Kasin ‘Niparaan Iray Pikakasim a Singa Insenso’?
“Pasabien mo [“niparaan komon,” NW] so pikakasik ed arap mo a singa insenso.”—SALMO 141:2.
1, 2. Anto so isisimbolo na panagpool na insenso?
INGGANGGAN nen Jehova a Dios so propeta ton si Moises a mangiparaay sagradon insenso ya usaren ed tabernakulo na Israel parad panagdayew. Say pormulan inter na Dios et mankaukolan na apatiran klase na masamyong a timpla. (Exodo 30:34-38) Talagan ambalbalingit itan.
2 Kinaukolan ed Ganggan a sipanan ya inawat na nasyoy Israel so panagpool na insenso ed inagew-agew. (Exodo 30:7, 8) Wala ta so nikaduman kabaliksay pangusar na insenso? On, lapud oniay inkanta na salmista: ‘Niparaan komon so pikakasik ed arap mo [Jehova a Dios] a singa insenso; tan say panangitagey ko ed limalimak a singa say bagat ed ngarem.’ (Salmo 141:2) Diad libro na Apocalipsis, deneskribe nen apostol Juan iramay walad kaliberliber na mangatatawen a trono na Dios a walaan na balitok iran yaong a napnoy insenso. ‘Tan,’ kuan na apuyanan a salaysay, ‘say insenso et sikara so pikakasi na saray sasantos.’ (Apocalipsis 5:8) Kanian, isisimbolo sirin na panagpool na ambalbalingit ya insenso so naabobonan iran pikakasi ya iyaapay na saray lingkor nen Jehova ed agew tan labi.—1 Tesalonica 3:10; Hebreos 5:7.
3. Anto so makatulong ed sikatayo pian ‘niparaan tayo iray pikakasi tayo a singa insenso ed arap na Dios’?
3 Ta pian abobonan na Dios iray pikakasi tayo, nepeg a manpikasi itayo’d sikato diad ngaran nen Jesu-Kristo. (Juan 16:23, 24) Balet panon tayon napaaligwas so kualidad na pikakasi tayo? Bueno, makatulong ed sikatayo so pangonsidera ed pigaran Makasulatan ya alimbawa pian niparaan tayo iray pikakasi tayo a singa insenso ed arap nen Jehova.—Uliran 15:8.
Iyapay Iray Pikakasin Atekepay Pananisia
4. Panon a misiglaotan so pananisia ed naabobonan a pikakasi?
4 Ta pian makasabi ed Dios iray pikakasi tayo bilang ambalbalingit ya insenso, nepeg a manpikasi itayon atekepay pananisia. (Hebreos 11:6) Sano natebek na Kristianon mamatatken ya awaten na sakey a toon mansasakit ed espiritual so Makasulatan a tulong da, say “pikakasi pananisia [ra] ilaban to so agmakayari.” (Santiago 5:15) Saray pikakasin niyapay ya atekepay pananisia so makapaliket ed mangatatawen ya Ama tayo, ontan met ed masimoon a panagaral na Salitay Dios. Impatnag na salmista so maabig ya awawey sanen inkanta ton: “Saray limalimak met itagey ko angga ed saray ganggan mo, a sikara so inad-arok, tan manumameng ak ed saray panangitontonan mo. Bangatan mo ak na maong a panangis-isip, tan kakabatan; ta sinisiak so saray ganggan mo.” (Salmo 119:48, 66) Komon ta ‘iyunat tayoray limalima tayo’ diad mapaabeban pikakasi tan agamilen so pananisia diad itulok ed saray ganggan na Dios.
5. Antoy gawaen tayo no kulang itayoy kakabatan?
5 Nayarin kulang itayoy kakabatan a nakaukolan pian natalonaan so pakakasubokan. Agtayo lagi segurado a nasusumpal la natan so partikular a propesiya na Biblia. Imbes ya abuloyan iyan mamakibangkibang ed sikatayo diad espiritual, manpikasi tayon nawalaay kakabatan. (Galacia 5:7, 8; Santiago 1:5-8) Siempre, agtayo nailaloan ya onebat so Dios ed sikatayo diad makapakelkelaw a paraan. Kaukolan tayon ipanengneng so inkasimoon na saray pikakasi tayo diad panggawa ed saray iilaloan ton gawaen na amin a totoo to. Nakaukolan ya agamilen tayo so makapabiskeg-pananisian panagaral na Kasulatan diad tulong na saray palapagan ya intarya na “matoor tan makabat ya aripen.” (Mateo 24:45-47; Josue 1:7, 8) Kaukolan ti met so onaligwas ed pikakabat diad panamegley na regular a pibibiang ed saray pantitipon na totoo na Dios.—Hebreos 10:24, 25.
6. (a) Anto so kaukolan a moriaen tayon amin nipaakar ed panaon tayo tan ed kasumpalan na saray propesiya na Biblia? (b) Niarum ni ed pangipikasi ed kapasantos na ngaran nen Jehova, anto so kaukolan tayon gawaen?
6 Natan, pambubunekan na arum a Kristiano iray personal a gegemtan tan karera ra a mangipapabitar a nalilibangan da lan wala itayo la’d “panaon na kasumpalan.” (Daniel 12:4) Matukoy ya ipikasi na saray kapananisiaan a saratan et ombiskeg odino omputel ed pananisia ra diad Makasulatan ya ebidensia a ginmapo lay kiwawala nen Kristo nen 1914 sanen sikatoy introno nen Jehova bilang mangatatawen ya Ari tan sikato lay manuuley ed leet na kakabusol to. (Salmo 110:1, 2; Mateo 24:3) Kaukolan a moriaen tayon amin a saray impasakbay lan ebento a singa say kaderal na palson relihyon—“Babilonia a Baleg”—say satanikon pangataki nen Gog na Magog ed totoo nen Jehova, tan say pangiliktar ed sikara na Dios a Makapanyarin-amin diad bakal ya Armagedon so bigbiglan ombetag tan nagawa itan ya amin diad loob na antiktikey a panat na panaon. (Apocalipsis 16:14, 16; 18:1-5; Ezequiel 38:18-23) Kanian manpikasi itayo parad tulong na Dios ta pian makapansiansia itayon aliing ed espiritual. Komon ta masimoon ya ipikasi tayon amin so kapasantos na ngaran nen Jehova, say isabi na Panarian to, tan say kagawa na linawa to diad dalin a singa met ed tawen. On, itultuloy tayo komon ya agamilen so pananisia tan ipanengneng tayon masimoon iray pikakasi tayo. (Mateo 6:9, 10) On, iyuna komon na amin a mangaaro’d si Jehova so nipaakar ed Panarian tan say inkatunong to tan nawalaay sankabalgan a pibibiang no posibli diad panangipulong na maong a balita sakbay ya onsabi so anggaan.—Mateo 6:33; 24:14.
Idayew tan Pisalamatan si Jehova
7. Anto so makapasagyat ed sika nipaakar ed pikakasi nen David a nikurit so kabiangan to diad 1 Awaran 29:10-13?
7 Sakey ya importantin paraan pian ‘niparaan iray pikakasi tayo a singa insenso’ et say pangibalikas na impapuson panangidayew tan pisasalamat ed Dios. Ontan so impikasi nen Arin David sanen sikato tan say baley na Israel so nannanagnag ed inkipaalagey na templo nen Jehova. Impikasi nen David: “Bendito ka, O Jehova, Dios nen Israel ya ateng mi, lawas ed ando lan ando. Kien mo, O Jehova, so kinabalgan, tan saray pakayari, tan say gloria; tan say palabo, tan say katageyan: ta amin a wala ed saray tawen tan dia ed dalin sikato so kien mo; kien mo so nanarian, O Jehova, tan nipatagey ka a singa ulo ed labas na amin. Nanpadpara so saray kayamanan tan galang a manlapu ed sika, tan manuley ka ed amin; et dia ed limam wala so pakayari, tan pakapanyari; et dia ed limam wala so panamabaleg, tan panamabiskeg ed amin. Natan sirin, Dios mi, misalamat kami ed sika, tan idayew mi so magloria a ngaran mo.”—1 Awaran 29:10-13.
8. (a) Antoran balikas na panangidayew ed Salmos 148 ya anggad 150 so nagkalalo lan anenyeg ed pusom? (b) No mibiang itayo ed saray sentimenton imbalikas na Salmo 27:4, anto so gawaen tayo?
8 Alay santing iran balikas na panangidayew tan pisasalamat! Nayarin aliwan marmarlas iray pikakasi tayo, balet ta nayarin impapuso iratan. Say libro na Salmos so napno na saray pikakasi na pisasalamat tan panangidayew. Naromog iray mararakep a balikas na panangidayew ed Salmos 148 anggad 150. Say pisasalamat ed Dios so nibalikas ed dakel a salmos. “Sakey a pamaakaran so kinerew ko ed Jehova,” so inkanta nen David. “A sikato so anapen ko: salanti pakapanayam ko komon ed abung nen Jehova, ed amin ya agew a pambilay ko, a mangamayo na karakpan nen Jehova, tan manbalita ed templo to.” (Salmo 27:4) Onkiwas itayo komon a mitunosan ed ontan iran pikakasi diad maseseg a pibibiang ed amin ya aktibidades na nandaragup a totoo nen Jehova. (Salmo 26:12) Say panggawa ed saya tan say inagew-agew a pandalepdep ed Salitay Dios so mangiter ed sikatayoy dakel a rason pian onasingger ed si Jehova tekep na impapuson panangidayew tan pisasalamat.
Mapaabeban Patulongan ed si Jehova
9. Panon so impanpikasi nen Arin Asa, tan anto so resulta?
9 No intiron-puso itayon manlilingkor ed si Jehova bilang Tastasi to, makapanseguro itayon dengelen toray pikakasi tayo parad tulong. (Isaias 43:10-12) Konsideraen pay Arin Asa na Juda. Napatnagan a walay kareenan ed pilimeron 10 taon na 41-taon ya uley to (977-937 K.K.P.). Insan say Juda so nilusob na sakey milyon a sundalo a walad panangimando nen Zera ya Etiope. Anggaman dagdaiset ira, inabet nen Asa tan say totoo to iray onlulusob. Balet, sakbay na pibakal da et masimoon lan nampikasi si Asa. Binidbir toy pakayari nen Jehova a mangiliktar. Diad ikekerew na tulong, oniay inkuan na ari: “Manmatalek kami ed sika, tan dia ed ngaran mo onla kami sumpa ed saya a karaklan. O Jehova, sika so Dios mi; agmo yabuloy komon a say too ontalona sumpa ed sika.” Agaway sigpot ya impanbiktorya diad impangisalba nen Jehova ed Juda nisesengeg ed matalonggaring a ngaran to. (2 Awaran 14:1-15) Balanglan iliktar itayo na Dios manlapud pakakasubokan odino pabiskegen to itayo pian nasungdoan itan, maseguron dengelen to so ikekerew tayoy tulong to.
10. No agtayo amta so gawaen tayo diad sakey a mairap a kipapasen, panon a makatulong so pikakasi nen Ari Josafat?
10 No agtayo amtay gawaen tayo diad sakey a mairap a kipapasen, makapanmatalek itayo a dengelen nen Jehova iray ikekerew tayoy tulong. Niyilustra iya ed panaon na Ari na Judea a si Josafat, a say 25-taon ya uley to et ginmapo nen 936 K.K.P. Sanen say Juda so sesesgaen na nanmumuyong a puersa na Moab, Ammon, tan mapalandey iran rehyon na Seir, oniay inyey-ey nen Josafat: “O Dios mi, agmo ra ta ukomen? Ta andian kami na pakapanyari sumpa ed saya a baleg ya ulop ya onsabi a sumpa ed sikami; agmi met amta no anto so [nepeg a] gawaen mi: balet saray mata mi wala ra ed sika.” Inebatan nen Jehova itan a mapaabeban pikakasi, ya akibakal parad Juda diad impanwetwet to’d kakabusol kanian nampapateyan ira. Bilang resulta, atalagnaw iray kabangibang a nasyon, tan tinmalona so kareenan ed Juda. (2 Awaran 20:1-30) No kulang itayoy nakaukolan a kakabatan pian talonaan so mairap a kipapasen, makapanpikasi itayon singa si Josafat: ‘Agmi amta no anto so nepeg min gawaen, saray mata mi so wala ed sika, Jehova.’ Nayarin ipanonot ed sikatayo na masanton espiritu iray Makasulatan a punto a nakaukolan pian nasolbar so problema, odino nayarin tulongan itayo na Dios diad paraan ya agnarandan na kanonotay too.—Roma 8:26, 27.
11. Anto so naaralan tayo nipaakar ed pikakasi manlapud kiwkiwas nen Nehemias a misiglaotan ed bakor na Jerusalem?
11 Kaukolan a mantultuloy itayon manpikasi parad tulong na Dios. Si Nehemias so nan-agogol, nannangis, nanayunal, tan nampikasi ed loob na pigaran agew nipaakar ed ageray a bakor na Jerusalem tan ed pakaskasin kipapasen na saray manaayam ed Juda. (Nehemias 1:1-11) Mapatnag ya akasabi iray pikakasi to ed Dios a singa ambalbalingit ya insenso. Ta sakey ya agew et tinepetan nen Arin Artajerjes na Persia so mabeleng a Nehemias: “Anto so kerewen mo?” “Dia ed ontan,” inkurit nen Nehemias, “akikasi ak ed Dios ed tawen.” Naebatan itan ya antikey tan mareen a pikakasi, lapud naabuloyan si Nehemias a manumpal ed pilalek na puso to diad iyakar ed Jerusalem pian ipaalagey lamet iray ageray a bakor na satan.—Nehemias 2:1-8.
Paibangat Ka’d si Jesus No Panon so Manpikasi
12. Diad dilin salitam, panon mon segeken iray manunan punto na modelon pikakasi nen Jesus?
12 Diad amin a pikakasin nikurit ed Kasulatan, say nagkalalo lan pakaaralan et say modelon pikakasin impresenta nen Jesus bilang ambalbalingit ya insenso. Oniay ibabaga na Ebanghelyo nen Lucas: “Inkuan ed sikato na sakey ed saray babangatan [nen Jesus], Katawan, ibangat mo kami a mikasi, unong met na impangibangat nen Juan ed saray babangatan to. Et inkuan to ed sikara, ‘No mikasi kayo, kuan yo, “Ama, nagalang komon so ngaran mo. Onsabi komon so panarian mo. Iter mo ed sikami komon ya agew-agew so kanen mi ya inagew-agew [“unong ed pankaukolan mi’d satan ya agew,” NW]. Tan paandien mo ed sikami so saray kasalanan mi; ta sikami met paandien mi so balang sakey ya akaotang ed sikami. Tan agmo kami yakar ed katukso.” (Lucas 11:1-4; Mateo 6:9-13) Konsideraen tayo pa iyan pikakasi, ya agginetman ulit-uliten noagta niganan pinagkagiya.
13. Panon mon ipaliwawa so kabaliksan na saray salitan, ‘Ama, napasantos komon so ngaran mo’?
13 “Ama, nagalang [“napasantos,” NW] komon so ngaran mo.” Say panawag ed si Jehova ya Ama so nikaduman pribilihyo na dedikado iran lingkor to. Singa ananak a mabulos ya onasingger ed mapangasin ama makasengeg ed papagaan da, kaukolan tayon ipanaon so maparanay a panagpikasi ed Dios ya atekepay dignidad tan galang. (Salmo 103:13, 14) Kaukolan a napatnagan ed saray pikakasi tayo so panagpaga nipaakar ed kapasantos na ngaran nen Jehova lapud pirawat tayon nanengneng itan a nalinisan manlapud amin a panagbalaw a nibubunton ed satan. On, labay tayon nibiig tan nitandoro so ngaran nen Jehova bilang masanto, odino sagrado.—Salmo 5:11; 63:3, 4; 148:12, 13; Ezequiel 38:23.
14. Anto so kabaliksan na panpikasi ya, “Onsabi komon so panarian mo”?
14 “Onsabi komon so panarian mo.” Say Panarian et pananguley nen Jehova a nidemostra diad panamegley na mangatatawen a Mesianikon gobierno a walad pakauley na Anak to tan saray kaiba nen Jesus a “sasanto.” (Daniel 7:13, 14, 18, 27; Apocalipsis 20:6) Magano lan “onsabi” itan sumpad amin a walad dalin ya onsusumpa ed inkasoberano na Dios, a kigalpongan na saratan. (Daniel 2:44) Diad ontan, nagawa so linawa nen Jehova ed dalin, a singa met ed tawen. (Mateo 6:10) Agaylan makapagayaga itan ed amin a pinalsan matoor a manlilingkor ed Sankatalbaan a Soberano!
15. Anto so ipapabitar na say ikerew ed si Jehova na ‘kanen mi ya agew-agew’?
15 ‘Iter mo ed sikami komon ya agew-agew so kanen mi unong ed pankaukolan mi’d satan ya agew.’ Say ikerew na tagano ed si Jehova ed “agew-agew” so mangipapanengneng ya agtayo onkekerew na dakerakel a probisyon noagta say inagew-agew lambengat a pankaukolan tayo. Anggaman manmamatalek itayo a mangitarya so Dios, mankimey itayo met tan uusaren tayoy antokaman a suston paraan a walad sikatayo ta pian nawalaan tayoy tagano tan arum nin nakaukolan. (2 Tesalonica 3:7-10) Siempre, kaukolan tayon pisalamatan so mangatatawen a Manangitarya tayo lapud napatnagan ed sarayan probisyon so aro, kakabatan, tan pakayari to.—Gawa 14:15-17.
16. Panon tayon nagamoray panamerdonay Dios?
16 “Paandien mo ed sikami so saray kasalanan mi; ta sikami met paandien mi so balang sakey ya akaotang ed sikami.” Lapud sikatayo et ag-ayadyari tan makasalanan, agtayo sigpot a nakapet iray naspot ya estandarte nen Jehova. Kanian, kaukolan tayoy manpikasi parad panamerdona to a base’d dondon bagat nen Jesus. Balet no kaliktan tayon iyaplika na “Dumerengel na pikakasi” so balor na satan a bagat ed saray kasalanan tayo, nepeg a magbabawi itayo tan mabulos ya awaten so antokaman a pananisiplina to’d sikatayo. (Salmo 65:2, NW; Roma 5:8; 6:23; Hebreos 12:4-11) Niarum ni, nailaloan tayon naperdona ti lambengat na Dios no ‘perdonaen tayo iray akaotang ed sikatayo,’ saramay mankakasalanan ed sikatayo.—Mateo 6:12, 14, 15.
17. Anto so kabaliksan na saray salitan, “Agmo kami yakar ed katukso”?
17 “Agmo kami yakar ed katukso.” No maminsan et ibabaga na Biblia a gagawaen nen Jehova iray bengatla, anta aabuloyan to lambengat iratan. (Rut 1:20, 21) Ag-itayo tutuksoen na Dios a mankasalanan. (Santiago 1:13) Saray pakatuksoan pian makagaway kaugsan so nanlapu ed Diablo, say makasalanan a laman tayo, tan sayan mundo. Si Satanas so Mananukso a mangisusuawi ed sikatayo pian makapankasalanan itayo ed Dios. (Mateo 4:3; 1 Tesalonica 3:5) No kekerewen tayon, “Agmo kami yakar ed katukso,” ikekerew tayo’d Dios ya agto aabuloyan ya onsaew itayo sano natutukso itayon ontunganga ed sikato. Sikato so mangigiya ed sikatayo kanian ag-itayo naayat tan natalonggaringan nen Satanas, ‘say mauges a sakey.’—Mateo 6:13; 1 Corinto 10:13.
Pankimeyan Iray Pikakasi Yo
18. Panon tayon napankimeyan iray pikakasi tayo parad maliket a panamaley tan bilay na pamilya?
18 Akobrian ed modelon pikakasi nen Jesus iray manunan punto, balet ta nayari tayon ipikasi so antokaman a bengatla. Alimbawa, nayari tayon ipikasi a maliket komon so panamaley tayo. Pian namantini so kasimpitan anggad pankasamento, nayari ti met ya ipikasi so pakapandangka. Balet ta pankimeyan tayo iray pikakasi tayo diad ipaliis ed imoral iran babasaen tan panligliwaan. Determinado tayo met komon a ‘miasawa lambengat unong ed Katawan.’ (1 Corinto 7:39; Deuteronomio 7:3, 4) Sano walay asawa tayo, kaukolan a pankimeyan tayo iray pikakasi tayo nipaakar ed liket diad pangiyaplika ed simbawa na Dios. Tan no walay ananak tayo, agmagenap so pangipikasin magmaliw iran matoor a lingkor nen Jehova. Nepeg a gawaen tayon amin so anggaay nayarian tayon nipurek ed kanonotan da iray katuaan a nipaakar ed Dios diad panamegley na panagaral na Biblia tan diad regular ya iyaatendi ed saray Kristianon miting a kaiba ira.—Deuteronomio 6:5-9; 31:12; Uliran 22:6.
19. Anto so kaukolan tayon gawaen no manpipikasi tayo nipaakar ed ministeryo tayo?
19 Kasin ipipikasi tayon nabendisionan so ministeryo? Onkiwas tayo sirin a mitunosan ed saratan a pikakasi diad pakawalaay makabaliksan a pibibiang diad panangipulong ed Panarian. No ipipikasi tayo so nipaakar ed saray pankanawnawan makatulong ed arum pian makapankurang ira’d basbas ya ompugta’d andi-anggaan a bilay, nakaukolan a walaan itayoy maabig a panangirekord ed saray interesado tan mabulos ya ilaktip so panangiyaral na Biblia ed eskedyul tayo. Anto no pilalek tayoy onloob ed sigpot-panaon a panagpulong bilang payunir? Gawaen tayo sirin iray pigaran kundang a mitunosan ed saray pikakasi tayo diad pamadaak tayo’d panagpulong a kimey tayo tan diad pibiang ed ministeryo a kaiba iray payunir. Say panggawa ed ontan iran kundang so mangipanengneng a mankikimey itayon mitunosan ed saray pikakasi tayo.
20. Anto so konsideraen ed ontumbok ya artikulo?
20 No matoor itayon manlilingkor ed si Jehova, makapanmatalek itayon ebatan toray pikakasi tayo a mitunosan ed linawa to. (1 Juan 5:14, 15) Maseguron agamoran tayo iray makagunggunan punto manlapud impangusisa ed pigaran pikakasi a nikurit ed Biblia. Konsideraen ed ontumbok ya artikulo so arum niran Makasulatan a panangigiya parad saramay manpipilalek a ‘mangiparaan ed pikakasi ra a singa insenso ed arap nen Jehova.’
Panon Yon Ebatan?
◻ Akin a kaukolan tayon iyapay iray pikakasi tayo ya atekepay pananisia?
◻ Anto so nepeg a betang na panangidayew tan pisasalamat diad saray pikakasi tayo?
◻ Akin a makapanmatalek itayon onkerew na tulong nen Jehova diad pikakasi?
◻ Anto so pigaran manunan punto ed modelon pikakasi?
◻ Panon tayon napankimeyan iray pikakasi tayo?
[Litrato ed pahina 12]
Singa si Arin Josafat, panapanaon a kaukolan tayon ipikasi ya: ‘Agmi amta no anto so nepeg min gawaen, saray mata mi wala ed sika, Jehova’
[Litrato ed pahina 13]
Kasin manpipikasi ka unong ed modelon pikakasi nen Jesus?