‘Kasin say Pusom et Maptek ed Pusok?’

“Mila ka ed siak, tan nengnengen mo so seseg ko nipaakar ed Jehova.”​—2 ARARI 10:16.

1, 2. (a) Panon a say relihyoson situasyon na Israel so inmuges lan inmuges? (b) Nen 905 K.K.P., antoran dramatikon pananguman so paganigani lan nagawa ed Israel?

SAY taon 905 K.K.P. so sakey a panaon na baleg a pananguman ed Israel. Ngalngali 100 taon ed akadkauna, pinaldua nen Jehova so nankasakey a panarian na Israel lapud impan-apostasya nen Solomon. (1 Arari 11:9-13) Say mamaabalaten a panarian, say Juda, so inuleyan ed saman na anak nen Solomon a Rehoboam bangbalet say mamaamianen a panarian, say Israel, so nisilong ed si Arin Jeroboam, sakey ya Efraimita. Makapaermen, say inggapo na mamaamianen a panarian so makaderal la. Aglabay nen Jeroboam a saray uuleyan to et manbiahen mamaarap ed mamaabalaten a panarian pian mandayew diad templo, diad takot ton ompan sikaray ompawil ed abung nen David. Kanian sikatoy angiletneg na panagdayew ed kilaw a baka diad Israel diad ontan et nigapo toy padron na panagtalintao a medyo nambayag ed intiron awaran na mamaamianen a panarian.​—1 Arari 12:26-33.

² Linmoor so kipapasen sanen si Ahab, ya anak nen Omri, so nagmaliw ya ari. Say sankailin akulaw to, si Jezebel et inyalibansa toy panagdayew ed Baal tan pinapatey toray propeta nen Jehova. Anggaman ed diritsaan ya impamasakbay nen propeta Elias, anggapoy ginawa nen Ahab pian sikatoy patundaen. Balet, nen 905 K.K.P., si Ahab so inatey, tan si Joram, say ilalak to, so nanuley. Natan la so panaon a linisan so dalin. Say kasublayan nen Elias, si Eliseo, so angipaamta ed komandanti na militar, si Jehu, a sikatoy lanaan nen Jehova a magmaliw ya ontumbok ya ari na Israel. Say komisyon to? Pian kabilen so makasalanan a sankaabungan nen Ahab tan ibales so dala na saray propetan pinaagos nen Jezebel!​—2 Arari 9:1-10.

3, 4. Panon ya impanengneng nen Jehonadab a say puso to et ‘maptek ed puso nen Jehu’?

³ Diad intulok ed ganggan na Dios, impapatey nen Jehu so marelmeng a Jezebel, tan kayari et inggapo to so impanlinis ed Israel diad impangabil ed sankaabungan nen Ahab. (2 Arari 9:15–​10:14, 17) Insan sikato so akiabetan ed sakey a sumusuporta. “Naabot to si Jonadab ya anak nen Rekab ya onla a mangabet ed sikato; et sikato so inggalang to, tan inkuanto ed sikato: ‘Say pusom sikato so maptek, singa say pusok maptek ed pusom?’ Et si Jonadab inkuanto: ‘Sikato so maptek.’ ‘No sikato so maptek, iderew mo ed siak so limam.’ Et inderew to ed sikato so lima to; et sikato so inlason to ed sikato ed luganan. Et inkuanto: ‘Mila ka ed siak, tan nengnengen mo so seseg ko nipaakar ed Jehova.’ Dia ed ontan sikato so pinalugan da ed luganan to.”​—2 Arari 10:15, 16.

⁴ Si Jehonadab (odino, Jonadab) so aliwan Israelita. Anggaman kuan, mitunosan ed say ngaran to (kabaliksan toy “Mabulos Si Jehova,” “Si Jehova so Matalonggaring,” odino “Si Jehova so Mabunlok”) sikato so sakey a managdayew nen Jehova. (Jeremias 35:6) Maseguro, sikato so walaan na nikaduman interes diad impakaimano ed “seseg [nen Jehu] nipaakar ed Jehova.” Panon tayon amta? Bueno, say impiabet to ed alanaan ya ari na Israel so agnibanbana. Si Jehonadab so “onla a mangabet ed sikato,” tan saya so nagawa ed panaon sanen pinapatey la nen Jehu si Jezebel tan arum ni ed sankaabungan nen Ahab. Amta nen Jehonadab no antoy nagagawa sanen inawat to so imbitasyon nen Jehu ya onlason ed karwahe to. Andi-lingon akidapag ed si Jehu​—tan ed kinen Jehova​—ed sayan balingaan ed baetan na palso tan tuan panagdayew.

Modernon-Agew a Jehu tan Modernon-Agew a Jehonadab

5. (a) Antoran pananguman so asingger lan nagawa ed amin a katooan? (b) Siopa so Babaleg a Jehu, tan siopa so mangilalaman ed sikato ed dalin?

⁵ Natan, agmanbayag et pirmin manguman so bengabengatla parad amin a katooan a singa agawa ed Israel nen 905 K.K.P. Asingger la natan so panaon sano linisan nen Jehova so dalin ed amin a mauges a resulta na impluensia nen Satanas, pati lay palson relihyon. Siopa ta so modernon-agew a Jehu? Anggapoy arum noagta si Jesu-Kristo, ya angipaarapan ed saray mapropetikon balikas: “Ibalkes mo so ayuram ed awak mo, O sankamakapanyarian, a pati gloriam tan kabelatan mo. Tan dia ed kabelatan mo mabulaslas ka ya onsangat, nisengeg ed katuaan tan kauyamoan tan inkatunong.” (Salmo 45:3, 4) Nilalaman si Jesus ed dalin na say “Israel na Dios,” alanaan a Kristianos “a sikara so manguunor ed ganggan na Dios, tan wala ed sikara so impantasi nen Jesus.” (Galacia 6:16; Apocalipsis 12:17) Nanlapulad 1922 sarayan alanaan ya agagi nen Jesus so andi takot ya angipasakbay ed onsasabi iran gawa na panangukom nen Jehova.​—Isaias 61:1, 2; Apocalipsis 8:7–​9:21; 16:2-21.

6. Siopa so nanlalapud nasyones a manuporta ed saray alanaan a Kristiano, tan panon dan linmoob ed karwahe, a singa panangibaga, nen Babaleg a Jehu?

⁶ Agbukbokor na saray alanaan a Kristiano. No panon a si Jehonadab et pinmaway pian miabet ed si Jehu, dakel so nanlalapud nasyones a manuporta ed si Jesus, say Babaleg a Jehu, tan ed saray manangilaman to ed dalin diad talindeg da parad tuan panagdayew. (Zacarias 8:23) Tinawag nen Jesus ya “arum a karnero” to, nen 1932 et sikaray abidbir bilang say modernon-agew a kasimbangan na kadaanan a Jehonadab tan naimbitaan ya ‘onlason ed luganan’ na modernon-agew a Jehu. (Juan 10:16) Panon? Diad ‘pangunor ed saray ganggan na Dios’ tan miulop ed saray alanaan diad ‘pantasi ra ed si Jesus.’ Diad modernon panaon, laktipen na saya so panangipulong na maong a balita na niletneg a Panarian na Dios ed silong nen Jesus bilang say Ari. (Marcos 13:10) Nen 1935 sarayan “Jonadab” so nipaamta bilang say “baleg ya ulop” ed Apocalipsis 7:9-17.

7. Panon a nipapanengneng na Kristianos natan a ‘siansian maptek so puso ra’ ed puso nen Jesus?

⁷ Nanlapulad dekada na 1930, say baleg ya ulop tan say alanaan ya agagi ra so sipapakpel ya amaneknek ed suporta ra ed tuan panagdayew. Diad pigaran daldalin diad Mamabukig tan Mamasagur a Europa, say Arawin Bukig, tan Aprika, dakel ed sikara so inatey lapud pananisia ra. (Lucas 9:23, 24) Diad arum a daldalin, sikaray nipriso, nilusob, odino andi et pinasegsegang. (2 Timoteo 3:12) Agaylan rekord na pananisia so agawaan da! Tan say 1997 a Report ed Serbisyon Taon so mangipapanengneng a siansian sikaray determinadon manlingkor ed Dios, anggan antoy pansumpalan. ‘Siansian maptek so puso’ ra ed puso nen Jesus. Saya so nidemostra legan na 1997, sanen 5,599,931 a manangipalapag na Panarian, amin da lawari so “Jonadab,” so angusar na dagup na 1,179,735,841 oras ed kimey na pantasi nipaakar ed si Jesus.

Siansian Manpupulong Tekep na Seseg

8. Panon ya ipapanengneng na Tastasi nen Jehova so seseg da parad tuan panagdayew?

⁸ Si Jehu so kabkabat ed maples a panagpabatik na karwahe—ya ebidensiay seseg to ed panumpal na kimey to. (2 Arari 9:20) Si Jesus, say Babaleg a Jehu, so nadedeskribe a ‘kinan’ tekep na seseg. (Salmo 69:9) Agmakapasurprisa sirin, a saray tuan Kristiano natan so nabidbiran lapud seseg da. Balanglan walad kongregasyon tan ed publiko, ‘ipupulong da so salita; manseseet ira no panaon to; tan ed agto panaon.’ (2 Timoteo 4:2) Say seseg da so nagkalalo lan napatnagan legan na akadkaunan parti na 1997 kayarin apaseseg ira na sakey ya artikulo ed Ministeryo Tayo ed Panarian a dakel komon no posibli so mibiang ed panag-auxiliary payunir. Diad kada bansa et wala so niletneg a kalat parad auxiliary payunir a serbisyo. Anto so kiwas? Matalonggaring! Dakel a sanga so linmampas ed kalat. Inletneg na Ecuador so kalat a 4,000 balet nen Marso et angireport na 6,936 ya auxiliary pioneer. Inreport na Hapon so dagup na 104,215 legan na saraman a taloran bulan. Diad Zambia, a say kalat ditan et 6,000, 6,414 ya auxiliary pioneer so nanreport nen Marso; 6,532 nen Abril; tan 7,695 nen Mayo. Diad sankagloboan, say nantekep a pantok na saray auxiliary tan regular payunir et 1,110,251, sakey a 34.2 porsienton indaak nen 1996!

9. Niarum ni ed panagkabkaabungan, anto niran arum a dalan a naroromog na Tastasi nen Jehova so totoon pangibagaan nipaakar ed maong a balita?

⁹ Imbaga nen apostol Pablo ed mamatatken a taga-Efeso: “Ya anggapo so antokaman a pakapinabangan yo a pinaulyan ko ya impaliwawa ed sikayo tan imbangat ko ed sikayo a lapag, tan dia ed saray kaabungan.” (Gawa 20:20) Aaligen natan na Tastasi nen Jehova so alimbawa nen Pablo tan siseseseg dan ipupulong so maong a balita ed kabkaabungan. Balet, nayarin aliwan mainomay so pakaromog ed totoo ed kaabungan da. Kanian, papasesegen na “say matoor tan makabat ya aripen” iray manangipalapag na Panarian ya asinggeray totoo ed kawalaan na negosyo ra, diad saray lansangan, diad saray baybay, diad publiko iran parki​—inerman a pakaromogay totoo. (Mateo 24:45-47) Marakerakep iray resulta.

10, 11. Panon ya impanengneng na saray manangipalapag ed duaran bansa so maabig a panangiyuna ed pananap ed saray interesado a gendagendat ya agnakatongtong ed kaabungan da?

¹⁰ Diad Copenhagen, Denmark, sakey a melag a grupo na saray manangipalapag so manpupulong ed saray lansangan a paway na istasyon na tren. Manlapud Enero ya anggad Hunyo, sikaray akapangipalima na 4,733 a magasin, akapitongtong ed dakel a totoo, tan nanggawa na dakel a panagpawil. Pigaran manangipalapag ed satan a dalin so akapangigapo na saray rota na magasin ed saray kawalaan na negosyo. Sakey a baley so walaan na baleg a tinda kada Biernes, a nilibo so ombibisita. Kanian inyarunsa na kongregasyon a walaan na regular a panagpulong ed agew na tinda. Diad sakey a lugar et saray eskuelaan so bibisitaen tekep na balkot na impormasyon a mankarga na saray palapagan a nagkalalo lan matukoy parad saray managbangat ed eskuelaan.

¹¹ Diad Hawaii met agawa iray sagpot a sabien iramay agnaromog ed kaabungan da. Saray espisyal a teritorya et laktipen toy mapublikon paspasen (lansangan, parki, paradaan, tan tundaay bus), abenida, shopping centers tan airports, panagpulong ed telepono, publikon luluganan (panpulong ed saray bus), tan diad saray sular na kolehyo. Seseguroen na saray kongregasyon a say dugan bilang na Tastasi so niasain ed kada teritorya tan saramay inasain so nipasal a maong parad asainmin. Saray organisadon-maong iran pansasagpot a mipadpara ed saraya so nireport ed dakel a daldalin. Bilang resulta, nakakatongtong iray interesadon totoo ya agbalot anganko naromog diad panagkabkaabungan a ministeryo.

Italindeg a Malet

12, 13. (a) Anton taktika so inusar nen Satanas sumpad Tastasi nen Jehova legan na 1997? (b) Diad anton dalan a say palson propaganda et pinmuliktar ed sakey a bansa?

¹² Diad pigaran daldalin nen 1997, saray Tastasi nen Jehova so biktima na maruksa, palson propagandan inyalibansa tekep na mapatnag a gagalan pangala na legal ya aksion sumpad sikara. Balet ta tinmalindeg iran malet! (Salmo 112:7, 8) Anonotan day pikakasi na salmista: “Saray manbalegbalegan nanggawa ra na sakey a tila ya onsumpa ed siak: bangbalet unoren ko a siansia so bilibilin mo ed sankabukel a pusok.” (Salmo 119:69) Say ontan a matilan panangipalapag so ebidensia lambengat parad tuan Kristianos a nabusol a singa ed impropesiya nen Jesus. (Mateo 24:9) Tan no maminsan et ompupuliktar. Sakey a laki ed Belgium so akabasa na managpabanday ya artikulo nipaakar ed Tastasi nen Jehova na sakey a bantog a peryodiko ed inagew-agew. Abigla ed managpauges a balikas, inatendian to so sakey a miting ed Kingdom Hall diad tinmumbok a Simba. Impaiyaralan na Biblia ed Tastasi tan nantultuloy a binmulaslas. Dati et sayan laki so membro na sakey a pangkat. Say panagaral to ed Biblia so tinmulong ed sikaton itunos so kabibilay to ed Biblia, bengatlan naimano na totoo ed kaliber-liber to. Maseguro, say nansulat ed sayan managpauges ya artikulo et agto inisip a magmaliw ya ontan so resulta!

¹³ Arum a matuan-impanpuson totoo ed Belgium so sipraprangkan nansalita sumpad masilib a propaganda. Sakey ed sikara et say datin primo ministro ya angaksobi a pandinayewan toy nagagawaan na Tastasi nen Jehova. Tan insulat na sakey a deputado: “Misumlangan ed nipapatnag iran balikas a nisisirkula no maminsan, ag-ompatnag ed siak a [saray Tastasi nen Jehova] et pansengegay anggan samet a kasigensigenan na saray institusyon na Estado. Sikaray mibabaley a maaro’d kareenan, maptek, tan marespeto ed saray walad pakauley.” On, talagan makabat iray salita nen apostol Pedro: “Masimpit komon so tongtongan yo ed utel na saray bugkalot, pian dia ed panalabutob da ed sikayo a singa managgawa na mauges nitandoro ra so Dios ed agew na idalaw to, lapu ed saray maong a ginawgawa yo a naimatonan da.”​—1 Pedro 2:12.

Matalonggaring a Selebrasyon na Memoryal

14. Antoray pigaran makapasagsagyat a report ed saray inmatendi ed Memoryal nen 1997?

¹⁴ Matukoy a saramay mantatasi nipaakar ed si Jesus so kaukolan a moriaen day Memoryal na impatey to bilang makabkabaliksan ed taon da. Nen 1997, 14,322,226 so presenti nen Marso 23 pian selebraan so ebento. Satan so masudsulok na 1,400,000 ni nen say nen 1996. (Lucas 22:14-20) Diad dakel a daldalin say inmatendi ed Memoryal so mas dakdakel nen say bilang na manangipalapag na Panarian, mangipapanengneng na maabig a nailaloan ed arapen ya idaraak. Alimbawa, diad Haiti, asagmak na 1997 so sakey a pantok na 10,621 a manangipalapag, bangta 67,259 so inmatendi ed Memoryal. Nayarin tsiken yo so tinaon a report ed pahina 18 ya anggad 21 pian nanengneng no pigara niran bansa so walaan na mipadparan ataragey ya inmatendi no ikompara’d bilang na saray manangipalapag.

15. Diad arum a daldalin, panon ya atalonaan na agagi tayo iray seryoson problema ta pian naselebraay Memoryal?

¹⁵ Parad arum, say iyaatendi ed Memoryal so aliwan mainomay. Diad Albania wala so curfew ed ala-7:00 n.l. lapud gulo na sibilyan. Diad 115 ya angkekelag a grupo ed intiron bansa, ginmapo so Memoryal ed 5:45 n.n. Sinmelek so agew ed 6:08 n.l., a panandaan ed gapoan na Nisan 14. Nipaliber iray emblema ed ngalngali 6:15 n.l. Diad maslak a kaso et say unor a pikakasi so nibalikas ed 6:30 n.l., tan saramay inmatendi so nanapuran sinmempet sakbay na curfew. Siansia, say inmatendi ed Memoryal et 3,154 no ipareng ed pantok na manangipalapag a 1,090. Diad sakey a bansa ed Aprika, pinagmaliw na gulo na sibilyan a mairap so pakasabi’d Kingdom Hall, kanian deniside na duaran mamatatken a mantotongtong ed abung na onkomatlon matatken pian iyaregloy panselebra ed angkekelag a grupo. Ta pian nasabi so abung, say duaran mamatatken so kaukolan ya ombeltang ed sakey a kanal. Balet, wala so panlalaban ed saman a lugar, tan saray sniper so mamaltog ed siopaman ya ombeltang ed kanal. Binatibatik na sakey a matatken so kanal ya anggapoy agawa. Ombeltang so onkomaduan matatken sanen nadngel to so putok. Kinmebkeb ed dalin tan kinmurong pian makaliktar legan a mansasweng iray bala ed uloan to. Say impanmiting na mamatatken so matalona, tan saray pankaukolan na kongregasyon so naasikaso.

“Nanlapu ed Balang Nasyon tan Amin na Saray Kailalakan . . . tan Salita”

16. Panon a niyuuksoy na matoor tan makabat ya aripen so kilalaknab na maong a balita ed limog na saray grupo na angkelag a lenguahe?

¹⁶ Inkuan nen apostol Juan a say baleg ya ulop so ‘manlapu ed amin a nasyon tan kailalakan tan binaleybaley tan salita.’ (Apocalipsis 7:9) Kanian, inyuksoy na Mananguley ya Ulop so kiwala na literatura ed dakel niran lenguahe​—pati saramay sasalitaen na nisulinek iran grupo tan angkekelag a grupo na totoo. Alimbawa, diad Mozambique, say tract a Life in a Peaceful New World so nipaway ed limara nin lenguahe. Diad Nicaragua, say brosyur ya Enjoy Life on Earth Forever! so apawala ed lenguahen Miskito​—say sankaunaan a palapagan na Watch Tower Society ed satan a pansasalita. Dakel a Miskito ya Indian so angawat ed brosyur tekep na gayaga ed impakanengneng a walay walad dilin lenguahe ra. Nen 1997 inaprobaan na Sosyedad so literatura ed 25 kaaruman nin lenguahe tan angimprinta na masulok a sakey bilyon a magasin.

17. Anton grupo na lenguahe so atulongan ed Korea, tan panon a saray videotape et akaasistin maong ed sayan seksion na populasyon?

¹⁷ Diad Korea sananey nin grupo na lenguahe so atulongan. Asagmak na taon 1997 so inmunan kombension ed Korea ya insinyas a lenguahe. Walaray 15 insinyas a lenguahen kongregasyon ed Korea tekep na 543 a manangipalapag, balet 1,174 so inmatendi ed kombension, tan 21 so abautismoan. Pian natulongan iray telek a naiirapan ya ontalos ed insalita odino insulat a salita, papawalaen iray palapagan ed videotape ed 13 nanduruman insinyas a lenguahe. Diad ontan et saray telek so natutulongan a “manbasa” tan makaaral ni ingen ed maong a balita, awalaay maabig iran resulta. Diad Estados Unidos, dati et sabien toy ngalngali limay taon parad sakey a telek ya onaligwas anggad punto na panpabautismo. Natan, nisesengeg ed pigaran video a niwala la ed American Sign Language, parad arum ed saray telek, satan so abawasan la na sakey taon.

‘Pansiansia ed Karwahe’

18. Kayari impiabet ed si Jehonadab, anto so inggapon gawaen nen Jehu?

¹⁸ Nen 905 K.K.P., kayari impiulop nen Jehonadab, inggapo nen Jehu so paneral ed palson panagdayew. Angimbita ed amin a managdayew nen Baal: “Pasantosen yo so sakey a maulimek a dagup a nipaakar ed Baal.” Insan angibaki ed intiron dalin pian seguroen ya anggapon balot so atilak a managdayew nen Baal. Legan na idadagup na saray ulop ed baleg a templo na palson dios, sineguro nen Jehu ya anggapo so managdayew nen Jehova diman. Diad kaunoran et si Jehu tan saray armada to et pinapatey daray managdayew nen Baal. “Onia so impamagbag nen Jehu ed Baal ed Israel.”​—2 Arari 10:20-28.

19. Nisesengeg ed nagawa ed katooan ed arapen, anton awawey so kaukolan tayon ipanengneng, tan ed anton kimey so kaukolan tayon sigugunaet a pan-okupadoan?

¹⁹ Natan, say pinal a panangukom ed amin a palson relihyon so asingsingger la. Diad silong na anghelikon panangiwanwan, saray Kristiano so mangiproproklama ed maong a balita ed amin a katooan, papasesegen iran ontakot ed Dios tan pian ibiig day inkasikara manlapud palson relihyon. (Apocalipsis 14:6-8; 18:2, 4) Papasesegen iray mauyamo ya ipasakop day inkasikara ed Panarian na Dios diad silong na introno nen Jehova ya Ari, si Jesu-Kristo. (Apocalipsis 12:10) Diad sayan makapasagsagyat a panaon, nepeg ya agtayo aabuloyan a say seseg tayo so ombetel legan ya akatalindeg tayo a malet parad tuan panagdayew.

20. Anto so determinadon gawaen mo legan na 1998 a serbisyon taon?

²⁰ Aminsan, sanen walad baleg a pakadesdesan si Arin David, nampikasi: “Say pusok naapiger, O Dios, say pusok naapiger la: nankanta ak, on, tan mankanta ak na daydayew. Dia ed leet na katooan misalamatak, O Katawan.” (Salmo 57:7, 9) Komon ta sikatayo met so mansiansian malet. Legan na 1997 a serbisyon taon, anggaman ed dakel a problema, sakey a maksil a kelyaw na panangidayew so nipaatagey ed kigloriaan nen Jehova a Dios. Komon ta satan a mipadpara, babaleg ni ingen, a kelyaw so narengelan legan na kaplesan a serbisyon taon. Tan komon ta mantultuloy tayon idayew si Jehova anggaman ed panasali nen Satanas a dismayaen itayo odino sumpaen itayo. Diad ontan et nipanengneng tayo a say kapusoan tayo et mansiansian maptek ed puso na say Babaleg a Jehu, si Jesu-Kristo, tan onkiwas tayo tekep na intiron kamarerwa ed apuyanan a simbawan: “Manliket kayo ed Jehova tan manggayaga kayo a matunong; tan oneyag kayo nipaakar ed gayaga, amin yo a maptek ed puso.”​—Salmo 32:11.

Kasin Naisalaysay Yo?

◻ Antoran pananguman so agawa ed Israel nen 905 K.K.P.?

◻ Siopa so modernon-agew a Jehu, tan panon a nipapanengneng na say “baleg ya ulop” a say ‘puso ra et maptek’ ed puso to?

◻ Antoran estadistika manlapud tinaon a report so mangiyiilustra ed seseg ya impanengneng na Tastasi nen Jehova legan na 1997 a serbisyon taon?

◻ Antokaman a nayarin gawaen nen Satanas sumpad sikatayo, anton awawey so ipanengneng tayo ed 1998 a serbisyon taon?

[Tsart ed pahina 18-21]

1997 SERBISYON TAON A REPORT NA SARAY TASI NEN JEHOVA ED SANKAMUNDOAN

(Nengnengen so tomo)

[Litrato ed pahina 15]

Ipapanengneng na atagey a bilang na inmatendi ed Memoryal so maabig a nailaloan parad arapen ya ibubulaslas

[Litrato ed pahina 16]

Singa impanuporta nen Jehonadab ed si Jehu, ontan met so panusuporta na “baleg ya ulop” natan ed Babaleg a Jehu, si Jesu-Kristo, tan saray alanaan ya agagi to