‘Mibakal Kayo a Nisesengeg ed Pananisia’!
“Mibangal [“mibakal,” NW] kayo a nisesengeg ed pananisia a niiter nen aminsan ed saray sasanto.”—JUDAS 3.
1. Diad anton pantalos a saray tuan Kristiano natan et mibabakal?
SARAY sundalon mibabakal so lawas walaan na mapaot a kabibilay. Isipen pan sigpot ya akakargada parad guerra tan manmamartsa na dakerakel a kilometro diad amin a klasen klima, nisisilong ed makapakesaw a panangipasal ed panangusar na armas, odino diad pangidepensay sarili sumpad amin a nengneng na kapeligroan na bilay tan pakasakitan. Balet, saray tuan Kristiano so agmibabali ed saray panbabakal na nasyones. (Isaias 2:2-4; Juan 17:14) Anggaman ontan, nepeg ya agtayon balot lilingwanan ya amin tayo et mibabakal diad espiritual a pantalos. Kagulan tuloy nen Satanas si Jesu-Kristo tan saray patumbok to ed dalin. (Apocalipsis 12:17) Bilang resulta, amin a desidien day manlingkor ed si Jehova a Dios so nilista bilang sundalon mibiang ed espiritual a pibabakal.—2 Corinto 10:4.
2. Panon so impaneskribe nen Judas ed Kristianon pibabakal, tan panon itayon natulongan na sulat ton nasungdoan itan?
2 Matukotukoy, insulat na agi nen Jesus ed ina a si Judas: “Inararo, legan kon mangiiter na amin a seseg a mansulat ed sikayo nisengeg ed lapag a kilalaban, apasootak a mansulat ed sikayo dia ed panangibangat ko a mibakal kayo a nisesengeg ed pananisia a niiter nen aminsan ed saray sasanto.” (Judas 3) Sanen pinaseseg nen Judas iray Kristiano a “mibakal,” inusar toy terminon nisisiglaot ed salitan “ot-ot.” On, sayan pibabakal so magmaliw a mairap, makapaot-ot ni ingen! Naeeksperiensiam ta a no maminsan et alay irap a sungdoan iyan pibabakal? Natulongan itayo na antikey balet ta mapuersan sulat nen Judas. Sisimbawaen to itayon resistiay imoralidad, respetoen so inletneg na Dios ya autoridad, tan pansiansiaen tayoy inkasikatayo ed aro na Dios. Nengnengen tayo pa no panoy pangiyaplika ed sayan konseho.
Resistiay Imoralidad
3. Anton emerhensian situasyon so nidungetan na Kristianon kongregasyon ed agew nen Judas?
3 Amta nen Judas ya aliwan amin ed kapara ton Kristianos et manatalo’d pibabakal ed si Satanas. Walad emerhensian situasyon so nidungetan na pulok. Walaray mauges a totoon “manakarakar ya agam-amta,” insulat nen Judas. Sarayan lalaki so maamot a mangiyaalibansay imoralidad. Tan sisisilib dan ikakatunongan iray gawa ra, “a say grasya na Dios tayo papagmaliwen da a kaugsan.” (Judas 4) Anganko, singa ed pigaran kadaanan iran Gnostic, ikakatunongan dan no mas makasalanan so sakey et lalon naawat toy agkanepegan a panangasi na Dios—kanian, bilang resulta et magmaong so pankasalanan ni! Odino inkuan dan say mapangasin Dios et agton balot ira dusaen. Diad antokaman a kaso, sikaray aliwa.—1 Corinto 3:19.
4. Anto so taloran Makasulatan ya alimbawa ed apalabas iran panangukom nen Jehova so insitas nen Judas?
4 Sinuppiat nen Judas so marelmeng a panagkatunongan da diad impangisitas ed taloran alimbawa na panangukom nen Jehova ed apalabas: sumpad saray Israelita ya “ag-anisia”; sumpad “saray angeles . . . [a] pinaulyan da so nigetar a panaayaman da” ta pian mankasalanan ed bibii; tan sumpad saray manaayam ed Sodoma tan Gomorra, ya “impanggawa ra na lawan tan intumbok da ed sananey a laman.” (Judas 5-7; Genesis 6:2-4; 19:4-25; Numeros 14:35) Diad balang kaso et pirmi impangukom nen Jehova ed saray managkasalanan.
5. Manlapud siopan kadaanan a propeta so impangaonan nen Judas, tan panon ya imbalikas na satan a propesiya so sigpot a kaseguroy kasumpalan to?
5 Saginonor, tinukoy nen Judas so lalon malaknab a panangukom. Inaon toy propesiya nen Enoc—bersikulon agnaromog ed inerman diad apuyanan a Kasulatan.a (Judas 14, 15) Impasakbay nen Enoc so sakey a panaon sano ukomen nen Jehova so amin ya agmaridios a totoo pati saray agmaridios a gawa ra. Makapainteres, say tiempon inusar nen Enoc ed impansalita to et diad apalabas, ta saray panangukom na Dios so segsegurado a singano asumpal la ra. Nayarin inelek-elekan na totoo si Enoc tan diad saginonor et si Noe, balet amin na saratan a managludlurey so nalner ed sankagloboan a Delubio.
6. (a) Antoy kaukolan a nipanonot ed saray Kristiano ed agew nen Judas? (b) Akin a kaukolan tayon ipapuso iray panonot nen Judas?
6 Akin ya insulat nen Judas irayan madibinon panangukom? Lapud amta ton pigara ed saramay kabiangan na saray Kristianon kongregasyon ed mismon agew to so mankakasalanan a singa kabanday tan kagrabe na saramay anagyat ed ontan a panangukom diad apalabas. Kanian, insulat nen Judas a kaukolan a napanonotan iray kongregasyon nipaakar ed pigaran manunan espiritual a katuaan. (Judas 5) Mapatnag a nilingwanan dan si Jehova a Dios et naiimano toy gagawaen da. On, sano gagalaen na ariripen ton sumlangen iray ganggan to, a dudutakay inkasikara pati say arum, naiimano to. (Uliran 15:3) Nasasakitan a tuloy ed ontan iran kiwas. (Genesis 6:6; Salmo 78:40) Makapakelkelaw ya isipen a sikatayo bilang totoo labat et naapektoan tayoy liknaan na Soberanon Katawan na uniberso. Inagew-agew to itayon babantayan, tan sano gawaen tayoy anggaay nayarian tayon tumboken iray bakat na Anak to, si Jesu-Kristo, diad ontan et sikatoy napapagayaga ed kondukta tayo. Sirin, agtayon balot komon panimbelan iratan a panonot a singa ed iyoopresi nen Judas noagta ipapuso tayo iratan.—Uliran 27:11; 1 Pedro 2:21.
7. (a) Akin ya importanti parad saramay nalalanor ed seryoson gawan-mauges a patulongan a tampol? (b) Panon tayon amin a napaliisan so imoralidad?
7 Aglambengat onnenengneng si Jehova noagta onkikiwas met. Bilang Dios na inkahustisya, dusaen toray mauges—diad dugan panaon to. (1 Timoteo 5:24) Saramay mangikakatunongan a saray panangukom to et parad apalabas labat tan anggapoy pibabali to ed kaugsan a gagawaen da et lulukoen day inkasikara. Agaylan importanti parad siopaman natan a a nalalanor ed imoralidad a patulongan a tampol ed Kristianon mamatatken! (Santiago 5:14, 15) Amin tayo so manonot no nipaakar ed panigensigen ya iyaarap na imoralidad ed espiritual a pibabakal tayo. Tinaon et walaray biktima—indibidual iran naeekal ed limog tayo, karaklan ed sikara so agnagbabawin manggagaway imoralidad. Nepeg itayon desididon tuloy a resistiay antokaman a tukson mangitonton ed sikatayo ed ontan a direksion.—Ikompara so Mateo 26:41.
Respetoey Madibinon Niletneg ya Autoridad
8. Sioparay “atagey ya inkabtang” ya asalambit ed Judas 8?
8 Sakey nin probleman inarap nen Judas et say agpangingalngalep ed madibinon niletneg ya autoridad. Singa bilang, diad bersikulo 8 et aakusaen to iratan lamlamang a marelmeng a totoo a “pagpaugesen da so saray atagey ya inkabtang.” Siopa irayan “atagey ya inkabtang”? Sikaray ag-ayadyarin lalaki, balet naikdan na saray responsabilidad diad panamegley na masanton espiritu nen Jehova. Alimbawa, saray kongregasyon et walaan na mamatatken, ya apabtangan a mamastol ed pulok na Dios. (1 Pedro 5:2) Wadtan met iray managbiahen manangasikaso, a singa si apostol Pablo. Tan say ulop na mamatatken ed Jerusalem so inmakto bilang mananguley ya ulop, a mandedesisyon ed kipaakaray Kristianon kongregasyon bilang interamenti. (Gawa 15:6) Nanpagaan a tuloy nen Judas ta walaray ontan ed loob na saray kongregasyon a papaugesen, odino papabandayen da so ontan a lalaki.
9. Antoran alimbawa nipaakar ed agpangingalngalep ed autoridad so insitas nen Judas?
9 Pian atakien so ontan ya agmamagalang a panagtongtong, insitas nen Judas ed bersikulo 11 iray talora nin alimbawa bilang panonot: di Cain, Balaam, tan Kore. Binaliwala nen Cain so maaron konseho nen Jehova tan sigagalan ginegemtan toy dilin kurson makapatey a gula. (Genesis 4:4-8) Aminpigan pinasakbayan si Balaam ya andi-suppiat a nanlapud labas-nen-natural a lapuan—anggan say mismon asno to so nansalita ed sikato! Balet ta sinisiblet ya intuloy nen Balaam so plano sumpad totoo na Dios. (Numeros 22:28, 32-34; Deuteronomio 23:5) Si Kore so walaan na dilin responsablin posisyon, balet ta agkontento. Inggapo toy panrebeldi’d sankauyamoan a too ed tapew na dalin, si Moises.—Numeros 12:3; 16:1-3, 32.
10. Panon a say arum natan et napelag ed patit na “panagpauges . . . ed sarat atagey ya inkabtang,” tan akin a kaukolan a paliisan iratan a labir?
10 Agaylan malinlinew a mangibangat irayan alimbawa ed sikatayon talingey konseho tan respetoen iramay walad responsablin posisyon! (Hebreos 13:17) Alay inomay so pananap na lingo na saray aturon mamatatken, ta aliwa iran ayadyari, a singa sikatayon amin et ag-ayadyari. Balet no andi lay nenengnengen tayo et saray lingo ra tan leglemewey panrespeto ed sikara, agta ‘pagpaugesen tayo ra lay walad atagey ya inkabtang’? Diad bersikulo 10, sinalambit nen Judas iramay ‘mamapabanday ed saray bengatlan agda amta.’ No maminsan et walaray mamalaw ed desisyon na ulop na mamatatken odino hudisyal a komite. Ingen, agda amtan amin so detalyen kinonsideray mamatatken sakbay iran nandesisyon. Kanian akin a pansalitaay mabanday iray bengatlan diad tua et agda amta? (Uliran 18:13) Saramay ag-ontunda ed ontan a negatibon tongtongan so napansengegay kaapag-apag ed loob na kongregasyon tan anganko et niyaliling ni ingen ed “niamot a batobato [“ed dalem na danum,” NW]” diad saray pandaragup na saray kapananisiaan. (Judas 12, 16, 19) Agtayon balot labay a pansengegay kapeligroan ed espiritualidad na arum. Imbes, determinadoy balang sakey ed sikatayon apresiaen iray responsablin lalaki lapud pambabanikel tan debosyon da ed pulok na Dios.—1 Timoteo 5:17.
11. Akin a pinokpokan nen Miguel so pangitarok na panangukom diad maabuson termino sumpad Satanas?
11 Insitas nen Judas so alimbawa na sakey a nirespeto ton maong so niletneg ya autoridad. Insulat to: “Si arkanghel Miguel, nen mibabakal ed Diablo nisesengeg ed laman nen Moises, agpinmangaya a managamil na pamabpabanday a panangukom a sumpa ed sikato, noag ingen inkuanto: ‘Say Katawan pooten to ka.’” (Judas 9) Sayan makapaayat a salaysay, a nikadkaduma ed Judas diad apuyanan a Kasulatan, so mangibabangat na duaran nikaduman leksion. Diad sakey a dapag, ibabangat to itayon ipalima ed si Jehova so panangukom. Mapatnag a labay nen Satanas ya aliway kausar ed bangkay na matoor a Moises ta pian iyalibansa so palson panagdayew. Agaylan inkarelmeng! Ingen, mapaabeban pinokpokan nen Miguel so pangitarok na panangukom, ta si Jehova lambengat so walaan na satan ya autoridad. Di nagkalalo sirin a tundaan tayon husgaay matoor a lalakin panggugunaetan day manlingkor ed si Jehova.
12. Antoy naaralan na saramay walad responsablin posisyon diad Kristianon kongregasyon manlapud alimbawa nen Miguel?
12 Diad biek a dapag, walay naaralan met a leksion na saramay walaay sukat na autoridad ed kongregasyon nipaakar ed si Miguel. Anggaman si Miguel et “arkanghel,” hepe na amin ya anghel, agto inabusoy posisyon na pakayari to, anggan diad silong na pakasyodotan. Tutumboken a tuloy na matoor a mamataken itan ya alimbawa, a bidbiren dan say panangabuso ed autoridad et agpangingalngalep ed inkasoberano nen Jehova. Dakel so nibaga na sulat nen Judas nipaakar ed lalakin walaay respetadon posisyon ed saray kongregasyon balet ta inabuso ray pakayari ra. Singa bilang, diad bersikulo 12 ya anggad 14, insulat nen Judas so pirmin panamaat nipaakar ed “pastol iran taganoen day inkasikara ya andi-takot.” (Ikompara so Ezequiel 34:7-10.) Diad arum a salita, say manunan interes da et say pakagunggunaan dan dili, aliwan say pulok nen Jehova. Dakel so naaralan na mamatatken natan ed saratan a negatibon alimbawa. Tua, malinlinew so pangililitrato na saray salita nen Judas no antoy agtayo labay a pagmaliwan. Sano manpasakop tayo’d inkasiblet, ag-itayo nayarin magmaliw a sundalo nen Kristo; masyado tayon okupado a mibabakal ed dilin paninteresan tayo. Imbes, sikatayon amin komon so manbilay unong ed saray salita nen Jesus: “Lalo a mapalar so mangiter nen say mangawat.”—Gawa 20:35.
“Mansiansia Kayo ed Panangaro na Dios”
13. Akin a masimoon a panpilalekan tayon amin a mansiansia ed panangaro na Dios?
13 Diad pansamposampot na sulat to, initer nen Judas iyan masimoon a konseho: “Mansiansia kayo ed panangaro na Dios.” (Judas 21) Anggapoy makatulong ed sikatayo ed Kristianon pibabakal nilikud ed sayan bengatla, say pansiansia ed saray puntirya na aro nen Jehova a Dios. Tutal, say aro so manunan kualidad nen Jehova. (1 Juan 4:8) Sinulat nen Pablo iray Kristiano ed Roma: “Sisiaen ko a peteg, ya anggan say patey, anggan say bilay, anggan saray angheles, anggan saray arari, anggan saray wala ed kaplesan, anggan saray wala ed arapen, anggan saray pakayari, anggan say katagey, anggan say kaaralman, anggan siopa a pinalsa, agda itayo nisian ed aro na Dios, a wala ed Kristo Jesus a Katawan tayo.” (Roma 8:38, 39) Panon tayo sirin a mansiansia ed ontan ya aro? Imanoen iray taloran kundang a gawaen tayo, unong ed si Judas.
14, 15. (a) Antoy labay ya ibaga na ipaalagey so inkasikatayo ed “sankasantosan a pananisia” tayo? (b) Panon tayon nausisa so kipapasey espiritual a kinlong tayo?
14 Unona, ibabaga nen Judas ya itultuloy tayon paalageyen so inkasikatayo ed “sankasantosan a pananisia” tayo. (Judas 20) Singa naimano tayo la’d akaunan artikulo, saya so tuloytuloy a proseso. Singa itayo bilding a mankakaukolay nagkalalon panamabiskeg sumpad mauges iran panaon. (Ikompara so Mateo 7:24, 25.) Kanian ag-itayon balot komon magmaliw a masyadon matalek. Imbes, kaukolan tayon anapey pakaalageyan tayo nipaakar ed pundasyon na pananisia tayo, ombibiskeg, lalon matoor a sundalo parad Kristo. Alimbawa, nayarin konsideraen tayoray kabiangan na espiritual a kinlong ya adeskribe ed Efeso 6:11-18.
15 Komustay kipapasen na dilin espiritual a kinlong tayo? Kasin mabisbiskeg so “kinlong na pananisia” tayo a singa nepeg a pagmaliwan to? Diad inengneng tayo ed agano niran taon, wala tay napapatnagan tayoran pigaran nibabaliwala, a singa say agtanton pakapipiaral, pakakabawasay seseg parad ministeryo, odino naaandi lay entusiasmo parad personal a panagaral? Saratan a sinyales so peligroso! Kaukolan tayoy onkiwas la natan ta pian napaalagey tan napabiskeg tayoy inkasikatayo diad katuaan.—1 Timoteo 4:15; 2 Timoteo 4:2; Hebreos 10:24, 25.
16. Antoy labay ya ibaga na panpikasi ed masanton espiritu, tan antoy sakey a bengatlan kaukolan tayon lanang a kerewen ed si Jehova?
16 Say komaduan dalan a pakapansiasia ed panangaro na Dios et say pantultuloy a ‘panpikasi ed espiritu santo.’ (Judas 20) Labay ton ibaga et manpikasi ed silong na impluensia na espiritu nen Jehova tan mitunosan ed apuyanay-espiritun Salita to. Say pikakasi so makanakanan paraan ed personal a kiapit ed si Jehova tan diad pangibalikas na debosyon tayo’d sikato. Agtayon balot papaulyanan iyan makapakelaw a pribilihyo! Tan sano manpikasi tayo, nayarin kerewen tayo—diad tua, tuloytuloy ya onkerew—na masanton espiritu. (Lucas 11:13) Satan so sankabiskegan a puersan niwala’d sikatayo. Tekep na ontan a tulong, lawas tayon makapansiansia ed panangaro na Dios tan makapananos bilang sundalo nen Kristo.
17. (a) Akin a say alimbawa nen Judas nipaakar ed panangasi so ontanlan makatantanda? (b) Panon a nitultuloy na balang sakey ed sikatayon nipanengneng so panangasi?
17 Komatlo, papasesegen itayo nen Judas a mantultuloy a mangipanengneng na panangasi. (Judas 22) Say mismon alimbawa to ed sayan pamaakaran so makatantanda. Tutal, makatunongan labat a naapektoan lapud kaugsan, imoralidad, tan apostasyan onloloob ed Kristianon kongregasyon. Anggaman kuan, agto nampatalona’d pakataranta, ya aawatey kaisipan a say tiempo et singano agmarakep a tuloy ed pangipanengneng na ontan a “mapalna” a kualidad a singa say panangasi. Andi, pinaseseg toray agagi a mantultuloy a mangipanengneng na panangasi kapiganman a posibli, a mikatunongan ed saramay walaay panduaruwa tan ‘samsamen [ni ingen] manlapud apuy’ iramay dawitdawit ya asingger la’d seryoson pankasalanan. (Judas 23; Galacia 6:1) Agaylan abig a pananimbawa parad mamatatken ed sarayan magulon panaon! Pambabanikelan da met ya ipanengneng so panangasi kapiganman a walay basiyan ed satan, bangta siansian mapekder sano nakakaukolan. Labay tayon amin met ya ipanengneng so panangasi ed sakey tan sakey. Alimbawa, imbes ya em-eman iray syodot ed angkekelag a bengatla, nayarin tayon magmaliw a mabunlok ed panamerdona tayo.—Colosas 3:13.
18. Panon tayon naseguroy panbiktorya ed espiritual a pibabakal tayo?
18 Talagan mairap so pibabakalan tayo. Singa inkuan la nen Judas, satan so “impasyan pibabakal.” (Judas 3, NW) Mabiskeg iray kabusol tayo. Aliwa lambengat a si Satanas noagta say marelmeng a mundo to pati say mismon agtayo inkayadyari so akapuntirya sumpad sikatayo. Ingen, naseguro tayo so sigpot a panbiktorya! Akin? Lapud wala itayo’d dapag nen Jehova. Sinampotan nen Judas so sulat to tekep na sakey a panonot a si Jehova so makanepegan a pangipaarapay “gloria, katagyan, uley, tan pakayari, ed arapey ami panaon, natan tan lawas ed ando lan ando.” (Judas 25) Agta satan so makapakelkelaw a kanonotan? Wala ta ni so kuestion, sirin, a sayan lanlamang a Dios et “makapanyari a mantalima ed sikayo ed kigagapol”? (Judas 24) Maseguron anggapo la! Komon ta determinado so balang sakey ed sikatayo a mantultuloy a resistiay imoralidad, a respetoey niletneg na Dios ya autoridad, tan pansiansiaey inkasikatayo ed panangaro na Dios. Diad ontan et napanggayagaan tayoy paniiba ed maglorian panbiktorya.
[Paimano ed leksab]
a Ipipilit na pigaran managsukimat ya angaon si Judas manlapud apokripal a Book of Enoch. Balet, kuan nen R. C. H. Lenski: “Tinepet mi: ‘Antoy lapuan na sayan pinantetekep a palapagan, say Book of Enoch?’ Sayan libro et pinan-aaruman, tan anggapoy makaseguro ed saray petsa na nanduruman parti to . . . ; anggapoy makaseguro no arum ed saray balikas to, anganko et ag-inaon a mismo ed si Judas.”
Tepetepet Parad Repaso
◻ Panon itayon nibabangat na sulat nen Judas a resistiay imoralidad?
◻ Akin ya ontanlan importanti a respetoey madibinon niletneg ya autoridad?
◻ Anto tay seryoso nipaakar ed aliwan panangusar na autoridad ed kongregasyon?
◻ Panon tayon nakimeyan so pansiansia ed panangaro na Dios?
[Litrato ed pahina 15]
Aliwan singa saray Romanon sundalo, espiritual a pibabakal so pibibiangan na Kristianos
[Litrato ed pahina 18]
Manlilingkor iray Kristianon pastol, aliwan lapud sinisiblet, noagta lapud aro