Say Kristianon Pananisia so Nasubok

“Sikaran amin anggapo so pananisia ra.”​—2 TESALONICA 3:2.

1. Panon a nipapanengneng na awaran ya aliwan amin so walaan na tuan pananisia?

DIAD inlabas na awaran, walaray lalaki, bibii, tan ugugaw a walaay tuan pananisia. Say adjetibon “tua” so matukotukoy lapud nipapatnag na minilyon ni so nengneng na pananisian singa panisnisia, bengat-bengat a manisian andiay makatunongan a basiyan odino rason. Say ontan a pananisia so mabetbet a manasaglawi ed palson dirios odino ed saray pormay panagdayew ya agmitunosan ed Makapanyarin-amin, si Jehova, tan ed niparungtal a Salita to. Kanian insulat nen apostol Pablo: “Sikaran amin anggapo so pananisia ra.”​—2 Tesalonica 3:2.

2. Akin ya importantin usisaen tayo so dilin pananisia tayo?

² Balet isusuheri na imbalikas nen Pablo a nensaman et walaray pigaran talagan walaan na tuan pananisia tan, diad pangisiglaot et walara met natan. Pilalek na maslak ed saray bumabasa na sayan dyurnal a nawalaan tan napadaak so ontan a tuan pananisia​—pananisian mitunosan ed suston pikakabat ed madibinon katuaan. (Juan 18:37; Hebreos 11:6) Ontan ta met ed sika? Sirin kapilitan a bidbiren mo tan manparaan ed bengatlan say pananisiam so nasubok. Akin a nibagan ontan?

3, 4. Akin a manilalo tayo ed si Jesus no nipaakar ed saray subok ed pananisia?

³ Nepeg tayon aksobien a si Jesu-Kristo so importanti ed pananisia tayo. On, sikatoy sasalambiten na Biblia bilang say Manamayadyari na pananisia tayo. Nisesengeg itan ed imbaga tan ginawa nen Jesus, nagkalautla ed impanumpal to ed propesiya. Pinabiskeg to so basiyan a napangiletnegan na totoo ed tuan pananisia. (Hebreos 12:2; Apocalipsis 1:1, 2) Siansia, nabasa tayo a si Jesus so “tinukso ed amin a singa sikatayo, ingen anggapo so kasalanan to.” (Hebreos 4:15) On, asubok so pananisia nen Jesus. Midumaan a tuloy itan ed pakadismayaan odino pakatalawan tayo, satan so manligliwa ed sikatayo.

⁴ Diad impanagmak na dakel a pakasalsali anggad punton impatey ed kiew, si Jesus “inaral to so katutulok.” (Hebreos 5:8) Pinaneknekan ton makapambilay so totoo unong ed tuan pananisia anggaman antoray subok ya onsabi ed sikara. Makabaliksan iya sano isipen tayoy imbaga nen Jesus nipaakar ed papatumbok to: “Pakanonoten yo so salita ya inkuanko ed sikayo, Say aripen aliwan babaleg nen say katawan to.” (Juan 15:20) Diad tua, nipaakar ed saray patumbok to ed panaon tayo, impasakbay la nen Jesus: “Gulaen da kayo naani na saray amin a nasyon nisengeg ed ngaran ko.”​—Mateo 24:9.

5. Panon ya ipapanengneng na Kasulatan a talagan arapen tayoray subok?

⁵ Diad asasakbay na sayan siglo, ginmapoy panangukom ed abung na Dios. Impasakbay na Kasulatan: “Panaon la a say panangukom manlapu ed abung na Dios; tan no manlapu ya unona ed sikatayo, anto kasi kasumpalan na saray ag-ontulok ed ebanghelyo na Dios? ‘Et no masuyat so kilalaban na matunong a too, iner so pakanengnengan ed samay maramsak tan makasalanan?’”​—1 Pedro 4:17, 18.

Asubok a Pananisia​—Akin?

6. Akin a say asubok a pananisia et makanakana?

⁶ Diad sakey a pantalos, say pananisian ag-asubok so agnapaneknekan a mabalor, tan mansiansian ag-amta so kualidad to. Niyaliling mo itan ed sakey a tseken agni asalatan. Nayarin akaawat ka na sakey a tseke lapud tinarabahom, ed bengabengatlan nitaryam, odino pinagkaregalo ni ingen. Say tseke et nengneng toy tudtua, balet ontan kasi? Talaga kasin nisalat mo itan unong ed akasulat a kantidad? Mipadpara, say pananisia tayo so nepeg a mas ni nen say basta nipapatnag odino niyaabawag labat. Nepeg a nasubok itan no paneknekan tayo a satan et walaay kakanaan tan de-kalidad. Sano nasusubok so pananisia tayo, naromog tayon satan so mabiskeg tan makana. Ipaparungtal met na sakey a subok so antokaman iran lugar na pananisia tayo a mankakaukolan na panamino odino panamabiskeg.

7, 8. Antoray panlalapuan na subsubok ed pananisia tayo?

⁷ Aabuloyan na Dios so panamasegsegang tan arum niran pakasubokay pananisia ya onsabi’d sikatayo. Nabasa tayo: “Agkomon ibaga na too no natukso, a: ‘Tinukso ak na Dios,’ ta say Dios agnayari a tuksoen na mauges tan agmet manukso na siopaman a too.” (Santiago 1:13) Siopa odino anto so panlalapuan na saratan a pakasalsalian? Si Satanas, say mundo, tan say mismon ag-ayadyarin laman tayo.

⁸ Nayarin aksobien tayo a si Satanas so mangisesekar na mabiskeg ya impluensia ed mundo, diad panag-isip tan daladalan to. (1 Juan 5:19) Tan anganko ta amta tayon sikatoy mangisusugsog ed kapasegsegang na Kristianos. (Apocalipsis 12:17) Balet kombinsido tayo ta met a panggugunaetan nen Satanas ya ibalang itayo diad panayat ed ag-ayadyarin laman tayo, a tatapangan to itayo na minumundo iran pakaayatan, diad ilalon singkaten tayo so tapang, ya onsunggay ed Dios, tan mansumpal ed agpanangabobon nen Jehova? Siempre, agti la nibaloan ed saray metodo nen Satanas, lapud inusar to la iratan a taktika sanen sasalien ton tuksoen si Jesus.​—Mateo 4:1-11.

9. Panon tayon nagunggunaan manlapud saray alimbawa na pananisia?

⁹ Diad panamegley na Salita to tan say Kristianon kongregasyon, itatarya nen Jehova ed sikatayo iray tudtuan alimbawa na pananisia a naalig tayo. Insimbawa nen Pablo: “Agagik ira, mankakasakey kayo a mangalig ed siak, tan tandaan yo so saray manaakar ya ontan unong na singa wala kayo ed sikami a singa sakey a pangaligan.” (Filipos 3:17) Bilang sakey ed alanaan ya ariripen na Dios nen inmunan siglo, si Pablo so angidaulo’d panangipanengneng na gawagaway pananisia anggaman dakel iray pakasalsalian a sinagmak to. Anggad kasampotan na koma-20 siglo, dakel so napangikomparaan tayon alimbawa na pananisia. Saray salita na Hebreos 13:7 so onaaplika natan a singa kapuersa sanen insulat nen Pablo iratan: “Nonot yo so saray manuley ed sikayo, a sikara so nansalita ed sikayo na salitay Dios; tan motektek yo no anto so asumpalan na impanbilay da, alig yo so pananisia ra.”

10. Antoran partikular ya alimbawa na pananisia so wala ed agano niran panaon?

¹⁰ Satan a simbawa so nagkalautlan mapuersa sano konsideraen tayo no antoy pansusumpalay kondukta na alanaan a nakdaan. Namotektek tayo so alimbawa ra insan aligey pananisia ra. Walad sikara so tuan pananisia a pipinoen na saray pakasalsali. Manlapu ed melag a gapoan nen dekaday 1870, atibukel so sankamundoan a Kristianon impanaagi. Bilang resulta na pananisia tan impansungdo na saray alanaan nanlapulad saman, masulok a limara tan kapalduan milyon a Tastasi nen Jehova so manpupulong tan manbabangat la natan nipaakar ed Panarian na Dios. Say kaplesan ya englobon kongregasyon na maseseg iran tuan managdayew so pakanengnengan a prueba ed asubok a pananisia.​—Tito 2:14.

Asubok so Pananisia Nipaakar ed 1914

11. Panon a say 1914 et makabkabaliksan parad si C. T. Russell tan saray kaiba to?

¹¹ Taotaon ni sakbay na imbetag na inmunan guerra mundial, inyabawag lay alanaan a nakdaan a say 1914 et makabkabaliksan a petsa ed propesiya na Biblia. Balet, arum ed saray iilaloan da so anggapo ni’d panaon, tan say panmoria ra ed nagawa so agtanton malinew. Alimbawa, atalosan di C. T. Russell, say inmunan presidenti na Watch Tower Society, tan saray kaiba to a kapilitan so malaknab a panagpulong a kimey. Abasa ran: “Sayan ebanghelyo na panarian so nipulong naani ed sankamundoan ya onkanan pamintuan ed saray amin a nasyones; et saman la onsabi anggaan.” (Mateo 24:14, King James Version) Balet, panon a nagawaan na melmelag a grupo ra itan?

12. Panon so inkiwas na sakey ed saray kaiba nen Russell ed katuaan na Biblia?

¹² Isipen pa no panon ya inapektaan na saya si A. H. Macmillan, kaiba nen Russell. Nianak ed Canada, anggapo ni 20 nen Macmillan sanen akalay libro nen Russell a The Plan of the Ages (1886). (Sayan libro, ya atawag met a The Divine Plan of the Ages, so nagmaliw a Tomo 1 na malaknab a nibunog a set ya Studies in the Scriptures. Say Tomo 2, The Time Is at Hand [1889], so angituro ed 1914 bilang say anggaan na “saray panaon na Gentiles.” [Lucas 21:24, KJ]) Diad mismon labin impamasa nen Macmillan et inisip to: “Bueno, singano katuaan iya!” Diad tiagew na 1900, akabat toy Russell ed sakey a kombension na saray Estudyante na Biblia, a singa tawag ed Tastasi nen Jehova ed saman. Ag-abayag et abautismoan si Macmillan tan akikimey la ed si Brother Russell ed hedkuarter na Sosyedad ed New York.

13. Antoy probleman naimano nen Macmillan tan arum ni nipaakar ed kasumpalan na Mateo 24:14?

¹³ Base’d abasa ra ed Biblia, inturo na saraman ya alanaan a Kristiano so 1914 a pakagawaan na makabaliksan a pananguman diad gagala na Dios. Balet panuumamengan di Macmillan tan arum ni no panon a nagawaan so panagpulong ed nasyones a nipasakbay ed Mateo 24:14 diad antiktikey lan natitilak a panaon. Inkuanto ed saginonor: “Nanonotan ko a mabetbet kon isisingbat itan ed si Brother Russell, tan iyebat ton, ‘Bueno, brother, mas dakel niray Judio diad mismon New York nen say diad Jerusalem. Mas dakel ni wadian taga-Ireland nen say diad Dublin. Tan mas dakel nira’d diay Italyano nen say diad Roma. Natan no pulongan tayo ra dia, pagmaliwen to itan a singa arateng lay mundo tekep na mensahe.’ Balet ta singano ag-itan makapenek ed kanonotan mi. Kanian naisip mi so ‘Photo-Drama.’”

14. Sakbay na 1914, anton matalonggaring a proyekto so agawa?

¹⁴ Agaylan nikadkaduman kimey so “Photo-Drama of Creation”! Pinantekep a pelikula tan kinoloran iran salming ya slide, a binansagan na saray paliwawa nipaakar ed Biblia tan musika ed nirekord iran ponograpo. Nen 1913, oniay inkuan na The Watch Tower nipaakar ed kombension diad Arkansas, E.U.A.: “Nankakasakeyan ya adesisyonan ya asabi lay panaon ya usaren iray pelikula diad pangibangat ed saray katuaan na Biblia. . . . insalaysay [nen Russell] a taloy taon lan kikimeyan to iyan mismon plano tan natan et wala lay ngalngali nilasus a marakdakep iran litrato, ya agpanduaruwaan a managyat ed baleg iran ulop tan mangiyabawag ed Ebanghelyo, tan ontulong ed publiko a napapawil so pananisia ra ed Dios.”

15. Antoran nengneng na resulta so agawaan na “Photo-Drama”?

¹⁵ Ontan a mismo so agawaan na “Photo-Drama” kayari na sankaunaan ya impangipalabas nen Enero 1914. Saray onggendan so report a nanlapud The Watch Tower na 1914:

Abril 1: “Inkuan na sakey a ministro, kayari impakabantay ed duaran parti, ‘Kapkapaldua labat so abantayan ko ed PHOTO-DRAMA OF CREATION, balet ta dakel lay naaralan ko nipaakar ed Biblia manlapud satan nen say taloy taon a kursok diad teolohikon seminaryo.’ Kayari impakabantay ed satan et inkuan na sakey a Judio, ‘Onalis ak a sakey a magmaong a Judio nen say sanen insabik.’ Pigaran Katolikon pari tan madre so linma ed DRAMA tan imbalikas day baleg ya apresasyon. . . . Lablabindua labat a set na DRAMA so akompleto . . . Anggaman kuan asabi mi la tan nipapanengneng la ed talomplo tan sakey a syudades . . . Masulok a talomplo tan liman libo kada agew so mannenengneng, mandedengel, mandinayew, maniisip tan nabebendisionan.”

Hunyo 15: “Lalo ak a pinaseet na pelikula a mangikayat ed Katuaan, tan inmaralem so panangarok ed Mangatatawen ya Ama tan ed pinabli tayon Kuyan Jesus. Inagew-agew kon ipipikasi mayaman a panamendision na Dios ed PHOTO-DRAMA OF CREATION tan amin na saray nalalanor a mangipalabas ed satan . . . Aripen yoak ed Sikato, F. W. KNOCHE.​—Iowa.”

Hulyo 15: “Maliket kamin makaimano ed maabig ya impresyon ya intilak na pelikula ed sayan syudad, tan apaseguroan kami a sayan pantasi ed mundo so nauusar met pian natipon niray dakel a pakapatnagay mablin bato diad dilin panamili na Katawan. Dakel so kabat miran masimoon ya Estudyante na Biblia a mililimog la natan ed Klase dia bilang resultay kimey a Photo-Drama. . . . Say agi yo ed Katawan, EMMA L. BRICKER.”

Nobyembre 15: “Segurado kamin naliketan kayon makaamta ed ekselentin panagtasi a niiter diad panamegley na PHOTO-DRAMA OF CREATION ed The London Opera House, Kingsway. Say manangidirehin lima na Katawan so makapakelkelaw a napapatnagan ed amin a detalye na sayan palabas a panlikliketan a maong na agagi . . . Saray nanbantay et tugyopen na amin a klase tan nengneng na totoo; naimano mi met so dakel a klero diad saray wadman. Sakey a bikaryo (vicar) . . . so kinmerew na saray tiket ta pian nabantayan dan sanasawa lamet itan. Naatendian lan aminpiga na sakey a Rektor na Church of England so DRAMA, tan . . . akapangitagar ed dakel a kakaaro to pian bantayan itan. Duaran obispo met so wadman, tan pigaran tituladon totoo.”

Disyembre 1: “Talagan pisalamatan min sanasawa so Mangatatawen ya Ama tayo lapud abalbaleg tan mabmablin bendision a sinmabi ed sikami diad panamegley mo. Nisesengeg ed marakdakep a PHOTO-DRAMA ya anengneng tan naawat mi so Katuaan . . . Walaan kami met la ed anemiran tomom ya STUDIES IN THE SCRIPTURES. Talagan baleg iratan a tulong.”

Kiwas ed Subsubok ed Saman a Panaon

16. Akin a say 1914 et anubok ed pananisia?

¹⁶ Balet, panon to, sanen ag-agawa so iilaloan na saratan a masimoon tan debosyonadon Kristianos a miiba’d Katawan nen 1914? Dinmalan iraman ya alanaan ed nikadkaduman panaoy panalsali. Oniay inyabawag na The Watch Tower na Nobyembre 1, 1914: “Tandaan tayo a sikatayo so wala la’d tiempo na panagsubok.” Nipaakar ed saya, oniay ibabaga na libron Jehovah’s Witnesses​—Proclaimers of God’s Kingdom (1993): “Peteg, a saray taon manlapud 1914 ya anggad 1918 so apaneknekan a ‘tiempo na panagsubok’ parad saray Estudyante na Biblia.” Abuloyan da kasin napino so pananisia ra tan naipetek so panag-isip da ta pian nagawaan day baleg a kimey a manatalaran ed sikara?

17. Panoy reaksion na saray matoor ya alanaan ed impansiansia da ni ed dalin kayari 1914?

¹⁷ Inkuan na The Watch Tower na Setyembre 1, 1916: “Inisip min say Panaganin panagtipon na Iglesia [na alanaan] so nasumpal sakbay a manampot so Panaon na Gentil; balet anggapoy ontan ya ibabaga na Biblia. . . . . Ombeleng tayo kasi lapud tuloytuloy ni so Panagani? . . . Pinablin agagi, kaukolan a say kaplesan ya awawey tayo et sakey a walaay baleg ya otang a linawa ed Dios, a papadaaken so apresasyon ed marakep a Katuaan ya iiter To ed sikatayo so pribilihyo a naamtaan tan napitunosanan, tan padaakey seseg diad pananulong ed panangipakabat na Katuaan ed arum.” Nipaarap ed subok so pananisia ra, ingen inarap da itan a subok tan atalonaan da. Balet sikatayon Kristianos et kaukolan ya amta tayo a dakel tan nambabangil iray subok ed pananisia.

18, 19. Anto niray tinmumbok a subok ed pananisia na totooy Dios kapatey nen Brother Russell?

¹⁸ Alimbawa, sakey nin nengneng na subok so sinmabi’d nakdaan kayarin tuloy na impatey nen Brother Charles T. Russell. Satan et say subok ed katooran tan pananisia ra. Siopa so ‘matoor ya aripen’ ed Mateo 24:45? Liknaen na arum a si Brother Russell itan a mismo, tan sikaray ag-akioopera’d balo iran uksoyan na organisasyon. No sikato iman ya aripen, anto la kasi gawaen na agagi natan ta sikato lay inatey? Kaukolan da kasin tumboken iray balo nin aturon indibidual, odino agta natan lay panaon pian bidbiren a say uusaren nen Jehova et aliwan saksakey a too, noagta intiron grupo na Kristianos bilang instrumento, odino aripen a klase?

¹⁹ Sinmabi so kaaruman nin subok ed saray tuan Kristiano nen 1918 sanen saray minumundon pakauley, diad impangisugsog na klero na Kakristianoan, so ‘amawalay panamuger ed panamegley na ganggan’ sumpad organisasyon nen Jehova. (Salmo 94:20, KJ) Nipaarap so daluyon na maramsak a panamasegsegang ed saray Estudyante na Biblia diad Amianen ya Amerika tan diad Europa. Say insugsog na kleron isusumpa so amantok nen Mayo 7, 1918, sanen nipaakseb so U.S. federal warrants ed kaaresto nen J. F. Rutherford tan pigara’d saray maapit a kakaiba to, pati si A. H. Macmillan. Sikaray sititilan inakusaay isusumpa’d ley, tan imbaliwala na saray autoridad so iyaapela ran anggapoy kasalanan da.

20, 21. Singa nipasakbay ed Malaquias 3:1-3, anton kimey so agawa ed limog na saray alanaan?

²⁰ Anggaman agda amoria ed saman, say panagdalisay a kimey et nagagawa la, a singa adeskribe ed Malaquias 3:1-3: “Siopa so makayari a mangitepel ed agew ya isabi to, tan siopa naani so makaalagey sano ompatnag? Ta [say mensahero na say sipanan] so singa say apuy na manggogol, tan singa sabon na managpakapal na abel. Et sikato onyurong naani a singa say manlinis tan manggogol na pilak, et gogolan to naani so saray anak nen Levi, et linisan tora naani a singa say balitok tan say pilak; et sikara manbagat ira naani ed Jehova na saray bagat ed inkatunong.”

²¹ Dia ed pansamposampot lay Guerra Mundial I, arum ed saray Estudyante na Biblia so nipaarap ed sananey a subok na pananisia​—no kasin namantini ra so mapeget a neutralidad nipaakar ed minumundon aktibidades na militar. (Juan 17:16; 18:36) Ag-itan agawaan na arum. Kanian nen 1918, imbaki nen Jehova so “mensahero na say sipanan,” si Kristo Jesus, diad uksoyan na espiritual a templo To pian linisan so melag a grupo na saray managdayew To manlapud minumundon karumsisan. Saramay intalaga ran mangipanengneng na tuan pananisia so akaaral manlapud eksperiensia tan inmabanti, a siseseseg a nantultuloy a manpulong.

22. No nipaakar ed saray subok ed pananisia, anto ni kaukolan a konsideraen?

²² Say akonsidera tayo so aliwan basta linmabas a paninteresan ed awaran. Direkta itan a misiglaotan ed kaplesan ya espiritual a kipapasen na sankamundoan a kongregasyon nen Jehova. Balet konsideraen tayo pa ed ontumbok ya artikulo so pigara ed saray subok ed pananisian aarapen na totoo na Dios natan tan imanoen no panon tayon sitatalonan nalabanan iraya.

Kasin Natandaan Yo?

◻ Akin a nailaloan na totoo nen Jehova a nasubok so pananisia ra?

◻ Antoran nengneng na impansagpot ed pangikayat na mensahe na Dios so nigapo sakbay na 1914?

◻ Anto so “Photo-Drama,” tan antoray resultan pinawala to?

◻ Panon a saray ebento ed peryodo na 1914-18 et kinmanan pakasubokan na saray alanaan?

[Litrato ed pahina 12]

Diad ibabaliksat la na siglo, aaralen la na totoo ed dakel a daldalin so Biblia diad tulong na saray serye na “Millennial Dawn,” a diad saginonor et atawag ya “Studies in the Scriptures”

[Litrato ed pahina 13]

Sulat a nanlapud kinen C. T. Russell tekep na introduksion parad sakey a rekording ya angikuanan to: “Say ‘Photo-Drama of Creation’ so iprepresinta na IBSA​—International Bible Students Association. Say gagala to et say kibangat na publiko nipaakar ed relihyon tan siensia, tan bilang depensa na Biblia”

[Litrato ed pahina 15]

Nambiahe si Demetrius Papageorge ya impapalabas so “Photo-Drama of Creation.” Diad saginonor et sikatoy nipisok lapud neutralidad bilang Kristiano