Asingger lay Maglorian Kawayangan Parad Ananak na Dios

“Say pinalsa impauleyan ed kaapaan, . . . ed ilalo. Pian say pinalsa a dili niliktar ed inkaaripen na kabulokan ya onloob ed kawayangan na gloria na saray anak na Dios.”​—ROMA 8:20, 21.

1. Panon a niyanino so bagat nen Jesus ed Agew na Pananakbong?

INTER nen Jehova so bogbogtong ya Anak to bilang sakey a dondon bagat ya angilukas ed dalan na mangatatawen a bilay parad 144,000 a totoo tan magnayon a mangaraldalin iran iilaloan ed arum nin katooan. (1 Juan 2:1, 2) Singa naimano la ed akadkaunan artikulo, say bagat nen Jesus parad saray nailalak ed espiritun Kristiano so niyanino la sanen say atagey a saserdote na Israel so angibagat na baka bilang apay ed kasalanan parad inkasikato, parad sankaabungan to, tan ed tribu nen Levi ed tinaon ya Agew na Pananakbong. Diad satan met ya agew, sikatoy angibagat na sakey a kanding bilang apay ed kasalanan parad amin niran Israelita, no panon a say bagat nen Kristo so mangungguna met ed katooan diad inkalapagan. Say mabilay a kanding diad piguratibon paraan et mangaawit ed ami-amin a kasalanan na totoo ed apalabas a taon, a naandipat diad kalawakan.a​—Levitico 16:7-15, 20-22, 26.

2, 3. Anto so kabaliksan na balikas nen Pablo a nirekord ed Roma 8:20, 21?

² Kayari impangidatak ed ilalo na totoo a magmaliw a mangatatawen ya ‘ananak na Dios,’ inkuanen apostol Pablo: “Say maseseg a panpilalek na pinalsa aalagden to so kipatnag na saray anak na Dios. Ta say pinalsa impauleyan ed kaapaan, aliwan lapud panlabay to, noag say makalanor so anguley ed sikato, ed ilalo. Pian say pinalsa a dili niliktar ed inkaaripen na kabulokan ya onloob ed kawayangan na gloria na saray anak na Dios.” (Roma 8:14, 17, 19-21) Antoy kabaliksan na sayan balikas?

³ Sanen pinalsa so inmunan ateng tayon Adan bilang ayadyarin too, sikato so “anak [odino, ilalak] na Dios.” (Lucas 3:38) Lapud impankasalanan, sikatoy alanor ed “inkaaripen na kabulokan” tan impasa to iyan kipapasen ed atooan a rasa. (Roma 5:12) Inabuloyan na Dios so totoon nianak ed “kaapaan” a nipaarap ed sikara lapud atawir dan ag-inkayadyari, balet ta inikdan tora na ilalo diad panamegley na “bini,” si Jesu-Kristo. (Genesis 3:15; 22:18; Galacia 3:16) Ituturo na Apocalipsis 21:1-4 so panaon sano ‘anggapo la naani ipapatey, pannangis, dageyem, tan ot-ot.’ Lapud sipan iya ed ‘katooan,’ ipapaseguro to’d sikatayo a walay balon mangaraldalin a sosyedad na totoon manbilay a nisilong ed uley na Panarian a makaeksperiensia ira ed kipawil na nonot tan laman ed sigpot a bunigas tan andi-anggaan a bilay bilang mangaraldalin ya ‘ananak na Dios.’ Legan na Sanlibon Taon ya Uley nen Kristo, saray matulok a totoo so “niliktar ed inkaaripen na kabulokan.” Kayarin napaneknekan day katooran da ed si Jehova legan na kaunoran a subok, sikaray nibulos a maando manlapud atawir a kasalanan tan ipapatey. (Apocalipsis 20:7-10) Diad ontan et saramay walad dalin so “onloob ed kawayangan na gloria na saray anak na Dios.”

Ibabaga Ran “Gala!”

4. Anto so labay ya ibaga na “mangala ed danum na bilay ya andi bayar”?

⁴ Agaylan makapakelkelaw ya ilalo so nipaarap ed katooan! Agpankelawan a saray nailalak ed espiritun Kristianos a wala ni ed dalin so siseseseg a mangidadaulo’d pangibaga ra’d arum nipaakar ed satan! Bilang magmaliw a kabiangan na say “nobya” na niglorian Kordero, si Jesu-Kristo, saray alanaan a nakdaan so nalalanor ed kasumpalan na sarayan mapropetikon salita: “Saman so espiritu tan saman so nobya kuanda: ‘Gala!’ Tan say makadngel, kuanto komon: ‘Gala!’ Tan say napgaan, ondago; et say malabay, mangala ed danum na bilay ya andi bayar.” (Apocalipsis 21:2, 9; 22:1, 2, 17) Andi, saray gungguna na dondon bagat nen Jesus so agnigegetar ed saray 144,000 ya alanaan. Tuloy-tuloy so ikikiwas na espirituy Dios diad nakekeraan niran kabiangay nobyan klase ed dalin a mangibabagan “Gala.” Siopaman ya ondengel a napgaan parad inkatunong so iimbitaan a mangibagay “Gala,” a mangamor na daakan a probisyon nen Jehova parad kilalaban.

5. Sioparay panliketan na Tastasi nen Jehova a wala ed limog da?

⁵ Panisiaan na Tastasi nen Jehova so probisyon na Dios parad bilay diad panamegley nen Jesu-Kristo. (Gawa 4:12) Panliketan da ta wala ed limog da iray matuan impanpuso a mapilalek a mangamta ed saray gagala na Dios tan manumpal ed linawa to. Lukas iray Kingdom Hall da parad amin a mankaliktan ya ‘ondago tan mangala na danum na bilay ya andi bayar’ diad sayan “panaon na kasumpalan.”​—Daniel 12:4.

Saray Pananguman ed Ilalabas na Panaon

6. Panon a say espiritu nen Jehova so onkukurang ed ariripen nen Jehova ed nanduruman peryodoy panaon?

⁶ Wala so panaon na Dios pian sumpalen iray gagala to, tan mangaapekta iya ed pidedeneng to’d totoo. (Eclesiastes 3:1; Gawa 1:7) Anggaman say espiritu na Dios so niwala’d ariripen to ed sakbay na panaoy Kristiano, ag-ira nailalak bilang espiritual ya ananak to. Balet, ginmapo’d si Jesus, sinmabi lay panaon nen Jehova ya usaren so masanton espiritu pian manilalak na dedikadon lalaki tan bibii parad mangatatawen a tawir. Tan komusta ed agew tayo? Parehon espiritu so onkukurang ed “arum a karnero” nen Jesus, balet ta agmanasagyat itan ed sikara na ilalo tan pilalek parad mangatatawen a bilay. (Juan 10:16) Tekep na magnayon a bilay ed paraison dalin bilang inter-Dios ya ilalo ra, sigagayaga iran mitutulongan ed saray alanaan a nakdaan a mantasi legan na sayan panaon na pananguman manlapud daan a mundo a mamaarap ed matunong a balon mundo na Dios.​—2 Pedro 3:5-13.

7. Anton panag-ani so panpapagaan na saray Estudyante na Biblia, balet antoy amta ra nipaakar ed paraiso?

⁷ Ginapoan na Dios so “pangyakar na dakel ya anak ed gloria” diad inkikalbo na masanton espiritu nen Pentecostes 33 K.P., tan mapatnag ya angiletneg na panaon parad kakompleto na espiritual ya “Israel na Dios” a walaay dagup na 144,000. (Hebreos 2:10; Galacia 6:16; Apocalipsis 7:1-8) Nanlapulad 1879, say panag-anin mangilalanor ed alanaan a Kristianos so mabetbet a nasasalambit ed sayan magasin. Balet amta met na saray Estudyante na Biblia (natan et natatawag a Tastasi nen Jehova) a say Kasulatan so mangipaparungtal ed ilalon magnayon a bilay ed paraison dalin. Alimbawa, say Watch Tower a paway na Hulyo 1883 kuanto: “Sanen niletneg la nen Jesus so panarian to, dineral so kaugsan, tan arum nira, sayan dalin so magmaliw a paraiso, . . . tan amin a wala’d lubok da so niwala ditan. Tan diad pagmaliw a matulok ed saray ganggan to et sikaray makapambilay a maando ed satan.” Diad ilalabas na panaon, ondaraiset so panag-ani ed saray alanaan, tan kalkalnan naani iray sinansakey ya andian na mangatatawen ya ilalo ya onkamang ed organisasyon nen Jehova. Ambegya, pinagamoran na Dios iray alanaan ya ariripen to, nianak-lamet a Kristianos, na makatantandan aralem a pakatalos.​—Daniel 12:3; Filipos 2:15; Apocalipsis 14:15, 16.

8. Panon a say impakatalos ed mangaraldalin ya ilalo ed asasakbay na dekaday 1930 et atibukel?

⁸ Nagkalautla nanlapulad 1931 a saramay walaay mangaraldalin ya ilalo so mililimog ed Kristianon kongregasyon. Diad satan a taon, niliwawaan nen Jehova iray nakdaan na nailalak ed espiritun Kristiano a talosan a say Ezequiel kapitulo 9 so manutukoy ed sayan mangaraldalin a klase, a namamarkaan parad kililiktar ed balon mundo na Dios. Nibaga nen 1932 a saray ontan a kinmarnero so nilitrato la na kaiba nen Jehu a Jonadab (Jehonadab). (2 Arari 10:15-17) Nen 1934 et nipalinew a “saray Jonadab” so kaukolan ya “italaga,” odino idedika, day inkasikara ed Dios. Nen 1935 say “baleg a karaklan,” odino “baleg ya ulop”​—a datin inisip a segundaryon espiritual a klase a magmaliw a “kakaulop” na nobya nen Kristo ed tawen​—so abidbiran bilang arum a karneron walaan na mangaraldalin ya ilalo. (Apocalipsis 7:4-15; 21:2, 9; Salmo 45:14, 15) Tan nagkalalo la nanlapud 1935 saray alanaan et mangiyuuna ed pananap na saray maptek a totoon mamipirawat a manbilay a maando ed paraison dalin.

9. Kayari 1935, akin a tinmunda iray arum a Kristiano a mibiang ed saray emblema ed Pangdem na Katawan?

⁹ Kayari 1935, pigaran Kristianon akibiang la ed tinapay tan alak ed Pangdem na Katawan so tinmundan mibiang. Akin? Lapud amoria ran say ilalo ra et mangaraldalin, aliwan mangatatawen. Inkuan na sakey a biin abautismoan nen 1930: “Anggaman [say pibibiang] et nipasen a matukoy, nagkalalo la parad saray sigpot-panaon a ministro, agak balot kombinsido a walaan ak na mangatatawen ya ilalo. Insan, nen 1935, nipalinew ed sikami a wala so katipon na baleg ya ulop a walaay ilalon manbilay a maando ed dalin. Dakel ed sikami so aliketan a natalosan a kabiangan kami na satan a baleg ya ulop, tan tinmunda kami lan mibiang ed saray emblema.” Anggan saray Kristianon palapagan so angumay lugan da. Bangta diad saramay apalabas a taon et adesinyon manuna parad nailalak ed espiritun papatumbok nen Jesus, manlapud 1935 a manpatuloy say The Watchtower tan arum nin literatura na say ‘matoor ya aripen’ so mangitatarok na espiritual a taganon nitukoy ed saray pankaukolan na namparan alanaan tan ed kakaiba ra a walaay mangaraldalin ya ilalo.​—Mateo 24:45-47.

10. Panon a say agmatoor ya alanaan et nayarin nasalatan?

¹⁰ No bilang ta say sakey ya alanaan et nagmaliw ya agmatoor. Wala ta so kasalat to? Malaknab so impaningbat nen Pablo ed simbolikon kiew na olibo. (Roma 11:11-32) No say sakey a nailalak ed espiritu et kaukolan a salatan, maseguron iter na Dios so mangatatawen a tawag ed sakey a say pananisia to et napanalimbawaan ed panangisaklang na sagradon serbisyo ed sikato ed dakel lan taon.​—Ikompara so Lucas 22:28, 29; 1 Pedro 1:6, 7.

Dakel a Rason Parad Otang a Linawa

11. Antokaman so nengneng na ilalo tayo, antoy ipapaseguro ed sikatayo na Santiago 1:17?

¹¹ Inerman so panlingkoran tayo ed si Jehova diad inkamatoor, peneken toray pankaukolan tan maptek iran pilalek tayo. (Salmo 145:16; Lucas 1:67-74) Balanglan walaan itayo na puron mangatatawen ya ilalo odino say iilaloan tayo et mangaraldalin, dakel so mabiskeg a rason pian nawalaay otang a linawa ed Dios. Lawas ton gagawaen iray bengatla parad pankaabiganan a maong na saramay mangaaro’d sikato. Inkuanen babangatan a Santiago ya “amin a maong a palangkap tan amin ya ayadyarin palangkap manlapu ed tagey tan onleksab a manlapu ed Ama na saray liwawa,” si Jehova a Dios. (Santiago 1:17) Imanoen tayo paray pigara ed sarayan langkap tan bendision.

12. Akin a nibaga tayo a si Jehova et iikdan to so kada sakey ed matoor ya ariripen to na makapakelaw ya ilalo?

¹² Iikdan nen Jehova so kada sakey ed matoor ya ariripen to na makapakelaw ya ilalo. Tinawag to la so arum ed mangatatawen a bilay. Diad saray sakbay na Kristianon tastasi to, ya initer nen Jehova so matalonggaring ya ilalon kioli ed andi-anggaan a bilay ed dalin. Singa bilang, walaan si Abraham na pananisia ed kioli tan tinalaranan to so “baley a wala so semento to”​—say mangatatawen a Panarian a diad silong to et sikatoy napaoli ed mangaraldalin a bilay. (Hebreos 11:10, 17-19) Maminsan lamet, diad sayan panaon na anggaan, ipapagamor na Dios so ilalo na andi-anggaan a bilay ed paraison dalin. (Lucas 23:43; Juan 17:3) Maseguro, diad siopaman a pangiteran nen Jehova na ontan ya engranden ilalo so kaukolan a misalsalamat a tuloy ed satan.

13. Panon ya onkukurang so masanton espiritu na Dios ed totoo to?

¹³ Iiter nen Jehova so masanton espiritu to bilang langkap ed totoo to. Saray Kristianon naikdan na mangatatawen ya ilalo so alanaan na masanton espiritu. (1 Juan 2:20; 5:1-4, 18) Ingen, saray ariripen na Dios a walaan na mangaraldalin ya iilaloan so walaan met na tulong tan panangiwanwan na masanton espiritu. Sakey ed saraya et si Moises, ya awalaan na espiritu nen Jehova, a singa met ed 70 aturon lalakin mangasisti ed sikato. (Numeros 11:24, 25) Diad silong na impluensia na masanton espiritu, nanserbi si Besaleel bilang onsianon komikimey nipaakar ed tabernakulo na Israel. (Exodus 31:1-11) Dinmapo met so espiritu na Dios ed kien di Gideon, Jefte, Samson, David, Elias, Eliseo, tan arum nira. Anggaman sarayan sinansakey ed inmunan panaon so agbalot niyakar ed mangatatawen a gloria, sikaray inwanwan tan tinulongan na masanton espiritu, a singa met ed arum a karnero nen Jesus natan. Kanian, sirin, say pakawalaan na espiritu na Dios et agto kabaliksan a sikatayo et walaay mangatatawen a tawag. Anggaman ontan, mangiiter so espiritu nen Jehova na panangiderihe, tutulongan to itayon manpulong tan manumpal ed arum niran inter-Dios ya asainmin, mamapakayari ed sikatayo ed labas nen say normal, tan mamapawala ed sikatayo na saray bunga to a singa say aro, gayaga, deen, andukey a panagtepel, kaabigan, kamaongan, pananisia, kaumildian, tan dangka. (Juan 16:13; Gawa 1:8; 2 Corinto 4:7-10; Galacia 5:22, 23) Agta pisalsalamatan tayo iyan mabunlok a palangkap a manlalapud Dios?

14. Panon tayon nagunggunaan manlapud saray langkap na Dios a pikakabat tan kakabatan?

¹⁴ Say pikakabat tan kakabatan so saray langkap a manlalapud Dios a nepeg a pisalamatan tayo, balanglan say ilalo tayo et mangatatawen odino mangaraldalin. Say suston pikakabat nipaakar ed si Jehova so ontutulong ed sikatayo “pian nayarian . . . ya abobonan so bengatla ran sankaabigan” tan pian “mankurang . . . a makana ed Katawan ya onarap ed amin a makapaliket” ed sikato. (Filipos 1:9-11; Colosas 1:9, 10) Onkakanan proteksion so maridios a kakabatan tan pinagkagiya ed bilay. (Uliran 4:5-7; Eclesiastes 7:12) Say tuan pikakabat tan kakabatan so nibase’d Salitay Dios, tan say pigaran nakekeraan iran alanaan so nagkalalo lan nasasagyat ed ibabaga to nipaakar ed mangatatawen ya ilalo ra. Balet, say aro parad Salitay Dios tan maong a pakatalos ed satan et agto tibukeley dalan na Dios a pakapatnagan a sikatayoy atawag ed mangatatawen a bilay. Saray totoo a singa di Moises tan Daniel so nansulat ni ingen ed saray kabiangay Biblia, balet ta sikaray napaoli ed bilay diad dalin. Balanglan say ilalo tayo et mangatatawen odino mangaraldalin, amin tayo so makakaawat na espiritual a tagano ed panamegley na naabobonan nen Jehova a “matoor tan makabat ya aripen.” (Mateo 24:45-47) Agaylan pisalsalamat tayon amin lapud agamoran tayon pikakabat!

15. Anto so sakey ed sankabalgan iran langkap na Dios, tan panon so panmoria tayo ed satan?

¹⁵ Sakey ed sankabalgan iran langkap na Dios et say maaron probisyon a dondon bagat nen Jesus, a mangungguna ed sikatayo balanglan walaan itayo na mangatatawen ya iilaloan odino mangaraldalin ya ilalo. “[Ontanlay] impangaro na Dios ed mundo na katooan ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Tan say aro nen Jesus so amakiwas ed sikaton “iter toy bilay to a panondon ed amayamay.” (Mateo 20:28) Singa impaliwawa la nen apostol Juan, si Jesu-Kristo “so manamaandi kasalanan tayo [saraman so alanaan], tan aliwa lambengat ed saray kasalanan tayo, noag met kasalanan na lapag a mundo.” (1 Juan 2:1, 2) Kanian, amin tayo so kaukolan a walaan na aralem a pisalsalamat ed sayan maaron probisyon parad kilalaban ed magnayon a bilay.b

Presenti Ka Ta?

16. Anton importantin ebento so nodnonoten kaselek na agew no Abril 11, 1998, tan sioparay kaukolan a presenti?

¹⁶ Say otang a linawa parad dondon ya inter na Dios diad panamegley na Anak to so kaukolan a mamakiwas ed sikatayon presenti ed saray Kingdom Hall odino arum niran pasen a pantitiponan na Tastasi nen Jehova kaselek na agew no Abril 11, 1998, pian ngilinan so impatey nen Kristo. Sanen inggapo to iyan pakanodnonotan ed saray matoor ya apostol to ed kaunoran a labi na mangaraldalin a bilay to, inkuanen Jesus: “Gawa yo ya a pakanodnonotan ed siak.” (Lucas 22:19, 20; Mateo 26:26-30) Saray pigaran nakekeraan ya alanaan so mibiang ed andi-lebaduran tinapay, a mangirerepresinta na andiay-kasalanan ya atooan a laman nen Jesus, tan ed ag-alaokan ya ambalangan alak, a mangilalaman ed dala a niyibung bilang bagat. Saray nailalak ed espiritu a Kristiano so kaukolan a mibiang lapud sikara labat so kabiangan ed balon sipanan tan ed sipanan parad Panarian tan walaan na agniburin panamintuan na masanton espiritu na Dios a say kien da et mangatatawen ya ilalo. Minilyon nira so magmaliw a presenti bilang mapagalang a manag-imaton a misalsalamat ed aron impanengneng na Dios tan Kristo mitukoyan ed bagat nen Jesus a pinagmaliw ton posibli so magnayon a bilay.​—Roma 6:23.

17. Anto so kaukolan a tandaan tayo nipaakar ed kalanaan ed espiritu?

¹⁷ Saray apalabas a relihyoson panmoria, pirmin liknaan ed impatey na naandi-la’d bilay ya inadaro, ir-irap a nisisiglaot ed kabibilay ed inagew-agew, odino say liknaan ed pakaawat na sakey a nikaduman bendision a manlalapud si Jehova so nayarin mangitonton ed arum a sililingon mangipasen a parad sikaray mangatatawen a bilay. Balet kaukolan tayon tandaan ya amin ya ag-itayo igaganggan na Kasulatan a mibiang ed saray emblema ed Memoryal pian ipanengneng so otang a linawa tayo ed dondon bagat nen Kristo. Niarum ni, say kalanaan ed espiritu, so “aliwa a kien na manlabay, anggan say ombatik, noag say Dios,” Samay nanilalak ed si Jesus bilang espiritual ya Anak tan mangigloria labat ed 144,000 arum niran anak.​—Roma 9:16; Isaias 64:8.

18. Parad maslak ed saramay manlilingkor ed si Jehova natan, antoran bendision so wala ed arapen?

¹⁸ Say andi-anggaan a bilay ed paraison dalin so inter-Dios ya ilalo ed dakerakel a totoon manlilingkor ed si Jehova ed sarayan kaunoran ya agew. (2 Timoteo 3:1-5) Agmanbayag, napanggayagaan da iyan makapakelkelaw a paraiso. Diad satan et saray prinsipe so mangasikaso’d saray kurang ed dalin diad silong na mangatatawen ya uley. (Salmo 45:16) Niwala so mareen a kipapasen legan a tutumboken na saray manaayam ed dalin iray dalan nen Jehova. (Isaias 9:6, 7; Apocalipsis 20:12) Dakel iray kimey a gagawaen, pangipaalagey na kaabungan tan pamatulok ed dalin. (Isaias 65:17-25) Tan isipen pay maliket a pannenengnengan na pamilya legan a napaoli iray inaatey ed bilay! (Juan 5:28, 29) Kayari unor a subok, amin a karelmengan so naandi la. (Apocalipsis 20:7-10) Kayari diad maando, say dalin so napano na ayadyarin totoo a ‘niliktar ed inkaaripen na kabulokan ya onloob ed kawayangan na gloria na ananak na Dios.’

[Saray paimano ed leksab]

Panon Yon Ebatan?

◻ Anto so kabaliksan na “mangala ed danum na bilay ya andi bayar”?

◻ Balanglan sikatayo so walaan na mangatatawen odino mangaraldalin ya ilalo, antoray rason tayo a nawalaay otang a linawa ed Dios?

◻ Anton tinaon a selebrasyon so kaukolan ya atendian tayon amin?

◻ Parad maslak a totoo nen Jehova, anto so itatarya na arapen?

[Litrato ed pahina 18]

Minilyon so ginmapon ‘mangaala’d danum na bilay ya andi bayar.’ Sakey ka ta ed sikara?