Misalsalamat ed Putel a Kristianon Tawir

UNONG ED SALAYSAY NEN GWEN GOOCH

Diad eskuelaan et kinansion koy himno tekep na saray salitan, ‘say Baleg a Jehova a nitrono ed gloria to.’ Mabetbet kon panumamengan no, ‘Siopa iyan Jehova?’

MATAKOT ed Dios so lakik tan baik. Kasakbayan na sayan siglo et akilimog lara’d saray Estudyante na Biblia, a singa tawag nensaman ed Tastasi nen Jehova. Maong a negosyante so tatay ko balet ta diad inmuna et agto impasa’d taloran anak to so Kristianon tawir a niyopresi’d sikato.

Dia lambengat ed impangiter nen Tatay ed sikami di kuyak, a Douglas, tan say agik a bii, si Anne, na saray bokletan apauloan na His Works tan Who Is God? so akaamtaan kon say ngaran na tuan Dios manaya et Jehova. (Salmo 83:18) Panlikliketan ko itan! Balet antoy amaliing ed interes nen Tatay?

Nen 1938, sanen anengneng ton akaparaan laray nasyon a mibakal, amoria nen Tatay a nagkalalo ni nen saray sagpot na too so kaukolan pian naresolbi iray problema ed mundo. Sikatoy inikdan nen baik na libron Enemies, ya impalapag na Tastasi nen Jehova. Diad impakabasa’d satan, naamtaan ton say peteg a kabusol na katooan et si Satanas a Diablo tan say Panarian na Dios labat so makapangitarok na kareenan ed mundo.a​—Daniel 2:44; 2 Corinto 4:4.

Anggaman manasingger so bakal, ginapoan na pamilya mi so miaral ed Kingdom Hall na Tastasi nen Jehova diad Wood Green, North London. Nen Hunyo 1939 linma kami’d kabangibang ya Alexandra Palace pian ondengel ed publikon paliwawan, “Government and Peace,” ya impaliwawa nen Joseph F. Rutherford, say presidenti ed saman na Watch Tower Society. Say paliwawa nen Rutherford ed Madison Square Garden diad New York City so nipasabi’d panamegley na radyo dia ed London tan ed arum nin manunan syudades. Malinlinew a narengel so paliwawa sanen ginirogiro na magulon pangkat ed New York, linmingaw ak pian nengnengen no kasin nagagawa itan ed auditoryum mi!

Say Seseg nen Tatay Parad Katuaay Biblia

Impilit nen Tatay a kada Sabadoy labi et sankapamilyaan kamin manaral na Biblia. Nisentro so panagaral mi ed tema na Biblia diad Say Panag-Bantayan a niyeskedyul a singbaten ed ontumbok ya agew. Pian niyilustray epekto na sarayan panagaral et anggad sayan agew say salaysay nipaakar ed si Josue tan say impangubkob ed syudad na Ai a siningbat ed The Watchtower na Mayo 1, 1939, so siansia nin malinew ed nonot ko. Ontanlay impanupapet ko’d satan a salaysay a sinurik ya amin so pakabasaan ed satan diad mismon Bibliak. Aromog kon makapainteres itan a panagsukimat​—tan angga ni’d natan.

Say pananginabang ed arum na naaaralan mi so angipaslep ed saray bangat na Biblia ed pusok. Sakey ya agew et inikdan ak nen tatay na ponograpo tekep na nirekord a sermon na Biblia, sakey a bokletan uusaren mi ed panagaral na Biblia, tan say address na sakey ya akulaw. Insan to kinerew ed siak a dalawen ko iman.

“Antoy ibagak ey, tan antoy gawaen ko?” so intepet ko.

“Wadtan lan amin,” so inyebat nen Tatay. “Basta ipatogtog mo, basam iray tepet, pabasam ed onabung iray ebat, insan basam iray kasulatan.”

Ginawak so imbaga to, tan diad onian paraan a naaralan koy mangikondukta na panagaral na Biblia. Diad ontan a panangusar ko na Kasulatan ed ministeryok et lalon atalosan ko iratan.

Angat ed Panaoy Bakal

Binmetag so Guerra Mundial II nen 1939, tan diad tinmumbok a taon et abautismoan ak bilang simboloy dedikasyon kon manserbi’d si Jehova. Siak so 13 labat. Denisidek ed saman so manpayunir, a singa tawag ed sigpot-panaon a ministros. Tinmunda ak a maneskuela nen 1941 tan diad kombension ed Leicester et akiulop ak ed si Douglas ed sigpot-panaon a panagpulong.

Diad tinmumbok a taon, nipriso si Tatay makasengeg ed relihyoson prinsipyo ya agto mibiang ed pibabakal. Inmayuda kamin ananak ed si nanay mi, a sikatoy tinulongan min mangasikaso’d abung mi legan na mairap a panaoy bakal. Insan, kayarin tuloy na inkibulos nen Tatay manlapud prisoan et atawag si Douglas a mansundalo. Say peryodiko diman et pakabasaay onian manunan balita, “No Akin a Pinili na Anak so Naprison Singa si Ama To.” Nansumpal iya ed maong a panagtasi, lapud pankanawnawa iyan mangipaliwawa no akin ya agmibibiang iray tuan Kristiano ed panamatey na kapara ran totoo.​—Juan 13:35; 1 Juan 3:10-12.

Legan na saratan a panaoy bakal, naynay ya ombisita’d abung mi so dakel a Tastasin walad sigpot-panaon a panagministro, tan saray makapabiskeg a nibase’d Biblian diskusyon da so nipaslep a tuloy ed sikami. Kaiba’d sarayan matoor a Kristianon agagi et di John Barr tan Albert Schroeder, a membro ira natan na Mananguley ya Ulop na Tastasi nen Jehova. Talagan maparawes iray atateng ko, tan imbangat da kamin magmaliw ya ontan met.​—Hebreos 13:2.

Akaparaan ya Onebat

Kayarin tuloy na inggapok a manpayunir, nabet koy Hilda ed kada-puertan ministeryo. Oniay mapasnok ton inkuan: “Mibabakal so masiken ko parad kagunggunaay totoon singa sikayo! Akin et anggapoy gagawaen yo nipaakar ed pibabakal?”

“Kaunongay antam nipaakar ed gagawaen ko?” so intepet ko. “Antam ta no akin a dinmalaw ak ed sika?”

“Bueno,” inyebat to, “onloob ka la ingen tan ibagam ed siak.”

Nipaliwawak ya itatarya tayoy tuan ilalo ed totoo a maniirap lapud makapataktakot iran nagagawa​—a mabetbet et diad ngaran na Dios. Maapresian dinmengel si Hilda, tan sikatoy nagmaliw ya inmuna-unan regular ya iyaaralan koy Biblia. Sikatoy aktibon Tasi anggan natan ed loob lay masulok a 55 taon.

Diad pansamposampot na bakal, akaawat ak na balon asainmin bilang payunir ed Dorchester, baley ed abalaten-sagur ya Inglatera. Pilpilimerok so manayam ed arawin pasen. Mantitipon so melag a kongregasyon mi diad sakey a restawran, sakey a koma-16 siglon bilding a tinawag na “The Old Tea House.” Kaukolan min umaney lira na saray lamisaan tan yurongan kada aral mi. Duma iya ed Kingdom Hall a nipasalan ko. Anggaman kuan, wala so parehon espiritual a tagano tan maaron panlilimog na Kristianon agagi.

Kamangta et inmalis so atateng ko diad Tunbridge Wells, abalaten na London. Sinmempet ak ta pian saniiba kamin makapanpayunir di Tatay tan Anne. Agnambayag et binmaleg so kongregasyon mi manlapud 12 ya anggad 70 Tastasi, kanian akerew ed pamilya mi ya onalis ed Brighton ed abalaten a baybay, a babaleg so pankaukolan na saray manangiproklama na Panarian. Dakel so maseseg ya akiulop ed panagpulong kaibay manpapayunir a pamilya mi, tan anengneng mi so mayaman ya impamendision nen Jehova ed kimey mi. Agnambayag et say sakey a kongregasyon et nagmaliw a talora!

Sakey ya Ag-iilaloan ya Imbitasyon

Diad tiagew na 1950, say pamilya mi so kaiba’d 850 delegadon manlapud Britanya ya inmatendi’d “Theocracy’s Increase International Assembly” diad Yankee Stadium ed New York City. Dakel a payunir ya onatendi’d satan a kombension a nanlapud arum a bansa so apawitan na aplikasyon ya onatendi ed Watchtower Bible School of Gilead, a walad South Lansing, New York. Kaiba kami di Douglas tan Anne ed saratan! Nanonotan koy momotekteken ko sanen impelag koy apirmaan lan aplikasyon ed buson, ‘Natan et talagan ginawak la itan! Anto la kasi arapey bilay ko?’ Ingen say determinasyon ko et: “Wadia ak! Ibaki moak.” (Isaias 6:8) Panlikliketan koy impakaawat na imbitasyon ya onatendi’d koma-16 a klase na Gilead, kaibay Douglas tan Anne. Amta min tuloy a nayarin nibaki kamin manmisioniro ed inerman a parti na mundo.

Kayari min apanggayagaay kombension a sankapamilyaan, asabi lay ipawil na atateng mi ed Inglatera​—a sikara labat. Sikamin talo ya ananak da so nanpayapay legan a pasempet laran akalugan ed bapor a Mauritania. Agaylan makapatenyeg itan a pansiasian!

Panmisioniro Iran Asainmin

Tugyopen na 120 estudyante so koma-16 a klase na Gilead a nanlapud amin a parti na mundo, a kaiba so pigaran nanirap ed panangipangawan iran kampo na Nazi. Lapud nibangat so Español ed klase mi, iilaloan mi so pakaasain ed bansan mansasalitay Español diad Abalaten ya Amerika. Isipen pay impakasurprisa mi ed agew na impangraduar sanen niasain si Douglas ed Hapon tan sikami nen Anne et diad Syria. Kanian sikamin bibii so nepeg a manaral na Arabe, tan nansiansian tua iya anggad sanen insalat ed asainmin mi so Lebanon. Legan min aalagaren iray visa mi, mamidua ed sakey simba so panbabangat nen George Shakashiri ed sikami na Arabe, say manag-typeset na Watch Tower Society parad Araben Panag-Bantayan.

Agaylan makapaliket so pakakar ed dalin ya asaglawi’d Biblia ya inaral mi ed klase! Si Keith tan Joyce Chew, Edna Stackhouse, Olive Turner, Doreen Warburton, tan Doris Wood so angiba’d sikami diman. Agaylan maliket a misioniron pamilya so impagmaliwan mi! Sakey a Tasin tagad’man so ombibisita ed panmisioniron ayaman mi pian nagkalalon natulongan kami nipaakar ed lenguahe. Legan na inagew-agew a peryodoy panaaral mi, ipasal mi so antikey a presentasyon, insan kayari to et ompaway kami pian usaren itan ed panagpulong mi.

Inusar mi so inmunan duaran taon mi ed Tripoli, a wala lay niletneg a kongregasyon. Tinmulong kami di Joyce, Edna, Olive, Doreen, Doris, tan Anne ed kaasawaan a bibii tan mamarikit na Tastasi diman a mibiang ed saray miting ontan met ed publikon ministeryo. Sakbay na saman et saray Kristianon agagi tayon lalaki tan bibii, diad panutumbok ed lokal a kustombre, so agmankaabay ed saray miting, tan matalag irayan Kristianon bibii a mibiang ed panagkabkaabungan. Kaukolan mi so tulong da ed lenguahen pampulong mi’d totoo, tan pinaseseg mi ran mibiang a mismo ed sayan kimey.

Insan sikami nen Anne so niasain ya ontulong ed melag a grupo na Tastasi ed kadaanan a syudad na Sidon. Agnambayag kayari to, akerew ed sikamin ompawil ed kabisera, a Beirut. Nitanem laray bukel na katuaan na Biblia ed limog na mansasalitay Armenyanon komunidad diman, kanian inaral mi itan a lenguahe pian natulongan ira.

Saray Panangumay Asainmin

Akabat koy Wilfred Gooch sakbay ak ya ontaynan ed Inglatera. Sikatoy maseseg, maempatiyan agi a nanlingkor ed London Bethel. Si Wilf so membro na koma-15 a klase na Gilead, a nangraduar kaleganay 1950 a kombension ed Yankee Stadium. Say panmisioniron asainmin to et diad sangan opisina na Watch Tower Society ed Nigeria, tan abayag kamin nansulatan. Nen 1955 et akaatendi kamin dua ed “Triumphant Kingdom” a kombension diad London, tan agnambayag et akapansipanan kami. Diad tinmumbok a taon, inkasal kami ed Ghana, tan akiulop ak la’d si Wilf diad panmisioniron asainmin to ed Lagos, Nigeria.

Nen tinaynan koy Anne ed Lebanon, sikatoy akapiasawa ed sakey a maong a Kristianon agi ya akaamtay katuaan na Biblia diad Jerusalem. Agla nayarian na atateng ko so mibansal lapud si Douglas, si Anne, tan siak et akapiasawa diad nanduruman parti na mundo. Siansia, kontento ra’d pakaamtan malikeliket kamin amin a manlilingkor ed Dios tayo, si Jehova.

Kimey ed Nigeria

Diad sangan opisina ed Lagos, niasain ak a tagalinis na saray kuartoy waloran membro na pamilya mi ed sanga ontan met ed pangiparaay kanen da tan ipesakan ira. Ompatnag ya agak labat awalaay asawa noagta biglaan met a pamilya!

Inaral mi nen Wilf iray antikey a presentasyon na Biblia ed lenguahen Yoruba, tan atumangan kami ed saray sagpot mi. Sakey a malangwer ya estudyante ya akatongtong mi nensaman so walaan la natan na ilalak a laki tan marikit a manlilingkor ed baleg a pamilyan Bethel ed Nigeria a walaay ngalngali 400 a membro.

Nen 1963, naimbitaan si Wilf ya onatendi ed samploran-bulan a kurso na espisyal a klase diad Brooklyn, New York. Sanen asumpal to itan, agto inilaloay kiasain ya ompawil ed Inglatera. Tinmilak ak ed Nigeria tan naikdan ak labat na 14 ya agew na abison onabet ed si Wilf diad London. Inmalis ak a nankakapiga so liknaan ko, lapud ontanlan maliket ya asainmin so Nigeria. Kayari na impanserbi a 14 taon ed biek taew, medyo abayag so impakaadapta lamet na bilay mi diad Inglatera. Balet, misalsalamat kami ta makapituyaw kami lamet ed saray ontatakken lan atateng mi tan naasikaso mi ra.

Asustini ed Ilalo Tayo

Manlapulad 1980, apribilihyoan ak a mangiba’d si Wilf diad pambiabiahe to ed dakel a bansa bilang zone overseer. Nagkalalo lan tatalaranan ko iray ipapawil mi ed Nigeria. Saginonor et linma kami met ed Scandinavia, say West Indies, tan say Pegley Bukig​—pati Lebanon. Nikadkaduman panliketan so panmolimoli ed saray maliket a pakanodnonotan tan napinengnengan iramay akabat koran malangwer a tin-edyer a manlilingkor la natan bilang Kristianon mamatatken.

Makapaermen, inatey so pinabpablik ya asawa nen primabera na 1992. Sikato et 69 ni labat. Nagkalalo lan makapasinagem itan ta bigbiglan agawa. Kayari 35 taon na panamaley, abayag so impangiyarunsak ed bilay ko. Balet akaawat ak na dakel a tulong tan panangaro manlapud sankamundoan a Kristianon pamilya. Awalaan ak na dakerakel a maliket iran eksperiensian molimolien.

Say atateng ko so namparan angipanengneng na matalonggaring ya alimbawa na Kristianon integridad. Inatey si Nanay nen 1981 tan si Tatay nen 1986. Matoor si Douglas tan Anne a manlilingkor ed si Jehova. Si Douglas tan say akulaw to, si Kam, so pinmawil ed London, a nansiansiaan da la kayari ran inasikaso si Tatay. Si Anne tan say pamilya to so walad Estados Unidos. Amin mi so mangaapresian tuloy ed inter-Dios ya ilalo tan tawir. Mantultuloy kamin “manilalo,” a tatalaranan so panaon sano saray mabilay, kaiba iray apaolin inad-aro ra, so saniiban manlingkor a maando bilang membro na mangaraldalin a pamilya nen Jehova.​—Tagleey 3:24.

[Paimano ed leksab]

[Saray litrato ed pahina 23]

Onggapo’d tagey a kawigi a manpakawanan:

Si Gwen ed edad a 13 so mangidedemostray modelon panagaral ed Kingdom Hall diad Enfield

Misioniron pamilya ed Tripoli, Lebanon, 1951

Si Gwen a kaiba toy masiken ton Wilf, nen mabilay ni