Antoy Magmaliw ya Arapen Mo?

NO SAY Dios a Makapanyarin-amin et kabat ton amin a bengatla, amta ton amin so apalabas, kaplesan, tan arapen, agta amin a bengatla et nigetar lan nagawan eksakto unong ed pakaamta la na Dios ed saratan? No amta la tan inggetar la na Dios so kurang tan pinal a kapalaran na amin a too, peteg kasin nibagan bulos itayon manpili ed kurang na bilay tayo, say arapen tayo?

Sarayan tepet so pansasangsangan ed loob la na saray siglo. Say kontrobersiya so siansian mangaapag ed angkabaleg iran relihyon. Kasin say abilidad na Dios ed pakaamta lan unona ed arapen et nitunos ed kawayangan na too? Iner so pananapan tayo na eba-ebat?

Minilyon a totoo ed intiron globo so onabobon a mitatalosan so Dios ed katooan panamegley na nisulat a Salita to a nipasabi panamegley na saray pinagkasangiyan to, saray propeta. Alimbawa, say Koran so manutukoy ed saray puyan bilang manlalapud Dios: say Taurāh (Torah, say Ganggan, odino limaran libro nen Moises), say Zabūr (saray Salmo), tan say Injīl (say Ebanghelyo, Kristianon Griegon Kasulatan, odino “Balon Sipan”), ontan met ed saray niparungtal ed saray propeta na Israel.

Diad Kristianon Griegon Kasulatan, nabasa tayo: “Amin a Sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan.” (2 Timoteo 3:16) Mapatnag, antokaman a giya odino pakaliwawaan a naaawat tayo so manunan manlalapun mismo ed Dios. Diad ontan agta makabat so pangusisa ed sulsulat na inmuna iran propeta na Dios? Antoy ipaparungtal da nipaakar ed arapen tayo?

Nigetar lan Arapen

Siopaman a manbabasay Masanton Kasulatan so mikabat a mankarga iratan na literal a nilasus iran propesiya. Saratan a maawaran ya ebento a singa say kapelag na kadaanan a Babilonia, say pangipaalagey lamet ed Jerusalem (komanem anggad komaliman siglo K.K.P.), tan say iyalagey tan kapelag na inmunan arari na Medo-Persia tan Gresya so detalyadon nipasakbay ya amin. (Isaias 13:17-19; 44:24–​45:1; Daniel 8:1-7, 20-22) Say kasumpalan na saratan a propesiya so sakey ed sankabiskegan iran prueba a say Masanton Kasulatan so peteg a Salita na Dios, ta say Dios labat so walaan na pakayarin mangamta lan unona tan makadeterminay nagawa ed arapen. Diad sayan pantalos say Masanton Kasulatan so peteg ya akadkauna lan angirekord ed arapen.

Indeklaran mismo na Dios: “Siak so Dios, et anggapo la so sananey; Dios ak, et anggapo so mipara ed siak; ya ipaliwawak so panganggaan a manlapu ed gapo, tan nanlapu nen inmuna a panaon ipaliwawak so saray bengatla ya agni agawa; a kuan ko, ‘Say simbawak mansiansia naani, tan gawaen ko naani so amin a labay ko’ . . . sinalitak, gawaen ko naani ya onlabas met; ninonot ko, sikato naani met so gawaen ko.” (Isaias 46:9-11; 55:10, 11) Say mismon ngaran ya impakabat na Dios so inkasikato ed inmuna iran propeta to et Jehova, a say literal a kabaliksan to et “Pagmaliwen to.”a (Genesis 12:7, 8; Exodo 3:13-15; Salmo 83:18) Ipaparungtal na Dios so inkasikato bilang say Sakey a magmaliw a Mananumpal na salita to, say Sakey a lawas manusungpal ed saray gagala to.

Sirin, uusaren na Dios so pakayari na pikakabat to lan unona diad pakasumpal na saray gagala to. Mabetbet ton uusaren itan pian pasakbayan iray marelmeng ed onsasabin panangukom ontan met pian ikdan so ariripen to na ilalo parad kilalaban. Balet kasin uusaren na Dios iyan pakayari ed aglimitadon paraan? Wala tay antokaman ya ebidensia diad Masanton Kasulatan nipaakar ed saray bengatlan pinili na Dios ya agto kaukolan ya amtaen ya unona?

Kasin Amta la na Dios ya Akauna so Amin a Bengatla?

Amin ya argumento ed panusuporta’d kapalaran so nibase’d padesir a lapud agniburin walaan so Dios na pakapanyarin mangamta lan unona tan manitermina la ed arapen iran ebento, nepeg labat ya amta to lan unona so amin a bengatla, pati say arapen iran kiwas na balang indibidual. Balet, kasin makatunongan iyan padesir? Say ipaparungtal na Dios ed Masanton Kasulatan so mangipapanengneng a duma.

Alimbawa, ibabaga na Kasulatan a “say Dios sinubok toy Abraham” diad pangigaganggan ed sikaton ibagat so anak ton si Isaac bilang popoolan ya apay. Sanen ngalngali la ibagat nen Abraham si Isaac, sikatoy inampaya na Dios tan kuanto: “Natan amtak la a sika et tatakotan mo so Dios, ta sika et agmo inkibot ed siak so anak mo, say bogbogtong ya anak mo.” (Genesis 22:1-12) Kasin nibaga itan na Dios no amta to lan tuloken nen Abraham iyan ganggan? Nagmaliw ta itan a matuan subok?

Sakey ni, saray inmunan propeta so angireport a paulit-ulit a sinalita na Dios a sikatoy ‘manbabawi’ ed bengatlan agawaan to odino inisip ton gawaen. Alimbawa, inkuan na Dios a sikatoy “nagbabawi [manlapud Hebreon na·chamʹ] ed impanggawa to ed Saul a manari ed Israel.” (1 Samuel 15:11, 35; ikompara so Jeremias 18:7-10; Jonas 3:10.) Lapud ayadyari so Dios, agkabaliksan na sarayan bersikulo ya alingo so Dios ed inpamili’d si Saul a magmaliw a sankaunaan ya ari na Israel. Imbes, ipapatnag na saratan a panermenan na Dios a si Saul et nagmaliw ya andiay pananisia tan matunganga. Say impangusar na Dios ed ontan a balikas ed panutukoy ed inkasikato so andi kabaliksan no amta to lan inmuna iray kiwas nen Saul.

Parehon termino so ompapatnag ed sankaraanan a Kasulatan, diad panutukoy ed saray agew nen Noe, inkuanto: “Et impangoli-oli to so linawa nen Jehova a nanggawa na too ed dalin, tan sikato so amasinagel ed puso to. Et si Jehova kuanto: ‘Gaygayen ko so too a pinalsak ya ekalen ed tapew na dalin . . . ta mangoli-oli linawak ed impamalsak ed sikara.’” (Genesis 6:6, 7) Dia lamet, ipapatnag na saya a saray kiwas na too et ag-inggetar na Dios. Alikna na Dios so pagbabawi, ermen, tan asakitan ni ingen, aliwan lapud alingo ed saray kiwas to, noagta lapud linmoor so karelmengan na too. Nagbabawian na Manamalsa a kapilitan so paneral ed amin a katooan likud ed si Noe tan say pamilya to. Ipapaseguro na Dios ed sikatayo: “Anggapo so liket ko ed ipapatey na marelmeng.”​—Ezequiel 33:11; ikompara so Deuteronomio 32:4, 5.

Kanian kasin amta lan inmuna na Dios tan inggetar to so pankasalanan nen Adan, ontan met ed makadesyang iran pansumpalan ya itarok na saya ed atooan a pamilya? Say akonsidera tayo la so mangipapanengneng ya agtua iya. Niyarum ni, no amta lan inmuna na Dios iyan amin, sikato komoy nagmaliw a sengegan na kasalanan sanen ginawa toy too, tan say Dios so nagmaliw a sigagalan oneebat ed amin a karelmengan tan paniirap na too. Malinew, ag-iya nitunos ed ipaparungtal na Dios nipaakar ed inkasikato diad Kasulatan. Sikatoy Dios na aro tan inkahustisya a manggugula ed karelmengan.​—Salmo 33:5; Uliran 15:9; 1 Juan 4:8.

Duaran Pansumpalan na Too

Ag-ipaparungtal na Masanton Kasulatan a say indibidual ya arapen tayo et nayarin adetermina lan akauna, odino inggetar la, na Dios. Imbes, say ipaparungtal na saratan et say impasakbay la na Dios a duara labat a posiblin pansumpalan na too. Iikdan na Dios so amin a too na kawayangan a manpili no anton pansumpalan so betang to. Indeklara nen propeta Moises nensaman ed saray Israelita: “Inyan ko ed arap mo so bilay tan say patey, . . . a pilien mo so bilay ta pian manbilay ka, sika tan say kapolian mo; say panangaro ed Jehova a Dios mo, say pananumpal ed bosis to tan say ipepeket ed sikato; ta sikato so bilay mo tan kinarukey na saray agew mo.” (Deuteronomio 30:19, 20) Impasakbay lan inmuna nen Jesus a propeta na Dios: “Onloob kayo ed mainget a pinto: ta maawang so pinto; tan malapar so dalan, a mamaarap ed kaderalan, et dakel so saray onloob diman. Ta mainget so pinto, tan makisir so dalan, a mamaarap ed bilay, et daiset so saray makaromog ed sikato.” (Mateo 7:13, 14) Duaran dalan, duaran pansumpalan. Say arapen tayo so posiblin mantegteen unong ed dilin kiwas tayo. Say panulok ed Dios et kabaliksan toy bilay, say isunggay ed sikato et kabaliksan toy ipapatey.​—Roma 6:23.

Say Dios “ibilin to ed amin a too, dia ed amin a pasen, a magbabawi ra. Bangta tinandaan to so sakey ya agew a sikato so pangukom to naani ed mundo unong ed katunongan.” (Gawa 17:30, 31) No panon a say karaklan ed katooan ed agew nen Noe so amilin onsunggay ed Dios tan sikaray atawtaw, ontan met natan say karaklan so ag-ontutulok ed saray ganggan na Dios. Ingen, ag-inggetar na Dios no sioparay naderal tan no sioparay nisalba. Diad tua, ibabaga na Salitay Dios ya “agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Anggan saray marelmeng a tuloy a totoo so makapanpataoli, magmaliw a matulok, tan manggawa na nakakaukolan iran pananguman pian nagamoray pabor na Dios.​—Isaias 1:18-20; 55:6, 7; Ezequiel 33:14-16; Roma 2:4-8.

Parad saramay matulok, isisipan na Dios so andi-anggaan a bilay diad mareen a paraiso, sakey a dalin ya alinisan ed amin a karelmengan, karawalan, tan bakal, mundon anggapo lay eras, irap, sakisakit, tan ipapatey. (Salmo 37:9-11; 46:9; Isaias 2:4; 11:6-9; 25:6-8; 35:5, 6; Apocalipsis 21:4) Anggan saray inaatey so napaoli tan naikdan na pankanawnawan manlingkor ed Dios.​—Daniel 12:2; Juan 5:28, 29.

“Tandaan mo so nagnap a too, tan nengneng mo so maptek,” kuan na salmista, “ta wala so maligan kasumpalan ed too na kareenan. Bangbalet saray managgawa na mauges nabagbag ira a mansasapon; say kasumpalan na bagel napater.” (Salmo 37:37, 38) Antoy pansumpalan na arapen mo? Akadependi itan ya amin ed sika. Saray manangipalapag na sayan magasin so maliket a mangiter ed sika na kaaruman ya impormasyon a mamaseguro ed inkasika ed maliket tan mareen ya arapen.

[Paimano ed leksab]

[Blurb ed pahina 6]

Uusaren na Dios so pakayari ton pikakabat lan unona diad pakasumpal na saray gagala to

[Blurb ed pahina 8]

Say Dios “agto labay a wala so siopaman a natawtaw noag ingen amin komon nagegemtan da so panagsibkel.” 2 Pedro 3:9

[Litrato ed pahina 7]

No amta lan inmuna na Dios a mabulos si Abraham a mangibagat ed anak to, nagmaliw ta itan a matuan subok?