Ginawa Ra so Linawa nen Jehova

Makpel a Nantasi si Pablo ed Arap na Saray Dederlengen

SAY pandumaan na duaran lalaki so agmairap ya ibiig. Sakey so abalangetan bangta say samay sakey et akagolonggolong. Say sakey et ari; samay sakey et priso. Kayari duay taon ed prisoan, manalalagey natan si apostol Pablo ed arap na manuley na saray Judio, si Herodes Agripa II. Say ari tan say konsorte to, si Bernice, so linma “ed baleg a liket, tan linmoob ira ed panangukoman, ya inulop na koronel, tan saray mablin totoo ed baley.” (Gawa 25:23) Onia so ibabaga na sakey palapagan: “Nayarin walay piganlasus a totoon wadman.”

Say balobalon aturon gobernador, si Festo, so angiyaregloy miting. Say gobernador ya inmuna nen sikato, si Felix, so kontenton paulyan lay Pablo diad prisoan. Balet ta kinuestion nen Festo so inkalegal na saray akusasyon sumpad si Pablo. Siempre, impilit a tuloy nen Pablo so kaandi-kasalanan to a kinaukolan ton ipanon so kaso to’d si Cesar! Say kaso nen Pablo so anagyat ed inkaupapet nen Arin Agripa. “Labay ko met komon a narengel itan a too,” inkuanto. Tampol ya inyareglo nen Festo, maseguron nanumamengan to no antoy isipen na ari ed sayan nikadkaduman priso.​—Gawa 24:27–​25:22.

Diad tinmumbok ya agew, naimano nen Pablo so inkasikato a manalalagey ed arap na baleg a grupo na saray dederlengen. “Igaton koy inkasiak a mapalar . . . ta dia ed arap mo nagawaan ko so mankatunongan [ed sayan agew],” so inkuanto ed si Agripa, “laut la, ta kabat mo ya amin so saray kaugalian tan siblangan a wala ed saray Judios; kanian kerewen ko ed sika ya imanesan moak a dengelen.”​—Gawa 26:2, 3.

Say Makpel a Panangidepensa nen Pablo

Unona, imbaga nen Pablo ed si Agripa so nipaakar ed apalabas to bilang manamasegsegang na Kristianos. “Pinasoot ko ra a nansalitay ayew,” inkuanto. “Inusilan ko ra angga ed saray sananey a baley.” Intuloy nen Pablo ya isalaysay no panon ton naawat so makapabegas-bagon pasingawey a ditan et sikatoy tinepetan na apaolin Jesus: “Akin ya uusilan moak? Mairap ed sika so mangidepak na utok.”a​—Gawa 26:4-14.

Insan ginanggan nen Jesus si Saulo a mantasi ed totoo ed amin a nasyon “ed saray bengatla ya anengneng mo tan saray bengatla ya ipapayawar ko ed sika.” Insalaysay nen Pablo a panggugunaetan ton sumpalen so asainmin to. Ingen, “lapu ed saya,” inkuanto ed si Agripa, “saray Judio inerel da ak ed templo, et labay da ak warin pateyen.” Lapud nasasagyat so interes nen Agripa ed Judaismo, indanet nen Pablo a say panagtasi to et talagan manasaglawi ed “agko salitaen so antokaman ya ag-imbaga na saray propetas tan si Moises, ya onsabi” nipaakar ed ipapatey tan kioli na Mesias.​—Gawa 26:15-23.

Sinmalet si Festo. “Say karakel na kakabatan mo pagmaliwen to ka a makulangkulang!” so inkelyaw to. Inmebat si Pablo: “Aliwa ak a makulangkulang, Sankablian a Festo; noag ingen uuliten ko so saray salita a matua tan maalas.” Insan inkuan nen Pablo ed si Agripa: “Say ari amta to so sarayan bengatla, a dia ed sikato mansalita ak a mabulos; ta kabat ko ya anggapo so niamot ed sarayan bengatla dia ed sikato; ta saya ag-agawa ed sakey a sukong.”​—Gawa 26:24-26.

Insan diretsaan ya inkuan nen Pablo ed si Agripa. “Ari Agripa, manisia ka ed saray Propetas?” Andi-duaruwan amairi-iri ed si Agripa so tepet. Sakey ni, kaukolan ton mantinien so indengan to, tan say piabobon ed si Pablo et pipakna ed tinawag nen Festo a “makulangkulang.” Anganko et nalilikas toy inkamasuyat nen Agripa, inebatan nen Pablo so mismon tepet to. “Amtak a manisia ka,” inkuanto. Nansalita natan si Agripa, balet ta impansiansia toray salita ton agmisisipan. “Dia ed dagdaiset a salita nauyot moak a man-Kristiano.”​—Gawa 26:27, 28.

Sidudunong ya inusar nen Pablo so agdirektamintin balikas nen Agripa pian makapangidanet na punto. “Labay komon na Dios,” kuanto “a dia ed dagdaiset odino dia ed dakel, aliwa labat a sika noag saray amin met a manderengel ed siak natan, magmaliw kayo komon a singa siak, likud labat ed sarayan balor.”​—Gawa 26:29.

Anggapoy naimano di Agripa tan Festo ed si Pablo a makanepegay ipapatey odino kipriso. Siansia, say kerew ton niparungtal so kaso to ed si Cesar so agnakansela. Satan no akin ya inkuan nen Agripa ed si Festo: “Nayarian mo komon ya ibulos so saya a too, noag pinmanon ed Cesar.”​—Gawa 26:30-32.

Leksion Parad Sikatayo

Say metodo na panagtasi nen Pablo ed arap na saray dederlengen so mangiiter na matalonggaring ya alimbawa parad sikatayo. Diad pitotongtong ed si Arin Agripa, inagamil nen Pablo so inkamasilib. Andi-duaruwan amta toy isyu nipaakar ed kiendi Agripa tan Bernice. Say relasyon da so insesto, lapud si Bernice et peteg ya agi nen Agripa. Balet diad sayan okasyon agpinili nen Pablo so panlektyur nipaakar ed moralidad. Imbes, indanet toray punto a panpaknaan dan dua nen Agripa. Sakey ni, anggaman binangatan si Pablo na de-aral a Fariseon Gamaliel, binidbir ton si Agripa et eksperto ed Judio iran kustombre. (Gawa 22:3) Anggaman ed saray moral a kipapasen nen Agripa, nansalita si Pablo ed sikato tekep na respeto lapud walad posisyon na autoridad si Agripa.​—Roma 13:7.

Anggaman makmakpel tayon mantatasi nipaakar ed saray sisiaen tayo, agtayo kalat so pangiwalwal odino pangondena ed agmalinis iran agamil na saray dumerengel tayo. Imbes, ta pian mas mainomay dan awaten so katuaan, kaukolan tayon idanet so positibo iran aspekto na maong a balita, ya idadanet so ilalon panpaknaan tayo. Sano mitotongtong ed saramay mas panguloan odino walad autoridad, kaukolan tayon bidbiren so posisyon da. (Levitico 19:32) Diad onian paraan, naalig tayo si Pablo, a kuanto: “Nagmaliwak ya ami ganagana ed amin day totoo, ta pian dia ed ami gawa nilaban ko so saray arum.”​—1 Corinto 9:22.

[Paimano ed leksab]