Say Dalin—Akin a Wadia Iya?

Walay tepet a nepeg mon konsideraen: Kasin pinawala na intelihentin Manamalsa so marakdakep a planeta a walaan na gagala ed dalin tan ed totoon manaayam ed satan? Say panresolbi’d satan ya isyu diad kapenek mo so ontulong ed sikan talosan no antoy itatarya na arapen parad planeta tayo.

DAKEL a sientistan pirmin nanaaral nipaakar ed uniberso tan ed dalin tayo so akanengneng la na saray ebidensia a mangipapaimano ed kiwawala na sakey a Manamalsa, a say Dios so walad benegan to. Konsideraen iray inkomento na sakey labat:

Insulat nen Propesor Paul Davies ed The Mind of God: “Say inkiwalay sakey a mauksoy, mitunosan ya uniberso a walaan na maligen, organisado, komplikadon inkasangal so mankakaukolan na saray ley tan kondisyon ed nikaduman tuloy a nengneng.”

Kayari impaningbat ed pigaran “inkibanbana” a naimano na saray astrophysicist tan arum ni, inkuan nen Propesor Davies: “No konsideraen irayan amin, itarok day makapadinayew a paneknek a say bilay unong ed pakaamta tayo et mandedependi’d pakaapekton maong ed inkatibukel na saray ley ed pisika, tan ed pigaran ompapatnag ya inkibanbana ed saray aktual a nipabtang a kuantidad ta apili la na eksternal a mundo parad nanduruman angkekelag a bengatla, saray biskeg na puersa, tan arum nira. . . . Magenap lay panalambit a, no Dios itayo, tan pilien iray bengatla ed saraya diad panamegley na pangiyasigta ed tugyop na agaradera, naimano tayon ngalngalin amin ya alasir na agaradera so manggawa’d uniberso ya agnapanayaman. Diad arum a kaso et ompapatnag a singano say nanduruman agaradera et kaukolan a nipetek a maong ed pirmin inka-eksakto ta pian say uniberso et magmaliw ya ontan pian ombulaslas so bilay. . . . Say bengatla ya anggan say samet a kauman ed kikukurang na bengabengatla et nayarin manggawa’d uniberso ya agnaimano na katooan so talagan sakey a katuaan na aralem a kabaliksan.”

Say ipapakabaliksan na saratan a nalmoan ed tagey ed dakel et say planeta tayo, pati arum ed uniberso, so pinawala na walay gagalan Manamalsa. No ontan, kaukolan tayon amtaen nin unona no akin a pinorma toy dalin. Kaukolan tayo met a seguroen, no nayarian tayo, so gagala to’d sayan dalin. Nisengeg ed saya et ompapatnag so nikaduman anomalya. Anggaman ed malaknab ya inkabantog na ateismo, siansian manisia so dakerakel a totoo ed intelihentin Manamalsa. Kaslakan a relihyon ed Kakristianoan so manutukoy ed makapanyarin-amin a Dios tan Manamalsa ed uniberso tayo. Ingen, mataltalag ed dinanman ed sarayan relihyon so manasaglawi tekep na talek tan kombiksion nipaakar ed arapen na dalin diad gagala na Dios.

Antoy Ibabaga na Biblia?

Makatunongan so ontupleg ed sakey a lapuan na impormasyon a malaknab lan aaksobien bilang nanlapud Manamalsa. Satan a lapuan et say Biblia. Sakey ed sankasimplian tan sankalinewan iran balikas to nipaakar ed arapen na dalin tayo so naromog diad Eclesiastes 1:4. Nabasa tayo: “Sakey a kailalakan so onlabas, tan sananey a kailalakan so onsabi: balet say dalin mansiansia lawas.” (King James Version) Diretsaay pangipapaliwawa na Biblia no akin a pinalsa nen Jehova a Dios so dalin. Ipapanengneng to met ya impasen to itan ed dugarugan posisyon ed uniberso tan mitunosan ed banwa tayo pian nasustini so bilay ditan. Pinuyanan na Makapanyarin-amin a Dios so kadaanan a propetan Isaias a mangisulat: “Onia so kuan nen Jehova ya amalsa ed saray tawen, say Dios ya anibukel tan nanggawa na dalin, sikato ya angiletneg ed sikato tan sikato so pinalsa to ya aliwa a kibalatar, a tinibukel to ta pian sikato so panayaman: ‘Siak si Jehova, et anggapo la so sananey.’”​—Isaias 45:18.

Balet panon to iramay papawalaen na too iran paraan pian deralen so amin a bilay ed dalin? Diad agnaparengan a kakabatan to, iyaabawag na Dios a sikatoy onsalet sakbay a deralen na katooan so amin a bilay ed planeta tayo. Imanoen pa iyan manamaseguron sipan ed unor a libro na Biblia, say Apocalipsis: “Sinmanok so saray nasyon, tan say sanok mo sinmabi la, tan say panaon na saray inatey pian sikara so naukom, tan pian iter mo so tumang ed saray aripen mo a propetas, tan saray sasantos, tan saray antakot ed ngaran mo, ed saray angkekelag tan saray angkakabaleg; tan pian bagbagen mo so saray mamagbag ed dalin.”​—Apocalipsis 11:18.

Ipaparungtal nen Jehova ed sikatayo so orihinal a gagala to diad impamalsa’d dalin, sayan mablin-bato ed liwang, a singa impaneskribe na sakey ya astronaut a niliber toy dalin. Ginagala na Dios a pagmaliwen itan a sankagloboan a paraiso, magayagan namakmakan na totoo​—lalaki tan bibii​—amin so manayam ed kareenan tan pantutunosan. Inyareglo toy panmakmak ed planeta a kalkalna diad impangiyabuloy ed inmunan sankaparis a too a mananak. Parad panliket tan panggayaga na inmunan sanasawa, ginawa nen Jehova so melag a parti na dalin a paraiso. Legan a mantultuloy so panagparakel na atooan a pamilya ed ilabas na taotaon tan siglos, say harden na Eden so kalkalna met ya onnatnat anggad nasumpal so Genesis 1:28: “Inkuan na Dios ed sikara; ‘Manbunga kayo, tan ondakel kayo, tan makmakan yo so dalin tan sikato so patuloken yo.’”

Bangta nanenengneng tayo la natan so makapaermen a kipapasen na dalin tan saray manaayam to, labay to kasin ibaga a say orihinal a gagala na Dios ed dalin et sinmaew la? Odino kasin inuman to lay gagala to tan nandesiden lapud inkabangar na katooan et abuloyan toy planeta a naderal lan intiraminti tan onggapo lamet, a singa panangibaga? Andi, makaseguro itayo ya aliwan tua iraya. Ibabaga ed sikatayo na Biblia ya antokaman a ginagala nen Jehova so nepeg a nagawa ed kaunoran, ya antokaman a denisidi to et agnaamper na siopaman odino anggan say ag-iilaloan a nagawa. Papaseguroan to itayo: “Ontan met naani so salitak ya ompaway ed sangik; sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangyakaran ko ed sikato.”​—Isaias 55:11.

Say Gagala na Dios so Abaya, Ag-balet Anguman

Diad insunggay di Adan tan Eva tan ed inkapagit da manlapud harden na Eden, mapatnag a say gagala na Dios a paraison dalin so nagawa anggano anggapo ira. Anggaman ontan, diad saman lanlamang et impatnag la nen Jehova ya arum ed anak da so mangisumpal ed orihinal a ganggan to. Tua, mankaukolan iya na panaon, dakel ni ingen a siglo, balet anggapoy pakapatnagan no kaunongan a panaon komon so nalalanor ed pangisumpal ed orihinal a ganggan anggano nantultuloy nin nambilay ira di Adan tan Eva ed inkayadyari. Say katuaan et diad sampot na Milenyon Uley nen Kristo Jesus​—masudsulok labat a sanlibon taon manlapud natan—​say Paraison kipapasen na Eden so ninatnat ed sankadalinan tan say planetan Dalin so natooan na mareen tan maliket iran kapolian na inmunan sankaparis a too. On, say abilidad nen Jehova bilang agnalingon Managgagala so niyalangon ed ando lan ando!

Insan nasumpal so makapaliket iran propesiya ya abayag lan impuyan na Dios. Maglorian nasumpal ed satan so kasulatan a singa say Isaias 11:6-9: “Say lobo miayam naani ed kordero, tan say leopardo miakdol naani ed kanding; et say kilaw na baka tan kilaw na leon tan say pinataba mantitipon ira; et sakey a melag ya ugaw so mangitonton ed sikara. Et say baka tan say oso mankabkab ira naani; saray kilaw da ondukol ira a mantitipon; et say leon mangan naani na dayami a singa say baka. Et say mansoso ya ugaw manggalaw naani ed abot na uleg ya aspid, tan say pinakso ya ugaw ikaot to naani lima to ed balaong na tadioko. Ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, singa saray danum sakbongan da so dayat.”

Say maletey a bunigas tan makapatey a sakisakit so magmaliw a bengatla ed apalabas, a singa met say patey mismo. Wala ta ni mas malinew nen say sarayan simplin salita a naromog diad unor a libro na Biblia? “[Say] tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da. Tan punasen to so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot; ta saray ona a bengatla sikara so linmabas la.”​—Apocalipsis 21:3, 4.

On, makapankompiyansa itayo​—say marakdakep a planeta tayon Dalin so mansiansia. Komon ta magmaliw a pribilihyom so pakaliktar ed anggaan na sayan sistema na bengabengatla, a pati amin ya agagamil a manederal ed dalin. Say malinis a balon mundo a gawaen na Dios so asingsingger la natan. Tan dakel ya inad-aro so ombangon manlapud patey diad mamilagron kikioli. (Juan 5:28, 29) Peteg, sayan dalin tayo so mansiansia, tan makapansiansia tayo ditan tan panggayagaan itan.