Pandayew ed Dios Diad Katuaan

Pian abobonan na Dios so panagdayew, nepeg a nibase itan ed katuaan. (Juan 4:23) Ipapabidbir na Biblia iray tuan managdayew bilang kabiangan na “iglesia [“kongregasyon,” NW] na Dios a mabilay, a lusek tan sakurong na katuaan.” (1 Timoteo 3:15) Saray manugyop ed kongregasyon na Dios so aglambengat manisia ed katuaan na Salitay Dios noagta manbilay met a mitunosan ed satan tan mangidepensa ed satan, ya ipaamta itan ed sankadalinan.​—Mateo 24:14; Roma 10:9-15.

KABKABAT iray Tastasi nen Jehova lapud edukasyonal a kimey da nipaakar ed Biblia, a nagagawa natan ed masulok lan 200 a daldalin. Aaralen day Biblia tan ibabangat da itan bilang katuaan, ya aglalaokan na saray makaimpluensian pilosopiya na too. Kabisadom taray nibase’d-Biblian bangabangat da? Dakel so masuyat ya ontalineng ed Tastasi nen Jehova lapud panagpauges a sumpad sikara. Balet saray matuan-impanpuson totoo so naiimbitaan a mandeside ed inkasikara no kasin katuaan odino andi so ipupulong na Tastasi. Say ontan a makanan desisyon so nepeg ya agnibase ed dengel-dengel labat. Dakel a personal a manguusisa ed saray bangat na Tastasi nen Jehova so nagugunggunaan a tuloy.

Say Pikakabat ed Katuaan et Pagiten toy Takot

Alimbawa, nonoten pay kaso nen Eugenia. Sikatoy pinabaleg ed estrikton Katolikon sankaabungan. Say ama to so sakey ed saray angorganisa ed imbisita na papa ed Mexico nen 1979. Legan ya ombibisita ed kakaaro, akapitongtong si Eugenia ed Tastasi nen Jehova. Diad tulong da et sikatoy ginmapon mangusisan maong ed ibabaga na Biblia. Natandaan to: “Diad inmuna, pinmalaloy takot ko. Aromog koy katuaan! Balet kabaliksan na saya a maslak ed dati iran sisiaen ko et aliwa. Pati say pamilyak, kakaarok, totoon pinablik​—amin da et aliwa. Nanaaburido ak. Naynay kon tetepetay inkasiak no panoy ikiwas na pamilyak ed balon nalmoan ko. Diad inlabas na panaon tan diad tulong nen Jehova, niyarunsak so inkasiak ed sayan makapaaburidon eksperiensia. Sakey ya agew et denesidek ya ipatua ed sakey a kaaro na pamilya, sakey a propesor na teologo. Imbagak ya amin ed sikato so nipaakar ed pilalek kon naromog so katuaan. Insan inkuanto, ‘No labay mon naamtaan so katuaan, anap moray Tastasi nen Jehova.’”

Singa tinakotan la nen Eugenia, sikatoy pinataynan na pamilya to. Anggaman ontan, sikatoy intultuloy na Tastasi a tinulongan ed espiritual. Inkomento to: “Apabiskeg ak ya ontalindeg ed katuaan. Amoriak a makanan ilaban itan. Say impangabrasa na Tastasi nen Jehova ed siak so makabkabaliksan. Aliknak so panangaro ed loob na Kristianon kongregasyon. Say inyapit ed organisasyon na Dios so tinmulong ed siak a talonaan so takot pian ontalindeg a bukor.”

Nonoten so sakey nin alimbawa. Si Sabrina so binmaleg ya apasal ed regular a diskusyon na pamilya nipaakar ed Biblia. Diad tua, atibukel day sakey a porma na ‘relihyon na pamilya.’ Niyugali to lay pilimog ed saray membro na nanduruman relihyon pian iwalwal iray lingo ra. Sanen inopresian na sakey ed Tastasi nen Jehova ya iyaralan na Biblia, mabulbulos ton inawat tekep na getman paneknekan a palso iray sisiaen da. Nanonotan to: “Kayari impanaral ed loob na masulok a sakey taon, tinmakot ak ompan nabalang koy ‘katuaan ko.’ Naimanok a magmainomay ya iwalwal so panamalikdo na dakel a relihyon ya akapilimogan ko la, balet ta aliwan magmainomay natan.”

Say takot nen Sabrina so amatunda ed piaaral toy Biblia ed Tastasi nen Jehova. Balet diad saman et alikna ton nakatan ed espiritual a paraan. Deneside ton ituloy lamet so panaaral to tan diad kaunoran et inawat to iyan balon aromogan a katuaan. Inmaligwas si Sabrina anggad punton labay to lan inabang ed arum so nanaaralan to. Kinerew to ni ingen ya ibaan iray Tastasi ed panagkabkaabungan a ministeryo ra. Insalaysay nen Sabrina: “Sakbay ak a naabobonan a manpulong kaibay Tastasi nen Jehova, tinepetan ak: ‘Talaga ta’n labay moy magmaliw a sakey ed Tastasi nen Jehova?’ ‘Andi!’ so inyebat ko. Pinmalalo lamet so takot ko.” Kaunoran, kayari tuloytuloy ya iyaatendi ed amin a miting tan iimatonan so totoo na Dios tan no panon dan iyaaplika iray prinsipyo na Biblia, akapankonklusyon si Sabrina a talagan katuaan itan. Sikatoy abautismoan tan natan et sakey lan sigpot-panaon ya ebanghelisador.

Akin a Dumaruman Tuloy?

Nayarin itepet na sakey, ‘Akin a dumaruman tuloy iray bangat na Tastasi nen Jehova ed arum a relihyon?’ Say pangimanon magano ed sisiaen na Tastasi so ontulong ed sika pian natalosan a sikaray masimoon a Kristianos, maalwar iran estudyante na Biblia. Pasesegen mi kan anapen ed mismon Bibliam iray teksto ed sumaryo na manuna iran sisiaen da a nipanengneng ed tagey.

Diad pangimanon maong ed sisiaen na Tastasi nen Jehova tan ed panutumbok da’d saray bangat na Biblia, nabendisionan ka tekep na kibulos ya itatarya na katuaan. (Juan 17:17) Anggapoy rason a takotan so katuaan. Nonoten so sipan nen Jesus: “Nakabatan yo so katuaan, et say katuaan sikayo so gawaen to a bulos.”​—Juan 8:32.

[Kahon ed pahina 6]

PIGARAN MANUNAN SISIAEN NA TASTASI NEN JEHOVA

◯ Si Jehova so makapanyarin-amin a Dios. Say personal a ngaran to so nabasa ed masulok a 7,000 danay ed sankaunaan iran manuskrito na Biblia.​—Salmo 83:18.

◯ Si Jesu-Kristo so Anak na Dios, a linma’d dalin pian iter so bilay to parad sankatooan. (Juan 3:16, 17) Tutumboken na Tastasi nen Jehova iray bangat nen Jesu-Kristo unong a naromog iratan ed saray Ebanghelyo.

◯ Say ngaran a Tastasi nen Jehova so nibase’d Isaias 43:10, a kuanto: “‘Sikayo so saray tasik,’ kuan nen Jehova.”

◯ Say Panarian ya ipipikasi na totoo ed pikakasin “Ama Mi” so mangatatawen a gobierno a magano lan mangekal ed amin a kairapan tan ot-ot ed mundo pian nasumpal so Paraiso ya isisipan na Biblia.​—Isaias 9:6, 7; Daniel 2:44; Mateo 6:9, 10; Apocalipsis 21:3, 4.

◯ Siopaman a manggagawa na linaway Dios so walaan na pankanawnawan panggayagaan a magnayon iray bendision na Panarian.​—Juan 17:3; 1 Juan 2:17.

◯ Nepeg a moldien na Kristianos so walna ra diad panamegley na ibabagay Biblia. Nepeg dan panggunaetan so pagmaliw a matua, malinis a panagbilay, maabig ed moral a bilay, tan ipanengneng so aro ed kaparan too.​—Mateo 22:39; Juan 13:35; 1 Corinto 6:9, 10.

[Litrato ed pahina 5]

Ipapakabat na Tastasi nen Jehova so katuaan na Biblia ed totoo diad masulok lan 200 a daldalin