludlurey, amin a bengatla so ag nantultuloy “a singa nen gapo na inkapalsa.”
11. Anton agni asabi’d panaon ya ililaloan na saray asasakbay a Kristiano so angitonton ed arum a ludlureyen ira?
11 Nayarin binalawbalaw na saray managludlurey iray matoor a Kristiano lapud saraya so walaan na agni asumpal iran ililaloan. Ag-abayag sakbay na impatey nen Jesus, saray babangatan to et “inisip da a say panarian na Dios ompatnag a tampol.” Insan, kayari na inkioli to intepet da no kasin niletneg a tampol so Panarian. Ontan met, manga samploran taon sakbay ya insulat nen Pedro so komaduan sulat to, say arum so “agonigon” diad panamegley “na salita” odino “na sulat,” ya ipapasen a manlalapud si apostol Pablo odino ed saray kaulop to, “a kunwari a say agew na Katawan et natan la.” (Lucas 19:11; 2 Tesalonica 2:2; Gawa 1:6) Balet ta aliwan tila iratan ya ililaloan na saray babangatan nen Jesus, agni labat asabi panaon to. Onsabin-onsabi so agew nen Jehova!
Nailaloan so Salitay Dios
12. Panon ya apaneknekan a nailaloan so Salitay Dios ed saray propesiya nipaakar ed “agew nen Jehova”?
12 Singa asaglawi la, saray propeta ed sakbay na Kristianon panaon so mabetbet ya amasakbay ya asingger lay agew na panangibales nen Jehova. Sakey a melag ya inkilitrato na “agew nen Jehova” so sinmabi nen 607 K.K.P. sanen impaakseb nen Jehova so panangibales to ed matungangan totoo. (Sofonias 1:14-18) Diad saginonor, anagmak na onman ya “agew nen Jehova” so arum nin nasyon, pati say Babilonia tan Ehipto. (Isaias 13:6-9; Jeremias 46:1-10; Abdias 15) Nipasakbay met so anggaan na inmunan-siglon Judion sistemay bengabengatla, tan agawa iya sanen dineral na saray armada na Romano so Judea nen 70 K.P. (Lucas 19:41-44; 1 Pedro 4:7) Balet ta tinukoy nen Pedro so sakey ya arapen nin “agew nen Jehova,” sakey a pagmaliwen ton melmelanting so englobon Delap!
13. Anton maawaran ya alimbawa so mangidedemostra ed inkapeteg na anggaan na sayan sistemay bengabengatla?
13 Ginapoan nen Pedro so deskripsion to ed onsasabin kadederal, diad impangibagan: “Balet . . . diad salitan niatol.” Kapkapangibaga to a “lapud salita na Dios,” say dalin sakbay na Delap so aromog a “wala ed danum tan utel na danum.” Sayan situasyon, ya adeskribe ed salaysay na Biblia ed panamalsa, so nanggawan posibli ed Delubio sanen kinmalbo so danum diad ganggan, odino salita, na Dios. Intuloy nen Pedro: “Balet saray tawen a wala natan, tan say dalin, impansiansia ra na dilin salitan niatol ya onkana ed apuy ed agew na panangukom, tan dia ed kaderal na saray mangaruksan totoo.” (2 Pedro 3:5-7; Genesis 1:6-8) Walaan itayo na nailaloan a salita nen Jehova parad satan! Panganggaen to so “saray tawen tan say dalin”—sayan sistemay bengabengatla—diad mangapuy-apuy a sanok na baleg ya agew to! (Sofonias 3:8) Balet kapigan?
Inkagunaet ed Isabi Anggaan
14. Akin a makapanmatalek tayo a manbibilay itayo la ed “saray kaunoran ya agew”?
14 Labay ya amtaen na saray babangatan nen Jesus no kapigay isabi anggaan, kanian intepet da ed sikato: “Anto kasi so tanda ed isabim tan say anggaan na mundo [say konklusyon na sistemay bengabengatla, NW]?” Mabitar ya itetepet da no kapigay pangangga na Judion sistema, balet say ebat nen Jesus so manunan akasentro no kapigay kaderal na kaplesan a ‘katawenan tan dalin.’ Impasakbay la nen Jesus iray bengatlan singa say angkabaleg a bakabakal, kakisiray tagano, yegyegyeg, sakisakit, tan krimen. (Mateo 24:3-14; Lucas 21:5-36) Nanlapulad taon 1914, nanenengneng tayo so kasusumpal na say tandan inter nen Jesus ta “say konklusyon na sistemay bengabengatla” ontan met ed saray bengatlan sinalambit nen Pablo so mangipabidbir ed “saray kaunoran ya agew.” (2 Timoteo 3:1-5) Peteg, a daakan so ebidensia a manbibilay tayo la ed panaon na anggaan na sayan sistemay bengabengatla!
15. Anto so panggugunaetan a gawaen na saray Kristiano anggaman ed pasakbay nen Jesus?
15 Magunaet ya amtaen na Tastasi nen Jehova no kapigay kagawa na agew nen Jehova. Lapud inkagunaet da et no maminsan et sasalien dan kalkulaen no kapigan so nayarin isabi to. Balet diad panggawa da ed saya et onsasaew ira, a singa agawa ed asasakbay a babangatan nen Jesus, pian tumboken so pasakbay na Katawan da ya “agyo amta no kapigan a panaon.” (Marcos 13:32, 33) Nababalaw na saray managludlurey iray matoor a Kristiano lapud anggapo ni’d petsan iilaloan. (2 Pedro 3:3, 4) Anggaman kuan, say agew nen Jehova so onsabi, pepekderan nen Pedro, unong ed panag-orasan To.
Kaukolan a Nawalaay Panmoria nen Jehova
16. Anton simbawa so makabat a tumboken tayo?
16 Kaukolan tayo a nawalaay panmoria nen Jehova nipaakar ed panaon, a singa ipapanonot nen Pedro ed sikatayo: “Balet, inarok ira, agyo lilingwanan so sakey a bengatla; a say sanagew dia ed arap na Katawan singa sanlibon taon, tan say sanlibo a taon singa sanagew.” Agaylan katikey no ikompara so panat na panaon na bilay tayo a 70 odino 80 taon! (2 Pedro 3:8; Salmo 90:4, 10) Kanian no say kasumpalan na sipasipan na Dios et nengneng toy naaabala, kaukolan tayon awaten so simbawa na propeta na Dios: “Anggan [say aturon panaon] manabala, sikato so alagden mo; ta petepeteg ya onsabi, ya agmanbayag.”—Habakkuk 2:3.
17. Anggaman say kaunoran iran agew et nambayag ni nen say inilaloan na dakel, diad anto so pakapanmatalekan tayo?
17 Akin a say kaunoran iran agew na sayan sistema so nambayag ni nen say inilaloan na dakel? Lapud maabig a rason, a singa ontumbok ya isalaysay nen Pedro: “Say Katawan agto bayagen so sipan to, a singa say arum igaton da a mabayag; noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Ikokonsidera nen Jehova no antoy pankaabiganan na amin a sankatooan. Say pampapagaan to et say bilay na totoo, a singa kuanto: “Anggapo so liket ko ed ipapatey na marelmeng; noag ingen say marelmeng ompawil komon a manlapu ed dalan to tan manbilay.” (Ezequiel 33:11) Kanian makapanmatalek tayo a say anggaan so onsabin dugaruga ed panaon pian nasumpal so gagala na makabat-ed-amin tan maaron Manamalsa tayo!
Anto so Mangangga?
18, 19. (a) Akin a determinado si Jehova a deralen iyan sistemay bengabengatla? (b) Panon a deniskribe nen Pedro iyan sistema, tan anto so aktual a naderal?
18 Lapud si Jehova et talagan aaroen toramay manlilingkor ed sikato, pagiten ton amin iramay manggugulo ed sikara. (Salmo 37:9-11, 29) Diad panaglawi, a singa ginawa nen Pablo ed inmuna la a sayan kadederal so onsabi’d agililaloan a panaon, insulat nen Pedro: “Say agew na Katawan onsabi a singa matakew; a dia ed satan saray tawen mangangga ra a pati baleg ya ungol, tan say elementos natunaw ed manliob a petang, tan say dalin tan saray gawa a wala ed sikato napoolan ira.” (2 Pedro 3:10; 1 Tesalonica 5:2) Say literal a katawenan tan dalin so ag-aderal ed Delubio, nisay naderal iratan legan na agew nen Jehova. Anto, sirin, so “mangangga,” odino naderal?
19 Saray gobierno na too a mamabanlong ed katooan a singa “katawenan” so mangangga tan ontan met ed “dalin,” odino sosyedad na agmaridios a too. Say “baleg ya ungol” anganko et mangipapanengneng ed maples ya ilalabas na katawenan. “Say elementos” a manitibukel ed abulok a sosyedad na too so “natunaw,” odino naderal. Tan say “dalin,” pati “saray gawa a walad sikato,” so “napoolan.” Sigpot ya iwalwal nen Jehova so marelmeng a gawa na totoo legan ya itarok to so intiron sistema na mundo ed manepeg labat ya anggaan to.
Pansiansiaen a Niyapasakey so Ilalo Yo
20. Panon so nepeg a pangapekta na pikakabat ed bilay tayo nipaakar ed saray ebento ed arapen tayo?
20 Lapud asingger la irayan dramatikon ebento, kuan nen Pedro a nepeg tayon nalanor ed “masantos a panagbilay tan kasimpitan, dia ed panalagar tan pampilalek yo ed isabi agew na Dios.” Anggapoy panduaruwa ed satan! “Saray tawen dia ed idalang da, tan saray elementos natunaw ed manliob a petang!” (2 Pedro 3:11, 12) Say katuaan a sarayan dramatikon ebento so nayarin onggapo la nabuas so nepeg a mangapekta ed amin a gagawaen tayo odino plaplanoen tayon gawaen.
21. Anto so manalat ed peles a katawenan tan dalin?
21 Ibabaga natan nen Pedro ed sikatayo no anto so manalat ed daan a sistema a kuanto: “Balet, unong ed sipan to alagden tayo so saray tawen a balo tan dalin a balo, a sikara so pana-ayaman na katunongan.” (2 Pedro 3:13; Isaias 65:17) Ah, agaylan engranden inawa! Si Kristo tan say 144,000 a kaiba ton manuley so manitibukel ed sakey a “balon” gobiernon “katawenan,” tan saray totoon makaliktar ed anggaan na sayan mundo so manibukel ed “balon dalin.”—1 Juan 2:17; Apocalipsis 5:9, 10; 14:1, 3.
Pansiansiaen so Inkaganatan tan Inkadalisay ed Moral
22. (a) Anto so ontulong ed sikatayon makapaliis ed antokaman a matik odino tilol? (b) Nipaakar ed anton kapeligroan so ipapasakbay nen Pedro ed sikatayo?
22 “Lapu ed saya, inararok ira,” intuloy nen Pedro, “bangta kaliktan yo so saraya a bengatla, pampelengan yo ta pian naromog kayo’d kareenan, ya andi matik tan karumsisan ed imaton to. Tan ibilang yo a sikatoy kilalaban so sungdo na Katawan.” Say panalagar tekep na magunaet a pantalaran tan moriaen so antokaman a singano kaaabala na agew nen Jehova bilang pakapatnagan na inkaanos na Dios so ontulong ed sikatayon napaliisay antokaman a matik odino tilol. Ingen, wala so kapeligroan! Amasakbay si Pedro diad impangisulat to na “inararo ya agi tayo a Pablo . . . arum ed saraya mairap a talosan, a saray werek tan palawpaw a totoo pikeweten da ra, a singa met saray arum a sulsulat, pian sikato so kaderalan dan dili.”—2 Pedro 3:14-16.
23. Anto so pansaran simbawa nen Pedro?
23 Mabitar a pinekewet na saray palson managbangat iray insulat nen Pablo nipaakar ed agkanepegan a kaabigan na Dios, ya uusaren iratan bilang baraan ed malukak a kondukta. Anganko ta walad kanonotan nen Pedro iya sanen insulat to so pan-patanir a simbawa to: “Kanian sikayo, inararok, diad pikakabat ed sarayan bengatla alwaran yo ompan, dia ed kasagyat yo ed lingo na saray mangarumsis a totoo napelag kayo ed satan a kaligenan yo.” Insan to sinampotan so sulat to, ya amaseseg: “Ombuna kayo komon ed grasya tan pikakabat ed Katawan tan Manangilaban tayo a Jesu-Kristo.”—2 Pedro 3:17, 18.
24. Anton awawey so nepeg a sayakupen na amin ya ariripen nen Jehova?
24 Malinew, labay nen Pedro a pasesegen iray agagi to. Pilalek to ya amin et nawalaan na awawey ya impatnag na 82-taon a Tasi ya inaon ed kagapo: “Inusar koy bilay ko unong ed samay insimbawa nen apostol [a Pedro], a ‘sinononot lawas ed isabi agew na Dios.’ Naynay kon momoriaen so insipan a balon mundo bilang ‘panangipatnag ed saray bengatla ya agni anengneng.’” Komon ta usaren tayoy bilay tayo ed ontan a paraan.
Panon Yon Ebatan?
◻ Anto so kabaliksan na “sinononot lawas ed” agew nen Jehova?
◻ Anto so sigagagalan ibabaliwala na saray managludlurey, tan akin?
◻ Diad anton rason a babalawen na saray managludlurey iray matoor a Kristiano?
◻ Anton punto-de-bista so kaukolan tayon mantinien?
[Litrato ed pahina 23]
Sinononot lawas ed agew nen Jehova . . .
[Litrato ed pahina 24]
. . . tan say ontumbok a balon mundo