Report na Saray Manangiyabawag na Panarian
“Say Katooan Mo Yapay Da so Inkasikara a Mabulbulos”
AKATING so hepe na mabiskeg ya armaday Siria a si Naaman. No agnatambal, sayan makapadimlan sakit so mansumpal ed kamigmig na laman tan ipapatey. Antoy gawaen nen Naaman? Sakey ed saramay kabiangay sankaabungan nen Naaman et say manmarmarikit, “a dinakep a nanlapu ed dalin na Israel.” Sikatoy masebeg a nansalita tan impaamta ton si propeta Eliseo so makatambal ed si Naaman.—2 Arari 5:1-3.
Lapu ed makpel a talindeg to, inanap nen Naaman si Eliseo tan sikatoy atambal. Niarum ni, si Naaman so nagmaliw a managdayew ed si Jehova! Sayan eksperiensia, a nikurit ed Biblia, so agawa nen koma-samplon siglo K.K.P. (2 Arari 5:4-15) Natan, ipapanengneng na dakel a tobonbalo so mipadparan pakpel a mansalita nisesengeg ed intereses na Panarian. Paneknekan iya na onggendan ya eksperiensia ed Mozambique.
Say anem-taon a si Nuno so sakey ya agbautismadon manangipalapag na maong a balita. Sakbay ni na impagmaliw ton agbautismadon manangipalapag, pandaragupen nen Nuno iray ugugaw ed kakaabay da, manpikasi, tan bangatan tora na Biblia, ya uusaren so publikasyon a My Book of Bible Stories.
Mabetbet ya ombabangon a masakbay si Nuno ed Sabadoy kabuasan ompian panonotan so pamilya to: “Ompaway tayo natan ed lawak a ministeryo.” Napapatnagay seseg to ed ministeryo diad arum a dalan. Legan na piiiba to’d atateng to diad panagpulong ed lansangan ed Maputo, si Nuno so mabetbet lan mansolo no onasingger ed saray totoo. Diad sakey ya inkagawa, sikatoy inasinggeran na sakey a negosyante tan tinmepet: “Akin et ilalakom irayan magasin.” Inmebat si Nuno: “Agko ilalako irayan magasin, balet aawaten koray kontribusyon ta pian makasapot ed panagpulong.” Inmebat so negosyante: “Anggano agak interesado, pandinayewan koy awawey tan abilidad mo. Labay koy mankontribusyon ed sayan kimey.”
Diad sananey ya inkagawa, inasinggeran nen Nuno so sakey a laki ed lansangan tan inopresian toy libron True Peace and Security—How Can You Find It? Intepet na laki: “Agta manaaral ka’d saman’ay ya eskuelaan?” “On,” so inyebat nen Nuno, “Manaaral ak ed satan ya eskuelaan, balet natan et iprepresintak so importantin mensahe manlapud sayan libro. Saya so mangipanengneng a makapambilay kayo ed balon mundo ya itarok na Dios, a singa nipanengneng ed litrato na sayan libro.” Ag-amoria nen Nuno a samay lakin akatongtong to et maestro manaya ed paneeskuelaan to. Aglambengat inawat na maestro so libro noagta natan et regular lan mangaawat na saray magasin a Panag-Bantayan tan Awake! manlapud si Nuno.
Sanen atepetan si Nuno no akin a labalabay toy mibiang ed panagpulong, inkuanto: “Gabay kon katongtongen so totoo tan ibangat ira nipaakar ed si Jehova tan say Anak to, si Jesu-Kristo.” Inyarum to ni: “Tan no ag-ondengel so totoo, anggapoy rason na panermen.”
Diad sankamundoan, nilibon tobonbalo a singa si Nuno so ‘mangiyaapay ed inkasikara a mabulbulos’ pian ibangat tan ipulong so nipaakar ed Panarian na Dios. (Salmo 110:3) Balet ta ag-iya agawan nibanbana. Saray atateng a mangibabangat ed ananak da nipaakar ed si Jehova manlapud inkaugaw, mangipapanengneng na maong ya alimbawa ed ministeryo, tan maseseg a mangegegemtan ed intereses na Panarian so mayamyaman a natumangan.