Mapublikon Deklarasyon Parad Kilalaban

“Siopaman ya ontawag ed ngaran na Katawan [Jehova, NW], nilaban.”​—ROMA 10:13.

1. Diad loob na say awaran, antoran pasakbay so nipapaknol?

DEDESKRIBIEN na awaran so pigara ‘iran agew nen Jehova.’ Say Delap ed agew nen Noe, say inkaderal na Sodoma tan Gomorra, tan say inkideral na Jerusalem nen 607 K.K.P. tan 70 K.P. so baleg tan makapataktakot a tuloy iran agew nen Jehova. Agew iratan na pananimbang na inkahustisya ed saramay nanrebeldi ed Jehova. (Malaquias 4:5; Lucas 21:22) Legan na saraman ya agew et dakel so atawtaw lapud karelmengan da. Balet walaray akaliktar. Amasakbay si Jehova, a pinakabatan iray marelmeng ed paganigani lan desyang tan iikdan na pankanawnawa iray maptek impanpuso a naromog so kilalaban.

2, 3. (a) Anton mapropetikon pasakbay so inaon nen Pentecostes? (b) Manlapulad Pentecostes 33 K.P., anto so kakaukolanen diad itawag ed ngaran nen Jehova?

² Say inkaderal na Jerusalem nen 70 K.P. so matalonggaring ya alimbawa ed saya. Diad pangipapasakbay ed satan ya ebento ngalngali 900 taon ed akadkauna, oniay insulat nen propetan Joel: “Ipatnag ko naani so saray pankelkelawan ed saray tawen tan ed dalin; dala, tan apuy, tan sekseklang ya asewek. Say banwa magmaliw naani ya ambilunget, tan say bulan dala, arapen na isabi na baleg tan makapataktakot ya agew nen Jehova.” Panon a makaliktar so siopaman ed ontan a kateriblin panaon? Onia so insulat nen Joel diad impamuyan: “Nagawa naani, ya anggan siopa ya ontawag ed ngaran nen Jehova; nilaban naani; ta dia ed palandey na Sion tan dia ed Jerusalem wala ra naani so saray makataynan, singa sinalita nen Jehova, et dia ed saray natilak wala naani so saray tawagen nen Jehova.”​—Joel 2:30-32.

³ Nen Pentecostes 33 K.P., nampaliwawa si apostol Pedro ed sakey ya ulop na saray Judio tan proselita diad Jerusalem diad impangaon to’d propesiya nen Joel, ya ipapanengneng a nailaloan na saray dumerengel to so kasumpalan ed agew da: “Mangipatnag ak naani na saray makapakelaw ed tagey ed tawen, tan saray tanda ed lepsag ed dalin; dala tan apuy, tan alingasew na asewek; say banwa magmaliw a bilunget naani, et say bulan magmaliw naani a dala, diad arapen na isabi agew na Katawan, saman baleg tan bantog ya agew. Et nagawa ya amin ya ontawag ed ngaran na Katawan, nilaban ira.” (Gawa 2:16-21) Saray ulop ya ontatalineng ed si Pedro so amin et nisilong ed Mosaikon Ganggan, tan sirin et amta ra so ngaran nen Jehova. Kanian, insalaysay nen Pedro lapud satan a punto a mas ni sasaglawien na panawag ed ngaran nen Jehova. Makatantanda, laktipen na saya so pakabautismo ed ngaran nen Jesus, samay pinatey tan kayari et pinaoli ed imortal a mangatatawen a bilay.​—Gawa 2:37, 38.

4. Anton mensahe so indeklaran malaknab na Kristianos?

⁴ Manlapud Pentecostes a manpatuloy, inkayat na Kristianos so salita nipaakar ed apaolin Jesus. (1 Corinto 1:23) Impakabat da a saray totoo et natagibi ira bilang espiritual ya ananak nen Jehova a Dios tan magmaliw a kabiangay balon “Israel na Dios,” sakey ya espiritual a nasyon a ‘mangibelyaw na karlangan nen Jehova.’ (Galacia 6:16; 1 Pedro 2:9) Saramay manmatoor anggad patey so makatawir na imortal a mangatatawen a bilay bilang kaiban tomatawir nen Jesus ed mangatatawen a Panarian to. (Mateo 24:13; Roma 8:15, 16; 1 Corinto 15:50-54) Niarum ni, sarayan Kristiano so kaukolan a mangiproklama ed onsabin baleg tan makapataktakot a tuloy ya agew nen Jehova. Kaukolan dan pasakbayan so Judion mundo a nasagmak toy kairapan a mas ni nen samay sinmabi la’d Jerusalem tan ed mankuan a totoo na Dios anggad saman a panaon. Balet, walaray makaliktar. Siopara? Saramay tinmawag ed ngaran nen Jehova.

“Diad Saray Kaunoran ya Agew”

5. Antoran kasumpalan na propesiya so nagagawa natan?

⁵ Diad dakel a nengneng et saray kipapasen ed saman so angiyanino ed naiimano tayo natan. Nanlapulad 1914, manbibilay lay katooan ed nikaduman peryodo na panaon ya atukoy ed Biblia bilang “[say] panaon na kasumpalan,” “say konklusyon na sistema na bengabengatla,” tan “saray kaunoran ya agew.” (Daniel 12:1, 4; Mateo 24:3-8, NW; 2 Timoteo 3:1-5, 13) Diad kawalaan tayon siglo et nitatarok na maruksan bakabakal, agnapugeran a karawalan, tan say kadederal na sosyedad tan kaliberliber so sankabitar a kasumpalan na propesiyay Biblia. Amin na saraya so kabiangan na say tandan impropesiya nen Jesus, a mangipapatnag a ngalngali lan nasagmak na katooan so pinal tan manampot a makapataktakot a tuloy ya agew nen Jehova. Onsabi iya ed panlalaban ed Armagedon, say kapantokan na “baleg ya irap ed satan, ya anggapo so ontan a nanlapud gapo na mundo ya angga ed natan, anggapo, anggapo la naani.”​—Mateo 24:21; Apocalipsis 16:16.

6. (a) Panon so ikikiwas la nen Jehova ed pangisalba ed saray mauyamo? (b) Iner so pakaromogan tayoy konseho nen Pablo ed no panoy kiliktar?

⁶ Legan a manasingger lay agew na pankibalatar, onkikiwas si Jehova nisesengeg ed kilalaban na saray mauyamo. Legan na sayan “panaon na kasumpalan,” titiponen to laray nakdaan na espiritual ya Israel na Dios tan insan ibaling toy imano na mangaraldalin ya ariripen to, nanlapulad dekada na 1930 a manpatuloy, ed pakatipon na “sakey a baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita.” Bilang sakey a grupo, saraya so “nanlapu ed baleg ya irap” a mabilay. (Apocalipsis 7:9, 14) Balet panon a naseguro na kada indibidual so kililiktar to? Inebatan nen apostol Pablo itan a tepet. Diad Roma kapitulo 10, sikatoy angiter na maabig a konseho parad kililiktar​—konsehon inmaplika ed agew to tan onaplika itan lamet ed panaon tayo.

Sakey a Pikakasi Parad Kilalaban

7. (a) Anton ilalo so akabatan diad Roma 10:1, 2? (b) Akin a nayarin nawalaan natan si Jehova na mas malaknab a kiyabawag na “maong a balita”?

⁷ Sanen insulat nen Pablo so libro na Roma, impulisay la nen Jehova so Israel bilang sakey a nasyon. Siansia, pinekderan na apostol: “Say pilalek na pusok tan say pikakasik ed Dios sikatoy nipaakar ed sikara, pian nilaban ira.” Iilaloan ton saray Judio bilang indibidual et nagamoran day suston pikakabat ed linawa na Dios, a mangitonton ed kilalaban da. (Roma 10:1, 2) Nagkalalo ni ed satan, ginetma nen Jehova so kilalaban parad saramay walad intiron mundo na katooan a mangagamil na pananisia, a singa nipanengneng ed Juan 3:16: “Ontanlay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” Say dondon bagat nen Jesus so angilukas ed dalan parad satan ya engranden kilalaban. Singa ed agew nen Noe tan ed arum niran agew na panangukom a tinmumbok, si Jehova so walaan na “maong a balita” a niproproklama, a mangipaimano’d dalan na kilalaban.​—Marcos 13:10, 19, 20.

8. Diad pangalig ed padron nen Pablo, siopa so panginanatnatan na tuan Kristianos na pampilpilalekan natan, tan panon?

⁸ Diad pangipanengneng na dilin pampilpilalek to ed namparan Judio tan Hentil, nampulong si Pablo ed amin a pankanawnawa. “Sineetan to a sinimbawa so saray Judios tan Griegos.” Imbaga to ed saray matatken na Efeso: “Anggapo so antokaman a pakapinabangan yo a pinaulyan ko ya impaliwawa ed sikayo tan imbangat ko ed sikayo a lapag, tan dia ed saray kaabungan. A pinatuak ed saray Judios tan saray Griegos so panpataoli ed Dios, tan say pananisia ed Katawan tayo a Jesu-Kristo.” (Gawa 18:4; 20:20, 21) Mipadpara, saray Tastasi nen Jehova natan so uusaren day inkasikara ed panpulong, aliwa lambengat ed saray mankuan a Kristiano noagta ed amin a totoo, anggan diad “kasampotan na dalin.”​—Gawa 1:8; 18:5.

Pangiyabawag ed “say ‘Salita’ na Pananisia”

9. (a) Anton nengneng na pananisia so ipapaseseg na Roma 10:8, 9? (b) Kapigan tan panon tayon iyabawag so pananisia tayo?

⁹ Nakakaukolan so magnayon a pananisia parad kilalaban. Diad impangaon ed Deuteronomio 30:14, indeklara nen Pablo: “‘Asingger ed sika so salita, ed sangim, tan ed pusom; salanti, say ‘salita’ na pananisia, ya ipulong tayo.” (Roma 10:8) Legan ya ipupulong tayo itan a “‘salita’ na pananisia,” lalon ontatanek itan ed kapusoan tayo. Ontan a tuloy ed si Pablo, tan saray ontumbok a salita to so mamaseseg ed determinasyon tayon magmaliw a singa sikato diad panginabang ed arum na satan a pananisia: “No dia ed sangim ipatuam si Jesus a sikato so Katawan, tan sisiaen mo ed pusom a say Dios pinabangon to ed saray inatey, nilaban ka.” (Roma 10:9) Aglambengat iya pinaneknekan ed imaton na arum diad panaon na bautismo noagta satan so nepeg a mantultuloy ya iyabawag, maseseg a publikon panamintuan nipaakar ed amin ya engranden nengneng na katuaan. Saratan a katuaan so mangisesentro ed kablian na ngaran na Soberanon Katawan a Jehova; na mesianikon Ari tan Mananondon tayo, say Katawan a Jesu-Kristo; tan ed makapakelaw iran sipan na Panarian.

10. Mitunosan ed Roma 10:10, 11, panon so nepeg tayon pamenben ed sayan “‘salita’ na pananisia”?

¹⁰ Anggapo so kilalaban ed siopaman ya agto awaten tan iyaplika iyan “‘salita’ na pananisia,” a singa ed sinalambit ni na apostol: “Ta say too sisiaen to ed puso to so katunongan; tan say sangi so manggawa na panangipatua na onkana ed kilalaban. Ta say Sulat kuanto: ‘Siopaman a manisia ed sikato, ag-ira nabaingan.’” (Roma 10:10, 11) Nepeg tayon nagamoran so suston pikakabat ed sayan “‘salita’ na pananisia” tan mantultuloy a bayuboan itan ed kapusoan tayo ta pian napakiwas itayon ibaga itan ed arum. Papanonotan itayon mismo nen Jesus: “Siopaman a mangibaing ed siak tan saray salitak dia ed sayan mikakalugoran tan makasalanan a kailalakan, say Anak na too sikato met so ibaing to naani, sano onla ed gloria nen Ama to pati saray masanton angheles.”​—Marcos 8:38.

11. Kaunongan kalaknab so nepeg a kiproklama na maong a balita, tan akin?

¹¹ Singa impasakbay la na propetan Daniel, diad sayan panaon na anggaan, “saray makabat” so naiimanon onsisinag a “singa sinag na tawen,” legan a say panagtasi ed Panarian so ninanatnat ed kasampotan na say dalin. Sikaray “mangipawil na dakerakel ed inkatunong,” tan say tuan pikakabat so talagan ondaraak, ta si Jehova so mangisisindag na masnag a liwawa ed saray propesiyan nipaakar ed sayan panaon na anggaan. (Daniel 12:3, 4) Nia so sakey a mensahe na kilalaban a makana ed kililiktar na amin na saramay manangaro na katuaan tan inkatunong.

12. Panon a say Roma 10:12 et mikasakey ed samay niganggan ed anghel ya adeskribe ed Apocalipsis 14:6?

¹² Intuloy nen apostol Pablo: “Anggapo so nandumaan na Judio tan Griego, ta say dili a Katawan so Katawan na ganagana, tan mayaman ed ganagana ya ontawag ed sikato.” (Roma 10:12) Say “maong a balita” so nepeg a nipulong natan tan ed lalon malalaknab ya englobon sukat​—ed amin a totoo, angga ed saray kasampotan na dalin. Say anghel ya asalambit ed Apocalipsis 14:6 so tuloytuloy ya ontetekkiab ed kapegleyay tawen, a mangimamatalek ed sikatayo na “andi-angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley.” Panon iyan mangungguna ed saramay onkiwas?

Itatawag ed Ngaran nen Jehova

13. (a) Anto so tinaon a teksto tayo parad 1998? (b) Akin a say tinaon a teksto tayo et matukotukoy a tuloy natan?

¹³ Diad impangaon ed Joel 2:32, iyaabawag nen Pablo: “Amin ya ontawag ed ngaran nen Jehova so nilaban.” (Roma 10:13, NW) Agaylan matukoy a saratan a salita so apili bilang tinaon a teksto na Tastasi nen Jehova parad 1998! Agni agawaan a balot ya ontanlan kaimportanti ya onabanti tekep na panagmatalek ed si Jehova, ya ipakabat so ngaran to tan saray engranden gagalan tatalindegan na saratan! Singa ed inmunan siglo, ontan met ed kaunoran iran agew na sayan peles a mauges a sistema na bengabengatla, say panangipaknol lamet so nipapaway: “Ilaban yo so inkasikayo ed sayan pikewet a kapolian.” (Gawa 2:40) Satan so singa intrumpetan imbitasyon parad amin a matakot ed Dios a totoo ed sankamundoan ya ontawag ed si Jehova pian mangipagamor na kilalaban ed sikara tan ed saraman met so ontalineng ed mapublikon deklarasyon na maong a balita.​—1 Timoteo 4:16.

14. Dinan a Dampay so nepeg a tawagan tayo parad kilalaban?

¹⁴ Anto so nagawa sano say baleg ya agew nen Jehova so ombetag ed sayan dalin? Maslak so agmanilalo ed si Jehova parad kilalaban. Say katooan ed inkalapagan et “kuanda ed saray palandey tan saray batobato: ‘Pelag kayo ed sikami, tan yamot yo kami ed lupa na Samay wala a manyurong ed trono, tan dia ed sanok na Kordero.’” (Apocalipsis 6:15, 16) Say panilaloan da et saray singa-palandey ya organisasyon tan institusyon na sayan sistema na bengabengatla. Balet, agaylan magmaong komon no sikaray manmatalek ed sankabalgan a Dampay ed amin, si Jehova a Dios! (Deuteronomio 32:3, 4) Nipaakar ed sikato, oniay inkuan nen Arin David: “Si Jehova sikato so batondampay ko, tan salimbeng ko, tan Mangiliktar ed siak.” Si Jehova so “Batondampay na kilalaban tayo.” (Salmo 18:2; 95:1) Say ngaran to so “mabiskeg ya ilang,” say mogmon “ilang” a mabiskeg a tuloy a manalimbeng ed sikatayo diad isabi na krisis. (Uliran 18:10) Kanian, importanti a dakerakel komon no posibli ed ngalngali anemiran bilyon a totoon mabilay natan so kaukolan a nabangatan ya ontawag ed ngaran nen Jehova tekep na katooran tan inkasimoon.

15. Anto so ipapanengneng na Roma 10:14 no nipaakar ed pananisia?

¹⁵ Matukotukoy, intuloy ya intepet nen apostol Pablo: “Panon sirin so panawag da ed saman so agda sinisia?” (Roma 10:14) Karaklan so natulongan ni a mangayarian met ed “‘salita’ na pananisia,” ta pian ontawag ed si Jehova parad kilalaban. Say pananisia so importanti’d amin. Inkuan nen Pablo ed sakey nin sulat: “No anggapo so pananisia agnayarin paliketen [so Dios]; ta say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” (Hebreos 11:6) Balet, panon, a saray minilyon ni et makapanisia ed Dios? Diad sulat to ed saray taga-Roma, itetepet nen Pablo: “Panon so panisia ra ed agda nadngelan?” (Roma 10:14) Kasin mangitatarya si Jehova na paraan pian narengel da? Segseguradon on! Talinengen pay katuloyan na balikas nen Pablo: “Panon so pakadngel da no anggapo so manangipulong?”

16. Diad madibinon areglo, akin ya importanti iray managpulong?

¹⁶ Mabitar diad argumento nen Pablo a nakakaukolan iray managpulong. Impanengneng nen Jesus a magmaliw ya ontan, anggad “konklusyon na sistema na bengabengatla.” (Mateo 24:14; 28:18-20, NW) Say panagpulong so importantin kabiangan na madibinon areglo ed panulong ed totoo ya ontawag ed ngaran nen Jehova ta pian nilaban. Anggano diad Kakristianoan et anggapoy nagagawaan na karaklan ed pangigalang ed mablin ngaran na Dios. Dakel so nawewetwet kalamor nipaakar ed si Jehova ed duaran bibidbiren a naromog ed agnaisalaysay a dogman Trinidad. Ontan met, dakel so nikakategorya ed totoon asalambit ed Salmo 14:1 tan Sal 53:1: “Say andi-kalakal inkuanto ed puso to: ‘Anggapo so Dios.’” Kaukolan dan naamtaan a si Jehova so say mabilay a Dios, tan nepeg dan talosan ya amin so kabaliksan na ngaran to no sikaray nilaban ed paganigani lan baleg a kairapan.

Say ‘Karakpan na Salisali’ na Saray Managpulong

17. (a) Akin a matukoy parad si Pablo a mangaon ed panangipawil a propesiya? (b) Anto so sasaglawien na pakawalaan na ‘karakpan na salisali’?

¹⁷ Wala ni makanan tepet nen apostol Pablo: “Panon so panpulong da no ag-ira imbaki? Unong na nisulat: ‘Alay karakpan na saray sali na saray mangitarok na saray magayaga a balita na saray maong a bengatla!’” (Roma 10:15) Aaonen nen Pablo dia so Isaias 52:7, a kabiangay panangipawil a propesiya a niyaaplika nanlapulad 1919. Natan, maminsan lamet, ya ibabaki nen Jehova so “mangyakar na saray maong a balita, a mangibawag na deen, a mangyakar na saray maong a balita na kaabigan, a mangibawag na kilalaban.” Situtulok, say nilanaan na Dios a “manbabantay” tan saray kaiba ra so onkekelyaw tekep na gayaga. (Isaias 52:7, 8) Say kasalian na saramay mangiyaabawag na kilalaban natan so nayarin naksawan, marabok ni ingen, diad panaakar dan mankakabkaabungan, balet alay masnag na kalupaan da tekep na gayaga! Kabat da a sikaray igaganggan nen Jehova ya iproklama so maong a balita na kareenan tan ligliwaen iray inateyan, a tutulongan irayan ontawag ed ngaran nen Jehova tekep na ilalon kilalaban.

18. Anto so ibabaga na Roma 10:16-18 no nipaakar ed pinal a resulta na panangipaknol ed maong a balita?

¹⁸ Balanglan saray totoo et ‘manisia ed nadngelan da’ odino pilien day ag-itulok ed satan, saray salita nen Pablo so talagan tua: “Agda ta nadngel? On, peteg, ‘dia ed ami dalin pinmaway so tanol da, tan saray salita ra angga ed saray sampot na mundo.’” (Roma 10:16-18) No panon a “saray tawen ipaliwawa ra so gloria na Dios,” a singa nipanengneng ed kimey na saray pinalsa to, ontan met a saray Tastasi to ed dalin so nepeg a mangiproklama “na taon na pamalangkap nen Jehova, tan say agew na kababales na Dios tayo; a manligliwa ed amin a managogol.”​—Salmo 19:1-4; Isaias 61:2.

19. Anto so pansumpalan na saramay ‘ontatawag ed ngaran nen Jehova’ natan?

¹⁹ Lalon manasingger so baleg tan makapataktakot a tuloy ya agew nen Jehova. “Kawaen la so agew! Ta asingger la so agew nen Jehova, et onsabi naani a singa kabagbag a manlapu ed Makapanyarin-amin!” (Joel 1:15; 2:31) Pikasi mi a dakerakel ni so onkiwas tekep na inkaganatan ed maong a balita, ya ondagsa ed organisasyon nen Jehova. (Isaias 60:8; Habacuc 2:3) Nonoten a say arum niran agew nen Jehova so angitarok na kadederal ed saray marelmeng​—diad agew nen Noe, diad agew nen Lot, tan diad saray agew na apostatan Israel tan Juda. Manalalagey ti la natan ed tambib na sankabalgan a kairapan, sano yanepen na alimbusabos nen Jehova so karelmengan ed tapew na sayan dalin, a lilinisan so dalan parad sakey a paraiso na maandon kareenan. Sakey ka ta ed “ontawag ed ngaran nen Jehova” diad inkamatoor? No ontan, manggayaga! Walaan ka na dilin sipan na Dios a nisalba ka.​—Roma 10:13.

Panon Yon Ebatan?

◻ Antoran balon bengatla so niproklama kayari na Pentecostes 33 K.P.?

◻ Panon so nepeg a pangimano na Kristianos ed “say ‘salita’ na pananisia”?

◻ Anto so kabaliksan na ‘itawag ed ngaran nen Jehova’?

◻ Diad anton pantalos a saray mensahero na Panarian et walaan na ‘karakpan na salisali’?

[Saray litrato ed pahina 18]

Iyaabawag na totoo na Dios iray karlangan to diad Puerto Rico, Senegal, Peru, Papua New Guinea​—on, diad sankagloboan