Saya Lay Agew na Kilalaban!

“Nia! Natan la so makanan panaon. Nia! Natan la so agew na kilalaban.”—2 CORINTO 6:2, NW.

1. Anto so kaukolan pian nawalaan na naabobonan a talindeg ed Dios tan ed si Kristo?

INGGETER la nen Jehova so agew na panangukom parad katooan. (Gawa 17:31) No magmaliw itan ya agew na panangilaban parad sikatayo, kaukolan tayon nawalaan na naabobonan a talindeg ed sikato tan ed tinuro ton Ukom, si Jesu-Kristo. (Juan 5:22) Say ontan a talindeg et kakaukolanen toy konduktan mitunosan ed Salitay Dios tan pananisian managdag ed sikatayon tulongay arum a magmaliw a tuan babangatan nen Jesus.

2. Akin a say mundo na katooan so niarawi manlapud Dios?

² Lapud atawir a kasalanan, say mundo na katooan so niarawi ed Dios. (Roma 5:12; Efeso 4:17, 18) Kanian, nagamoran lambengat na saramay pupulongan tayo so kilalaban no sikaray makapipulangan ed sikato. Impalinew iya nen apostol Pablo sanen sinulatan toray Kristiano diad Corinto. Usisaen tayo pay 2 Corinto 5:10–6:10 pian naamtaan no antoy imbaga nen Pablo nipaakar ed panangukom, pipupulangan ed Dios, tan kilalaban.

“Tatangguyoren Miray Totoo”

3. Panon so ‘panatangguyor nen Pablo ed totoo,’ tan akin a kaukolan tayon gawaen iya?

³ Insiglaot nen Pablo so panangukom ed panagpulong sanen insulat to: “Nakaukolan ya ompatnag itayo ed panangukoman nen Kristo; piano balang sakey awaten to so saray agawaan to ed laman, unong ed ginawa to, maong odino mauges. Kanian amta mi takot ed Katawan, bibilinen [“tatangguyoren,” NW] miray totoo.” (2 Corinto 5:10, 11) ‘Tinatangguyor’ na apostol ‘iray totoo’ diad impangipulong ed maong a balita. Komusta itayo balet? Lapud asingsingger ti la ed anggaan na sayan marelmeng a sistema na bengabengatla, kaukolan a mamasya tayon tangguyorey arum a gawaey nakakaukolan iran kundang pian nagamoray paborablin panangukom nen Jesus tan say abobon na Lapuan na kilalaban, si Jehova a Dios.

4, 5. (a) Akin ya agtayo ipasirayew iray agawaan tayo ed serbisyo ed si Jehova? (b) Panon a nanpasirayew si Pablo “nipaakar ed Dios”?

⁴ Anggaman nabebendisionan na Dios so ministeryo tayo, agtayo nepeg a manpasirayew. Diad Corinto, walaray ikikinon day inkasikara odino ed arum a totoo, a pansesengegay inkaapag-apag ed loob na kongregasyon. (1 Corinto 1:10-13; 3:3, 4) Tutukoyen iyan situasyon, oniay insulat nen Pablo: “Agmi imatalek lamet so inkasikami a dili ed sikayo, noag ingen itdan mi kayo na kigloria yo lapu ed sikami, pian wala so yebat yo ed saray ongloria dia ed pakanengneng, et aliwan dia ed puso. Ta anggan onkulangkulang kami; sikatoy nipaakar ed Dios: anggan makalakal kami, sikatoy nipaakar ed sikayo.” (2 Corinto 5:12, 13) Saray mapangta so ag-interesado ed pankakasakey tan espiritual a pankaabiganay kongregasyon. Labay dan ipasirayew iray palaway a pakapatnagan imbes a tulongan iray kapananisiaan a nawalaan na maong a kapusoan ed arap na Dios. Sikato no akin a binaat nen Pablo so kongregasyon tan inkuanto ed saginonor: “Say manpasirayew, manpasirayew komon ed Katawan.”​—2 Corinto 10:17.

⁵ Agta nampasirayew met si Pablo? Nayarin ontan so inisip na arum lapud imbaga to nipaakar ed inka-apostol to. Balet kaukolan toy manpasirayew “nipaakar ed Dios.” Impasirayew toray pakakualipikaan to bilang apostol, ta pian ag-ikaindan na saray taga-Corinto si Jehova. Ginawa iya nen Pablo pian ipawil ira ed Dios lapud sikaray isusuawi na saray palson apostol. (2 Corinto 11:16-21; 12:11, 12, 19-21; 13:10) Ingen, aliwa pan naynay a papasirayewan nen Pablo so amin nipaakar ed saray agawaan to.​—Uliran 21:4.

Dadagdagen Ka ta na Panangaro nen Kristo?

6. Panon a say aro nen Kristo mangapekta ed sikatayo?

⁶ Bilang sakey a tuan apostol, imbangat nen Pablo so arum nipaakar ed dondon bagat nen Jesus. Walay epekto na satan ed bilay nen Pablo, ta insulat to: “Say aro nen Kristo pasooten to kami; ta isipen mi, a no inatey so sakey lapu ed amin, sirin amin da inatey ira nensaman. Tan sikato so inatey lapud amin, pian saray manbilay ag-ira manbilay komon na andukdukey ed sikaran dili, noag dia ed saman so inatey lapu ed sikara tan inmolin binmilay lamet.” (2 Corinto 5:14, 15) Agaylan aro so impatnag nen Jesus diad impangiter toy bilay to parad sikatayo! Maseguro nepeg a magmaliw itan a managdagdag a puersa ed bilay tayo. Say otang a linawa ed si Jesus lapud bilay ya inter to nisesengeg ed sikatayo so nepeg a mamakiwas ed sikatayo ed maseseg a kimey diad pangiproklama na maong a balita na kilalaban ya intarok nen Jehova diad panamegley na inad-aron Anak to. (Juan 3:16; ikompara so Salmo 96:2.) Kasin “say aro nen Kristo” pasooten to ka a maseseg a mibiang ed panangipulong na Panarian tan panaggaway babangatan?​—Mateo 28:19, 20.

7. Antoy kabaliksan na “anggapoy amtaen a too unong ed laman”?

⁷ Diad pangusar day bilay da ed paraan a pakapatnagay otang a linawa ra ed ginawa nen Kristo ed biang da, saray alanaan so ‘agmanbibilay parad inkasikaran dili, noag dia ed [sikato].’ “Kanian,” inkuan nen Pablo, “manlapud natan tan say arapen anggapo so amta mi a too unong ed laman; anggan naamtaan mi ni si Kristo unong ed laman, natan agmi la amta.” (2 Corinto 5:16) Nepeg ya agmoriaen na Kristianos so totoo unong ed laman, anganko et mas papaboray Judios nen saray Gentil odino saray mayaman nen saray pobri. Saray alanaan et ‘anggapoy amta ra a too unong ed laman,’ ta say importanti et say espiritual a relasyon da ed saray kapananisiaan da. Saramay ‘makaamta ed Kristo unong ed laman’ et aliwan saraman lambengat so totoon akanengneng ed si Jesus sanen wadiad dalin. Anggano saramay maniilalo ed Mesias a datin say panmoria ra ed Kristo et unong ed laman labat, aliwa lan ontan so panmoria ra. Inter toy laman to bilang dondon tan apaoli bilang manangiter-bilay ya espiritu. Say arum ya inmoli ed mangatatawen a bilay so kaukolan ya ompatey ed pisikal a laman da ya agdan balot anengneng si Jesu-Kristo ed laman.​—1 Corinto 15:45, 50; 2 Corinto 5:1-5.[3]

8. Panon a ‘niwala ed Kristo’ iray indibidual?

⁸ Tutukoyen niray alanaan, inyarum nen Pablo: “No siopaman a too wala ed Kristo, sikato so sakey a balon pinalsa: saray daan a bengatla linmabas la ra; nia, nagmaliw iran balo.” (2 Corinto 5:17) Say pagmaliw a “wala ed Kristo” et kabaliksan toy panggayagaay pakapikasakey ed sikato. (Juan 17:21) Niwala iyan siglaotan ed sakey sano sikatoy iyasingger nen Jehova ed Anak to tan tagibiin itan a too tekep na masanton espiritu. Bilang tinagibi ed espiritun anak na Dios, sikato so “sakey a balon pinalsa” a walaay ilalon nakaibay Kristo diad mangatatawen a Panarian. (Juan 3:3-8; 6:44; Galacia 4:6, 7) Saratan ya alanaan a Kristiano so naikdan na engranden pribilihyo na serbisyo.

‘Mipulangan ed Dios’

9. Antoy ginawa la na Dios pian posibli pakapipulangan ed sikato?

⁹ Ontanlay pamapabor nen Jehova ed “balon pinalsa”! Kuan nen Pablo: “Ami ganagana kien na Dios, ya impipulangan to itayo ed sikaton dili, ed panamegley nen Kristo tan inter to ed sikatayo so ministeryo na pipulangan. Nepeg ya amtaen, ta say Dios wala ed Kristo a pipupulanganen to so mundo ed sikaton dili, agto la ibibilang ed sikara so saray kasalanan da, tan inmatalek to’d sikami so salita na pipulangan.” (2 Corinto 5:18, 19) Say katooan so niarawi manlapud Dios nanlapulad impankasalanan nen Adan. Balet ta inmuna la si Jehova diad maaron impangilukas to ed dalan na pipupulangan diad panamegley na bagat nen Jesus.​—Roma 5:6-12.

10. Siopay angimatalekan nen Jehova na ministeryo na pipupulangan, tan antoy ginawa ra pian nasumpal iya?

¹⁰ Inmatalek nen Jehova so ministeryo na pipupulangan ed saray alanaan, kanian naibaga nen Pablo: “Sikami ibabaki sirin nen Kristo, a singa no say Dios manpirawat ed sikayo lapu ed sikami: kerewen mi ed sikayo ed ngaran nen Kristo, a mipulangan kayo ed Dios.” (2 Corinto 5:20) Diad inmuunan panaon, manunan nibabaki iray embahador diad panaon na saray gulo pian amtaen no kasin napugeray pambabakal. (Lucas 14:31, 32) Lapud say makasalanan a mundo na katooan so niarawi ed Dios, imbaki toray alanaan ya embahador to pian ipakabat ed totoo iray kondisyon to nipaakar ed pipupulangan. Bilang manangilaman nen Kristo, mikakasi iray alanaan: “Mipulangan kayo ed Dios.” Sayan kerew et sakey a mapangasin panamaseseg a mikareenan ed Dios tan awatey kilalaban a pinagmaliw ton posibli diad panamegley nen Kristo.

11. Diad panamegley na pananisia ed dondon, siopa ed kaunoran so makagamor na matunong a talindeg ed arap na Dios?

¹¹ Amin a totoon mangagamil na pananisia ed dondon so makapipulangan ed Dios. (Juan 3:36) Oniay kuan nen Pablo: “[Si Jesus ya] ag-akaamta na kasalanan, ginawa to [Jehova] a kasalanan lapu ed sikatayo; pian magmaliw itayo a katunongan na Dios dia ed sikato.” (2 Corinto 5:21) Say ayadyarin too a Jesus so niyapay parad kasalanan na amin ya ilalak nen Adan a nibulos manlapud impakatawir ed inkamakasalanan. Nagmaliw iran ‘inkatunong na Dios’ diad panamegley nen Jesus. Sayan inkatunong, odino matunong a talindeg ed arap na Dios, so nipagamor ya unona ed saray 144,000 a kaiba nen Kriston mananawir. Legan na Sanlibon Taon na Uley to, onsabi met so pakawalaay matunong a talindeg bilang ayadyarin totoo ed saray ananak ed dalin na say Andi-anggaan ya Ama, si Jesu-Kristo. Itandoro tora ed sakey a matunong a talindeg ed inkayadyari ta pian napaneknekan met iran matoor ed Dios tan naawat so regalon andi-anggaan a bilay.​—Isaias 9:6; Apocalipsis 14:1; 20:4-6, 11-15.

‘Say Makanan Panaon’

12. Anton importantin ministeryo so susumpalen na saray embahador tan ibabaki nen Jehova?

¹² Pian nilaban, nepeg itayon onkiwas unong ed saray salita nen Pablo: “Diad pankikimey min nikasakey ed sikato [si Jehova] pikasi mi ed sikayo met ya agyo awaten so grasya na Dios ed andi kakanaan. Ta kuanto, ‘Dia ed makanan panaon dinengel ta ka, tan dia ed agew na panangilaban tinulongan ta ka: Nia, natan so makanan panaon; nia, natan so agew na panangilaban.” (2 Corinto 6:1, 2) Ag-aawaten na saray alanaan ya embahador tan ibabaki nen Jehova, say “arum a karnero,” so agkanepegan a panangasi na Ama ra pian nasaew labat so gagala to. (Juan 10:16) Diad maptek a kondukta tan maseseg a ministeryo ra ed sayan “makanan panaon,” panpipirawatan day pabor na Dios tan ipapakabat da ed saray manaayam ed dalin a saya lay “agew na panangilaban.”

13. Antoy belas na Isaias 49:8, tan panon iyan inmunan asumpal?

¹³ Inaon nen Pablo so Isaias 49:8, a pakabasaay: “Onia so kuan nen Jehova: ‘Dia ed sakey a panaon a makana inebatan taka, tan dia ed sakey ya agew na kilalaban tinulongan taka; et yagel taka naani tan iter taka naani a sakey a sipan a nipaakar ed totoo, a mamaalagey na dalin, tan ipatawir mo so saray abagbag a tawir.’” Inmunan asumpal iyan propesiya sanen nibulos iray totoo na Israel manlapud impakautibo ed Babilonia tan diad saginonor et pinmawil ed nankibalatar a binalegan dan dalin.​—Isaias 49:3, 9.

14. Panon ya asumpal so Isaias 49:8 ed biang nen Jesus?

¹⁴ Diad sakey nin pakasumpalan na propesiya nen Isaias, inter nen Jehova so “aripen” to a si Jesus bilang ‘silew na saray Gentil, pian makapagmaliw a say pangilaban na Dios so angga ed sampot na dalin.’ (Isaias 49:6, 8; ikompara so Isaias 42:1-4, 6, 7; Mateo 12:18-21.) Say “panaon a makana,” odino “makanan panaon,” so malinlinew a manutukoy ed si Jesus sanen wadia ni ed dalin. Sikatoy nampikasi, tan “inebatan” na Dios. Apaneknekan itan a “sakey ya agew na kilalaban” parad si Jesus lapud minantini to so naspot a katooran to tan sirin et “nanggawa na andi-anggaan a kilalaban ed saray amin ya ontulok ed sikato.”​—Hebreos 5:7, 9; Juan 12:27, 28.

15. Nanlapulad kapigan a saray espiritual ya Israelita et nambanikelan dan pinaneknekan a sikaray makana ed agkanepegan a panangasi na Dios, tan tekep na anton gagala?

¹⁵ Intukoy nen Pablo so Isaias 49:8 ed alanaan a Kristianos, ya ikekerew toran ‘agda aawaten so grasya na Dios ed andi kakanaan’ diad agpananap na kaabigan to legay “makanan panaon” tan ed “agew na panangilaban” ya itatarya to. Iyarum ni nen Pablo: “Nia, natan so makanan panaon; nia, natan so agew na panangilaban.” (2 Corinto 6:2) Nanlapulad Pentecostes 33 K.P., nambanikelan a pinaneknekan na saray espiritual ya Israelita a sikaray makana parad agkanepegan a panangasi na Dios ta pian say “makanan panaon” et magmaliw ya “agew na panangilaban” parad sikara.

‘Imamatalek Mi Inkasikami Bilang Ministros na Dios’

16. Diad antoran mairap a kipapasen ya inrekomenda nen Pablo so inkasikato bilang ministro na Dios?

¹⁶ Arum a totoon membro na kongregasyon ed Corinto so apaneknekan ya agmakana parad agkanepegan a panangasi na Dios. Pinauges da si Pablo diad gunaet a deraley autoridad to bilang apostol anggaman pinaliisan toy “mangiter na bengatlan kagapolan.” Talagan inrekomenda toy inkasikato bilang ministro na Dios “dia ed dakel ya anos, dia ed ermen, dia ed pankaukolan, dia ed kairapan, dia ed inkalewetlewet, dia ed inkipangawpangaw, dia ed inkagulogulo, dia ed sagsagpot, dia ed panagpuyat, dia ed panagayunal.” (2 Corinto 6:3-5) Saginonor, inkatunongan nen Pablo a no saray sumusumpa to et ministros ira, sikato so “lalo [“a matalonggaring,” NW] ni” lapud akasagmak na dakel ya inkipangaw, inkalewet, kaatapan, tan saray inkasibletan.​—2 Corinto 11:23-27.

17. (a) Diad pangipatnag na antoran kualidad a nairekomenda tayo so inkasikatayo bilang ministros na Dios? (b) Antoray “ayura na katunongan”?

¹⁷ Singa si Pablo tan saray kaiba to, nairekomenda tayo so inkasikatayo bilang ministros na Dios. Panon? “Dia ed kasimpitan,” odino kalinisan, tan diad ikiwas a mitukoyan ed suston pikakabat ed Biblia. Nairekomenda tayo so inkasikatayo “dia ed andukey a panagtepel,” siaanos a tepelay panagmaltrato odino panamasulag, tan “dia ed karunongan” legan a tutulongan tayoy arum. Sakey ni, nairekomenda tayo so inkasikatayo bilang ministro na Dios no paigiya itayo ed espiritu to, ya ipatnag so “aro a matua,” mansalitan simamatua, tan manilalo ed sikato parad biskeg a nasumpal so ministeryo. Makatantanda, apaneknekan met nen Pablo so talindeg to bilang sakey a ministro “dia ed ayura na katunongan, dia ed kawanan a lima tan dia ed kawigi.” Diad kadaanan a pambabakal, kaslakan a say nikawanan a lima so mangeegna ed kampilan bangta say nikawigin lima et sankaegnaan toy samper. Diad espiritual a pibabakal sumpad saray palson managbangat, ag-inusar nen Pablo iray ayura na makasalanan a laman—inkasilib, panagliput, panagsaol. (2 Corinto 6:6, 7; 11:12-14; Uliran 3:32) Inusar toy matunong ‘iran ayura,’ odino saray paraan, pian niyalibansay tuan panagdayew. Ontan met so nepeg tayon gawaen.

18. No ministros itayo na Dios, panon so nepeg tayon ikiwas?

¹⁸ No sikatayoy ministro na Dios, onkiwas itayo a singa ed si Pablo tan saray kakimeyan to. Onkiwas tayo bilang Kristianos balanglan narespeto tayo odino andi. Ag-itayo naamper ed panagpulong tayo lapud mauges iran balita nipaakar ed sikatayo, nisay onkinon tayo no paborabli balita nipaakar ed sikatayo. Mansalita itayo na katuaan tan agla pigan nabidbir itayo lapud maridios iran gawa. Sano niwalad makapatey a kaatapan lapud panangataki kabusol, manmatalek tayo ed si Jehova. Tan awaten tayo so disiplina tekep na pisasalamat.​—2 Corinto 6:8, 9.

19. Panon a posiblin ‘napayaman so dakel’ ed espiritual a paraan?

¹⁹ Diad impansampot na diskusyon to nipaakar ed ministeryo na pipupulangan, sinaglawi nen Pablo so inkasikato tan saray kaiba to a “singa maermen, et lawas sililiket; singa duruka, et payayamanen mi so dakel; a singa andian kami bengatla, et anggaman ontan kayarianen mi ami ganagana.” (2 Corinto 6:10) Bangta walay katunongan na saraman a ministro a manermen lapud impamairap ed sikara, sikaray maliket. Sikaray pobri ed materyal, balet ta ‘apayaman da so dakel’ diad espiritual a paraan. Diad tua, ‘kinayarian dan ami ganagana’ lapud sikaray apayaman ed espiritual nisesengeg ed pananisia ra—pati say ilalon pakapagmaliw ya ananak na Dios ed tawen. Tan walaan ira na mayaman tan maliket a bilay bilang Kristianon ministros. (Gawa 20:35) Singa sikara, ‘napayaman tayo so dakel’ diad pibiang la natan ed ministeryo na pipupulangan—diad sayan agew na kilalaban!

Manmatalek ed Panangilaban nen Jehova

20. (a) Anto so masimoon a pilalek nen Pablo, tan akin a nepeg ya anggapoy nadarak a panaon? (b) Antoy mananda ed agew na kilalaban a pambibilayan tayo la?

²⁰ Sanen insulat nen Pablo so komaduan sulat to ed Corinto nen ngalngali 55 K.P., 15 taon lambengat so natitilak parad Judion sistema na bengabengatla. Alay pankaliktan na apostol a saray Judio tan Gentil so makapipulangan ed Dios diad panamegley nen Kristo. Agew itan na kilalaban, tan nepeg ya anggapoy panaon a nadarak. Bueno, manbibilay ti la ed parehon konklusyon na sistema na bengabengatla nanlapulad 1914. Say englobon kimey na panangipulong na Panarian a nagagawa natan so pakatandaan a saya lay agew na kilalaban.

21. (a) Antoy apilin teksto parad taon 1999? (b) Antoy kaukolan tayon gawaen ed sayan agew na panangilaban?

²¹ Kaukolan a naamtaan na totoo ed amin a nasyon so nipaakar ed probisyon na Dios parad kilalaban diad panamegley nen Jesu-Kristo. Anggapo lay panaon a pangipaleen. Insulat nen Pablo: “Nia! Natan la so agew na kilalaban.” Sarayan salita ed 2 Corinto 6:2 unong ed New World Translation so magmaliw a teksto na Tastasi nen Jehova ed taon 1999. Agaylan matukoy, ta nipapaarap itayo ed bengatlan mas ni nen say inkaderal na Jerusalem tan say templo to! Maganggano la so anggaan na sayan intiron sistema na bengabengatla, a lalanoren ton amin so walad dalin. Natan la—aliwan nabuas—so panaon pian onkiwas. No panisiaan tayon betang nen Jehova so panangilaban, no sikatoy inaro tayo, tan no papablien tayo so magnayon a bilay, agtayo saewen so agkanepegan a panangasi na Dios. Tekep na impapuson pilalek ya igalang si Jehova, paneknekan tayo diad salita tan gawa a talagan panpepelengan tayo so pangibebelyaw na: “Nia! Natan so agew na panangilaban.”

Panon Yon Ebatan?

◻ Akin a say pipupulangan ed Dios so importantin tuloy?

◻ Sioparay embahador tan ibabakin mibibiang ed ministeryo na pipupulangan?

◻ Panon tayon nairekomenda so inkasikatayo bilang ministros na Dios?

◻ Antoy kabaliksan ed sika na teksto na Tastasi nen Jehova parad taon 1999?

[Saray litrato ed pahina 17]

Singa si Pablo, kasin maseseg kan manpupulong tan ontutulong ed arum a makapipulangan ed Dios?

Estados Unidos

Pransya

Côte d’Ivoire

[Litrato ed pahina 18]

Diad sayan agew na panangilaban, sakey ka ta ed saray dakerakel a makapipupulangan ed si Jehova a Dios?