Ginawa Ra so Linawa nen Jehova

Imbaki nen Jesus so 70 a Babangatan

OTONYO ed saman na 32 K.P. Anem bulan labat lay nakekeraan sakbay na ipatey nen Jesus. Kanian, ta pian napapeles so panagpulong tan ninatnat so pangipasal ed arum a papatumbok to, sikatoy anuro na 70 babangatan tan “imbaki tora a sanderwa ed arap to, ed amin a syudad tan pasen, a sikaton dili asingger la a laen to.”​—Lucas 10:1.a

Imbaki nen Jesus iray babangatan to ya ‘unona ed sikato’ ta pian makapandesidi lan tampol so totoo no kasin para ira ed odino sumpa ira ed Mesias sano onsabi ed saginonor si Jesus. Balet akin ya imbaki tora a “sanderwa”? Mapatnag, pian diad ontan et sikaray makapanpapasesegan sano nipaarap ed isusumpa.

Diad pangidadanet ed inkaganatan na panagpulong da, inkuanen Jesus ed papatumbok to: “Say anien peteg a daakan, ingen saray komikimey daiset. Pikasi yo sirin ed Katawan na anien, ta mangibaki komikimey ed anien to.” (Lucas 10:2) Say impangiyaliling ed ani et matukoy, ta antokaman a kaabala ed panagani so manresulta ed kaperdi na mabalor ya apit. Ontan met, no ibaliwala na saray babangatan so panagpulong ya asainmin da, naandi iray mablin bilay!​—Ezequiel 33:6.

Agnagirogiro Iran Ministro

Intultuloy nen Jesus nin binilin iray babangatan to: “Agkayo mangitarok na bulsa, anggan supot anggan sapin; et anggapo so too ya ibano [a lakapen, NW] yo ed dalan.” (Lucas 10:4) Kaugalian parad managbiahe a mangawit na aliwa lambengat a supot tan tagano noagta pati met lay ekstran paris na sandalyas, lapud napodpod iray dapan tan napultot iray bayet. Balet agkaukolan a panaburidoan na saray babangatan nen Jesus iratan a bengatla. Imbes, kaukolan iran manmatalek ya asikasoen ira nen Jehova diad panamegley na kapara ran Israelita, a diad sikara et kaugalian lay panagparawes.

Balet akin ya imbaga nen Jesus ya aglakapen ed pangibano so siopaman? Kasin magmaliw iran ambetebetel, agmangigalgalang ni ingen? Andin balot! Say Griegon salitan a·spaʹzo·mai, a kabaliksan toy lakapen ed pangibano et mankabaliksan na mas nen say magalang a “hello” odino “maabig ya agew.” Laktipen to met so kaugalian ya angob, lakap, tan mansumpal ed andukey a pantongtong sano makapanabet iray sankabat. Inkuan na sakey a komentarista: “Agkabiangan ed panangibano ed limog na saray taga-Bukig, a singa sikatayon taga-Sagur, so pangituek, odino pipasamano, noagta gawaen diad panamegley na dakel a lakap, tan itatalimukor, tan panagdakmomo ni ingen ed dalin. Amin na saya et kakaukolanen toy baleg a panaon.” (Ikompara so 2 Arari 4:29.) Diad ontan, tinulongan nen Jesus iray patumbok ton paliisay agnakakaukolan, anggaman kaugalian, iran pakaabalaan.

Diad kaunoran, imbaga nen Jesus ed saray babangatan to a sano onloob ira ed abung tan naabrasa, kaukolan iran “[mansiansia, NW] ed saman ya abung, a mangan tan oninum na bengabengatla ya iter da.” Balet no onloob ira’d sakey a syudad tan agnaabrasa, kaukolan ya “ompaway kayo ed saray pulong, et kuan yo, ‘Anggan say dabok na syudad yo, a pinmeket ed saray sali mi, pokpokan mi sumpa ed sikayo.’” (Lucas 10:7, 10, 11) Say panpokpok odino pangipagpag ed dabok na sali so mangipatnag a saray babangatan so mareereen ya ontaynan ed ag-angawat ya abung odino syudad ya anggad nagawa iray bengatlan manlapud Dios. Balet saraman so angawat ed saray babangatan nen Jesus tekep na kaabigan et indasig day inkasikara parad saray bendision. Imbaga nen Jesus ed apostoles to diad sananey ya okasyon: “Say mangawat ed sikayo, awaten toak, tan say mangawat ed siak awaten to so angibaki ed siak. Tan siopaman a mamainum naani ed sakey ed sarayan angkekelankit ya ugugaw na sanbaso lambengat a danum ya ambetel, ed ngaran na sakey a babangatan, tua kuanko’d sikayo, ya agto naani nabalang so tumang to.”​—Mateo 10:40, 42.

Leksion Parad Sikatayo

Say komisyon ya ipulong so maong a balita na Panariay Dios tan panggaway babangatan et gagawaen la natan na masulok a 5,000,000 a Tastasi nen Jehova ed sankamundoan. (Mateo 24:14; 28:19, 20) Momoriaen dan maganat so mensahe ra. Sirin, aanamoten dan maong so panaon da, papaliisan iray pakaabalaan a manebel ed sikara manlapud pangiter na sigpot ya imano ed importantin asainmin da.

Pambabanikelan na Tastasi nen Jehova so pagmaliw a makaaro ed amin a naabet da. Anggaman kuan, aglabat ira mitotongtong ya andi kana, nisay mibabali ira ed saray sangsangan ed sosyal iran isyu odino ed onsasaew iran gagala na sayan mundo pian peteken iray ag-inkahustisya. (Juan 17:16) Imbes, iyaapasakey day itotongtong da ed alenleneg a magnayon a solusyon ed saray problema na too​—say Panarian na Dios.

Kaslakan, naiimanon mankikimey a sankaparis iray Tastasi nen Jehova. Kasin baleg so nagawaan no balang sakey et mankimey a bukor? Anganko. Anggaman kuan, natebek na Kristianos natan so gungguna ed pikimeyan ed kaparan mananisia. Iiter toy magenap a proteksion sano manpupulong ed mapeligro iran lugar. Say pankimey a walay iba so mamasarag met ed saray balobalo ni pian nagunggunaan manlapud dunong na mas eksperiensiado iran manangipalapag na maong a balita. Petepeteg, namparan makatulong ed pakapanpapasesegan.​—Uliran 27:17.

Anggapoy duaruwa, say panagpulong so sankaganatan a kimey a nagagawa ed sarayan “kaunoran ya agew.” (2 Timoteo 3:1) Maliket iray Tastasi nen Jehova ta natutulongan na sankamundoan ya impanaagi a ditan et sikaray mankikimey a ‘mankakaiba a nipaakar ed pananisia ed ebanghelyo.’​—Filipos 1:27.

[Paimano ed leksab]