No Panon a Napansiansiay Gayaga ed Sigpot-Panaon a Serbisyo

MALINLINEW ya ipapanengneng na kasumpalay propesiya na Biblia a manbibilay itayo la ed kaunoran iran agew na sayan andiay-dios a sistema. Diad pikabat ed saya, uusaren na ariripen nen Jehova a Dios so amin a panaon a makatunongan a nagawaan da ed panginabang na maong a balita na Panarian to. Masulok a 600,000 a Tastasi nen Jehova so angiyarunsa na bilay da pian mibiang ed sigpot-panaon a serbisyo. Arum ed sikara so sigpot-panaon a manangiproklama na Panarian a tatawagen a payunir. Say arum so boluntaryo ed Bethel diad saray hedkuarter na Watch Tower Society odino saray sangan opisina to. Siansia say arum so misioniro odino managbiahen manangasikaso.

Ipapanengneng na Biblia a diad kaunoran iran agew et niwala so “saray panaon a maatap” a mairap a pidenengan. (2 Timoteo 3:1-5) Uusaren na Griegon teksto na Biblia so balikas a nipatalos ya “aturo iran panaon a magulo.” Kanian, anggapo so makapanilalo ed sakey a bilay ya andiay problema ed panaon tayo. Parad arum a Kristianon ministro, say problema et nengneng toy grabe a nitepet da’d sarili ran, ‘Makapantultuloy ak ta ni ed sigpot-panaon a serbisyo, odino nepeg ko lay ontunda?’

Antoray situasyon a sengegay pangusisa lamet na sakey ed serbisyo to bilang sakey a payunir, boluntaryo ed Bethel, managbiahen manangasikaso odino misioniro? Anganko ta say pakawalaay graben sakit. Ompan say matatken la odino mansasakit a kanayon so mankakaukolan na tuloy-tuloy a panangasikaso. Posibli met ya onggapo lan manpamilya so sanasawa. Siopaman ya ontunda’d sigpot-panaon a serbisyo nisesengeg ed saratan tan ed resulta na Makasulatan iran obligasyon et agto nepeg a liknaen a nababaingan ed panggawa na ontan a pananguman.

Balet, panon to no say sakey et plaplanoen toy ontunda’d sigpot-panaon a serbisyo lapud naandian lay gayaga? Anganko ta agtanton mabunga so ministeryo na sakey a payunir tan mantetepet, ‘Akin a mantultuloy ak ed sakey a masakripisyo’d-sarilin paraan na kabibilay anta dagdaiset labat so ontatalineng?’ Ompan say sakey a boluntaryo ed Bethel et agto tanton panliliketay asainmin to. Odino posiblin say pawil-pawil a sakit, bangta agmangaamper itan ed panagpayunir, so diad kaunoran et kalkalnan mangeekal ed liket na sakey. Panon a napansiansia na ontan iran indibidual so gayaga ra? Konsideraen tayo paray imbaga na pigaran eksperiensiadon ministro.

Iyaarap ed Pakadismayaan

Si Anny, a taga-Switzerland, so nanaral ed Watchtower Bible School of Gilead nen 1950. Nampirawatan toy paka-asain bilang misioniro ed biek-taew. Sanen niasain lamet a mantrabaho ed Bethel diad Europa, si Anny so adismaya. Anggaman kuan, inawat to so asainmin to ed Departamento na Panagpatalos tan siansian mantratrabaho ditan. Panon ton tinalonaay inkadismaya to? “Wala tan dakerakel a nepeg a tratrabahoen. Say liknaan tan panlabayan ko so aliwan singa kaimportanti na say kimey,” so salaysay nen Anny.

No agtayo naliliketan ed asainmin tayo, maabig no bayuboan tayo so singa samay awawey nen Anny. Say personal a panlabayan tayo so aliwan say sanka-importantian. Say importantin tuloy et amin na saray nanduruman responsabilidad a nisisiglaot ed kilaknab na mensahe ed Panarian so naasikason maong. Oniay ibabaga ed sikatayo na Uliran 14:23 a “dia ed amin a kimey wala so nabang.” Antokamay asainmin a niiter ed sikatayo, say sitotoor a pananumpal ed saratan so makatulong ed kasumpal na kimey ed Panarian. Tan niwala so baleg ya inkapenek​—on, gayaga​—ed ontan ya inter-Dios a kimey.​—Ikompara so 1 Corinto 12:18, 27, 28.

Pidedeneng ed Arum

Sasaglawien na sigpot-panaon a serbisyo so maapit a pidedeneng ed amin a klase na totoo​—diad lawak a ministeryo, diad Bethel, diad pan-misioniron ayaman, odino legan ya ombibisita ed nanduruman kongregasyon bilang managbiahen manangasikaso. Kanian, say gayaga so mandedependin tuloy ed maabig a pidedeneng ed arum. Balet, say ‘magulon panaon’ a nipasakbay ed sarayan kaunoran ya agew so pansesengegay mairap a pakapideneng ed arum. Panon a napaliisan na sakey a ministro so pakabalang toy gayaga to, anggano walay akapaingongot ed sikato? Anganko walay naaralan tayo manlapud si Wilhelm.

Nagmaliw a membro na pamilyan Bethel ed Europa si Wilhelm nen 1947. Kayari to et akapanpayunir tan linmoob ed serbisyo bilang managbiahen managasikaso. “No sikamin sanasawa et walay naimano miran bengatlan diad padesir mi et aliwan susto odino personal a mamaaburido ed sikami, ibabaga mi ed si Jehova so nalilikna mi tan insan mi la ipia ed sikato so pakaresolbi na bengabengatla,” so salaysay nen Wilhelm.​—Salmo 37:5.

Anganko ta sikan mismo et nagogonigon lapud walna na sakey a kaparan Kristiano a nansalita ed sika ya andiay respito odino bengatbengat. Tandaan a sikatayon amin so nagagapol a maminpigapiga ed panagsalita tayo. (Santiago 3:2) Kanian akin ya ag-usaren iyan situasyon ya onapit ed “Dumerengel na pikakasi”? (Salmo 65:2, NW) Itongtong itan ed si Jehova, tan insan la ipia ed sikato. No labay na Dios a manggawa na saray pananguman, gawaen to itan. Saramay manaayam ed pan-misioniron ayaman so nakaukolan a mangipaslep ed saya no onlesa iray pakadetdetan ed mipadpara iran problema, unong ta saya so ontulong ed sikaran napansiansiay gayaga ra ed serbisyo ed si Jehova.

Sano Makapuy so Laman

Pigpigaran totoo labat so lawas mabunigas. Anggan saraman ni ingen so walad tatawagen a kabisbiskegan a bilay da so nayarin makakasagmak na depresyon odino sakit. Lapud beblay et kapilitan a tinmunday arum ed sigpot-panaon a serbisyo, balet ta kayari to et ekselentiy nagagawaan da bilang manangipalapag na Panarian. Balet, asarag na arum ya ituloy so sigpot-panaon a serbisyo ra anggan makapuy so laman da. Alimbawa, isipen pay Hartmut tan Gislind.

Di Hartmut tan Gislind so sanasawan akapangusar la na 30 taon bilang payunir, misioniro, tan ed panagbiahen kimey. Sikaran dua so akasagmak la na graben beblay a no maminsan et mamaandi’d biskeg tan emosyon da. Anggaman kuan, ekselenti so agawaan da tan akapaseseg ira ed arum a makakasagmak na mipadpara iran pakasalian. Anto so nisisimbawa ra? “Onnengneng ed arapen tan aliwan ed apalabas. Anamoten moy kada situasyon. Kada agew et nayarin mangitarok na anggan sakey labat a pankanawnawan nidayew si Jehova. Usaren moy ontan a pankanawnawa, tan panggayagaan itan.”

Isipen pay kipapasen nen Hannelore. Sikatoy paiirapen na tubat-tubat a sakit ed loob la na 30 taon to bilang sakey a payunir, misioniro, diad panagbiahen kimey a kaiba nen masiken to, tan diad serbisyo ed Bethel. Oniay kuan nen Hannelore: “Isesentrok so imanok ed isyun pinawala nen Satanas​—a saray totoo et manlilingkor labat ed si Jehova no say pananumpal et magmainomay parad sikara. Diad pantepel ed saray pakasalsali, nawalaan ak na betang ed pakapaneknek a matila si Satanas.” Nayari iyan magmaliw a mabiskeg a motibasyon. Tandaan a say personal a katooran mo ed si Jehova ed silong na subok so importanti ed sikato.​—Job 1:8-12; Uliran 27:11.

Sano panggugunaetan a manggawa na asimbang a desisyon no nipaakar ed bunigas mo, isipen so duaran kabiangan na propesiya nen Jesu-Kristo nipaakar ed konklusyon na sistemay bengabengatla. Impasakbay nen Jesus iray salot ed nanduruman pasen. Inkuanto met: “Saya ya ebanghelyo na panarian nipulong naani ed sankamundoan.” (Mateo 24:3, 14; Lucas 21:11) Amta nen Jesus a diad kaunoran iran agew, mipuligesgesan iray patumbok to ed sakit. Balet ta amoria ton say panagpulong a kimey so sumpalen na totoon aliwa lambengat a panggayagaan day maong a bunigas noagta pati saray indibidual a manasagmak na seryoson sakit. No makapantultuloy itayo ed sigpot-panaon a serbisyo anggaman ed graben sakit, aglingwanan nen Jehova so aron ipapanengneng tayo parad ngaran to.​—Hebreos 6:10.

Panagmantini ed Gayaga Anggaman ed Inkaandi-Interes na Publiko

Say awawey tayo so naapektoan ed reaksion na arum a totoo ed panangipulong-na-Panarian. “Anggan saray payunir et naiirapan a mangigapo na tongtongan ed sakey ya onabung,” inkuan na sakey ya eksperiensiadon ministro. “Amin tayo so kaukolan a mipuligesgesan ta pian namantini so gayaga tayo.” On, say inkaandi-interes na publiko so mamawas ed gayaga tayo ed lawak a serbisyo. Kanian panon a namantini na sakey a payunir so gayaga to no naynay a nipapaarap ed agpananginenen? Iiter na saray eskperiensiadon ministro so onggendan iran suhestion ya asali tan apaneknekan la.

Talagan makapaangat so inkaandi-interes, balet ta agkabaliksan na saya so inkasaew. Diad satan a mismo et say kasmak ya agpananginenen so aliwan sengegan pian ontunda la ed sigpot-panaon a serbisyo. Namantini tayoy gayaga tayo ed arap na inkaandi-interes no magenap so pangipanaon tayo ed magunaet a panagaral na Kasulatan. Saratan so ‘kibangatan tayo a maong ed amin a gawa a maabig,’ tan lalaktipen na satan so pitongtong ed saramay agda labay so ondengel ed maong a balita. (2 Timoteo 3:16, 17) Anggaman aglabay na totoon talinengey propetan Jeremias, ag-itan amatunda ed sikato. (Jeremias 7:27) Sano manaaral na Biblia diad tulong na saray Kristianon palapagan, nagunggunaan tayon maong no tandaan tayoray kaisipan a mamabiskeg ed pananisia tayo tan ontulong ed pakapideneng tayo ed say inkaandi-interes.

Iyan lan sakey ya angat so inkaandi-interes, usisaen tayo pay awawey tayo ed saramay pupulongan tayo. Akin a sikaray agmanginennenen? Singa bilang, say sakey a rason na kasmak ya inkaandi-interes ed dakel a parti na Europa et say makapabaing a rekord na palson relihyon. Agnalilikna na totoo a walay pasen na relihyon ed bilay da, nisay napilanlanor ed antokaman a relihyon. Kaukolan a magmaliw itayon marunong ya onadapta, mitongtong ed totoo nipaakar ed pamaakaran a mangaapekta ed sikara, a singa say agpakaempleyo, bunigas, krimen, inkamapeget, kaliberliber, tan say sesga na bakal.

Diad introduksion tayo ed onabung, nayarin salambiten tayoy bengatlan paninteresan ed saman a lugar. Ontan so sinalin ginawa nen Dietmar sanen manpupulong ed sakey a purok a ditan et agtanton matalona. Asaglawi na sakey a residenti ya asagmak na purok so trahedya duay agew lay apalabas. Kanian diad kada puertan nila to, imbalikas nen Dietmar so masimoon a pieermen to ed trahedya. “Kabekta et mitotongtong met laray totoo,” inkuanto. “Say trahedya so walad kanonotan na balang too. Dakel so akatongtong ko ed saman ya agew lapud impanengneng kon interesado ak ed bilay da.”

Kaukolan tayon pulongan so totoo nipaakar ed Panarian inermay pakaromogan tayo ed sikara. Nayarin mabunga so impormal a panagtasi, tan nayarin ipasal tayoy inkasikatayo ed sayan aktibidad diad pangusar na saray suhestion a niyopresi ed nibase’d-Biblia iran palapagan. Nayarin mansumpal so gayaga manlapud pigaran makaaron salita odino diad pangipalima na saray kopya na Panag-Bantayan tan Awake! a magasin ed sakey ya onabung. No sikatayoy akapanggawa na panagpawil tan akapangigapo la na panangiyaral na Biblia ed sakey ya interesado, makaalmo tayo ni na interesado diad pangitepet: “Wala tay kabat mon labay toy paiyaralan na Biblia?” Saya so mangipaarap ed pakapangigapo na sakey a panangiyaral na Biblia. Diad antokaman a kaso, magmaliw tayon positibo, impapuson manmatalek ed si Jehova, ya agpadidismaya lapud inkaandi-interes.

Panamaseseg Manlapud Arum

Di Jürgen tan Christiane so manpapayunir tan mibibiang ed panagbiahen kimey ed loob la na masulok a 30 taon. Aminsan et niasain ira a lalanoren toy panpulong ed lugar a ditan et maslak a totoo so andiay-interes tan mairap a katongtongen. Alay pirawat di Jürgen tan say asawa to a napaseseg! Balet diad pigaran rason et arum ed kongregasyon so ag-akapenek ed pankaukolan da.

Kanian unong ed eksperiensia et kabat nen Jürgen ya “arum a payunir so nairapan met. Nakaukolan da so malaglaem a panamaseseg manlapud mamatatken tan arum niran manangipalapag.” Imbaga na Dios ed si Moises a pasesegen tan pabiskegen toy Josue. (Deuteronomio 3:26-28) Tan saray Kristiano so nepeg a lapuay panpapasesegan. (Roma 1:11, 12) Napaseseg na saray manangipalapag na Panarian iramay walad sigpot-panaon a serbisyo diad panamegley na makapaalagey iran salita tan diad piulop ed sikara a panapanaon ed ministeryo ra.

Say Gayaga ed Jehova​—Salimbeng Tayo

Saray Kristiano ya angusar na baleg a kabiangay bilay da bilang payunir, misioniro, manlilingkor ed Bethel, odino ombibisita ed saray kongregasyon ed panagbiahen kimey so akadiskobre a maslak ed problema ra et agmanbayag, balet say arum so manbayag. Anggan say pigpigaran probleman ompapatnag ya agnaandi so agnepeg a manamsam na gayaga tayo. Si Ramon, a say asainmin to et diad biek-taew ed masulok lan 45 taon, so mangisusuheri a kapiganman a mamaermen ed sikatayo so problema, “kaukolan tayon nonoten iray kinarakel na bendision tayo tan nipaakar ed nilibo niran manasagmak na mas graben pakakairapan.” On, saray panirap so nasasagmak na saray kapananisiaan tayo ed sankamundoan, tan peteg a tatalimaen itayon amin nen Jehova.​—1 Pedro 5:6-9.

Kanian, no aabuloyan itayo na personal iran sirkumstansia tayo a mibiang ed sigpot-panaon a serbisyo tan mansiansia ed satan, mantinien tayo komon so gayaga tayo diad panmatalek ed mangatatawen ya Ama tayo. Papabiskegen toray ariripen to, tan kaukolan tayon amin a tandaan a ‘say liket [gayaga, NW] ed Jehova sikato so biskeg tayo.’​—Nehemias 8:10.

[Litrato ed pahina 21]

“Say liknaan tan panlabayan ko so aliwan singa kaimportanti na say kimey”

[Litrato ed pahina 22]

“Ibabaga mi ed si Jehova so nalilikna mi tan insan mi la ipia ed sikato”

[Saray litrato ed pahina 23]

“Anamoten moy kada situasyon. Kada agew et nayarin mangitarok na anggan sakey labat a pankanawnawan nidayew si Jehova”

[Litrato ed pahina 23]

“Diad pantepel ed saray pakasalsali, nawalaan ak na betang ed pakapaneknek a matila si Satanas”

[Saray litrato ed pahina 24]

“Arum a payunir so naiirapan met. Nakaukolan da so malaglaem a panamaseseg manlapud mamatatken tan arum niran manangipalapag”

[Litrato ed pahina 24]

“Kaukolan tayon nonoten iray kinarakel na bendision tayo”