Siansia​—Inkahustisya Parad Amin

“Panggunaetan min talinengey balo iran paraan . . . iray bosis na alames, iray bosis na mapaga, iray bosis na naandiay ilalon dengelen. . . . Say natitilak et say pangagamil ed nisulat la ed ley: pian naseguro a siansia a no panon ya amin et nianak a pare-pareho ed kagalangan ed imaton na Dios, amin et nianak a pare-pareho ed kagalangan ed imaton na too.”​—U.S. President Richard Milhous Nixon, paliwawa ed inagurasyon, Enero 20, 1969.

SANO saray arari, presidenti, tan prime minister so nipuesto, labalabay dan tongtongey inkahustisya. Sakey lay Richard Nixon, datin presidenti na Estados Unidos. Balet saray maabig iran talumpati to so anggapoy kana sano moriaen ed anggapoy dadapagan ya awaran. Anggaman insipan to so ‘pangagamil ed ley,’ si Nixon so diad saginonor et nalmoan a nankasalanan na insunggay ed ley tan pinaskar a mangikban ed posisyon to. Taloran dekada ed saginonor, ‘saray alames, mapaga, tan naandiay ilalon bosis’ so siansian onkekelyaw a dengelen komon.

Say pandengel ed ontan iran bosis tan pideneng ed saray ey-ey da so agmainomay a kimey, singa naroromogan na dakerakel a walaay maong ya intension iran lider. ‘Say inkahustisya parad amin’ so apaneknekan lan agnakapet a kalat. Anggaman kuan, dakel lan sigloy apalabas, ginaway sakey a sipan a makanepegay imano tayo​—nikadkaduman sipan nipaakar ed inkahustisya.

Diad panamegley nen propeta ton Isaias, pinaseguroan na Dios so totoo To a mangibaki ed sikara na sakey ya “aripen” a pilien ton mismo. “Inyan ko so espirituk ed sikato,” inkuan nen Jehova ed sikara. “Sikato yakar to naani inkatunong ed saray Gentil.” (Isaias 42:1-3) Anggapoy toon manuley a makakpel a manggaway ontan a malaknab a deklarasyon, sakey a mankabaliksay magnayon ya inkahustisya ed amin a nasyon. Kasin napanmatalkan iyan sipan? Nagawaan ta ni ontan ya ekstra-ordinaryon kimey?

Sipan a Napanmatalkan Tayo

Say sipan et napanmatalkan labat no napanmatalkan so angisipan ed satan. Diad sayan kaso, anggapo lay arum noag say Makapanyarin-amin a Dios a mangiyaabawag a say “aripen” to so mangiletneg na inkahustisya ed sankamundoan. Aliwan singa saray politiko, ag-ibabaliwala nen Jehova iray sipan. ‘Agnayari a mantila so Dios,’ so ipapaseguro’d sikatayo na Biblia. (Hebreos 6:18) “No antoy ginetmak a gawaen nasumpal,” so maranet ya indeklara na Dios.​—Isaias 14:24, Today’s English Version.

Say kompiyansa tayo ed satan a sipan so pinaletan met na rekord na pinili na Dios ya “aripen,” si Jesu-Kristo. Samay mangiletneg na inkahustisya so nepeg a mangaro ed inkahustisya tan manbilay unong ed satan. Angitilak si Jesus na ag-amatikan a rekord bilang too ya ‘angaro ed inkatunong tan amusol ed kaugsan.’ (Hebreos 1:9) Say imbaga to, impanbilay to, tan anggan say impatey to, amin iratan so amaneknek a sikatoy talagan maptek a too. Diad impatey nen Jesus, sakey ya opisyal na sundaloy Roma, a mapatnag ya akatasi ed impanbista tan impamatey ed si Jesus, so apakiwas a mangibagan: “Petepeteg sayan too matunong.”​—Lucas 23:47.

Likud ed matunong ya impanbilay ton mismo, niresistian nen Jesus so ag-inkahustisya a kasmak a tuloy ed agew to. Ginawa to iya, aliwan diad panangigeba odino rebolusyon, noagta diad impangibangat na tuan inkahustisya ed amin ya ontalineng ed sikato. Say Sermon to’d Palandey so sakey ya inkalarinon panangipaliwawa ed no panon a say tuan inkahustisya tan inkatunong so kaukolan a naagamil.​—Mateo, kapitulo 5-7.

Inagamil nen Jesus so impulong to. Agto minelmelag so napapairap iran akating, saray “agnadiwit” na Judion sosyedad. Imbes, akitongtongan tora, pinupuyok tora, tan pinapaabig to nira ingen. (Marcos 1:40-42) Amin a totoon nabet to, pati saray pobri tan nalalames, so importanti’d sikato. (Mateo 9:36) “Dago kayo’d siak, amin yon nasasagpotan tan nabebelatan, et itdan ta kayoy pampainawa,” inkuanto’d sikara.​—Mateo 11:28.

Nagkalalo ed amin, ag-inabuloyan nen Jesus so ag-inkahustisya ed kaliber-liber to a mangimpluensia odino mamaingongot ed sikato. Agbalot binmales na mauges ed mauges. (1 Pedro 2:22, 23) Anggan sanen manasagmak na pirmin ot-ot, impikasi to’d mangatatawen ya Ama to iray mismon sundalon angipasak ed sikato. ‘Ama, perdonam ira,’ so iney-ey to, ‘ta agda amta so gagawaen da.’ (Lucas 23:34) Petepeteg, si Jesus ‘impakabat to ed saray Gentil so inkahustisya.’ (Mateo 12:18) Anto nin babaleg a prueba so walad sikatayo ed pilalek na Dios a mangiletneg na maptek a mundo nen say mabilay ya alimbawa na Anak ton dili?

Natalonaan so Ag-inkahustisya

Say mabilay a prueban natalonaan so ag-inkahustisya so wala met ed mundo natan. Bilang indibidual tan bilang organisasyon, pambabanikelan na Tastasi nen Jehova a talonaan so panangidumaduma, panangibiig, rasismo, tan karawalan. Konsideraen pay onggendan ya alimbawa.

Panisiaan nen Pedroa a say manangigeban kiwas so mogmon paraan pian nitarok so inkahustisya ed Basque Country, say rehyon na España a panaayaman to. Diad sayan gagala et sikatoy nagmaliw a membro na teroristan organisasyon ya angipasal ed sikato ed pan-militar diad Pransya. Bektan asumpal so inkipasal to, sikatoy ginanggan a mamorma na teroristan yunit tan pasabogen iray barrack na polisya. Ipaparaan la na grupo to iray panagpasabog sanen sikatoy inaresto na polis. Sikatoy aprison 18 bulan, balet anggan diad loob na selda et intultuloy toy mapolitikan aktibidad to, akibiang ed hunger strikes tan sinasalger toray ngalongaloan to ed aminsan ya inkagawa.

Panisiaan nen Pedro ya ilalaban toy inkahustisya. Insan akabatan toy Jehova tan saray gagala to. Legan ya apriso si Pedro, say akulaw to so impaiyaralan na Biblia ed Tastasi nen Jehova, tan sanen nibulos, inimbitaan nen akulaw to ya onatendi ed sakey ed saray miting da. Nanggayagaan ton maong so okasyon a nampaiyaralan na Biblia, panagaral ya angitonton ed sikaton anguman a tuloy ed panmoria to tan ed kabibilay to. Kaunoran, nen 1989, abautismoan si Pedro tan say akulaw to.

“Pisalsalamatan koy Jehova ta agkon balot aktual ya akapatey na siopaman legan na saray taon ya inka-teroristak,” so inkuan nen Pedro. “Natan uusaren koy kampilan na espiritu na Dios, say Biblia, pian ikdan so totoo na mensahe na tuan kareenan tan inkahustisya​—say maong a balita na Panarian na Dios.” Agni abayag si Pedro, a natan et manlilingkor bilang sakey a matatken ed Tastasi nen Jehova, so binmisita ed saray mismon barrack a ginetma ton pasabogen. Natan et sikatoy linma’d man ed gagalan ipulong so mensahe na kareenan ed saray pamilyan manaayam diman.

Gagawaen na Tastasi nen Jehova irayan pananguman lapud panpirawatan day matunong a mundo. (2 Pedro 3:13) Anggaman mapetepet iran manmamatalek ed sipan na Dios a mangitarok na saya, namomoria ra ya obligasyon da met so pambilay a mitunosan ed inkahustisya. Malinew ya impanengneng la na Biblia ed sikatayo ya iilaloan itayo na Dios a gawaey biang tayo.

Panagtanem na Bukebukel na Inkatunong

Tua, sano nipaarap ed ag-inkahustisya, liknaen tayon onkiling a mangikelyaw: “Iner so kawalaan na Dios na inkatunong [“inkahustisya,” NW]?” Ontan so kelyaw na saray Judio ed agew nen Malaquias. (Malaquias 2:17) Kasin impasen na Dios a marason so reklamo ra? Diad kasunian, satan so ‘amasagpot’ ed sikato lapud, say sakey a makasengeg et sikaran mismo so akideneng a sipapalikdo ed kaasawaan dan inmaakulaw la, ya indidiborsyo ira ed angkekelag iran baraan. Imbalikas nen Jehova so kapagaan to ed saray ‘asawa na inkaugaw da, a sumpa ed sikara nanagamilan da a sililiput, anggan sikato so iba ra, tan saray asawa na sipan da.’​—Malaquias 2:14.

Makatunongan kasin nireklamo tayoy ag-inkahustisya no sikatayon mismo so onkikiwas ya agmaptek? Diad biek a dapag, no panggunaetan tayon aligen si Jesus diad pangiwaklit ed panangidumaduma tan rasismo manlapud kapusoan tayo, diad pagmaliw ya agmanangibiig tan maaro ed amin, tan diad agpangibales na mauges ed mauges, ipapanengneng tayon talagan labalabay tayoy inkahustisya.

Pian manani itayo na inkahustisya, papasesegen itayo na Biblia a ‘mantanem na bukel na inkatunong.” (Oseas 10:12) Anggan panon kamelag so nengneng to, importanti so balang personal a pambiktorya sumpad ag-inkahustisya. Singa insulat nen Martin Luther King, Jr., ed Letter From Birmingham Jail to, “say ag-inkahustisya ed inerman a pasen so makasigensigen ed inkahustisya ed amin a pasen.” Saramay ‘manaanap na inkatunong’ et totoon pipilien na Dios a manawir ed matunong a balon mundo to a magano lan onsabi.​—Sofonias 2:3.

Agtayo nipaalagey so ilalo tayo parad inkahustisya ed agmalet a pundasyon na sipasipan na too, ingen makapanmatalek itayo ed salita na maaron Manamalsa tayo. Satan no akin ya inkuan nen Jesus ed papatumbok to ya itultuloy dan ipikasi isabi na Panariay Dios. (Mateo 6:9, 10) Si Jesus, say aturon Ari ed satan a Panarian, “iliktar to so naukolan no oney-ey, say makabos met, ya anggapo so mananulong ed sikato. Sikato ilagak to so makabos tan naukolan, tan ilaban to so kamarerwa na naukolan.”​—Salmo 72:12, 13.

Malinew, agmansiansia so ag-inkahustisya. Taloen na uley nen Kristo ed intiron dalin so ag-inkahustisya diad ando lan ando, singa ipapaseguro ed sikatayo na Dios panamegley nen propeta ton Jeremias: “Onsabi so panaon sano sumpalen ko so insipan ko . . . Diad satan a panaon pilien ko bilang ari so sakey a matunong a kapolian nen David. Satan ya ari so manggawa ed no anto so duga tan maptek ed intiron dalin.”​—Jeremias 33:14, 15, TEV.

[Paimano ed leksab]