Panamabiskeg ed Pananisia Tayo ed Salita na Dios

MAS dakel a totoo so akabasa la’d Biblia nen say dinanman ya arum a libro. Balet kaunongan so mangipapanengneng na pananisia ed mensahe to? Isasalaysay a mismo na Biblia a say “pananisia so aliwan kayarian na amin a totoo.” (2 Tesalonica 3:2, NW) Malinew, ag-itayo nisipor a walaay pananisia. Nepeg a bayuboan itan. Anggan saramay walaan na sukat na pananisia so agnepeg a mangibaliwala ed satan. Say pananisia so nayarin onkapuy tan ompatey. Kanian, nakakaukolan so sagpot pian mansiansian “maksil ed pananisia.”​—Tito 2:2.

Sirin, tekep na maong a rason, say Mananguley ya Ulop na Tastasi nen Jehova so amili ed teman “Pananisia ed Salita na Dios” parad serye na 1997/98 iran distriton kombension da. Minilyon a Tastasi tan arum ni so apribilihyoan a mantitipon a mankakasakey pian pabiskegen so pananisia ra ed Salitay Dios.

Say Salita na Dios so Katuaan​—Say Basian na Pananisia Tayo

Saya so tema na unonan agew na kombension. Ginapoan itan diad impangomenda ed amin ya inmatendi. Say kiwawala ed kombension so paneknek na panagrespeto ed Biblia. Ingen, saray makatenyeg-kanonotan a tepet so nipaarap a mitukoyan ed kualidad na pananisia tayo: ‘Sarag tayo ta’n idepensa iray sisisiaen tayo, ya uusarey Salitay Dios a pinagka-autoridad? Kasin ipapanengneng tayoy apresasyon parad espiritual a tagano, ya agleglemewen so Biblia, saray miting ed kongregasyon, tan nibase’d-Biblia iran publikasyon? Kasin ombubulaslas itayo ed aro, suston pikakabat, tan pakatebek?’ Pinaseseg na espiker so amin ya ontalineng a maong, ya ipapaimanon “sayan ‘Pananisia ed Salita na Dios’ a Distriton Kombension so niparaan la pian ontulong ed sikatayon surien so inkasikatayo tan usisaen so kaaralem tan kualidad na pananisian kakayarianen tayo bilang indibidual.”

Say pinagkateman paliwawa so atituloan na ‘Panakar Diad Panamegley na Pananisia, Aliwan Diad Pakanengneng.’ (2 Corinto 5:7) “Say pananisia na saramay magmamaliw a Tastasi nen Jehova so aliwan basta pananisia labat,” so inkuan na espiker. Agaylan tua iya! Say puron pananisia so aliwan panbulagbulagan. Nibase itan ed saray inkapeteg. Ibabaga na Hebreos 11:1: “Say pananisia sikato so agpanduaruwa ed saray bengatla ya iilaloan, say panangipatnag ed saray bengatla ya agni anengneng.” Onia so inkuan na espiker: “No talagan manakar itayo diad pananisia, kaukolan tayoy niletneg a maong a pananisia.” Lapud manaakar itayo diad pananisia, aliwan diad pakanengneng, agtayo kaukolan iray detalye ed no panon tan no kapigan sumpalen nen Jehova so amin ya aspekto na gagala to. Say kabat tayo la nipaakar ed sikato et mangiiter ed sikatayo na sigpot a kompiyansa ed pakapanyari ton manumpal ed saray sipan to a simamaaro tan ed inkatunong.

Say paliwawan “Saray Kristianon Tobonbalo​—Makanan Kabiangan na Kongregasyon” so amanonot ed saray kalangweran ed no panon iran kamabli ed si Jehova. Sikaray apaseseg ya ombulaslas ed espiritual diad pangegemtan ed saray kalat a singa say pambasa ed intiron Biblia tan panangapet ed saray kakaukolanen parad dedikasyon tan bautismo. Say pangemtan na kaaruman ya edukasyon so personal a pamaakaran a kaukolan a desidien na atateng na sakey, balet no gawaen itan, say gagala so kaukolan a lawas pian nakinlongan a manlingkor ed Dios a lalon epektibo. Say sekular ya edukasyon so onkanan makagunggunan gagala sano ‘seseguroen tayoy mas importanti iran bengatla’ a mitunosan ed pananisia tayo.​—Filipos 1:9, 10, NW.

Insan sinmublay so simposium na taloran paliwawa ed teman “Siopan Estandarte so Uunoren Yo?” Say pananisia ed Salita na Dios so mamapakiwas ed sikatayon tumboken iray estandarte na Biblia. Uunoren na Kristianos iray ganggan tan prinsipyo nen Jehova. Singa bilang, papasesegen itayo na Kasulatan ya agmansalita na mabanday tan maabuson panagsalita. (Efeso 4:31, 32) Intepet na espiker: “Sano apasyodot odino apabarong, kasin abusadon ingalan moy asawam odino ananak mo?” Siempre, satan so agmakakristiano. Walaan met so Dios na saray estandarte nipaakar ed personal ya itsura tayo. Nepeg a mankawes iray Kristiano “na masimpit, a manparakep ira na mabinta.” (1 Timoteo 2:9, 10) Say salitan “mabinta” so mangipapasabi na kanonotan a dilin-respeto, liknaan na kagalangan, inkasimbang, tan inkamapalna. Papakiwasen itayo na aro parad arum tan igigiya na saray prinsipyo na Biblia tan diad liknaan ed no antoy matukoy.

Say tinmumbok a duaran paliwawa et laktipen toy bersikulo por bersikulon panangonsidera ed Hebreos 3:7-15 tan 4:1-16. Papasakbayan itayo na sarayan bersikulo na Biblia sumpad kapeligroan na pagmaliw a ‘manpaawet lapud panamalingo na kasalanan.’ (Hebreos 3:13) Panon itayon ontalona ed pibabakal tayo sumpad kasalanan? Tutulongan itayo nen Jehova panamegley na Salita to. On, “say salita na Dios sikatoy mabilay tan mabiskeg, tan . . . masiglat a mangibiig ed saray nonot tan saray getma na puso.”​—Hebreos 4:12.

Say unor a paliwawa ed unonan agew na kombension et “Sakey a Libro Parad Amin a Totoo.” Ipapabitar toy autentisidad, inkasusto, tan praktikal a kablian na Biblia. Agaylan makapalikliket so pakadngel ed impangiyanunsio na espiker ed kipaway na sakey a balon 32-pahinan brosyur ya atituloan na Libron Parad Amin a Totoo! Sayan balon publikasyon so imparaan nagkalautla parad totoo ya, anggaman edukado et samsamet so amta ra nipaakar ed Biblia. Sinampotan so paliwawa ed saray salitan: “Kaukolan ya usisaen na totoo so Salitay Dios. Matalek itayo a no sikaran mismo so unonan mangusisa, namoria da a sayan nikadkaduman libro, say Biblia, et peteg a libron parad amin a totoo!”

Aligen so “Manamayadyari na Pananisia Tayo”

Sayan tema na komaduan agew na kombension so angipaimano ed si Jesu-Kristo, say “Manamayadyari na pananisia tayo.” Kaukolan tayon ‘tumboken so bakat to.’ (Hebreos 12:2; 1 Pedro 2:21) Nikuan ed dakel a Kakristianoan: ‘Manisia ed Katawan a Jesus, tan nisalba kayo!’ Balet kasin pananisia labat? Ibabaga na Biblia a “say pananisia ya andi-gawa inatey.” (Santiago 2:26) Sirin, nilikud ed panisia ed si Jesus, nepeg tayon gawaen iray kimey a ginawa to, nagkalalo la diad panangipulong ed maong a balita na Panariay Dios.

Inyapasakey na programa ed kabuasan so panag-ebanghelyo. Singa si Pablo, nepeg tayon iyabawag so maong a balita na kilalaban. (Roma 1:14-16) Nampulong si Jesus ed totoo ed inerman a pasen. Anggaman say regular a panagkabkaabungan a ministeryo tayo et manreresulta, mas ondarakel so totoon andi’d ayaman sano ondadalaw itayo. (Gawa 20:20) Dakel so walad eskuelaan, mantratrabaho, mansasaliw, odino manbiabiahe. Kanian, kaukolan tayo met so manpulong ed saray publikon paspasen tan diad inerman a pakaromogan ed totoo.

Say paliwawan “Magmaliw a Nilamot tan Niletneg ed Katuaan” so angipanonot ed sikatayo ed baleg a bilang na saray balon babangatan a nababautismoan​—sakey a promedyo na masulok a 1,000 kada agew! Importantin nilamot a maong irayan balo ni tan niletneg ed pananisia. (Colosas 2:6, 7) Insalaysay na espiker a saray literal a lamot so manepsep na danum tan nutrina bangta mangi-angkla odino manusuporta met ed tanaman. Ontan met, diad panamegley na maong iran ugali ed panagaral tan mabunigas a pililimog, napabiskeg ed katuaan iray balon babangatan.

Sayan konseho so nagkalalo lan matukoy parad saray kandidato ed bautismo. On, diad komaduan agew na kombension, baleg a grupo na balon babangatan so abautismoan, a manutumbok ed uliran nen Jesus. Pinanonotan na paliwawan “Mangitonton ed Bautismo so Pananisia ed Salita na Dios” iray kandidato a say sigpot a kipalseb ed danum so matukoy ed simbolo na ipatey da ed datin dilin-panlabayan a kurang na bilay da. Say kiimwas da ed danum so mangirerepresinta ed pagmaliw dan mabilay a manggawa ed linaway Dios.

Say paliwawan “Impasyan Mibakal Parad Pananisia” so nibase’d libro na Biblia a Judas. Apaseseg itayon salimbengan so pananisia tayo diad panresisti ed makaderal iran impluensia, a singa say imoralidad, panagrebeldi, tan apostasya. Say sinmublay, saray atateng​—nagkalalo la’d kaamaan​—so akaawat na espisyal a paimano ed paliwawan “Taganoen so Sankaabungan Yo.” Makasulatan ya obligasyon so pangitarya na espiritual, pisikal, tan emosyonal iran pankaukolan na pamilya. (1 Timoteo 5:8) Mankakaukolan iya na panaon, pitatalosan, tan inkamaapit. Seguradon naliliketan si Jehova a Dios ed amin ya impasyan kimey a gagawaen na Kristianon atateng pian pabalegen so ananak da ed katuaan.

Say sinmublay a simposium, “Onla Itayo ed Abung nen Jehova,” so amabiskeg ed panangapresia ed saray Kristianon miting. Mangitatarya iratan na inawa manlapud saray kapagaan ed sayan mundo. Diad saray miting et walaan itayo na pankanawnawan manpapasesegan, tan nidemostra tayoy aro tayo’d saray kapananisiaan. (Hebreos 10:24, 25) Saray miting so ontulong met ed sikatayo pian napatarem so dunong tayo bilang managbangat, tan napaaralem so pakatalos tayo ed gagala na Dios. (Uliran 27:17) Agtayon balot komon isian so inkasikatayo manlapud kongregasyon, tan nonoten tayo sirin iray salita nen Jesus: “Ta no iner so kawalaan na duara ono talora a nantitipon nisengeg ed ngaran ko, siak wala ak ed nanleleetan da.”​—Mateo 18:20.

Say unor a paliwawa ed komaduan agew et “Say Kualidad na Pananisia Yo​—Nasusubok Natan.” Say pananisian ag-asubok so agnapaneknekan a mabalor, tan siansian ag-amta so kualidad to. Singa itan tseke ya agni nisalat. Talaga ta’n mabalor so kantidad ya akasulat ed satan? Mipadpara, say pananisia tayo so nepeg a nasubok pian napaneknekan a walaan itan na substansya tan tudtuan kualidad. (1 Pedro 1:6, 7) Inkuan na espiker: “Panapanaon, say news media ontan met ed saray autoridad so papalikdoen na saray klerigo tan apostata diad sititilan pangaakusa’d sikatayo, a papaugesen iray kristianon sisiaen tan kabibilay tayo. . . . Kasin abuloyan tayo iramay bubulagen nen Satanas a mamagyaw tan mamatalaw ed liknaan tayo pian ibaing so maong a balita? Paulyanan tayo ta iray katilaan nipaakar ed katuaan a mangapekta’d regular ya iyaatendi ed miting tan panagpulong tayo? Odino ontalindeg tayon malet tan magmaliw a makpel tan mas determinado nen say kapiganman ya itultuloy so pangiyabawag na katuaan nipaakar ed si Jehova tan say Panarian to?”

Manbilay Lapud Pananisia

Say tema na komatlon agew na kombension so nibase’d saray salita nen Pablo: “Balet maliwawa ya anggapo so napatunong ed arap na Dios lapud ganggan, ta, walan nisulat: ‘Say matunong manbilay ed pananisia.’” (Galacia 3:11) Say simposium a, “Saray Mapropetikon Salita nen Joel Parad Agew Tayo,” so sakey ed saray pabitar ed kabuasan. Ituturo na libron Joel so panaon tayo tan ibabaga to tekep na liknaan na inkaganatan: “Kawaen la so agew! Ta asingger la so agew nen Jehova, et onsabi naani a singa kabagbag a manlapu ed Makapanyarin-amin!” (Joel 1:15) Diad paraan a miulibay ed satan a matewet a duro-duron, saray alanaan a Kristiano so agmangiyaabuloy ed antokaman a mangamper ed kiproklama na Panarian diad sayan panaon na anggaan.

Say libro nen Joel so mangiiter met na ilalo, a kuanto: “Anggan siopa ya ontawag ed ngaran nen Jehova; nilaban naani.” (Joel 2:32) Kabaliksan na saya so nagkalalo nen say pangusar labat ed ngaran nen Jehova. Nakaukolan so impapuson panagbabawi, tan laktipen na saya so pangipulisay tayo ed gawan mauges. (Joel 2:12, 13) Anggapo lay panabala lapud magano lan ipaakseb nen Jehova so panangukom to ed saray nasyon, a singa ginawa to ed Moab, Ammon, tan ed mapalandey a rehyon na Seir ed saray agew nen Arin Josafat na Juda.​—2 Awaran 20:1-30; Joel 3:2, 12.

Amin so apaseseg ed paliwawan “Ipanengneng so Pananisia Diad Panalagar ed si Jehova.” Natan diad pandenden na anggaan, nayarian tayoy onnengneng ed apalabas diad inkasumpal na dakel a sipan nen Jehova, tan mapetepet itayon interesado ed saray bengatlan onsabi ni. Nepeg a mantultuloy a mananos iray totoo nen Jehova, a nodnonoten ya amin a bengatlan insipan na Dios et nagawa.​—Tito 2:13; 2 Pedro 3:9, 10.

Sinampotan so programa ed kabuasan na drama a “Pansiansiaen Yon Simpli so Mata Yo.” Sayan realistikon impangidrama so amaseseg ed sikatayon mangusisa ed awawey tayo’d materyal iran gegemtan. Inermay panaayaman tayo, no labay tayon bulos ed kapagaan so bilay tayo, nepeg tayon tumboken so konseho nen Jesus a pansiansiaen tayon simpli so mata tayo, a malinlinew ya akasentro ed Panarian na Dios.​—Mateo 6:22.

Say publikon paliwawa so walaan na makapainteres a titulo “Say Pananisia tan say Arapen Yo.” Angiter itan na prueba ed agpakasarag na atooan iran lider a manolbar ed saray problema na mundo. (Jeremias 10:23) Say awaran na too so nauulit-ulit​—diad babaleg tan mas makaderal a laknab. Panoy panmoria na Tastasi nen Jehova nipaakar ed arapen? Sisiaen tayo a say matoor a katooan so walaan na masnag ya arapen ed silong na Panarian na Dios. (Mateo 5:5) Sumpalen na Dios iray sipan to parad kagunggunaan na amin a walaan na pananisia ed Salita to, ya ipapaseseg ton: “Anapen yo si Jehova natan ta naromog yo ni; ontawag kayo ed sikato natan ta asingger ni.”​—Isaias 55:6.

Amalesa si Jesus na makanan tepet a walad kanonotan to so agew tayo. Intepet to: “Sano onla dia so Anak na too, makaromog kasi na pananisia ed dalin?” (Lucas 18:8) Nirepaso na unor a paliwawa so programa na kombension tan impanengneng to no panon itan ya angitarya na mabiskeg ya ebidensia a nagagawa so pananisia ed Salita na Dios, anggaman manbibilay itayo ed andiay pananisia tan materyalistikon mundo.

Siansia, nitepet tayo ed inkasikatayo bilang indibidual, ‘Sakey ak ta ed saramay walaan na agnagiing a pananisia ed Dios tan ed Salita to?’ Say “Pananisia ed Salita na Dios” a Distriton Kombension so kaukolan ya ontulong ed sikatayon onebat na on ed satan a tepet. Tan agaylan pisalsalamat tayo ed si Jehova ta pinabiskeg toy pananisia tayo ed sikato tan ed apuyanan a Salita to, say Biblia!

[Saray litrato ed pahina 24]

Dakel so masayaksak a namboluntaryo pian naasikaso so nilibon delegado

[Saray litrato ed pahina 25]

Impaway nen L. A. Swingle na Mananguley ya Ulop so balon brosyur

[Litrato ed pahina 25]

Nausar iray angkabaleg ya istadyum a singa saya ed sankamundoan

[Litrato ed pahina 26]

Dakel so abautismoan bilang simbolo na dedikasyon da ed si Jehova

[Saray litrato ed pahina 27]

Sigagayagan mangakansion iray kombensionista na saray kanta parad Panarian. Walad loob: say draman “Pansiansiaen Yon Simpli so Mata Yo”