Peteg a Liket—Anto so Tombok?

GETMAN manliket so katooan. Akin a segurado itayon ontan? Bueno, konsideraen pay gapoan na too.

Pinalsa nen Jehova a Dios so inmunan sanasawa a walaan na abilidad a panggayagaan so liket. Impasen si Adan tan Eva ed sakey a paraiso, sakey a harden na panliket a tinawag ya Eden. Intaryaan ira na Manamalsa na amin a nakakaukolan dan pisikal a bengabengatla pian manbilay. Say harden so walaan na “amin a kiew a makaroyo ed mata tan maong ira a kanen.” (Genesis 2:9) Si Adan tan Eva so mabunigas, mabiskeg, tan malimlimgas​—sikaray ayadyari tan tuan maliket.

Balet, antoy tombok ed liket da? Kasin say paraison ayaman da odino anganko et say inkanaspot da ed pisikal? Siempre sarayan regalon nanlapud Dios so amagayaga ed panagbilay da. Balet agnandepende so liket da ed saratan a nanengneng a bengatla. Say harden na Eden so mas nen say sakey a marakep a parki. Santuaryo iman, sakey a pasen a pandayewan ed Dios. Say tombok ed magnayon a liket da et say abilidad dan igapo tan mantinien so maaron siglaotan ed Manamalsa. Pian magmaliw a maliket, unona et kaukolan day magmaliw a maespiritual.​—Ikompara so Mateo 5:3.

Say Espiritualidad so Mangitonton ed Liket

Diad inmuna et walaan si Adan na espiritual a siglaotan ed Dios. Saman so sakey a maaro, matamoy a siglaotan a singa ed sakey ya anak ed ama. (Lucas 3:38) Diad harden na Eden, walaan si Adan tan Eva na naspot iran sirkumstansia ya angiyabuloy ed sikaran peneken so pilalek da a mandayew. Diad mabulos tan maaron katutulok da ed si Jehova, sikaray makapangitarok na galang tan gloria ed Dios ed labas na naitarok na pinalsan ayayep. Sidudunong dan nidayew so Dios lapud pandinayewan iran kualidad to tan sirin et makasuporta ed inkasoberano to. Makapantultuloy ira met a mangawat na maaro tan matamoy a panagtalima nen Jehova.

Sayan maapit a siglaotan ed Manamalsa tan katutulok ed saray ganggan to so angitarok na puron liket ed inmunan atateng tayo. (Lucas 11:28) Agla kaukolan di Adan tan Eva so dakel a taon na paneksperimento sakbay dan nadiskobre so tombok ed liket. Sikara lay maliket diad bektan inkapalsa ra. Amaliket ed sikara so pikakareenan ed Dios tan panpapasakop ed autoridad to.

Balet, anampot itan a liket diad bektan insumlang da’d Dios. Diad impanrebeldi, pinakset di Adan tan Eva so espiritual a siglaotan da ed si Jehova. Aliwa laran kakaaro na Dios. (Genesis 3:17-19) Ompapatnag a manlapud saman ya agew na impamapaway ed sikara manlapud harden, intunda la nen Jehova so amin a pitatalosan ed sikara. Abalang day inkayadyari ra, say ilalo ran manbilay a maando, tan say harden ya ayaman da. (Genesis 3:23) Balet lalon importanti, lapud abalang day siglaotan da ed Dios, abalang da met so tombok ed liket.

Say Abilidad Tayon Manpili

Sakbay ya ompatey, impasa di Adan tan Eva ed kailalakan da so atooan iran walna ra, say nisipor a konsiensia ra, tan say kapasidad na espiritualidad. Agmet nipaabeba so atooan a pamilya ed kipapasen na ayayep. Makapipulangan itayo ed Manamalsa. (2 Corinto 5:18) Bilang intelihinti iran pinalsa, mantultuloy so katooan a nawalaan na pakayarin manpili no kasin tuloken day Dios odino andi. Saya so niyilustra dakel a siglo ed saginonor sanen impanpili nen Jehova a Dios so balobalon aporman nasyon na Israel na bilay odino patey. Diad panamegley na sangian ton si Moises, onia so inkuan na Dios: “Inyan ko ed arap mo ed sayan agew so bilay tan kaabigan, tan patey tan say kaugsan.”​—Deuteronomio 30:15-18.

Anggan natan, nilibon taon kayarin abalang so orihinal a Paraiso, sikatayon totoo so siansian makapanpilin duga. Walaan itayo na onggaganan konsiensia tan manunan kapasidad ed itutulok ed saray ganggan na Dios. Sasaglawien na Biblia so “too mi ed loob” tan say too ed “dalem.” (2 Corinto 4:16; Roma 7:22) Sarayan balikas so ontutukoy ed nisipor a posibilidad a walad sikatayon amin pian isindag so personalidad na Dios, pian isipen iray panag-isip to, pian magmaliw a maespiritual.

Nipaakar ed moralidad tan konsiensia tayo, onia so insulat nen Pablo: “Ta no saray Gentiles ya anggapo so ganggan da gawaen da ed ugali ra a nianakan so saray onepeg ed ganggan, saraya sirin anggan anggapo so ganggan, sikara so ganggan ed sikaran dili. Dia ed pangipatnag da na gawa na ganggan a nisulat ed kapusoan da, say konsiensia ra so mangiter na pantasi, tan mandadaleman o mantetepelan so kanonotan da.”​—Roma 2:14, 15.

Say Maridios a Kakabatan tan Katutulok​—Say Tombok

Balet nayarin itepet na sakey, ‘No walaan itayo na nisipor ya inklinasyon pian dayewen so Dios tan, bilang resulta, pian panggayagaan so puron liket, akin balet et kasmak so agmaliket?’ Say makasengeg pian magmaliw a maliket, nepeg ya ombulaslas so balang sakey ed sikatayo ed espiritual. Anggaman apalsa unong ed indengan na Dios, say too so nisian manlapud Manamalsa to. (Efeso 4:17, 18) Kanian, nepeg a mangala so balang sakey ed sikatayo na piho iran kundang pian iletneg tan mantinien so espiritual a siglaotan ed Dios. Say ontan a siglaotan so agniwalan automatiko.

Indatak nen Jesus so duaran importantin prinsipyo diad pamayubo’d espiritualidad. Say sakey et say igamor na suston pikakabat ed Dios, tan say sananey et say situtulok a pampasakop ed linawa to. (Juan 17:3) Diad pangaon ed Salita na Dios, inkuan nen Jesus: “Walan nisulat, ‘Aliwa a say tinapay labat so napambilay na too, noag say amin a salitan ombesngaw ed sangi’ Dios.’” (Mateo 4:4) Diad sananey ya okasyon, onia so inkuan nen Jesus: “Say kanen ko sikato so panggawak na linawa na saman so angibaki ed siak, tan manumpal na kimey to.” (Juan 4:34) Agla kaukolan a dekadekadan maneksperimento itayo diad pansukimat na liket. Say eksperiensia so aliwan tombok ed liket. Imbes, say maridios a kakabatan tan katutulok ed Manamalsa tayo so mogmon makapangitonton ed tuan gayaga ed bilay.​—Salmo 19:7, 8; Eclesiastes 12:13.

Malinew, say liket a resultay pangagamil na maridios a kakabatan tan say pakawalaan na maabig a talindeg ed arap na Dios et nadampot tayo. (Gawa 17:26, 27) Say pikakabat nen Jehova tan say gagala to et kakaala na amin. Tekep na binilyon a kopya ed dakel a lenguahe, mantutultuloy so Biblia a sankalaknaban a nibubunog a libro ed mundo. Natulongan ka na Biblia a magmaliw a kaaro na Dios tan panggayagaan so tuan liket, lapud ibabaga ed sikatayo na Kasulatan a “mainawa [maliket, NW] so totoo a say Dios da et si Jehova!”​—Salmo 144:15.

[Kahon ed pahina 6]

Saray Kundang a Mamaarap ed Liket

1. Tebeken tan bayuboan so espiritualidad. Inkuan nen Jesus: “Mapalar [maliket, NW] so saray ondengel ed salita na Dios, tan sikatoy unoren da!”​—Lucas 11:28.

2. Bidbiren a mas importanti so abobon na Dios nen say kayamanan odino inkaluksuryo. Insulat nen Pablo: “Balet say kasimpitan sikato so baleg a gungguna no tooran na pamasarag. . . . No wala siri’ pantagano tayo tan kawesen tayo pasaragen tayo komon ya.”​—1 Timoteo 6:6-8.

3. Panbanikelan a bayuboan tan onkiwas ed nipasal ed Biblian konsiensia.​—Roma 2:14, 15.

4. Determinadon ontulok ed si Jehova a Dios, diad ontan et onkualipikan magmaliw a sakey ed totoo to. Onia so insulat nen David nensaman: “Mainawa [maliket, NW] so totoo a say Dios da et si Jehova!”​—Salmo 144:15.

[Litrato ed pahina 7]

“Maliket iramay sinononot ed espiritual a pankaukolan da.”​—Mateo 5:3, NW