Ginawa Ra so Linawa nen Jehova

Intandoro nen Elias so Tuan Dios

SIKATO so lakin pirmin aanapen diad Israel. Dawitdawit a sikatoy napapatey no sikatoy naromog na ari. Siopa iyan uusil-usilan a too? Say propeta nen Jehova a si Elias.

Si Arin Ahab tan say paganon asawa to, si Jezebel, so makasengeg ed insalindak na panagdayew ed Baal diad Israel. Bilang resulta, indapo nen Jehova so kelang ed dalin, a wala la’d komapat a taon to’d saman. Sinali nen asanokan a Jezebel ya ipapatey iray propeta nen Jehova, balet ta si Elias so nagkalalo lan aanapen nen Ahab. Si Elias imay angibaga ed si Ahab a masulok lan taloy taon so linmabas ya: “Anggapo naani linaew nisay uran ed saraya a taon, noag unong na salitak.” (1 Arari 17:1) Tan say nansumpal a kelang so siansian nantultuloy.

Diad onian delikadon situasyon, ingganggan nen Jehova si Elias ya: “Onla ka, ompatnag ka ed Ahab; et manbaki ak na uran ed dalin.” Anggaman pakarisgoan ton tuloy, tinulok nen Elias so ganggan nen Jehova.​—1 Arari 18:1, 2.

Nanarap so Duaran Mankalaban

“Sika, sika so managgonigon na Israel?” so intepet nen Ahab, diad impakanengneng to’d si Elias. “Agko ginonigon so Israel,” so makpel ya inyebat nen Elias, “balet sika tan say abung nen amam, dia ed impangikaindan yo ed saray ganggan nen Jehova, tan tinmumbo’ ka ed saray Baal.” Insan indirehi nen Elias so amin ya Israel a kaukolan a mandaragup ed Palandey Carmelo, pati “saray pomaparles nen Baal ya apat a lasus tan limamplo, tan saray pomaparles na Ashera ya apat a lasus.” Insan oniay imbaga nen Elias ed ulop: “Panon so kabayag yo ya onla a manpawilpawil ed saray mankadua a kanonotan?a No si Jehova sikato so Dios, ontumbok kayo ed sikato; balet no si Baal, sirin ontumbok kayo ed sikato.”​—1 Arari 18:17-21.

Agmakaskasel iray totoo. Anganko ta amoria ray kasalanan da diad insaew dan mangisaklang na nikabkabiig a debosyon ed si Jehova. (Exodo 20:4, 5) Odino nayarin kinmalyo laray konsiensia ra ya agda ipapasen a kasalanan a pankadduaey katooran da’d baetan nen Jehova tan si Baal. Dinanman ed satan, binilin nen Elias so totoo a mamawalay duaran kalakian a baka​—say sakey et parad saray propeta nen Baal tan say sakey et parad sikato. Parehon itadia iray baka parad bagat, balet ta agpaparlangan. “Tawagen yo so ngaran na dios yo,” so inkuan nen Elias, “tan tawagen ko so ngaran nen Jehova; et say Dios ya onebat ed panamegley na apuy, sikato so Dios.”​—1 Arari 18:23, 24.

Nitandoro si Jehova

Saray propeta nen Baal so ginmapon ‘manlukso ed asingger ed altar a ginawa ra.’ Sankabuasan iran nankulyaot: “O Baal, denglen mo kami!” Balet ta ag-inmebat si Baal. (1 Arari 18:26) Insan ira ginapoan nen Elias a kantiawan: “Onakis kayo na maksil; ta sikato so sakey a dios.” (1 Arari 18:27) Sinasalger ni ingen na saray propeta nen Baal so inkasikara panamegley na yoro tan solnit​—agamil a mabetbet a gagawaen na saray pagano pian liingen so panangasi na dirios da.b​—1 Arari 18:28.

Lampas lay kaagwan, tan saray managdayew nen Baal so nantultuloy a ‘nampaparles’​—sakey a balikas a diad sayan konteksto et mangipapasabi ed pantalos a pantultuloy ed katataranta tan kaandiay dilin-dangka. Nen onngangarem la, oniay inkuan la nen Elias ed amin a totoo: “Onasingger kayo ed siak.” Mapetepet a nambantay so amin legan ya iyaapiger nen Elias so altar nen Jehova, binanawangan toy liber na satan, tinetegteg so kalakian a baka, tan intapew itan ed altar a walaay pantungoan. Kayari to, say baka, say altar, tan say kiew so nileteb a maong na danum, tan say banawang so napnoy danum (andi-duaruwan danum na dayat ya inala manlapud Dayat Mediteraneo). Insan, nampikasi si Elias ed si Jehova: “Ipakabat mo ed saya ya agew a sika so Dios dia ed Israel, tan siak so aripen mo, tan ginawak so saraya ya amin a bengatla lapu ed salitam. Denglen moak, O Jehova, denglen moak pian saya a baley nakabatan to a sika, Jehova, sika so Dios, tan impanpataolim so puso ra.”​—1 Arari 18:29-37.

Bigbigla, pinmelag so apuy manlapud tawen “tan inupot to so bagat a poolan, tan say kiew, tan saray bato, tan say sapok, tan pinaekal to so danum a wala ed banawang.” Saray totoon manbabantay so tampol a dinmakmomo, a kuanda: “Si Jehova, sikato so Dios! Si Jehova, sikato so Dios!” Diad ganggan nen Elias, inerel iray propeta nen Baal tan inlasur da ra’d lawak na Cison, a ditan ira pinatey.​—1 Arari 18:38-40.

Leksion Parad Sikatayo

Nipanengneng nen Elias so singa labas nen say toon inkakpel. Ingen, ipapaseguro’d sikatayo nen Santiago a managsulat na Biblia a “si Elias sakey a too a nitalaga ed ontalan kairapan [walaan na saray liknaan, NW] a singa sikatayo.” (Santiago 5:17) Sikatoy agnipuera’d sakey a sukat na itakot tan kapagaan. Alimbawa, sanen insamba nen Jezebel ed saginonor ya ibales toy impamatey ed saray propeta nen Baal, binmatik si Elias tan insan inmey-ey ed si Jehova diad pikakasi: “Sarag la! natan, O Jehova, ekalen mo so bilay ko.”​—1 Arari 19:4.

Agpinakset nen Jehova so bilay nen Elias diad patey. Imbes, sikatoy mapangasin angitaryay tulong. (1 Arari 19:5-8) Napaseguroan iray aripen na Dios natan ya ontan met so gawaen nen Jehova sano nipaarap ira’d panaon na pirmin kapagaan, anganko lapud isusumpa. On, no ipikasi ray tulong nen Jehova, ikdan toray “sankatageyan ya inkabaleg na pakayari,” ta pian anggano sikaray ‘naeletan ed balang diking,’ et ag-ira “nairapan.” Diad ontan, natulongan iran mansungdo, a singa si Elias.​—2 Corinto 4:7, 8.

[Saray paimano ed leksab]