Mauges Ta ya Amin so Panangireklamo?

Antoran pakaalipanesan so mas ansakit ni nen saramay agtayo nireklamo?​—Marquis De Custine, 1790-1857.

DUAY taon ton intepel so seksual a panggigirogiroy katrabahoan to. Saray insuppiat to so nansumpal ed insalitan panangabuso tan agpangikabkabilangan. Mangaapekta’d bunigas to so eem-eman ton pakadesdesan, balet antoy nagawaan to? Mipadpara, sakey ya estudyanten sankamaongan ed klase to so apaekal ed eskuelaan lapud agnaawat na konsiensia to so mibiang ed saray panagsanay ed martial-arts a kakaukolaney eskuelaan. Alikna ran dua a sikaray naagrabyado, balet kaukolan ta iran manreklamo? No gawaen da, nailaloan da kasi so tulong odino mas onloor la ingen iray bengatla?

Say oniaran reklamo tan arum nira so kaslakan natan, lapud manbibilay tayo’d limog na ag-ayadyarin totoo ed sayan maksay a mundo. Sasaglawien na panagreklamo so amin a laknab manlapud panangibesngaw labat na itetepel ya ingongot, ermen, inkasakitan, odino imbel na linawa lapud pigaran situasyon anggad pormal lan dalem sumpad sakey a too. Mas pilien ni na maslak a totoo so ipaliis ed panangireklamo tan piaarapan; ingen, nepeg kasin naynay lan manpareen so sakey? Anto so panmoriay Biblia?

Mauges Iran Epekto To’d Sika tan ed Arum

Agpanduaruwaan a say mareklamon tuloy ya awawey et makadesyang, tan kokondenaen itan na Biblia. Nitarok na managreklamo ed inkasikaton dili so pisikal tan espiritual a desyang tan sinagem met ed saramay irereklamo to. Tutukoyey mareklamon asawan bii, ibabaga na proverbioy Biblia: “Say naynay a panterter ed mamauran ya agew tan say makolkol a bii sikara so nanpadpara.” (Uliran 27:15) Say panreklamon sumpad si Jehova odino sakey ed saray probisyon to so nagkalautlan pankasalanan. Sanen inreklamoy nasyon na Israel so mamilagron manna a nitarya legan na 40-taon ya impanteyengteyeng da’d kalawakan, a tinawag da ni ingen itan a “kagulgulan tinapay,” imbaki nen Jehova iray maditan uleg pian dusaen iray anggapoy respiton managreklamo, tan dakel so inatey.​—Numeros 21:5, 6, NW.

Niarum ni, sinimbawa nen Jesus ya ag-irereklamo na saray patumbok to, so “taep” na saray kalilingoan a naiimano’d kapara tayon totoo, noagta maimano tayon maong ed say babaleg a “pagsen” na saray kakulangan tayon mismo. (Mateo 7:1-5) Mipadpara, kinondena nen Pablo so panaghusga (sakey a nengneng na panagreklamo) ed arum bilang ‘agnabaraanan . . . ta sika a manguukom et gagawaen mo iratan a bengatla.’ Sarayan pasakbay sumpad panagreklamo so kaukolan a mamakiwas ed sikatayon paliisay agnakaukolan a panagsita tan pamayubo’d mareklamon awawey.​—Roma 2:1.

Nakondena Ta ya Amin so Panangireklamo?

Kaukolan tayo kasin ikuan ya amin a nengneng na reklamo et nepeg a kondenaen? Andi, aleg komon. Ipapanengneng na Biblia a dakel iray ag-inkahustisya ed panbibilayan tayon mundo a walaay depekto a mankaukolan labat na panangorehi. Diad sakey ya ilustrasyon, sinalambit nen Jesus so sakey ya agmatunong ya ukom ya apilitan a mangipaakseb na inkahustisya ed sakey ya alames a balon bii ompan “agla naynay ya ondago tan mamairap [ed sikato] anggad kasampotan.” (Lucas 18:1-8, NW) Diad arum a paraan et nayarin kaukolan tayo met ya itultuloy iray irereklamo tayo anggad pakapetek na saray lingo.

Diad pamapaseseg ed sikatayo ya ipikasi so isabi na Panariay Dios, agta sasagyaten itayo nen Jesus a bidbiren iray kakulangan na sayan kaplesan a mundo tan ‘onkelyaw’ ed Dios parad sakey a solusyon? (Mateo 6:10) Sanen say “akis [na panreklamo]” nipaakar ed karelmengan na kadaanan a Sodoma tan Gomorra so nadngel to, imbaki nen Jehova iray mensahero to pian “nengnengen . . . no ginawa ra ya amin so singa say akis to” tan pian mangitarok na solusyon. (Genesis 18:20, 21) Diad inkainawaan na saramay nanreklamo ed sikato, kayari et pinetek nen Jehova so situasyon diad impaneral ed duaran syudad tan ed saray imoral a manaayam ditan.

Say Kristianon Kongregasyon

Kaukolan ta’n duma itan ed limog na agagi ed loob na Kristianon kongregasyon? Anggaman ag-ayadyarin lalaki tan bibii, masimoon a panggugunaetan na Kristianos a panlingkoran so Dios diad kareenan tan pankakasakey. Ingen, onlesa iray situasyon ed limog da a sengegay panreklamo tan mankaukolan itan na solusyon. Nen inmunan siglo, linmesa so situasyon ed kongregasyon na saray alanaan kayarin tuloy na Pentecostes. Dakel a balobalon akombertin Kristiano so tinmilak ed Jerusalem parad kaaruman nin instruksion tan panamaseseg. Walay panangiyutob ed walan abaston tagano. Balet, “nantalabutob so saray Griego a Judio ya onsumpa ed saray Hebreos, lapud saray bibii a babalo ed sikara napapaulyan ira ed pannanabangan ya inagew-agew.” Imbes a kondenaen irayan managreklamo bilang managgulo, kinmiwas iray apostol pian ipetek so situasyon. On, saray makatunongan a reklamo a ginawa ed manepeg a respito tan diad suston awawey so mapaabeban dengelen tan remedyoan na saramay mangaasikaso’d kongregasyon.​—Gawa 6:1-6; 1 Pedro 5:3.

Diad Matukoy ya Autoridad

Agmo ta naimano’d saray alimbawan walad tagey a kaukolan a gawaen so panreklamo diad suston awawey tan diad matukoy ya autoridad? Alimbawa, anggapoy kakanaan no ireklamo’d polisya so atagey a buis odino diad sakey a huis so nipaakar ed pisikal a beblay na sakey. Kanian, ontan met, agmatukoy ya ireklamo so sakey ya situasyon ed loob odino paway na kongregasyon diad sakey a toon ag-autorisado odino andian na pakayarin ontulong.

Diad maslak a daldalin natan, walaray korte tan arum niran matukoy ya autoridad a natuplegan aglapigan nagamoray sakey a sukat na pakainawaan. Sanen say estudyanten asalambit ed gapo na artikulo so nanreklamo ed korte, pabor ed sikato so desisyon na saray huis, tan sikatoy pinapawil tekep na dispensan nanlapud eskuelaan. Mipadpara, say biin trabahador a seksual ya agirogiro so akainawa diad panamegley na onkukurang ya ulopan na bibiin trabahador. Sikatoy akaawat na dispensa na school board. Kinmiwas iray pantratrabahoan to pian patundaen so seksual a panaggirogiro.

Balet, agkaukolan ya ilaloan ya amin a reklamo et walaay parehon pansumpalan. Onia so realistikon naobserbaan nen makabat ya Arin Solomon: “Say pikewet agnayari a panpeteken.” (Eclesiastes 1:15) Maabig no bidbiren tayo ya arum a pamaakaran so nepeg lambengat ya iyalagar ed Dios a mangipetek ed dili ton manepeg a panaon.

[Litrato ed pahina 31]

Dedengelen tan reremedyoan na mamatatken iray makatunongan a reklamo