Tepetepet Manlapud Saray Managbasa
Dakel ed Tastasi nen Jehova so manseselebra ed saray anibersaryoy kasal da. Say agew na inkianak so sakey ya anibersaryo sanen niyanak ka. Kanian akin a seselebraan iray anibersaryoy kasal balet ta andi iray anibersaryoy agew na inkianak?
Diritsaan et agpa kaukolan a selebraan na sakey a Kristiano iratan a dua. Siansia, agto labay ya ibagan parparehoy kabaliksan odino nepeg a moriaen na Kristianos so unona (saray anibersaryoy kasal) a singa ed panmomoria ra ed saray selebrasyon ed agew na inkianak.
Singa nipaimano la, nibagan nampara itan ya anibersaryo lapud say “anibersaryo” et ‘tinaon a petsa a mananda ed sakey ya ebento.’ Nayarin anibersaryo itan na ed dinanman ya ebento—say agew na inka-aksidentim ed luganan, impakanengneng na eklipse na bulan, impan-swimming a kaibay pamilyam, tan arum nira. Malinew ya agpapagmaliwen na Kristianos so amin ya “anibersaryo” ya espisyal ya agew odino manponsia pian nodnonoten itan. Kaukolan ya isipen na sakey iray aspekto na ebento insan desidien no antoy matukoy.
Alimbawa, espisipikon binilin na Dios iray Israelita a tinaon a selebraan so agew sanen say anghel to so linmabas ed saray kaabungan na Israelitas diad Ehipto tan say resultan intaynan na totoo to nen 1513 K.K.P. (Exodo 12:14) Sanen saray Judio, pati si Jesus, so sinmublay a nannodnonot ed anibersaryo na saman ya ebento, saman so katutulok ed panangiwanwan na Dios, tan agda ginawa iman tekep na ponsia odino pan-iiteray regalo. Imbilang met na saray Judio so inkidedika lamet na templo bilang espisyal ya anibersaryo. Anggaman say pannodnonot ed sayan maawaran ya ebento so agniganggan ed Biblia, isusuheri na Juan 10:22, 23 ya agbinalaw nen Jesus so panselebra’d satan. Diad kaunoran, wala so nikaduman pantitipon na saray Kristiano ed anibersaryo na impatey nen Jesus. Siempre, saya so ginawa lapud katutulok ed malinew a ganggan a naromog ed Salitay Dios.—Lucas 22:19, 20.
Komusta balet so nipaakar ed saray anibersaryoy kasal? Diad arum a daldalin et kaslakan parad sanasawa a nodnonoten so anibersaryoy impankasal da, sakey ya uksoyan ya inggapo na Dios. (Genesis 2:18-24; Mateo 19:4-6) Petepeteg, ag-ipapasen na Biblia a makapuy so panangasawa. Inmatendi si Jesus ed selebrasyoy kasal tan tinmulong parad panliket ed okasyon.—Juan 2:1-11.
Sirin diad anibersaryo na kasal da, agpankelawan no labay na sanasawan nodnonoten so inkagayaga na saman ya ebento tan ed determinasyon dan mantulongan ed italona ra bilang sanasawa. Akauley lara no selebraan da iyan maliket ya okasyon a sikara labat a dua, bilang sanasawa, odino kaiba daray pigaran kakanayon odino maapit a kakaaro. Say okasyon so agnepeg a pangibaraanay baleg a sosyal a pantitipon. Diad sayan okasyon et labayen na Kristianos a paigiya ed saray prinsipyo ya onaaplika ed inagew-agew a kabibilay da. Kanian balanglan labayen na sakey a nodnonoten so anibersaryoy kasal odino andi et personal a pamaakaran.—Roma 13:13, 14.
Komusta balet so espisyal a pannodnonot ed agew na inkianak? Wala tay antokaman a pakapatnagan tayo ed Biblia nipaakar ed ontan ya anibersaryo?
Bueno, diad kagapo na sayan siglo, saray Estudyante na Biblia, bilang tawag ed Tastasi nen Jehova nensaman, so nanselebra ed agew na inkianak. Dakel ed sikara so angilista ed saraya diad angkelag iran libron tinawag a Daily Heavenly Manna. Lugan na saraya so teksto ed Biblia parad kada agew, tan dakel a Kristianos so angipeket na melag a litrato ed saray pahinan mipetekan ed saray agew na inkianak na saray kaparan Estudyante na Biblia. Ontan met, say The Watch Tower na Pebrero 15, 1909, inkuanton diad samay kombension ed Jacksonville, Florida, E.U.A., inwanwan day Brother Russell, say presidenti na Sosyedad ed saman, ed plataporma. Akin? Sikatoy naikdan na surprisan regalo ed agew na inkianak to a pigaran kahon na lukban, pinya, tan kahil. Satan so mangipanonot ed sikatayo ed datin ag-agamil. Pian napankokonektaanen iray pamaakaran, nonoten a legan na saman a peryodo, saray Estudyante na Biblia so nannodnonot met ed Disyembre 25 bilang say anibersaryoy inkianak nen Jesus, odino agew na inkianak. Akaugalian ni ingen so pangiparaay pangdem ed Krismas diad saray hedkuarter na Brooklyn.
Siempre, nanlapulad saman et ombubulaslas so totoo na Dios ed espiritual a paraan ed dakel ya aspekto. Diad dekada na 1920 say pinmalalon liwawa na katuaan so tinmulong ed sikaran natalosan so onggendan:
Agniyanak si Jesus ed Disyembre 25, petsan walaay pikonektaan ed paganon relihyon. Iwawanwan itayo na Biblia a nodnonoten so petsay impatey nen Jesus, aliwan say anibersaryo na inkianak to odino inkianak na siopaman. Say panggawa ed satan so mitunosan ed Eclesiastes 7:1 tan say bengatlan pansumpalan na bilay na matoor a too so mas importanti nen say agew na inkianak to. Anggapoy rekord na Biblia a walay siopaman a matoor a lingkor ya angiselebray agew na inkianak to. Irerekord to labat iray selebrasyoy agew na inkianak na saray pagano, ya insisiglaot iraya ed maruksan gawa. Alaen tayo pa so nanlapuan na saraman ya anibersaryo ed agew na inkianak.
Say unona et say agew na inkianak nen Faraon ed panaon nen Jose. (Genesis 40:20-23) Diad sayan pamaakaran, say artikulo nipaakar ed saray agew na inkianak ed Encyclopædia of Religion and Ethics nen Hastings kuanto: “Say kustombre na pannodnonot ed agew na inkianak so misiglaotan, ed nengneng to, ed pannodnonot ed panaon, tan, ed lugan to, tekep na pigaran manunan relihyoson prinsipyo.” Saginonor, inaon na encyclopedia si Egyptologist Sir J. Gardner Wilkinson, ya angisulat: “Balang Ehipsio so pirmin nisiglaot ed kaimportantian na agew, tan anggan ed oras ni ingen na inkianak to; tan posibli a, singa ed Persia, kada too et nginilinan toy agew na inkianak to tekep na baleg a panliliket, ya aabrasaen iray kaaro to tekep na saray panliliket na sosyedad, tan nagkalalo lan inlambak iran parungo.”
Say sakey nin asalambit ed Biblia a nanselebray agew na inkianak et si Herodes, a diad saman et pinutotay ulo si Juan a Managbautismo. (Mateo 14:6-10) Onia so iiter ya aralem a pakatalos na The International Standard Bible Encyclopedia (1979 ya edisyon): “Saray sakbay na Hellenistikon Griego so nanselebray agew na inkianak na dirios tan prominentin lalaki. Say G[riego]n genéthlia so impanawag ed sarayan selebrasyon, bangta say genésia et kabaliksan toy selebrasyon a pakanodnonotan ed agew na inkianak na inatey lan importantin too. Diad 2 Mac[abeos] 6:7 et naromog tayo so reperensia ed binulan a genéthlia nen Antiochus IV, a leleg to et saray Judio so apaskar a ‘mibiang ed saray panagbagat.’ . . . Sanen senelebraan nen Herodes so agew na inkianak to, sikatoy kinmiwas unong ed Hellenistikon kustombre; anggapoy ebidensia parad selebrasyon na saray agew na inkianak ed Israel sakbay na Hellenistikon panaon.”
Tua, saray tuan Kristiano natan so ag-alablabas a mapaga nipaakar ed saray lapuan tan posiblin kadaanan iran relihyoson pikoneksionan na kada agamil odino kustombre, balet ag-ira onkikiling a mangibaliwala ed mabitar iran pakapatnagan a wala ed Salitay Dios. Laktipen na saya a saray mogmon selebrasyoy agew na inkianak a nirekord ed Biblia et saray pagano tan nisiglaot ed saray inkaruksa. Kanian, malinew ya ipapasen na Kasulatan iray selebrasyoy agew na inkianak ed agpaborablin pikakabat, bengatlan agnepeg ya ibabaliwala na masimoon a Kristianos.
Kanian, bangta intiramintin pribadon pamaakaran no pilien na Kristianos a nodnonoten so anibersaryoy kasal da, walaray makatunongan a rason no akin ya agseselebraan na matatken ed espiritual a Kristianos iray agew na inkianak.