Report na Saray Manangiyabawag na Panarian
Pananalona ed Saray Angat Diad “Dalin ya Ag-iilaloan”
TINEPETAN nen apostol Pablo iray inmunan-siglon Kristiano ed Corinto: “No say trumpeta ontanol na tanol a panduaruwaan, siopa kasi makapanparaan a mibakal? Ontan kayo met, no dia ed dila agyo bitlaen so saray salitan mainomay a talosan, panon so pakaamta na sasalitaen?”—1 Corinto 14:8, 9.
Diad Papua New Guinea, no maminsan et natatawag a say Dalin ya Ag-iilaloan, akaabet iray Tastasi nen Jehova na oniirap iran babeng diad panangipulong ed malinew a mensahe na Biblia. Pupulongan daray totoon mansasalita na masulok a 700 a nanduruman lenguahe tan walaan na malaknab a panduruma na kustombri. Nipapaarap met so Tastasi ed kapalandeyan a daldalin, kulang a daladalan, tan ondaraak a krimen. Nilikud ni ed sarayan amin a kairapan, wala so isusumpa manlalapud pigaran relihyoson grupo tan, no maminsan, manlapu ni ingen ed opisyales na eskuelaan.
Anggaman kuan, kikinlongan na maong ya espiritual ya instruksion tan ombabaleg a librarya na saray katulongan ed Biblia ed lokal iran lenguahe iray Tastasi pian ipasabi so maong a balita a singa nibiig a tanol na trumpeta. Mabetbet a positibo so kiwas, a singa ipapanengneng na onggendan iran report:
● Diad kagapoy pan-eskuela, labay ya amtaen na sakey a maestro no akin ya ag-onsasaludo ed bandera odino mangakansion na national anthem iray anak na Tastasi nen Jehova. Intepet to iya ed si Maiola, estudyanten mantaon na 13 a bautismadon Tasi. Malinew tan base’d Kasulatan ya insalaysay nen Maiola. Inawat na maestro so panagkatunongan to lapud nanlapud Biblia itan. Say salaysay to so impaamta met ed arum nin staff na eskuelaan.
Saginonor, sanen inasain iray estudyante a mangisulat na saray komposisyon, pinili nen Maiola so teman nipaakar ed Trinidad. Say komposisyon to so akaawat na sankatageyan a grado ed klase, tan tinepetan na maestro no iner so angalaan toy impormasyon. Impanengneng to’d sikatoy libron Makapambilay Kayo na Ando lan Ando ed Paraiso diad Dalin ed lenguahen Ingles. Insan impresinta na maestro so libro ed intiron klase, tan dakel so malabay a makalay dilin kopya ra. Tinmumbok ya agew, akapangipalima si Maiola na 14 a libro tan 7 magasin ed saray kaeskuelaan to, tan akapangigapoy taloran panangiyaral na Biblia ed talora ed sikara. Say kalat nen Maiola et say pagmaliw a sigpot-panaon a ministro.
● Sakey a nisulinek a grupo na Tastasi nen Jehova diad sakey a purok ed gilig na dayat ya asingger ed Port Moresby so nipaarap ed isusumpa nanlapulad asasakbay na dekaday 1970. Balet, agano ni, akaawat iray tulong manlapud ag-iilaloan a lapuan. Sakey ya agew et kinerew na obispo na United Church diman, tubo ed Papua New Guinea a nanaral ed biek-taew, iray akimisa a mantepet. Onia so intepet na sakey a laki: “Walay duaran relihyon ed purok tayo—Say United Church tan Tastasi nen Jehova. Antoy kaukolan min gawaen no ondalaw iray Tastasi nen Jehova ed sikami?” Kayari na andukey ya ag-impakasel, inyebat na obispo: “Amta yo, talagan agko amtay ibagak ed sikayo. Agano ni, duaran malangwer a Tastasi so dinmalaw ed abung ko. Tinepetan da ak, tan anggaman ed inkibangat ko ed unibersidad, agko amtay ebat. Balet ta magmainomay da ak ya inikdan na ebat manlapud Biblia. Kanian agko ibaga ed sikayo no antoy gawaen yo—akauley kila. Agkayo ondedengel no agyo labay, balet ta agkayo maruksa ed sikara.”
Onia so inreport na sakey a managbiahen manangilaman na Watch Tower Society a diad saginonor ed binmisita ed sayan grupo na Tastasi: “Ngalngalin amin ed purok so ondedengel ed Tastasi no manpupulong ira. Arum ni ingen so mangimbita ed sikara diad abung da. Satan so sakey a paraiso parad panagpulong natan.”